Pasin bilong stap gut i olsem anka i holim strong marit long taim bilong hevi
MARIT
1 Stap gut
MAKIM WANEM SAMTING
Ol maritman na maritmeri husat i stap gut long marit i tingim olsem em samting bilong i stap oltaim, na dispela i lukautim marit bilong ol. Olgeta wan wan i bilip olsem poroman marit bai stap gut long marit, maski long taim bilong hevi tu.
Sampela marit i pilim olsem ol i mas stap wantaim bikos ol pren na ol famili i no laik bai ol i divos. Tasol bikpela samting moa em pasin laikim tru na rispek i mas kirapim ol long stap gut long poroman marit.
STIATOK BILONG BAIBEL: “Maritman i no ken lusim meri bilong en.”—1 Korin 7:11.
“Sapos yu stap gut long marit bilong yu, yu no inap bel hevi kwik. Yu bai hariap long fogivim narapela na tok sori. Yu tingim ol hevi olsem samting bilong bagarapim marit, na i no bilong i stap longpela taim na kamapim divos.”—Micah.
WAI NA EM I BIKPELA SAMTING
Taim ol marit i bungim hevi, man o meri i no gat pasin bilong stap gut long narapela inap tok, ‘Mipela i no bilong marit,’ na ol i painim rot long lusim narapela.
“Planti i marit na ol i ting olsem taim ol samting i no wok gut, ol bai kisim divos. Taim ol man i gat tingting bilong divos paslain long ol i marit, kirap long taim ol i marit ol bai i no stap gut long poroman marit.”—Jean.
SAMTING YU KEN MEKIM
ASKIM YU YET
Taim hevi i kamap . . .
Yu save bel hevi olsem yu marit long dispela man o meri?
Yu save kisim tingting olsem yu laik marit long narapela man o meri?
Yu save tok olsem “Mi bai lusim yu” o “Mi bai painim wanpela husat bai amamas long mi”?
Sapos bekim bilong yu em yes long wanpela o tripela askim wantaim, orait nau yu mas strongim pasin bilong i stap gut long poroman marit.
TOKTOK WANTAIM POROMAN MARIT
Pasin bilong stap gut long poroman marit i wok long pinis? Sapos olsem, bilong wanem?
Yumi inap mekim wanem long nau bilong strongim pasin bilong pas gut wantaim?
SAMPELA ROT
Sampela taim raitim liklik nout long poroman marit olsem yu laikim em
Soim olsem yu laik stap gut long poroman marit taim yu putim piksa bilong em long tebol long ples wok
Ringim poroman marit taim yu stap long ples wok o long taim yupela i no stap wantaim
STIATOK BILONG BAIBEL: “Samting God i pasim pinis, man i no ken katim.”—Matyu 19:6.