Ol i Laik Kirapim Ol Yangpela Katolik Long Autim Tok

DISPELA STORI I KAM LONG AUSTRALIA

LONG Julai long yia i go pinis, ol Katolik bilong olgeta hap ol i go bung long Sydney, Australia, bilong tingim Wol Yut De 2008, em wanpela bung bilong lotu em Misin Katolik i kamapim.

Ol lain bilong 170 kantri ol i holim fleg na wokabaut long ol rot na ol i singaut amamas na singsing, na amamas bilong dispela bung i inapim olgeta hap bilong taun. Planti tausen manmeri ol i sanap long Sydney Harbor bilong lukim Pop Benedict Namba 16 i kam long bot wantaim 12-pela narapela bot. Inap olsem 500 milion manmeri long olgeta hap bilong graun ol i lukim dispela samting long TV.

Ol i mekim laspela Misa long wanpela stediam bilong hosres long Sydney, na 400,000 manmeri i kam bung, na 4,000 em ol bikman bilong misin, na 2,000 em ol niusman. Em nambawan bikpela bung i bin kamap long Australia, winim ol lain i bin bung long Olimpik Gems long Sydney long yia 2000.

Wol Yut De em wanem samting? Wanem as bilong en? Ol i mekim wanem ol samting long en? Em i kamapim klia wanem samting long bilip bilong ol yangpela bilong Sydney?

“Bilip i Laik Bagarap”

Wol Yut De i save kamap wanpela taim long olgeta yia bilong tingim bilip bilong ol yangpela Katolik. Ol Katolik i save tingim dispela de long ol haus lotu bilong ol yet. Tasol long olgeta 2-pela o 3-pela yia, wanpela biktaun i save holim dispela bung na singautim ol yangpela Katolik bilong olgeta hap long i go long en. Tenpela biktaun bilong 5-pela kantri i bin holim pinis ol dispela bung, na planti milion manmeri ol i bin go long en.

Tasol olsem ol bikman bilong misin i tok, narapela wok bilong Wol Yut De em bilong stopim ol Katolik long lusim lotu. George Cardinal Pell, em wanpela pris i gat bikpela namba long Misin Katolik long Australia, em i tok: “Mipela i gat bikpela hevi, planti manmeri i no bihainim moa lotu Katolik, na i luk olsem bilip i laik bagarap. Wol Yut De em bilong stretim dispela hevi.”

Ripot bilong Vatiken i soim olsem namba bilong lain pris i wok long i go daun long olgeta hap. Insait long sampela yia i go pinis, planti tausen pris i lusim wok pris bambai ol i ken marit. Na insait long 30 yia i go pinis, namba bilong ol man i lain long kamap pris long Australia i go daun tru, winim 70 pesen. Long nau, planti pris long wanpela bikpela hap em bisop i bosim, ol i winim pinis 60 krismas, tasol long 1977 planti pris i gat olsem 40 krismas tasol.

Long planti kantri, namba bilong ol manmeri i go long lotu i wok long i go daun. Long Australia, inap 25 pesen bilong ol lain i tok ol i Katolik, tasol 14 pesen tasol i save go oltaim long lotu. Ol i ting namba bilong ol yangpela Katolik i save go long lotu i no winim 10 pesen. Na planti Katolik i save sakim ol tok bilong Misin long stretpela pasin bilong marit, pasin bilong pasim bel, na katim marit. Sampela i tingting planti long ol tok i kamap long pasin nogut em sampela pris i mekim long ol mangi.

Nius The Sydney Morning Herald i tok long Wol Yut De olsem “em laspela wok bilong traim long stopim ol manmeri long lusim Misin. Ol bikman bilong lotu long Australia na Rom ol i painim rot bilong stretim bek lotu na givim nupela strong long en long rot bilong ol yangpela.” Ol i mekim wanem?

Ol Amamas na Pati

Wol Yut De 2008 i gat sampela kain pilai o amamas bilong lotu, na ol grup i bung na toktok long sampela samting, na sampela i bung na raun i go long ol ples em ol i tok em i holi, na ol bikpela lain i bung bilong mekim Misa. Ol dispela samting i kirapim tru tingting bilong planti lain husat i stap long dispela bung, tasol ol i lukim olsem i gat narapela kain tingting i stap long ol dispela pati samting. Alexandra, em wanpela yangpela Katolik bilong Amerika, em i tok dispela bung “em i wanpela bikpela pati nating.”

