Pas Bilong Ol Man

Lusim Sin Nau tasol mi kaunim pinis stori i stap long “Baibel i Tok Wanem . . . God i Save Lusim Tingting Olgeta Long Sin Bilong Yumi?” (Oktoba 8, 1994) Dispela stori i stret tru long mi. Stori i bin helpim mi long save, taim God bilong yumi i lusim sin bilong yumi, em i lusim tingting olgeta long dispela sin. Taim mi raitim dispela pas long yupela, mi pilim olsem bel bilong mi i stap isi tru.

J. W., long Amerika

Bel bilong mi i amamas long save, Jehova i lukim bel bilong yumi, na em i amamas long lusim tingting olgeta long sin bilong yumi. Bipo mi pilim olsem Jehova i no inap tru lusim tingting long rong bilong mi, olsem na mi bel hevi stret. Mi bin tingting long kilim i dai skin bilong mi yet. Sampela gutpela pren bilong mi insait long kongrigesen i bin helpim mi. Tasol bel bilong mi i no stap isi tumas yet, olsem na dispela stori i bin helpim mi.

K. H., long Amerika

Aiglas Tenkyu tru long stori “Yumi Lukluk Long Aiglas.” (Epril 8, 1994) Mi save ai bilong mi i no gutpela tumas na em i gutpela sapos mi go lukim dokta bilong ai, tasol mi no bin mekim. Taim mi kaunim pinis dispela stori, mi makim taim bilong go lukim dokta. Mi amamas mi bin mekim olsem​—dispela stori i kam long taim stret bilong helpim mi.

J. W., long Inglan

Papa na Pikinini i Stap Gut Long God Taim mi kaunim stori “Papa Bilong Mi i Stap Olsem Gutpela Piksa” (Ogas 8, 1994), mi no malolo​—mi kaunim i go i go. Dispela stori i kirapim mi long mekim sampela wok moa long autim tok. Pasin bilong Lester Davey na pikinini man bilong em, Michael, long sanap strong na mekim laik bilong Jehova inap long taim ol i dai, i bin stretim bek tingting bilong mi long mekim olsem. Taim mi baptais long 1992 mi gat 18 krismas na long dispela taim mi tu i strong long mekim laik bilong Jehova. Dispela stori i kirapim gen dispela laik long bel bilong mi. Mi laik bai kain stori olsem i helpim planti narapela yangpela long olgeta hap.

C. M., long Itali

Ol Naispela Piksa Mi amamas tru long lukim piksa long skin bilong Kirap! bilong Julai 8, 1994, em piksa long nupela taim God bai kamapim. Mi bin lukluk strong long dispela piksa na beten askim Jehova long mi ken i stap long dispela taim. Sampela de bihain mi lukim gen dispela piksa na mi gat wankain tingting long en. Tenkyu tru long gutpela piksa bilong strongim bel bilong mi.

S. H., long Amerika

Mi no save husat i wokim ol piksa long ol buk na nius bilong yupela, tasol ol i gutpela tru! Mi no lukim planti buk i gat ol gutpela piksa olsem ol piksa i stap long ol buk na nius bilong yupela. Mi man bilong wokim ol piksa, olsem na mi gat save long wanem wanem piksa i gutpela tru.

D. W., long Amerika

Raun Long Bas Taim mi bel hevi liklik, sampela taim mi save samapim laplap na harim kaset i gat ol stori bilong Kirap! long en. Mi harim stori “Raun Long Bas i Go Namel Long Ostrelia” (Mas 8, 1994), na mi amamas tru long dispela stori na em i mekim na bel bilong mi i gutpela​—i olsem mi tu i raun long dispela bas na mi insait long ol gutpela samting i kamap​—mi no tingim moa bel hevi bilong mi. Tenkyu tru.

A. W., long Amerika