Baibel i Tok Wanem?
I Gat As Long Pret Long Man i Dai Pinis?
Ol manmeri bilong lain Anang long Naijiria ol i bilip olsem sapos ol i no givim biknem long man taim ol i planim bodi bilong em, spirit bilong em bai kam bek na givim hevi, na kilim tu, wanpela long famili. Sampela Saina i bilip tu olsem sapos ol i no bihainim pasin bilong ples long planim man, spirit bilong man i dai pinis bai kam bek na mekim nogut long ol man o kilim ol i dai.
LONG planti ples long olgeta hap bilong graun, i gat dispela bilip olsem taim man i dai pinis, i gat wanpela samting—olsem spirit, o tewel—i lusim bodi. Na planti man i bilip olsem dispela spirit, o tewel, inap mekim sampela samting long famili o ol wantok.
Tasol olsem wanem? Taim man i dai pinis, tru i gat wanpela samting i gat tingting i lusim bodi na i stap laip yet? Na yu ting dispela “samting” inap nogutim ol man i stap laip yet? Baibel i tok wanem?
Man i Dai Pinis Em i Save Long Wanpela Samting?
Baibel i tok man i dai pinis em “i no inap save long wanpela samting.” Na man i dai pinis em “i no i stap moa.”—Saveman 9:4, 5; Aisaia 26:14.
Taim Baibel i stori long man i dai pinis i stap olsem wanem, Baibel i no kolim ol tok yumi no inap kliagut long en, nogat. Em i tok taim man i dai pinis, i olsem em i slip tasol. Wanpela taim Jisas i tok long wanpela gel i gat 12-pela krismas olsem: “Em i no i dai. Em i slip tasol i stap.” Ol manmeri i kirap na “lap nogut [tru] long em, long wanem, ol i save, pikinini i dai pinis.” Tasol maski dispela meri i dai tru, Baibel i tok Jisas i kirapim em—i olsem em i lusim slip na i kirap.—Luk 8:51-54.
Na i wankain tu long taim Lasarus i dai. Jisas i tokim ol disaipel bilong em olsem Lasarus “i slip” na em bai go “kirapim em.” Ol disaipel i no kliagut long dispela tok Jisas i mekim, olsem na “Jisas i tok klia long ol olsem, ‘Lasarus i dai pinis.’ ” Aposel Pol tu i tok long “ol manmeri i dai pinis” na em i tok olsem long taim God i makim, ol bai kirap bek na stap laip gen.—Jon 11:11-14; 1 Tesalonaika 4:13-15.
I no gat wanpela hap bilong Baibel i tok olsem i gat wanpela samting, olsem spirit, i stap laip yet taim man i dai pinis, nogat. Olsem na i no gat as long yumi pret long man i dai pinis. Orait wanem samting i kamapim dispela bilip olsem wanpela samting i save stap laip yet taim man i dai pinis? Na wanem as bilong dispela pret olsem man i dai pinis em inap mekim nogut long ol man i stap laip yet?
Wanpela Tok Giaman
Ol lotu giaman i bin strongim dispela tingting olsem taim man i dai, em i no i dai tru. Long bipo yet, planti man long olgeta hap i bin kisim dispela tingting olsem ol man i gat wanpela spirit i no inap i dai. Dispela i mekim na taim sampela bikman—olsem ol Fero bilong Isip bilong bipo—i dai, ol man i kilim i dai ol wokboi bilong ol na bai ol dispela bikman i gat ol wokboi bilong helpim ol long laip bilong ol long bihain.
Planti manmeri i bin kisim hevi, na ol i ting spirit, o tewel, bilong man i dai pinis i mekim dispela samting. Ol i ting dispela hevi i kamap, long wanem, ol i no bin mekim kol bel bilong ol wanblut i dai pinis. Tasol Baibel i tokaut klia olsem dispela tingting bilong ol i kranki. Ol spirit nogut i as bilong dispela hevi i painim ol. Ol i save kisim bikpela amamas long mekim nogut long ol man na pretim ol.—Luk 9:37-43; Efesus 6:11, 12.
Baibel i tok Satan em i “papa tru bilong pasin bilong tok giaman,” na em i “save senisim pasin bilong en na kamap olsem ensel bilong lait.” Em wantaim ol spirit nogut ol i wok long “giamanim olgeta manmeri bilong graun.” (Jon 8:44; 2 Korin 11:14; KTH 12:9) Em nau, Satan i as bilong dispela tok giaman olsem man i gat wanpela spirit i no inap i dai na dispela spirit inap nogutim ol man i stap laip yet.
Tasol ol dispela tok giaman i no paulim ol man i bilip long Baibel. Ol i save olsem Satan i laik giamanim ol man long bilip olsem man i dai pinis em inap toktok wantaim man i stap laip. Tasol Baibel i tok: “Ol man i dai pinis, ol i no inap save long wanpela samting.” (Saveman 9:4, 5) Tru tumas, i gat ol tok long Baibel i tokaut stret long man i dai pinis i stap olsem wanem, na taim yumi save long ol dispela tok tru, dispela i mekim yumi kamap fri na yumi no kalabus moa long ol tok giaman!—Jon 8:32.
YU LAIK SAVE?
◼ Ol man i dai pinis ol i save long wanpela samting?—Saveman 9:4, 5; Aisaia 26:14.
◼ Wanem samting i olsem as bilong dispela bilip olsem wanpela samting, olsem spirit, i stap laip yet taim man i dai pinis?—Jon 8:44.
◼ Wanem samting bai helpim yumi long save long man i dai pinis i stap olsem wanem?—Jon 8:32; 17:17.
[Rait long pes 23]
Ol lain i kisim amamas long mekim nogut long ol man, em ol spirit nogut, na i no ol man i dai pinis