Dispela bung bilong 6-pela de long Sydney i gat 450 kain kain samting i kamap, olsem musik, ol muvi, ol drama, na sampela i sanap long rot na mekim musik na singsing. I gat musik opera, na ol lotu singsing, na ol musik i gat bikpela pairap, olsem rok musik na rap musik. Ol rok musik i pulim planti tausen yangpela, na ol i amamas na pairap nabaut.

Sampela Katolik i tingting planti long ol dispela samting i kamap. Wanpela pris, em Peter Scott, em i tokim ABC nius bilong Australia olsem dispela bung “i kamap olsem pati nating bilong amamas​—⁠wik bilong mekim ol pati na singsing na musik na olkain amamas bilong graun, tasol i no gat wanpela samting long en i holi tru o i santu, nogat.” Long yia 2000, Pop Benedict Namba 16 husat i gat nem Kadinal Ratzinger long dispela taim, em i tok: “ ‘Rok’ [musik] i save kamapim klia ol strongpela laik nogut bilong bel, na ol manmeri i kam long ol dispela bung ol i lotuim ol lain bilong singsing na rok musik, na dispela i no stret long lotu Kristen.”​—⁠Buk The Spirit of the Liturgy.

Yumi ken askim olsem: “Wol Yut De bai senisim laip bilong ol man?” Paul Collins, bipo em i wanpela pris, em i tok: “Ating em bai senisim laip bilong wan wan man tasol. Planti bai kirap gen long bihainim olpela pasin.” Na em i tok: “Ol bikpela de i gat olkain bilaspasin long en i no save mekim ol man i senisim laip bilong ol, nogat. Bilong mekim olsem, man i mas skelim gut bel, na tingim gut ol samting em bai mekim, na em i mas redi long stretim ol pasin i bin pas strong long em inap longpela taim pinis.”

“Autim Tok Bilong Mi”

Ol bikman bilong lotu ol i save long ol dispela samting. Olsem na as tok bilong Wol Yut De 2008 i olsem: “Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi.”a

Ol bisop i kirapim ol lain i bin kam long dispela bung long “painim nupela strong olsem bilong ol aposel long autim strong tok bilong Gutnius long olgeta lain manmeri bilong nau.” Pop Benedict Namba 16 i tokim ol long kamap “wanpela nupela lain aposel,” na bihain em i tokim ol long autim “Gutnius long ol pren na famili bilong ol, na olgeta man ol i bungim.”

Dispela tok i kirapim tru sampela manmeri i gat gutpela bel. Ramindo, em wanpela yangpela bilong Amerika husat i gat 20 krismas, em i tokim wanpela niusman: “Mi ting pasin bilong autim tok em i bikpela samting.” Tasol Beatrice bilong Itali, em i gat 18 krismas, em i tok: “Long nau ol yangpela i no save toktok long God. Long nau i hatwok tru long mekim wok bilong autim tok.” Planti long dispela bung ol i mekim wankain tok olsem tupela yangpela meri bilong Texas, Amerika, ol i tok: “Long hap bilong mipela, ol Witnes Bilong Jehova tasol i save autim tok.”

Ol Yangpela Husat i Save Autim Tok

Tru tumas, ol Witnes Bilong Jehova, ol yangpela wantaim ol lapun, ol i gat nem long givim bel long autim tok. Bilong wanem ol i mekim olsem? Sotir, em wanpela Witnes long Sydney husat i gat 22 krismas, em i tok: “Ol i laikim tru God, ol i laikim tru ol manmeri, na ol i laikim tru Baibel.”

