Sapta 8

Wanem Samting i Painim Man i Dai Pinis?

1. Planti manmeri i tingim ol man i dai pinis na ol i gat wanem ol askim?

TAIM wanpela man yumi laikim tumas em em i dai, yumi save bel hevi tru, a? Yumi pilim olsem i no gat wanpela samting yumi inap mekim bilong helpim em! Olsem na yumi laik save: Wanem samting i painim man i dai pinis? Yu ting em i stap laip yet long wanpela ples? Ol manmeri i dai pinis, bihain bai yumi inap bung gen wantaim ol hia long graun?

2. Taim namba wan man Adam i dai, wanem samting i painim em?

² Orait, sapos yumi laik save long bekim bilong ol dispela askim, gutpela sapos yumi save long ol samting i painim Adam taim em i dai. Taim Adam i mekim rong, God i tokim em: “[Bai] yu go bek long graun. Long wanem, mi bin wokim yu long graun, na bambai yu go bek gen long graun.” (Jenesis 3:19) Olsem na taim God i no wokim yet Adam, Adam i no i stap. Na taim Adam i dai, em i no i stap.

3. (a) Taim man i dai, olsem wanem long em? (b) Eklisiastis 9:5, 10 i tok wanem long ol manmeri i dai pinis?

³ Man i dai pinis em i no gat laip na em i no gat save o tingting. Baibel i tok: “Ol man i stap laip ol i save bai ol i dai; tasol ol man i dai pinis ol i no save long wanpela samting, na ol i no ken kisim pe moa; long wanem, ol man i lusim tingting long ol. Olgeta wok han bilong yu i laik mekim, yu mas wok strong long mekim; long wanem i no gat wok o tingting o save o savepasin long [matmat], em bai yu go long en.”—Eklisiastis 9:5, 10, NW.

4. (a) Taim man i dai, olsem wanem long tingting bilong em? (b) Taim man i dai, bilong wanem em i no inap lukim o harim o smelim wanpela samting?

⁴ Ol man i dai pinis ol i no save long wanpela samting. Tingting bilong ol i pinis. Olsem na ol i no inap pilim pen o lukim o harim o smelim wanpela samting. Olsem Baibel i tok: “Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.” (Sam 146:3, 4) Na Baibel i tok: “Bodi i no gat spirit wantaim, em i dai pinis.” (Jems 2:26) Taim man i dai, “spirit” o strong bilong laip i lusim skin bilong em. Em i mas pulim win bambai dispela strong inap i stap long skin bilong em. Tasol taim em i dai, em i no inap pulim win moa, olsem na dispela strong i lusim skin bilong em na i no i stap moa. Olsem Baibel i tok, ol man i dai pinis ol i no gat laip moa. Ol i no gat tingting moa na ol i no inap mekim wanpela samting o bagarapim yumi. Olsem na yumi no ken pret long ol. Na yumi no inap helpim ol, maski yumi wokim kaikai o mekim kain kain pasin bilong lotu o pasin bilong ol tumbuna.—2 Samyuel 12:21-23.

5. (a) Baibel i tok wanem na yumi save, i dai bilong ol man na ol animal i wankain tasol? (b) Wanem dispela “spirit” i stap long skin bilong ol man na ol animal na ol i stap laip?

⁵ I dai bilong man na animal i wankain. Ol i dai na ol i no gat save o tingting moa. Baibel i tok: “I dai bilong narapela i wankain long i dai bilong narapela. Ol i gat wanpela kain spirit tasol, olsem na man i no winim animal, . . . Olgeta wantaim i go long wanpela ples tasol. Ol i bilong graun, na ol i go bek long graun.” (Eklisiastis 3:19, 20, NW) Ol man na ol animal i gat “wanpela kain spirit tasol.” Dispela “spirit” em dispela strong i stap long skin bilong ol na ol i stap laip. Taim dispela “spirit” o strong bilong laip i lusim skin bilong ol, ol i dai na i go bek long graun.

MAN I SAVE DAI TRU

6. Baibel i tok man i narapela kain long ol animal o olsem wanem?

⁶ Tasol sampela man i tok, man i narapela kain long ol animal, long wanem man i gat tewel. Ol i tok, taim man i dai em i no i dai tru, long wanem tewel i stap laip yet na i no save dai. Tasol Baibel i tok man i no narapela kain long ol animal.

7. (a) Baibel i kolim wanem tok Hibru na tok Grik long ol man na long ol animal samting na yumi ken save, man i no narapela kain long ol animal? (b) Bilong wanem i no stret ol i tanim dispela tok Hibru na tok Grik olsem “tewel”?

⁷ Yumi inap save long dispela samting taim yumi skelim Baibel bilong pastaim, em ol i bin raitim long tok Hibru na tok Grik. Long tok Hibru Baibel i kolim ol man na animal na pis na pisin samting olsem nefes (nephesh), na long tok Grik saiki (psy’khe). Insait bilong dispela tupela tok i olsem “samting i pulim win” o “samting i gat laip.” Olsem na man i no narapela kain long ol animal. Olgeta wantaim em ol “samting i gat laip” (Jenesis 1:20, 24; 2:7) na taim ol i dai ol i dai tru. (Revelesen 16:3; Sam 22:29) Long Baibel Pisin ol i bin tanim dispela tok Hibru na tok Grik olsem “pipel,” “man,” “laip,” “bel,” “lewa” samting. (Jenesis 46:18; Aposel 3:23; Matyu 10:39; Luk 1:46; 2:35) Tasol long sampela hap bilong Nupela Testamen ol i tanim kranki na ol i bin raitim olsem “tewel.” (Matyu 10:28; Mak 12:30; Luk 10:27; 1 Tesalonaika 5:23; Hibru 4:12; Revelesen 20:4) Dispela tok “tewel” i no stret, long wanem em i no insait tru bilong dispela tupela tok “nefes” na “saiki.” Ol i mas raitim olsem “man” o “laip” samting; “tewel” nogat.

