Pas Bilong Ol Man
Olgeta Lain Ol stori “Olgeta Lain Inap Kamap Wanbel?” (Jun 8, 1994) i bin helpim mi long save olsem wanem pasin bilong birua long man bilong narapela skin o lain i bin kirap. Na nau mi save olsem wanem ol lain i kamap bihain i bin kisim dispela kain tingting. Na tu, nau mi save bilong wanem sampela Kristen i no stap isi wantaim ol man bilong narapela skin o lain. Bipo ol dispela samting i mekim na mi bel hevi, tasol nau mi save ol i no inap rausim wantu dispela tingting nogut. Mi amamas long wetim stretpela nupela taim God bai kamapim na long dispela taim skin na lain bilong ol man bai i no bikpela samting.
C. W., long Amerika
Hevi Long Skin Dispela stori long “Ol Yangpela i Laik Save . . . Olsem Wanem Mi Inap Karim Hevi Long Skin i Bagarap?” (Mas 8, 1994) i stret tru, winim planti ol narapela stori bilong dispela kain hevi. Mi bin wok sampela yia long brens-ofis bilong ol Witnes Bilong Jehova long Rom, Itali, na bihain bikpela birua i painim mi long ka, olsem na bun bilong baksait bilong mi i bagarap. Ol samting i no hatwok long mekim, olsem wokabaut o holim wanpela glas i gat wara long en, nau i hatwok tru long mi. Nau i mas i gat man bilong helpim mi long lusim bet, pasim klos bilong mi, helpim mi long go antap long lata, na bilong mekim sampela samting moa. Inap longpela taim liklik mi kros, na bel hevi, na tingim hevi bilong mi tasol. Tasol bihain mi save mi no inap stretim hevi—mi mas karim tasol. Skin bilong mi i kamap orait liklik, long wanem, wanpela gutpela nes bilong wokim han lek samting i helpim mi, na papamama na ol pren bilong mi, ol tu i givim bel long helpim mi. Olsem na mi inap wok yet long brens-ofis. Tru tumas, maski yumi karim hevi long skin i bagarap, yumi inap mekim yet ol gutpela wok!
A. E., long Itali
Painim Ol Ston Mi wanpela dokta, olsem na mi amamas long kaunim stori bilong yupela, “Painim Ol Gutpela Samting i Stap Hait.” (Epril 8, 1994) Tasol taim mi kaunim dispela stori, mi lukim olsem yupela i no bin toktok long man i mekim wok long wanpela hama, em i mas pasim wanpela samting bilong lukautim ai bilong em. Dispela i bikpela samting, long wanem, taim hama i paitim ston ol liklik pipia ston bai sut i kam antap na dispela inap bagarapim ai bilong man.
G. T. W., long Inglan
Mipela amamas long samting yu bin kamapim na man i ken was gut long ai bilong em.—ED.
Ol Stori Bilong Animal Mi wanpela Sulu na mi gat 20 krismas. Mi save amamas long lain long ol gutpela samting God i bin wokim. Mi amamas tru long stori bilong yupela, “Em i No Pairap Liklik.” (Februeri 8, 1994) Long lain Sulu, tarangau bilong nait i makim olsem wanpela samting nogut i kamap na ol i ting em samting bilong marilaman na glasman na posinman. Taim ol manmeri i lukim tarangau bilong nait ol i save rausim. Olsem na mi amamas long gutpela stori bilong yupela. Yupela i no kamapim planti tok, tasol tok yupela i kamapim i givim gutpela save long mi.
Z. P. M., long Saut Afrika