Pas Bilong Ol Man

Karim Hevi Bilong Sik Mi laik tok tenkyu long yupela long kamapim stori bilong Hans Augustin long dispela stori “Mi Wok Strong Long i Stap Laip.” (Janueri 8, 1993) Skin bilong mi i no strong na mi save sik, tasol hevi bilong em i winim tru hevi bilong mi. Mi tingim stori bilong wanpela man em i no gat su na em i ting em i stap rabis. Tasol taim em i lukim wanpela man i no gat lek, em i save olsem hevi bilong dispela man i winim hevi bilong em. Olsem na stori bilong Hans Augustin i strongim tru bilip bilong mi, na taim mi beten mi tingim em tu.

A. M. M., long Amerika

Het bilong mi i save pen, na lek han bilong han sut bilong mi i save dai, na ai bilong mi i no strong moa, na mi save ai raun. Mi bin kisim eksre, tasol eksre i no bin kamapim wanpela sik. Mi bel hevi tru, long wanem, mi no inap mekim planti wok bilong God. Mi bel hevi tu taim mi tingim sindaun bilong mi long bihain. Tasol, stori bilong Hans Augustin i kirapim yumi long tingim ol samting bilong spirit i bikpela samting, na mi laik bihainim gutpela tingting bilong em. Ol dokta bai glasim mi gen long bihain, tasol maski wanem samting i kamap, bai mi karim tasol hevi bilong dispela sik.

K. T., long Japan

Wok Bisnis Bilong Graun Mi raitim dispela pas bilong tok tenkyu long yupela long raitim ol stori long “Ol Bikpela Wok Bisnis i Kamap na i Pinis Gen.” (Septemba 8–Disemba 8, 1992) Mi ting bai i hatwok long kisim ol tok i stap long dispela ol stori, tasol yupela i raitim gut ol dispela stori, olsem na mi no hatwok long kisim insait bilong en. Mi amamas tru long kaunim ol dispela stori.

D. H., long Amerika

Hevi Long Kaikai Mi laik tok tenkyu tru long yupela long kamapim dispela stori “Helpim Ol Manmeri i Gat Pasin Kranki Long Kaikai.” (Disemba 8, 1992) Dispela stori i helpim mi long tokaut olsem mi gat dispela hevi long kaikai. Em namba wan taim tru mi kisim save olsem kaikai yet i no as bilong hevi bilong mi, nogat. Hevi insait long famili i wanpela as bilong dispela hevi. Dispela hevi bilong mi long kaikai i pasim mi long mekim planti samting, olsem wok autim tok samting. Taim mi kaunim dispela stori, mi wok long painim sampela save moa long dispela sik, na nau mi save olsem mi gat bikpela wok long stretim dispela hevi. Tasol mi save olsem Jehova i save marimari long yumi na dispela samting i helpim mi.

J. S., long Amerika

Mi gat 15-pela krismas na inap sampela yia nau mi gat dispela hevi long kaikai. Taim mama bilong mi i kaunim dispela stori, em i pilim tru hevi bilong mi na em i save helpim mi long stretpela rot. Mi pilim olsem nau mi inap bosim tru laip bilong mi, na mi laik tok tenkyu tru long yupela long ol stori yupela i save kamapim. Ol i save helpim mi tru.

M. G., long Amerika

Stap Nupela Meri Tenkyu tru long dispela stori “Ol Yangpela i Laik Save . . . Bilong Wanem Mi Mas Stap Nupela Meri?” (Janueri 8, 1993) Mi krai taim mi kaunim tok bilong dispela meri i gat 14-pela krismas. Em i mekim pasin pamuk na em i no stap nupela meri moa. Dispela samting i bin painim mi tu. Maski mi krai inap planti taim, dispela i no inap kamapim tru bel bilong mi olsem mi sori tru long mi no bihainim pasin Kristen na mi no stap nupela meri moa. Taim papa bilong mi i save long dispela samting, em i krai. God i save lusim tingting long ol rong bilong yumi, tasol wan wan taim mi tingim dispela samting, na mi save krai. Em gutpela samting sapos yumi stap nupela yet long taim yumi singel na yumi no karim hevi bilong pasin pamuk samting.

I. M., long Japan

Inap sampela taim nau wanpela meri long skul i askim mi long slip wantaim em, tasol olgeta taim mi sakim em. Long dispela as tasol em i tok mi man bilong slip wantaim ol man. Stori bilong yupela i strongim bilip bilong mi olsem pasin bilong i stap nupela em i gutpela samting. Long dispela as, marit bilong mi long bihain inap i stap gut.

D. L., long Amerika