Rot Bilong Strongim Marit Bilong Yu

TINGIM wanpela haus em ol i no lukautim gut. Pen i wok long raus, kapa i bagarap, na ol i no katim gras. Win na ren samting i bin mekim na haus i no gutpela olsem bipo. Yu ting ol i mas rausim dispela haus? Nogat. Sapos pos na bun bilong en i strong yet, ol inap long stretim bek dispela haus.

Olsem wanem? Ol samting i painim dispela haus i kirapim yu long tingim marit bilong yu? Insait long ol yia i go pinis, ating ol hevi i kain olsem bikpela win na ren i bin painim marit bilong yu. Ating i gat sampela samting em yu wanpela tasol o yutupela wantaim i no mekim bilong lukautim dispela marit. Ating tingting bilong yu i wankain olsem bilong Sandy. Em i marit inap 15 yia, em i tok: “Mitupela i marit, tasol i no gat wanpela samting mipela i gat wankain laik long en. Na dispela i no gutpela.”

Maski marit bilong yu i olsem, no ken wokim tingting hariap long brukim marit. Yu inap stretim marit bilong yu. Tasol bilong dispela samting i ken kamap, yutupela i mas i gat strongpela tingting na laik long stretim na lukautim marit bilong yupela. Dispela kain tingting inap helpim marit long stap strong long taim bilong hevi. Olsem wanem Baibel inap helpim yu long kisim dispela kain tingting?

I Gat Wok Yu Mas Mekim

Dispela tok strongpela tingting na laik i makim olsem yu mas pilim olsem em wok bilong yu yet long strongim marit na bel i mas kirapim yu long mekim olsem. I kain olsem wanpela man i bin wokim kontrak long wokim wanpela haus. Ating em i no save long man i givim dispela wok long em. Tasol em i pilim olsem em i gat wok long truim dispela tok promis, i olsem wanpela wok em i mas mekim.

Tru, marit i no kain olsem wanpela bisnis kontrak, nogat, tasol dispela strongpela tingting na laik bilong yu long lukautim marit bai kirapim yu long pilim olsem em wok bilong yu yet long strongim marit bilong yu. Yu na poroman bilong yu i bin tok promis long ai bilong God na ol man olsem bai yutupela i stap wantaim, maski wanem samting i kamap. Jisas i tok: “Bipo tru taim God i wokim olgeta samting, em i wokim ol manmeri, na em i mekim ol i kamap man na meri. Na God i tok, ‘Olsem na man i save lusim papamama na i pas wantaim meri bilong en.’ ” Na Jisas i tok moa: “Samting God i pasim pinis, em man i no ken katim.” (Matyu 19:​4-6) Taim hevi i kamap, yutupela i mas i gat strongpela tingting long truim tok promis yupela i bin mekim long narapela narapela.a Wanpela meri marit i tok: “Taim mitupela i no tingting moa long katim marit, ol samting i wok long kamap gutpela.”

Tasol strongpela tingting na laik long lukautim marit bilong yu i no wanpela wok yu yet i mas mekim na em tasol, nogat. I gat wanem narapela samting?

Pasin Bilong Wok Gut Wantaim Bai Strongim Marit

Strongpela tingting na laik long lukautim marit, dispela i no makim olsem tupela marit bai wanbel long olgeta samting. Taim hevi i kamap, tupela i mas i gat strongpela laik long stretim dispela hevi, i no long wanem tupela i bin mekim tok promis long mekim olsem, nogat, tupela i mekim olsem long wanem narapela i givim bel long narapela. Jisas i tok long man na meri marit olsem: “Tupela i no i stap olsem tupela moa. Nogat. Tupela i kamap olsem wanpela bodi.”

Dispela tok kamap “wanpela bodi” wantaim poroman bilong yu i makim wanem samting? Aposel Pol i tok, “yupela man, yupela i mas laikim tru ol meri bilong yupela, olsem yupela i save laikim bodi bilong yupela yet.” (Efesus 5:​28, 29) Dispela tok “wanpela bodi” i makim olsem yu tingim tru poroman marit bilong yu olsem yu save tingim yu yet. Yu mas lusim pasin bilong tingim yu yet tasol​—⁠yu mas tingim poroman bilong yu tu. Wanpela meri i save givim tok bilong helpim ol marit em i tok: “Man na meri marit i mas lusim pasin bilong mekim ol samting olsem ol i singel, na ol i mas kirap tingting na mekim ol samting olsem man na meri i marit.”

