Wanem Samting Bai Kamap Sapos Yumi Dai?

YU SAVE olsem long nau ol man i save go lapun, kisim sik, na i dai. Sampela pikinini tu i save dai. Olsem wanem? Yu mas pret long indai o ol man i dai pinis?— Yu save wanem samting bai painim yumi sapos yumi dai?—

I no gat wanpela man i stap nau i bin i dai na kirap bek na tokim yumi long dispela samting. Tasol taim Jisas, Bikpela Tisa, i bin i stap long graun, i bin gat wanpela man olsem. Yumi inap kisim save long ol samting i painim ol man i dai pinis taim yumi ritim stori bilong dispela man. Man ya em i pren bilong Jisas na em i stap long Betani, em wanpela liklik taun klostu long Jerusalem. Nem bilong em Lasarus, na em i gat tupela susa, nem bilong ol Marta na Maria. Yumi ken skelim stori bilong Baibel long ol samting i bin kamap.

Wanpela taim Lasarus i sik nogut tru. Long dispela taim, Jisas i stap longwe long narapela hap. Olsem na Marta na Maria i salim wanpela man i go bilong toksave long Jisas olsem brata bilong ol, Lasarus, em i sik. Ol i mekim olsem, long wanem, ol i save Jisas inap kam na oraitim brata bilong ol. Jisas em i no wanpela dokta, tasol em i gat strong i kam long God bilong oraitim olgeta kain sik.​—Matyu 15:​30, 31.

Tasol paslain long Jisas i go lukim Lasarus, sik bilong Lasarus i go bikpela tru na em i dai. Jisas i tokim ol disaipel bilong em olsem Lasarus i slip na Em bai go kirapim Lasarus. Ol disaipel i no kliagut long tok bilong Jisas. Olsem na Jisas i tokaut stret olsem: “Lasarus i dai pinis.” Dispela i soim indai i olsem wanem samting?— Yes, em i olsem man i slip i dai olgeta na em i no driman.

Jisas i kam long lukim Marta na Maria. Planti pren bilong ol i kam pinis. Ol i kam bilong mekim gut bel bilong tupela susa, long wanem, brata bilong tupela i dai pinis. Taim Marta i harim olsem Jisas i kam, em i go long bungim em. I no longtaim na Maria tu i go long lukim Jisas. Em i bel hevi tru na i krai, na em i brukim skru long lek bilong Jisas. Ol arapela pren i bihainim Maria, ol tu i krai.

Bikpela Tisa i askim ol long ol i bin putim Lasarus long wanem hap. Orait, ol i bringim Jisas i go long hul bilong ston ol i bin putim Lasarus long en. Taim Jisas i lukim olgeta man i krai, em tu i krai. Em i save long bikpela bel hevi man i pilim taim wanpela em i laikim tumas i dai.

Wanpela ston i pasim hul, olsem na Jisas i tok: “Yupela rausim dispela ston.” Olsem wanem? I gutpela long ol i rausim?— Marta i ting i no gutpela long mekim olsem. Em i tok: “Bikpela, nau em i namba 4 de bilong em i stap long matmat. Olsem na smel nogut bai i kamap.”

Tasol Jisas i tokim em: “Pastaim mi tokim yu pinis, sapos yu bilip, orait yu bai lukim bikpela strong bilong God.” Tok bilong Jisas i makim olsem Marta bai lukim wanpela samting i givim biknem long God. Jisas bai mekim wanem? Taim ol i rausim ston, Jisas i beten long Jehova. Bihain Jisas i singaut strong olsem: “Lasarus, yu kam ausait”! Olsem wanem? Em bai kam ausait? Em inap mekim olsem?—

Olsem wanem? Yu inap kirapim man i slip?— Yes, sapos yu singaut strong, em bai kirap. Tasol yu inap kirapim man i dai pinis?— Nogat. Maski yu singaut strong tru, man i dai pinis em i no inap harim. I no gat wanpela samting yu na mi o wanpela arapela man long graun inap mekim bilong kirapim ol man i dai pinis.

Tasol Jisas i narapela kain. Em i gat strong i kam long God. Olsem na taim Jisas i singautim Lasarus, wanpela narakain samting i kamap. Dispela man i dai inap 4-pela de pinis, em i kam ausait long hul bilong ston! Em i kisim laip gen! Em inap pulim win na wokabaut na toktok gen! Yes, Jisas i kirapim bek Lasarus long matmat.​—Jon 11:​1-​44.

Orait tingim: Wanem samting i bin painim Lasarus taim em i dai? Yu ting wanpela hap bilong em​—wanpela spirit—i lusim bodi na i go stap laip long narapela hap? Yu ting spirit bilong Lasarus i go long heven? Yu ting em i bin stap laip inap 4-pela de long heven wantaim God na ol ensel holi?—

Nogat. Tingim, Jisas i bin tok olsem Lasarus i slip. Wanem samting i save kamap taim yu slip? Taim yu slip i dai olgeta, yu no save long ol samting i wok long kamap, a?— Na taim yu kirap, yu no save long hamas aua yu bin slip. Taim yu lukim klok yu save hamas aua yu bin slip.

Na i wankain long ol man i dai pinis. Ol i no save long wanpela samting. Ol i no pilim wanpela samting. Na ol i no inap mekim wanpela samting. Lasarus i bin stap olsem taim em i slip long matmat. Dai i olsem man i slip na em i no tingim wanpela samting. Baibel i tok: “Ol man i dai pinis, ol i no inap save long wanpela samting.”​—Saveman 9:​5, 10.

Tingim dispela samting tu: Sapos Lasarus i bin stap long heven long dispela 4-pela de, em bai mekim sampela tok long dispela, a?— Na sapos em i bin stap long heven, yu ting Jisas bai strong long em i mas lusim dispela gutpela ples na kam bek long graun?— Nogat tru!

Tasol planti man i tok i gat wanpela samting i stap insait long yumi em dispela samting i save stap laip yet taim yumi dai. Ol i tok Lasarus i bin stap laip long sampela hap. Tasol Baibel i no tok olsem. Baibel i tok taim God i wokim namba wan man, em i winim win bilong laip i go insait long em na “man i kisim laip.” Baibel i tok tu olsem taim Adam i mekim sin, em i dai. Em i dai na em i no gat save moa long wanpela samting. Em i go bek long graun God i bin wokim em long en. Baibel i tok tu olsem olgeta tumbuna pikinini bilong Adam ol i kisim sin na dai long Adam.​—Stat 2:7; 3:17-​19; Rom 5:​12.

Sampela man i save pret long ol man i dai pinis. Ol i no inap go klostu long ples matmat, long wanem, ol i ting ol daiman i gat spirit em inap mekim nogut long ol man i stap laip. Tasol olsem wanem? Man i dai pinis em inap mekim nogut long man i stap laip?— Nogat, a?

Sampela man i ting ol daiman inap tanim i kamap spirit na kam bek lukim ol man i stap laip. Olsem na ol i save putim kaikai bilong ol man i dai pinis i ken kisim. Tasol ol man i save mekim ol dispela pasin, ol i no bilip tru long tok God i mekim long ol samting i painim ol man i dai pinis. Sapos yumi bilip long tok God i mekim, bai yumi no inap pret long ol man i dai pinis. Na sapos yumi tenkyu tru long laip God i givim long yumi, yumi bai kamapim klia dispela samting long rot bilong mekim ol samting God i orait long en.

Tasol ating yu laik save: ‘God bai kirapim bek ol pikinini i dai pinis o nogat? Tru tru em i laik mekim olsem?’ Yumi ken stori long dispela long sapta i kamap bihain long dispela.