Pas Bilong Ol Man

Ol Bubu  Mitupela meri bilong mi i no yangpela moa, tasol mipela i bin amamas tru long kaunim ol stori “Ol Yangpela i Laik Save . . . ” (Epril 8 na Me 8, 1993). Ol i bin stori long sindaun bilong ol yangpela taim ol bubu i kam na stap wantaim famili. Nau tasol mipela i go na sindaun wantaim lapun bubu bilong meri bilong mi, na dispela i putim sampela hevi long mitupela. Tasol gutpela tok bilong Baibel na gutpela save yupela i kamapim long pasin bilong ol lapun i bin helpim gut mipela. Mipela i bin mekim famili-stadi long dispela tupela stori na taim mipela i bihainim ol tok bilong en, em i bin helpim sindaun bilong mipela.

J. L., long Amerika

Nupela Musik  Dispela stori “Nupela Musik​—Em i Bilong Givim Wanem Tingting Long Man?” i bin kamap long Kirap! (Epril 8, 1993) i sutim bel bilong mi. Mi bin hatwok tru long sakim dispela kain musik. Stori yupela i bin kamapim i strongim bel bilong mi bilong sakim dispela musik bilong Satan. Mi save bai mi gat hatwok yet, tasol Jehova bai helpim mi long winim dispela hevi.

M. D., long Amerika

Sik AIDS  Yupela i bin kamapim gut dispela stori long “Sik AIDS Long Afrika”! Toksave yupela i bin givim long dispela stori inap helpim gut ol yangpela i laik marit na bai ol i lukautim laip bilong ol. Mi nupela Kristen i baptais pinis na bipo taim mi no Kristen yet sindaun bilong mi i narapela kain, olsem na mi askim ol dokta long glasim skin bilong mi, mi gat sik AIDS o nogat. Mi no gat dispela sik. Tasol mi save tingting planti, bilong wanem sampela i no go na askim dokta long glasim skin bilong ol. Na sampela marit em poroman bilong ol i mekim pasin pamuk samting, ol i ting dispela sik i no inap kalap long ol. Tasol nau dispela sik i go bikpela tru, olsem na yumi no ken tingting tasol yumi kisim pinis dispela bikpela sik o nogat; yumi mas mekim wanpela samting, olsem go lukim dokta.

L. J., long Amerika

Mipela i amamas long harim tok bilong yu. Wanpela lain (U.S. Centers for Disease Control) i tok, sapos man i kisim pinis binatang jem bilong sik AIDS, 3-pela i go inap 6-pela mun samting i mas pinis pastaim na ol dokta i ken save tru em i gat sik AIDS o nogat. Olsem na sapos wanpela man i bin mekim wanpela samting na em inap kisim sik AIDS long en na dokta i bin glasim skin bilong em hariap, ating em i mas go bek gen long dokta na larim em i glasim gen skin bilong em.​—ED.

Ol Animal  Tenkyu tru long stori yupela i bin kamapim long Kirap! bilong Julai 8, 1993. “Animal Kapibara​—God i Popaia Long Wokim? o Em i Gutpela Samting?” Planti taim mi save kaunim ol stori bilong ol animal long pikinini bilong mi. Pikinini bilong mi i amamas tru long dispela stori, long wanem, i olsem Mista Kapibara yet i toktok long em!

C. T., long Japan

Planti nius i save kamapim ol pipia stori, tasol dispela stori em i gutpela tru. Mi na ol pikinini bilong mi i kaunim dispela stori wantaim. Mipela amamas tru long lain long ol narapela kain kain animal!

C. H., long Amerika