Skul Yumi Kisim Long Jisas

Gutpela Samting Bai Painim Ol Man i Dai Pinis

Jisas i bin kirapim bek 3-pela man i bin i dai, na dispela i kamapim klia olsem gutpela samting bai painim ol man i dai pinis. (Luk 7:​11-​17; 8:​49-​56; Jon 11:​1-​45) Bilong kliagut long gutpela samting bai painim ol man i dai pinis, pastaim yumi mas kliagut long wanem samting i mekim na ol man i save dai?

Bilong Wanem Yumi Save Sik na Dai?

Taim Jisas i lusim sin bilong ol manmeri, ol i kamap orait. Olsem: Taim Jisas i bungim wanpela paralais man, Jisas i tok: “ ‘Wanem tok em i isi long mi mekim? Em i isi long mi tok, “Mi lusim ol sin bilong yu,” o em i isi long mi tok, “Yu kirap na wokabaut”? Tasol mi laik bai yupela i save olsem, Pikinini Bilong Man em i gat strong long dispela graun, na em inap long lusim ol sin.’ Jisas i tok . . . long dispela man, bun bilong en i dai olgeta, . . . ‘Yu kirap na kisim bet bilong yu, na yu go long haus bilong yu.’ ” (Matyu 9:​2-6) Olsem na sin em i as bilong sik na indai. Yumi kisim sin long namba wan man, Adam.​—Luk 3:38; Rom 5:12.

Bilong Wanem Jisas i Dai?

Jisas i no bin mekim sin olsem na i no stret em i dai. Tasol Jisas i kisim ples bilong yumi na em i dai, na long dispela rot em i givim pe bilong baim bek sin bilong yumi. Em i tok em bai kapsaitim blut bilong em bilong “lusim sin bilong planti manmeri.”​—Matyu 26:28.

Na tu, Jisas i tok: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Jisas i kolim stret samting em i givim olsem ‘pe bilong baim bek’ ol man, long wanem, dispela pe i kisim bek ol man long kalabus bilong indai. Na tu, Jisas i tok: “Mi kam bilong ol i ken kisim laip, na bilong laip i ken pulap tru long ol.” (Jon 10:10) Bilong kliagut long gutpela samting bai painim ol man i dai pinis, yumi mas save long wanem samting i painim ol man taim ol i dai.

Wanem Samting i Painim Man Taim Em i Dai?

Taim pren bilong Jisas, em Lasarus i bin i dai, Jisas i stori long samting i save painim man taim em i dai. Em i tokim ol disaipel bilong em: “ ‘Pren bilong yumi Lasarus i slip. Tasol mi bai go [long Betani] na kirapim em.’ . . .  Ol i ting Jisas i tok long Lasarus i slip tasol. Olsem na nau Jisas i tok klia long ol olsem, ‘Lasarus i dai pinis.’ ” Olsem na Jisas i kamapim klia olsem ol man i dai pinis tingting bilong ol i no wok, i olsem ol i slip indai.​—Jon 11:​1-​14.

Taim Jisas i kirapim bek Lasarus, pren bilong em i bin dai pinis inap 4-pela de. Tasol Baibel i no tok Lasarus i bin mekim sampela stori long samting i bin painim em insait long dispela haptaim, nogat. Taim Lasarus i bin dai, tingting bilong em i no wok na em i no save long wanpela samting.​—Saveman 9:​4, 5, 10; Jon 11:​17-​44.

Wanem Gutpela Samting Bai Painim Ol Man i Dai Pinis?

Ol man i dai pinis, ol bai kisim bek laip na ol bai stap laip oltaim. Jisas i tok: “Taim i laik kamap na olgeta manmeri i stap long matmat ol bai i harim maus bilong [Jisas], na ol bai i lusim matmat na i kam ausait.”​—Jon 5:​28, 29.

Long dispela rot, God i kamapim pasin laikim bilong em. Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​—Jon 3:16; KTH 21:​4, 5.

Bilong kisim sampela save moa, lukim sapta 6 bilong buk Tru Tru Baibel i Tok Wanem? a

[Futnot]