Rot Bilong Famili i Ken Stap Amamas

Wok Long Mekim Ol Samting Bilong Strongim Marit Bilong Yu

Meri i tok: “Inap sampela hap taim mi luksave olsem man bilong mi, Michael, em i no pas gut moa wantaim mi na em i no mekim gut moa long tupela pikinini bilong mipela.a Pasin bilong em i senis bihain liklik long mipela i kisim Intenet, na mi ting olsem em i mas wok long lukim ponografi. Wanpela nait taim ol pikinini i slip pinis, mi go long em na strong long em i mas tokim mi stret long samting em i mekim, na em i tokaut olsem em i bin lukluk long ponografi long Intenet. Bel bilong mi i bagarap stret. Mi no inap bilip olsem dispela samting i kamap long mi. Mi no moa trastim em. Na samting i mekim na i hatwok moa, em wanpela wanwok bilong mi i kirap soim olsem em i gat laik long mi.”

Man i tok: “I no longtaim i go pinis, meri bilong mi Maria i lukim wanpela piksa i stap long kompiuta bilong mipela na i askim mi long dispela samting. Taim mi tokaut olsem mi save lukim ponografi long Intenet, em i kros nogut tru. Mi sem pipia stret na bel bilong mi i gat tok. Mi ting olsem marit bilong mipela bai bruk.”

YU TING wanem samting i kamap long marit bilong Michael na Maria? Yu inap ting bikpela hevi bilong Michael em pasin bilong lukim ponografi. Tasol olsem Michael yet i luksave, dispela pasin i soim olsem i gat wanpela bikpela hevi moa insait long marit bilong ol​—ol i no givim bel long strongim marit bilong ol.b Taim Michael na Maria i marit nupela, ol i bin ting olsem narapela bai laikim narapela na amamas long mekim ol samting wantaim. Tasol olsem planti arapela marit, isi isi laik bilong ol long strongim marit i no strong moa na ol i no pas gut tumas.

Olsem wanem? Yu pilim olsem yu no pas gut moa wantaim poroman marit bilong yu olsem bipo? Yu gat laik long strongim dispela pasin bilong yupela long pas gut wantaim? Sapos olsem, yu mas save long bekim bilong 3-pela askim: Pasin bilong strongim na stap gut long marit i makim wanem samting? Wanem ol samting inap mekim na yu no strongim marit bilong yu? Na yu ken mekim wanem bilong strongim pasin bilong yu long stap gut long poroman marit bilong yu?

Pasin Bilong Strongim na Stap Gut Long Marit Em Wanem Samting?

Yu ting pasin bilong strongim marit na stap gut long en i makim wanem samting? Planti bai tok em samting ol marit i ting ol i mas mekim. Olsem: Ating tupela marit bai i stap gut long marit bilong ol, long wanem, ol i tingim ol pikinini bilong ol o ol i pilim olsem ol i mas stap gut long God, em Man i kamapim marit. (Stat 2:​22-​24) Tru, kain tingting olsem i gutpela na i helpim ol long taim hevi i kamap insait long marit. Tasol bilong ol i ken i stap amamas, tupela marit i no ken pilim tasol olsem ol i mas stap wantaim, nogat, ol i mas mekim sampela samting moa.

God Jehova i wokim marit bambai tupela i ken i stap amamas na bel isi. Em i laik bai man i “amamas” long meri bilong em na long meri i laikim man bilong em na pilim olsem man bilong em i laikim em olsem em i save laikim bodi bilong em yet. (Sindaun 5:18; Efesus 5:28) Bilong tupela marit i ken pas gut olsem, narapela i mas lain long bilip long narapela. Na bikpela samting tu, ol i mas kamap gutpela pren. Taim man na meri i mekim ol samting bilong narapela i ken bilip long narapela na long ol i ken kamap gutpela pren, laik bilong ol long stap gut long marit bai i go bikpela. Ol bai pas gut wantaim olsem Baibel i tok na kamap “wanpela bodi tasol.”​—Matyu 19:5.

Yumi ken tok pasin bilong strongim marit na i stap gut long en, dispela i kain olsem simen i save pasim ol brik wantaim bilong wanpela strongpela haus. I gat kain kain samting insait long simen, olsem wesan na wara samting. Na olsem tasol, i gat kain kain samting insait long pasin bilong i stap gut long marit, olsem tupela marit i save olsem em samting ol i mas mekim, narapela i bilip long narapela, na pren gut wantaim. Orait wanem samting inap mekim na marit i no strong moa?

Wanem Sampela Hatwok?