Olsem wanem? Yu na poroman bilong yu i save “tingim na mekim ol samting olsem man na meri i marit”? Sampela i stap wantaim inap planti yia, tasol ol i no stap olsem “wanpela bodi.” Yes dispela inap kamap, tasol wanpela buk (Giving Time a Chance) i tok: “Marit i makim olsem man na meri i mas wok wantaim long mekim ol samting, na taim tupela i mekim olsem, marit bilong tupela i wok long kamap gutpela.”

Sampela em marit bilong ol i no gat amamas long en ol i save stap wantaim bilong lukautim ol pikinini bilong ol o bilong lukautim ol yet long ol samting bilong mani. Na sampela ol i stap wantaim, long wanem, ol i ting pasin bilong katim marit i gat rong long en o ol i pret long ol man bai ting olsem wanem long ol sapos ol i lusim poroman o katim marit. Tru, i gutpela ol dispela marit i no bruk, tasol bikpela samting em ol i mas wok long kamapim pasin laikim insait long marit.

Pasin Bilong Tingim Narapela Bai Strongim Marit

Baibel i tok profet olsem “long taim bilong las de” ol manmeri bai “laikim ol yet tasol.” (2 Timoti 3:​1, 2) Olsem dispela tok profet i kamapim, planti man long nau i save laikim ol yet tasol. Planti marit i pilim olsem sapos ol i mekim gutpela pasin long poroman bilong ol i no save bekim dispela gutpela pasin, dispela i makim olsem ol i no gat strong. Olsem na bilong marit i ken stap gut, tupela wantaim i mas daunim laik bilong ol yet. Olsem wanem yu ken mekim olsem?

No ken tingting oltaim long dispela askim, ‘Mi kisim wanem samting long marit bilong mi?,’ nogat; askim yu yet, ‘Mi yet mi mekim wanem samting bilong strongim marit bilong mi?’ Baibel i tok olsem ol Kristen i “no ken lukautim ol samting bilong [ol] tasol. Nogat. [Ol] wan wan i mas lukautim ol samting bilong ol arapela manmeri bilong [ol] na helpim ol long i stap gut.” (Filipai 2:⁠4) Taim yu tingim dispela stiatok bilong Baibel, orait skelim ol pasin yu bin mekim long wik i go pinis. Hamas taim yu bin mekim gutpela pasin bilong helpim poroman marit bilong yu? Taim poroman bilong yu i laik toktok, yu bin putim yau​—⁠maski yu pilim olsem yu no laik long mekim olsem? Hamas ol samting yutupela i mekim wantaim, em ol samting poroman bilong yu i laikim moa winim yu yet?

Taim yu tingim ol dispela askim, no ken tingting planti olsem taim yu mekim ol gutpela wok, poroman bilong yu bai i no luksave long en o em i no inap bekim wanpela samting long yu. Wanpela buk i tok, “long planti marit, taim wanpela i tingim poroman bilong em, dispela i save kirapim poroman long mekim olsem tu, olsem na bilong kirapim poroman long tingim yu, pastaim yu yet i mas mekim olsem.” Taim yu daunim laik bilong yu yet long mekim ol samting, dispela bai strongim marit bilong yu, long wanem, dispela i soim olsem yu tingim gut marit bilong yu na yu laik lukautim.

Tingim Olsem Marit i No Bilong Stap Sotpela Taim Tasol

God Jehova i save laikim tru pasin bilong i stap gut long narapela. Baibel i tok: “Bikpela, sapos man i no lusim yu, orait yu no save lusim em.” (2 Samuel 22:26) Bilong i stap gut long God, man na meri marit i mas stap gut insait long marit bilong ol em God i bin kamapim.​—⁠Stat 2:⁠24.

Sapos yu na poroman i stap gut long narapela narapela, bai yu pilim olsem marit bilong yupela bai i stap oltaim. Taim yu tingim sindaun bilong yu long bihain, yu tingim olsem yupela bai i stap yet wantaim. Yu no save ting olsem wanpela taim bai kamap na yutupela i no marit, nogat, na dispela i mekim yu stap bel isi na yu pas gut wantaim poroman bilong yu. Wanpela meri i tok: “Maski mi belhat long [man bilong mi], mi no tingting planti olsem marit bilong mitupela bai bruk, nogat. Mi tingting planti long olsem wanem mitupela bai stretim hevi bilong mitupela na pas gut wantaim gen. Mi save olsem bai mitupela i pas gut wantaim gen, tasol long dispela taim stret mi no save olsem wanem bai mitupela i mekim olsem.”

