Yu Save Long Dispela?

Long taim bilong Jisas, bilong wanem ol Juda i stap nabaut long planti hap?

Taim Jisas i tokim ol manmeri i harim tok bilong em, olsem ol i no inap go long ples em bai i go long en, ol Juda i toktok namel long ol yet olsem: “Bai em i go we . . . ? Ating em bai i go long ol wanlain bilong yumi i stap long kantri bilong ol Grik, . . . a?” (Jon 7:​32-​36) I no longtaim bihain, ol misineri Kristen i go autim gutnius namel long ol Juda i stap nabaut long ol hap bilong Mediterenian.​—Aposel 2:​5-​11; 9:2; 13:​5, 13, 14; 14:1; 16:​1-3; 17:1; 18:​12, 19; 28:​16, 17.

As na ol Juda i bin go stap nabaut long planti hap, i olsem: Ol narapela lain i bin kam daunim ol na rausim ol long kantri bilong ol​—namba wan lain i rausim ol em ol Asiria long 740 B.C.E., na bihain, ol Babilon long 607 B.C.E. Lain Juda i go kalabus, hap lain tasol ol i go bek gen long kantri Israel. (Aisaia 10:​21, 22) Olgeta arapela Juda i stap bek long ol hap ol i sindaun long en.

Olsem na inap 400  yia samting paslain long Krais, i gat ol Juda i sindaun long 127 provins long hap Gavman Persia i bosim. (Esta 1:1; 3:8) Pasin bilong ol Juda long wok strong long kirapim ol man long bihainim lotu Juda i mekim na bihain planti manmeri i kisim sampela save long Jehova na long Lo em i bin givim long ol Juda. (Matyu 23:15) Ol Juda i sindaun long planti kantri, ol i kam bung long Jerusalem long Bung Bilong Pentikos 33 C.E., na ol i harim gutnius bilong Jisas. Olsem na taim ol dispela Juda i go bek long ol kantri ol i sindaun long en em Rom i bosim, ol i wok strong long autim tok na lotu Kristen i go bikpela hariap long planti hap.

King Solomon i gat hamas gol?

Baibel i tok King Hiram bilong Tair i bin salim 4-pela ton gol i go long Solomon, na kwin bilong Seba i givim klostu wankain skel bilong gol long Solomon, na ol sip bilong Solomon i go long Ofir na bringim 14 ton gol i kam. Baibel i tok: “Olgeta yia Solomon i save kisim samting olsem 23 ton gol.” (1 King 9:​14, 28; 10:​10, 14) Yu ting yumi inap bilipim dispela tok bilong Baibel? Long dispela taim bipo, ol king i holim hamas gol?

Wanpela olpela rait em ol saveman i painim na ol i ting ol tok bilong en i tru, dispela rait i tok, Fero Tutmos Namba 3 bilong Isip (winim 1,000 yia paslain long Krais) i bin givim 13.5 ton gol long tempel bilong Amun-Ra long Karnak. Inap 700 yia samting paslain long Krais, king bilong Asiria, em Tiklat Pileser Namba 3 i singaut long takis na ol Tair i givim gol winim 4-pela ton long em, na Sargon Namba 2 i givim wankain skel bilong gol long ol god bilong Babilon. Ol i tok olsem long olgeta yia King Filip Namba 2 bilong Masedonia (359-​336 B.C.E.) i save kisim gol winim 28 ton long ol main bilong Pangeam long Tres.

Taim pikinini man bilong Filip, em Bikpela King Aleksander (336-​323 B.C.E.) i kisim Susa, em biktaun bilong Persia, ol i tok em i bin kisim 1,108 ton gol long dispela biktaun na klostu 7,000 ton gol long olgeta hap bilong kantri Persia. Olsem na taim ol man i skelim ol dispela tok wantaim tok bilong Baibel, stori Baibel i mekim long gol bilong King Solomon i no wanpela tok nating.