Pas Bilong Ol Man

Hevi Bilong Ol Meri Tenkyu long ol stori yupela i kamapim long pasin bilong paitim ol meri (Julai 8, 1989), na samting bilong helpim famili bilong man bilong dring (Mas 8, 1993), na i stret yumi litimapim nem bilong ol meri (Epril 8, 1993). Ol dispela stori i kamapim gut ol samting i stap long bel na tingting bilong ol manmeri. Kirap long de stret long mi marit nupela mi karim kain kain bikpela hevi. Mi kisim sik, olsem na mi go lukim ol dokta bilong skin na ol dokta bilong tingting. I no planti man inap pilim gut ol dispela kain hevi, na sapos ol i no save long rot bilong helpim man, hevi i go bikpela moa. Tasol ol dispela stori yupela i bin kamapim i bin stretim tingting bilong mi na helpim mi long save bilong wanem ol dispela hevi i kamap. Tenkyu.

N. H., long Ajentina

Litimapim Nem Bilong Ol Meri Ol samting mi lukim taim mi liklik, olsem man i bel nogut long meri, dispela i mekim na mi tu mi nolaik tru long ol meri. Na mi nolaik tru long marit! Tasol mi senisim tingting bilong mi long ol meri, long wanem, mi bin kaunim ol stori long “Ol Meri​—i Stret Yumi Litimapim Nem Bilong Ol.” (Epril 8, 1993) Tupela taim mi kaunim ol dispela stori, na nau mi ting bihain bai mi kamap wanpela gutpela man marit.

N. B. M., long Kot Diwa

Lain Inka Nau tasol mi kaunim pinis dispela stori long “Sindaun Bilong Lain Inka.” (Oktoba 8, 1992) Mi gat 15 krismas na mi save amamas long lain long ol man bilong Saut Amerika, em ol man i bin stap bipo tru taim Kolambas i no kamap yet long ples bilong ol. Mi amamas long kaunim stori yupela i raitim long dispela lain na em i narapela kain long ol narapela stori yupela i bin raitim. Ol dispela kain stori i helpim mipela long kisim sampela save moa na amamasim mipela taim mipela wok long kisim dispela save.

D. A. S., long Ajentina

Ol Yangpela i Laik Save Tenkyu tru long stori “Ol Yangpela i Laik Save . . . Olsem Wanem Sapos Famili Bilong Mi i Rabis?” (Oktoba 8, 1992) Mi no wanpela yangpela na mi no stap rabis tru, tasol dispela stori i bin helpim mi. Sampela hevi bilong skin i painim mitupela man bilong mi na mi ting i no gat rot bilong mekim wanpela samting bilong stretim. Dispela stori i bin helpim mi long save, tingting kranki bilong mi i no helpim dispela hevi bilong mi, em i mekim hevi i go bikpela moa. Nau mi inap karim dispela hevi.

K. J., long Amerika

Katim Marit Ol stori bilong yupela long “Katim Marit​—Ol Hevi i Kamap Long En,” (Novemba 8, 1992) i kirapim mi long raitim dispela pas. Mi bin marit 4-pela yia na long 1988 mi katim marit. Sapos long dispela taim mi bin save long ol samting mi save long en long nau, bai mi no inap katim marit bilong mi. Katim marit i pinisim olgeta mani bilong mi. Na ol man marit i laik prenim ol meri i bin katim marit, tasol ol man singel i no amamas long meri i gat pikinini. Ol i amamas long prenim ol meri, tasol ol i no laik maritim ol. Mi amamas sapos dispela stori i helpim wanpela long lukautim gut marit bilong em​—mi no inap tru lukautim gut marit bilong mi na em i bagarap.

T. R., long Amerika

Yupela i tok tru taim yupela i tok, katim marit i save kamapim bikpela bel hevi, maski i gat as na i stret long katim marit. Sampela taim mi tingting planti na mi pilim olsem hevi bilong mi i no inap pinis. Tasol ol wok bilong spirit, na pasin marimari bilong Jehova, na taim i wok long lus liklik​—olgeta dispela samting i helpim mi long daunim bel hevi bilong mi na mi no bel hevi tumas olsem bipo.

M. H., long Amerika