Bilong i stap gut long marit, ol marit i mas wok strong na daunim laik bilong ol yet. Dispela i makim olsem yu mas amamas long bihainim tingting bilong poroman marit bilong yu bilong amamasim em. Tasol dispela pasin bilong man i bihainim tingting bilong narapela na i no bilong em yet​—olsem em i no wokim ol disisen i bilong helpim em yet tasol​—em wanpela pasin planti man long nau i no laik bihainim. Tasol askim yu yet, ‘Ol manmeri i save tingim ol yet tasol, hamas bilong ol i stap amamas insait long marit bilong ol?’ Ating bai yu tok i no planti. Bilong wanem i olsem? Man i save tingim em yet tasol bai i no gat strongpela tingting long i stap gut long marit bilong em taim em i mas daunim sampela laik bilong em yet, na moa yet taim samting em i orait long mekim i no inap helpim em yet. Sapos tupela marit i no strongim marit, ol bai no pas gut moa wantaim, maski bipo narapela i bin laikim tru narapela.

Baibel i tokaut klia olsem marit i gat hatwok bilong en. Baibel i tok “man i marit, em i save tingting planti long ol samting bilong dispela graun. Em i laik mekim pasin meri bilong en i laikim” na “meri i marit, em i save tingting planti long ol samting bilong dispela graun. Em i laik mekim pasin man bilong en i laikim.” (1 Korin 7:​33, 34) Ol marit husat i gat pasin bilong daunim laik bilong ol yet, sampela taim ol tu i no luksave sapos poroman marit bilong ol i wari na tingting planti, o ol i no pilim ol samting poroman marit bilong ol i mekim bilong tingim ol. Taim tupela marit i no soim olsem ol i amamas long ol samting poroman i mekim, marit bilong ol bai i gat “planti hevi.”​—1 Korin 7:28.

Sapos yu laik bai marit bilong yu i stap strong long taim bilong hevi na i stap gutpela tru taim i no gat hevi, orait yu mas tingim olsem marit bilong yu i bilong stap longpela taim. Olsem wanem yu ken kisim kain tingting olsem? Na yu ken mekim wanem na bai poroman bilong yu i laik i stap gut long yu?

Rot Bilong Strongim Marit

Wanpela bikpela samting em pasin bilong bihainim ol tok i stap long Tok Bilong God, em Baibel. Sapos yu mekim olsem yu na poroman bilong yu bai “stap gut.” (Aisaia 48:17) Tingim 2-pela samting yu ken mekim.

1. Tingim olsem marit bilong yu em i bikpela samting. Aposel Pol i tok: “Skelim gut wanem ol samting i bikpela samting moa.” (Filipai 1:​10, NW) Long ai bilong God, pasin man na meri marit i mekim long narapela narapela i bikpela samting tru. God bai givim biknem long man i save givim biknem long meri bilong em. Na meri i save rispek long man bilong em “dispela kain pasin em i gutpela moa yet long ai bilong God.”​—1 Pita 3:​1-4, 7.

Marit bilong yu i bikpela samting long yu olsem wanem? Taim yu gat wanpela wok i bikpela samting, yu save lusim bikpela hap taim long en, a? Askim yu yet: ‘Long mun i go pinis, mi bin lusim hamas aua samting long i stap wantaim poroman marit bilong mi? Mi bin mekim wanem ol samting bilong poroman marit bilong mi i ken save olsem mipela i gutpela pren yet?’ Sapos yu bin lusim liklik hap taim o yu no lusim taim liklik long strongim marit bilong yu, ating poroman marit bilong yu bai i hatwok long bilip olsem yu laik stap gut long marit bilong yutupela.

Olsem wanem? Poroman marit bilong yu i ting olsem yu wok long mekim ol samting bilong strongim marit bilong yupela? Olsem wanem yu ken save long dispela?

TRAIM MEKIM OLSEM: Long wanpela pepa raitim dispela faipela samting: mani, wok, marit, ol amamas, na ol pren. Orait nau putim namba 1 i go 5 bilong makim wanem samting yu ting i bikpela samting long poroman bilong yu. Tokim poroman marit bilong yu long mekim wankain. Taim yutupela i mekim pinis, orait senisim pepa wantaim poroman. Sapos poroman marit bilong yu i pilim olsem yu no save lusim bikpela hap taim na strong bilong strongim marit bilong yupela, orait toktok wantaim em long wanem ol senis yu mas mekim bilong strongim marit bilong yupela. Na tu, askim yu yet, ‘Mi inap mekim wanem bilong tingim moa ol samting i bikpela samting long poroman bilong mi?’

