Rot 2: Stap Gut Long Poroman
“Samting God i pasim pinis, em man i no ken katim.”—Matyu 19:6.
Mining bilong dispela. Ol marit i stap gut wantaim ol i tingim marit i bilong i stap oltaim. Taim hevi i kamap, tupela i wok strong long stretim, na ol i no ting hevi em rot bilong brukim marit. Taim tupela marit i pilim tru olsem ol i mas i stap gut long poroman, ol i stap bel isi. Narapela i bilip olsem narapela bai wok yet long stap gut long marit.
As na em i bikpela samting. Long planti samting, tingting bilong i stap gut long poroman em i samting bilong strongim tru marit. Tasol taim planti kros pait i wok long kamap, tok promis long i stap gut long marit em inap kamap olsem umben, na i no olsem wanpela gutpela samting. Tok promis ol i bin mekim, olsem ‘mipela bai stap gut wantaim i go inap long taim mipela i dai,’ i kamap olsem wanpela kontrak nating em ol i laik painim rot bilong brukim. Ating tupela i no pinisim marit tru tru, tasol ol inap ‘lusim’ poroman long ol narapela rot—olsem narapela i no toktok long narapela taim sampela bikpela hevi i kamap na ol i mas toktok wantaim bilong stretim.
Traim mekim olsem. Mekim wok long ol askim i stap daunbilo bilong skelim tingting bilong yu long pasin bilong stap gut long poroman.
◼ Taim mitupela i tok pait, mi save ting mobeta mi no bin maritim poroman bilong mi?
◼ Planti taim mi save tingting olsem mi stap wantaim wanpela i no poroman marit bilong mi?
◼ Sampela taim mi tokim poroman bilong mi, “Bai mi lusim yu,” o “Mi laik painim wanpela poroman i save tingim mi”?
Pasim tok long bel. Tingim wanpela o tupela samting yu ken mekim bilong strongim tok promis bilong i stap gut long marit bilong yu. (Olsem: Sampela taim raitim liklik pas long poroman, o long ples wok putim piksa bilong poroman, o ringim poroman long olgeta de long ples wok bilong yu bilong soim olsem yu tingim em.)
Yu ken kamapim sampela tingting olsem, na askim poroman long em i ting wanem samting i gutpela long mekim.
[Piksa long pes 4]
Tingting bilong i stap gut long poroman i olsem banis i lukautim marit na marit i no ken bagarap
[Kredit Lain]
© Corbis/age fotostock