8. Orait, taim yumi dai, yumi dai tru o nogat?

⁸ Olsem yumi stori pinis (long Sapta 7), God i no wokim man i gat tewel. Man i no gat tewel. God i wokim man i gat laip wankain olsem ol animal. Man na animal em ol “samting i gat laip” na taim ol i dai, orait laip bilong ol i pinis. No gat wanpela hap bilong ol i stap laip moa; ol i dai olgeta na tanim i kamap graun gen.—Eklisiastis 3:20; Jenesis 3:19.

9. Wanem insait bilong dispela tok “spirit i go bek long God”?

⁹ Nau yumi save yumi no gat tewel. Tasol yumi gat strong bilong laip o “spirit” i stap long skin bilong yumi. Taim man na animal i stap laip yet na i pulim win, dispela spirit o strong i stap long olgeta liklik hap skin bilong ol. Baibel i tok, taim yumi dai “das i save go bek long graun . . . na spirit i save go bek long God tru em yet i bin givim.” (Eklisiastis 12:7, NW) Taim yumi dai, isi isi dispela strong bilong laip i lusim olgeta liklik hap skin bilong yumi na skin i wok long bagarap. I no olsem dispela strong i lusim yumi na i wokabaut i go antap long God. Nogat. Dispela tok “spirit i go bek long God,” insait bilong en i olsem: God tasol inap givim laip gen long yumi long bihain. Strong bilong kirapim gen laip bilong yumi i stap long han bilong God.—Luk 23:46; Sam 104:29, 30, ol i tanim tok “spirit” olsem “win.”

LASARAS-EM I DAI NA I STAP FOPELA DE LONG MATMAT

10. Lasaras i dai pinis, tasol Jisas i tok wanem long em?

¹⁰ Lasaras i dai na em i stap fopela de long matmat. Ol samting i painim Lasaras i helpim yumi na yumi inap save long ol samting i painim ol man i dai pinis. Jisas i tokim ol disaipel: “Pren bilong yumi Lasaras i slip pinis. Tasol mi go kirapim em.” Ol disaipel i tok: “Bikpela, sapos em i slip, bai em i orait gen.” Tasol nau Jisas i tok klia long ol: “Lasaras i dai pinis.” Orait, bilong wanem Jisas i tok, em i slip?

11. Lasaras i dai pinis, tasol Jisas i mekim wanem bilong helpim em?

¹¹ Jisas i go long ples bilong Lasaras, na susa bilong Lasaras, em Mata, em i go bungim Jisas long rot. Bihain Jisas wantaim Mata na planti manmeri moa ol i go long matmat bilong Lasaras. Em wanpela hul ol i bin wokim insait long bikpela ston na wanpela ston i pasim ai bilong matmat. Jisas i tok: “Yupela tekewe dispela ston.” Tasol Mata i tok: “Bikpela, em i dai na 4-pela de i go pinis. Olsem na smel nogut i kamap nau.” Tasol ol i tekewe dispela ston na Jisas i singaut strong na em i tok: “Lasaras, yu kam ausait!” Na dispela man i dai pinis em i kirap na i kam ausait! Laplap i pas yet long skin bilong em na Jisas i tok: “Lusim laplap na larim em i go.”—Jon 11:11-44.

12, 13. (a) Olsem wanem yumi inap save, taim Lasaras i dai em i no save long wanpela samting? (b) Lasaras i dai pinis, olsem na bilong wanem Jisas i tok Lasaras i slip?

¹² Orait, taim Lasaras i dai wanem samting i bin painim em long dispela 4-pela de? Yu ting em i bin i go long heven? Em i gutpela man. Tasol taim em i kirap bek em i no tok em i bin i go long heven. Sapos em i bin i go, bai em i tokim ol, a? Tasol nogat. Lasaras i dai tru, olsem Jisas i tok. Olsem na bilong wanem pastaim Jisas i tok, Lasaras i slip?

¹³ Long wanem Jisas i save, taim Lasaras i dai i olsem em i slip, em i no save long wanpela samting, olsem Baibel i tok: “Ol man i dai pinis ol i no save long wanpela samting.” (Eklisiastis 9:5, NW) Man i slip, yumi inap kirapim em, a? Na olsem tasol Jisas i laik kirapim Lasaras bambai ol man i ken save, long strong bilong God em inap kirapim bek man i dai pinis.

14. Sapos yumi save long strong bilong Krais long kirapim bek ol manmeri i dai pinis, dispela save i mas kirapim yumi long mekim wanem?

¹⁴ Man i slip em i no inap tingim wanpela samting. Na man i dai pinis tu em i no inap tingim wanpela samting o pilim pen samting. Em i no i stap moa. Tasol bihain, ol manmeri i dai pinis na God i bin baim bek ol, bai ol i kirap bek. (Jon 5:28) Yumi save long dispela samting na dispela save i mas kirapim yumi long mekim ol samting bambai God i ken amamas long yumi. Na maski yumi dai, bai God i tingim yumi na kirapim yumi na bai yumi stap laip gen.—1 Tesalonaika 4:13, 14.

[Piksa long pes 76]

ADAM—God i wokim em long graun . . . em i go bek long graun

[Piksa long pes 78]

Lasaras i stap olsem wanem taim Jisas i no kirapim yet em?