Em i No Pairap Liklik

SAPOS yu bin raun long bus long nait, ating yu bin harim krai bilong tarangau bilong nait. Long olgeta hap i gat 145 kain kain tarangau bilong nait, olsem na ating planti man i bin harim krai bilong wanpela. I gat wanpela kain tarangau bilong nait (barn owl) na em i stap long Not na Sentral na Saut Amerika, Yurop, Afrika, na long planti hap bilong Esia, Tasmania, na sampela hap moa bilong Ostrelia tu. Wanem samting i mekim na tarangau bilong nait i narapela kain long ol narapela pisin?

Namba wan samting em pes na ai bilong en. I gat kain kain tarangau bilong nait na ol i gat narapela narapela kain pes, tasol ‘planti i gat bikpela het, na gras i raunim ai bilong en i olsem plet. Olsem na dispela gras i save bungim krai bilong ol samting i go long en na i go insait long yau.’ (The World Book Encyclopedia) Ai bilong tarangau bilong nait i narapela kain long ai bilong ol narapela pisin, long wanem, ai bilong en i no inap lukluk raun long ol samting na i no inap meknais​—em i pas tasol. Olsem na tarangau bilong nait i mas tanim het bilong en bilong lukim wanpela samting i wokabaut i go. Em inap tanim het i go olgeta na lukim ol samting i stap baksait!

Gras bilong en i narapela kain, olsem na taim em i flai antap na win i holim gras bilong en, i no gat pairap. Em i save mekim wok long ai na yau bilong en long painim abus, olsem rat samting, na pul bilong en i no pairap liklik, olsem na wantu em i sut i kam daun na holim abus. Na em i save helpim gut ol fama, long wanem, em i save pinisim ol rat i save bagarapim gaden.

Wanpela buk (Book of North American Birds) i tok: ‘Planti lain man long olgeta hap i ting taim dispela kain pisin i raun long hap bilong ol, dispela i makim olsem wanpela samting nogut i kamap o wanpela man i dai.’ Baibel i save stori long tarangau bilong nait. Aisaia 13:21 i stori long ol “pisin bilong nait” bai pulap long ol pipia haus bilong Babilon.

Bikpela tarangau bilong nait i save kaikai planti. Wanpela buk i tok: ‘Wan wan taim bikpela tarangau bilong nait i bin flai i kam daun bilong kisim hat long het bilong man o meri, em hat ol i bin wokim long skin bilong wanpela animal. Ating pisin i ting em wanpela animal tru!’ Long Lo bilong Moses tarangau bilong nait em wanpela pisin i no klin na ol i no bin kaikai, tasol yumi ken tok tarangau bilong nait i narapela kain pisin tru na em i save litimapim nem bilong Man i bin wokim em.​—Wok Pris 11:​16, 17.

[Ol Piksa long pes 31]

Bikpela tarangau bilong nait​—gutpela ai na yau, na pul bilong en i no save pairap

[Kredit Lain]

Photos: Courtesy of Green Chimneys Wildlife Rehabilitation Center, Brewster, NY