Long Wol Yut De 2008, klostu 400 yangpela Witnes long Sydney​—⁠em ol i no kam long dispela bung​—⁠ol i bung long mekim wanpela spesel wok bilong autim tok bilong Baibel long ol yangpela Katolik husat i bin kam long Sydney. Travas, em i gat 25 krismas, em i tok: “Mi bin amamas tru long bungim ol dispela yangpela Katolik em ol i save tingim ol samting bilong lotu. Planti bilong ol i gat ol gutpela askim bilong Baibel, na mi bin amamas tru long soim ol long ol gutpela bekim bilong ol dispela askim.”

Tarsha, em i gat 23 krismas, em i tok: “Mi bin mekim gutpela pasin pren long ol. Mi laik tok welkam long ol i kam long Sydney na mi laik harim bilip bilong ol.” Frazer, husat i gat 20 krismas, em i tok: “Long taim i stret long mekim, mi givim wanpela presen long ol​—⁠em buk Tru Tru Baibel i Tok Wanem? b Olgeta manmeri mi bungim ol, ol i amamas long kisim.”

I klia tru olsem planti bilong ol dispela yangpela ol i bin amamas long toktok wantaim ol yangpela Witnes. Suzanne, em i kam long Fiji, em i askim Belinda, em wanpela Witnes i gat 19 krismas, long as na God i larim ol pen na hevi i stap. Belinda i tok i gutpela sapos ol i lukim bekim bilong dispela askim i stap long buk Baibel i Tok. Taim tupela i toktok pinis, Suzanne i tok: “Ol man i save tokim mi olsem God i save mekim ol samting long narapela kain pasin tru. Tasol nau mi kisim bekim tru bilong dispela askim!” Taim Belinda i givim buk long Suzanne, em i kirap nogut na tok: “Mi traim long putim olgeta tok bilong yu long tingting. Mi no ting olsem yu bai larim mi i kisim dispela buk!”

Wanpela Filipino i askim Marina em wanpela Witnes i gat 27 krismas, long kisim piksa bilong em long ai bilong wanpela gutpela haus samting long Sydney. Bihain tupela i toktok gut wantaim na Marina i givim em buk Baibel i Tok. Meri i tok: “Asde long nait mi beten long kisim gutpela save long Baibel. Ating God i bin harim beten bilong mi na mi kisim dispela buk!”

Levi, em wanpela Witnes i gat 27 krismas, em i kirap toktok wantaim tupela meri i kam long Panama, em wanpela mama wantaim pikinini meri bilong em. I no longtaim na ol i kirap stori long ol samting bilong lotu na Levi i kamapim sampela tok bilong Baibel long ol. Tupela i kisim wanpela buk Baibel i Tok. Bihain Levi i askim tupela: “Wanem samting bilong dispela raun bilong yupela i bikpela samting long yupela?” Pikinini meri i holim strong buk Baibel i Tok na em i tok: “Bikpela samting long mi, em mi bin bungim yu.”

Tru tumas, planti yangpela Katolik ol i amamas long kisim sampela save moa long Baibel. Olsem wanem long yu? Yu laik save gut moa long ol tok bilong Baibel? Sapos olsem, orait askim ol Witnes Bilong Jehova long mekim fri Baibel stadi wantaim yu. Ol bai amamas long helpim yu tu!

[Ol Futnot]

[Rait long pes 27]

“Mipela i gat bikpela hevi, planti manmeri i no bihainim moa lotu Katolik, na i luk olsem bilip i laik bagarap.” ​—⁠George Cardinal Pell bilong Misin Katolik

[Blok/Ol Piksa long pes 25]

SO BILONG OL WOK MISIN

Wol Yut De 2008 i bin i gat bikpela so bilong olkain wok bilong lotu, i no gat narapela so long Australia i bikpela olsem. Winim 100 lain bilong mekim olkain wok lotu i bin givim tok long 50,000 manmeri bilong kirapim ol long tingting long mekim wok bilong Misin Katolik olsem pris, sister, bruder, o mekim sampela kain wok bilong lotu.

[Piksa long pes 24, 25]

Ol lain bilong ol narapela kantri ol i putim kala kala bilas na wokabaut long ol rot

[Ol Piksa long pes 26]

Ol Witnes Bilong Jehova i go toktok wantaim ol lain bilong ol narapela kantri ol i raun long biktaun Sydney

[Piksa Kredit Lain long pes 24]

Getty Images