Pasin bilong tingim olsem marit bilong yu bai stap longpela taim, dispela bai strongim marit bilong yu. Taim kros i kamap, ating wanpela man o meri marit bai mekim kain tok olsem, “Mi bai lusim yu!” o, “Mi bai painim wanpela poroman i save tingim mi!” Planti taim ol i toktok nating tasol. Tasol Baibel i tok olsem “marasin nogut bilong kilim man i dai i pulap long maus bilong yumi.” (Jems 3:⁠8) Taim man o meri marit i mekim ol tok bilong pretim poroman bilong ol, i olsem ol i laik tok: ‘Mi no ting olsem marit bilong mitupela bai i stap oltaim. Mi ken lusim yu long wanem taim mi laik mekim olsem.’ Taim man o meri marit i kamapim kain tingting olsem long tok em i mekim, dispela inap bagarapim marit bilong ol.

Taim yu tingting olsem marit i no bilong i stap sotpela taim tasol, yu save olsem yu bai stap wantaim poroman marit bilong yu maski wanem hevi i kamap. Dispela tingting i gutpela. Em bai mekim na yutupela i no ken tingim tumas ol pasin kranki na popaia bilong narapela narapela na nau i no hatwok long lusim tingting long rong bilong narapela narapela. (Kolosi 3:13) Wanpela buk i tok: “Insait long wanpela marit i stap gut, man na meri marit inap popaia tasol dispela i no mekim na marit bilong tupela i bruk.”

Long de yu marit, yu bin mekim wanpela tok promis long poroman bilong yu, na i no long pasin bilong marit. Dispela samting i mas stiaim tingting na pasin yu bihainim olsem man o meri marit. Ating yu bai wanbel olsem yu mas stap wantaim poroman bilong yu, long wanem, yu tingim marit em i holi na tu, yu laikim dispela man o meri yu maritim.

[Futnot]

[Blok/Piksa long pes 5]

Ol Samting Yu Ken Mekim Nau

Strongpela tingting na laik bilong yu long lukautim na strongim marit bilong yu i strong olsem wanem? Ating yu luksave olsem i gat sampela samting yu mas mekim. Bilong strongim dispela tingting bilong yu, yu ken mekim ol dispela samting:

● Skelim yu yet. Askim yu yet: ‘Pasin na tingting bilong mi i makim olsem mi marit, o mi bihainim yet pasin na tingting olsem bilong taim mi stap singel?’ Painimaut tingting bilong poroman bilong yu long dispela samting.

● Ritim dispela stori wantaim poroman marit bilong yu. Long pasin isi toktok wantaim poroman bilong yu long ol rot yupela i ken bihainim bilong strongim pasin bilong yupela long stap gut long marit.

● Mekim ol samting wantaim poroman bilong yu, em ol samting bilong strongim pasin bilong i stap gut long narapela narapela. Olsem: Lukim ol poto bilong de yupela i marit na ol narapela bikpela de. Mekim ol samting yupela i bin amamas long mekim taim yupela i bin pren o long taim yupela i marit nupela yet. Stadi long ol stori bilong Baibel i stap long Wastaua na Kirap! i stori long marit.

[Blok/Piksa long pes 6]

Bilong Lukautim Marit Bilong Yu . . .

● I Gat Wok Yu Mas Mekim “Yu mas bihainim promis bilong yu. Sapos yu mekim promis . . . na yu no bihainim dispela promis, orait dispela i no gutpela pasin. Sapos yu no inap bihainim promis bilong yu, orait mobeta yu no mekim promis.”​—⁠Saveman 5:​4, 5.

● Mekim Wok Wantaim “I no gutpela long man i stap wanpis. Sapos tupela man i stap wantaim, em i gutpela. . . . Sapos wanpela i pundaun, orait narapela i ken litimapim em gen.”​—⁠Saveman 4:​9, 10.

● Daunim Laik Bilong Yu Yet “Amamas bilong man i givim samting long ol arapela man, dispela i winim amamas bilong man i kisim samting bilong em yet.”​—⁠Aposel 20:⁠35.

● Tingim Marit Olsem Em i No Bilong Stap Sotpela Taim Tasol “Man i save givim bel bilong en long ol arapela, . . . long taim bilong hevi em i save sanap strong.”​—⁠1 Korin 13:​4, 7.

[Ol Piksa long pes 7]

Taim poroman bilong yu i laik toktok, yu save putim gut yau long tok bilong em?