2. Sakim olgeta kain pasin pamuk. Jisas i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:28) Taim wanpela i slip wantaim wanpela i no poroman marit bilong em, em i bagarapim tru marit na Baibel i tok sapos dispela kain samting i kamap, ol i ken katim marit. (Matyu 5:32) Tasol tok bilong Jisas long antap i soim olsem laik nogut inap stap longtaim pinis long bel paslain long man i mekim pasin pamuk. Sapos man i larim dispela laik nogut i stap long bel bilong em, orait em i no stap gut long poroman marit bilong em.

Bilong stap gut long marit bilong yu, yu mas wokim strongpela promis olsem yu no inap lukim ponografi. Maski ol man i mekim wanem kain tok long ponografi, ponografi i save bagarapim marit. Tingim tok wanpela meri marit i mekim long pasin bilong man bilong em long lukim ponografi: “Man bilong mi i tok pasin bilong lukim ponografi i save helpim marit bilong mipela. Tasol dispela i save mekim na mi pilim olsem mi samting nating, olsem mi tasol mi no inap long em. Taim em i lukim ol dispela piksa nogut mi save krai i go inap long mi slip.” Yu ting dispela man i wok long mekim ol samting bilong strongim marit bilong em, o em i wok long bagarapim marit? Yu ting pasin em i mekim i helpim meri bilong em long i stap gut long marit bilong ol? Yu ting em i mekim pasin i soim olsem meri bilong em i gutpela pren bilong em?

Gutpela man Jop i tokaut long pasin bilong em long stap gut long marit bilong em na long God, long rot bilong ‘mekim strongpela promis olsem em i no ken aigris long ol meri.’ (Jop 31:1) Olsem wanem yu ken bihainim pasin bilong Jop?

Yu mas sakim pasin bilong lukim ponografi, na tu, yu mas was gut long bel, nogut yu kirap laikim wanpela i no poroman marit bilong yu. Tru, planti i ting olsem pasin bilong tok gris wantaim narapela husat i no poroman marit bilong ol, dispela i no save bagarapim marit. Tasol Baibel i givim tok lukaut long yumi olsem: “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?” (Jeremaia 17:9) Olsem wanem? Bel bilong yu i bin giamanim yu? Askim yu yet: ‘Mi save tingim gut husat​—poroman marit bilong mi o narapela i no poroman marit bilong mi? Mi save tokim husat pastaim long ol gutpela samting i painim mi​—poroman marit bilong mi o narapela husat i no poroman marit bilong mi? Sapos poroman marit bilong mi i tokim mi long mi no ken pas tumas wantaim wanpela man o meri, bai mi mekim wanem? Mi bai kros o mi bai amamas long bihainim tok bilong em?’

TRAIM MEKIM OLSEM: Sapos yu pilim olsem yu kirap laikim wanpela husat i no poroman marit bilong yu, orait no ken bung tumas wantaim dispela man o meri, na sapos yu gat sampela wok samting bilong mekim wantaim em, orait mekim ol dispela samting tasol. No ken tingim ol pasin bilong dispela man o meri em yu ting i winim pasin bilong poroman marit bilong yu. Yu mas tingim ol gutpela pasin bilong poroman marit bilong yu. (Sindaun 31:29) Tingim ol samting i bin kirapim yu long laikim poroman bilong yu. Askim yu yet, ‘Poroman bilong mi i no gat moa ol dispela pasin, o mi yet i no luksave moa long ol dispela gutpela pasin bilong em?’

Go Pas Long Mekim Samting

Michael na Maria, em yumi bin kamapim tok bilong ol long kirap bilong stori, ol i askim ol arapela long givim sampela gutpela tingting long ol bilong stretim hevi bilong ol. Pasin bilong askim ol arapela long givim sampela gutpela tingting em i namba wan hap bilong wok bilong stretim hevi. Tasol taim ol i tokaut long hevi bilong ol na askim ol arapela long helpim ol, tupela wantaim i kamapim klia olsem ol i laik stap gut long marit bilong ol, na ol i laik wok strong long mekim marit bilong ol i stap gut.

Maski marit bilong yu i stap gut o yupela i gat hevi, poroman marit bilong yu i mas save olsem yu laik strongim marit na stap gut long en. Yu mas mekim olgeta samting yu inap mekim bilong kamapim klia dispela samting. Olsem wanem? Yu amamas long mekim olsem?

[Ol Futnot]

ASKIM YU YET . . .

▪ Mi ken lusim wanem ol samting na bai mi ken lusim bikpela hap taim moa bilong i stap wantaim poroman marit bilong mi?

▪ Mi inap mekim wanem na bai poroman marit bilong mi i ken save mi laik i stap gut long marit bilong mipela?

[Piksa long pes 20]

Lusim hap taim bilong stap wantaim poroman marit bilong yu

[Piksa long pes 21]

Laik nogut bilong bel i kirapim man o meri long mekim pasin pamuk