Pas Bilong Ol Man

Ston Long Kidni  Mi raitim dispela pas bilong tok tenkyu long yupela long stori “Ston Long Kidni​—Stretim Sik Bilong Bipo Yet.” (Jun 8, 1994) Dispela stori i stret long dispela taim, long wanem, liklik taim bihain long nius i kamap, mi kisim save olsem mi yet i gat ol ston long kidni. Tenkyu tru long dispela stori. Nau mi save long as bilong sik bilong mi na mi inap redi taim mi mas go long haus sik.

V. T., long Amerika

Olgeta Lain  Mi raitim liklik pas bilong tok tenkyu long ol nambawan stori “Olgeta Lain Inap Kamap Wanbel?” (Jun 8, 1994) I hatwok long stori long kain samting olsem, tasol mi ting yupela i bin stori gutpela tru. Yupela i no mekim wanpela tok bilong skrapim bel bilong man, tasol yupela i no mekim wanpela tok na bai man i gat rot long bel nogut long ol man bilong narapela lain na skin, em wanpela pasin nogut tru.

D. G., long Amerika

Go Long Narapela Kantri  Tenkyu tru long stori “Ol Yangpela i Laik Save . . . I Gutpela Mi Go Long Kantri i Gat Gutpela Sindaun?” (Februeri 8, 1994) Bipo mi ting bilong helpim sindaun bilong mi, i gutpela mi go long narapela kantri. Nau mi save, i no liklik samting sapos mi lusim ples na go long narapela kantri. Mi mas tingting gut pastaim na skelim gut ol samting. Na dispela stori i helpim mi long save wanem ol samting i bikpela samting bilong helpim sindaun bilong mi na helpim mi long kisim trupela amamas maski mi stap we.

M. R., Ripablik Dominika

Aiglas  Tenkyu tru long raitim stori “Yumi Lukluk Long Aiglas.” (Epril 8, 1994) Dispela stori i kamapim ol gutpela tok. Taim mi no ritim yet dispela stori mi no save lukautim gut aiglas bilong mi. Taim mi lusim aiglas mi bin slipim na bai glas i stap aninit na i holim samting, glas i no stap antap, olsem na glas i save bagarap. Olsem na mi bin baim kontak-lens, tasol dispela i mekim na ai bilong mi i raun. Mi no gat narapela rot, mi mas i gat aiglas, tasol mi bai bihainim ol gutpela tok yupela i bin kamapim long dispela stori.

T. C., long Itali

AIDS  Mi amamas long kaunim ol stori long sik AIDS long “Ol Yangpela i Laik Save . . . ” bilong Jun 8, 1994 na Julai 8, 1994. Mi gat 20 krismas na bipo mi sem long wanem mi wanpela nupela meri, mi no bin slip wantaim wanpela man. Tasol taim mi kaunim ol dispela stori, mi save pasin bilong stap nupela meri i no samting bilong sem long en, em i wanpela gutpela presen Jehova i givim long mi.

L. K., long Amerika

Mi ting i no stret long tok olgeta man na meri i pamuk ol inap kisim sik AIDS olsem ol man i save mekim pasin sodom. Ol saveman i skelim dispela sik i tok, planti man i save mekim pasin sodom ol i save kisim sik AIDS, winim ol man na meri i pamuk.

J. S., long Amerika

Tru tumas, ol man i save skelim sik AIDS i tok ol man i mekim pasin sodom inap kisim dispela sik, winim ol man i pamuk. Tasol ol saveman i tok, nau planti man na meri i save mekim pasin pamuk, ol tu i kisim dispela sik. Na wanpela mausman bilong lain “U.S. Food and Drug Administration” i tok, nau planti meri ‘long dispela kantri i kisim jem bilong sik AIDS, winim ol man.’ I no olsem asua bilong olgeta meri na ol i kisim dispela sik, nogat; planti i kisim dispela sik, long wanem, man bilong ol i pamuk.​—ED.