Ol i Lukautim Gut Haus Bilong Ol
Wanpela man long Saut Afrika i raitim dispela stori bilong Kirap!
LONG sampela hap bilong bikbus long Afrika i gat wanpela kain diwai ol i kolim bateria. Ol han bilong dispela diwai i no gat bel bilong en—i gat hul insait. Diwai i hatwok long go bikpela, long wanem, bikbus i pas pas. Na mosong na ol rop i save go antap i pasim diwai long go bikpela, olsem na ol lip bilong en i no inap kisim san. Wanpela kain blakpela anis i save mekim bikpela wok bilong lukautim dispela diwai. Wanpela stori long televisen (African Rainforest: Korup bilong Phil Agland na Michael Rosenberg) i soim wok bilong dispela anis bilong helpim diwai bateria. Ol i wokim dispela piksa wokabaut long bikbus Korup long Kamarun.
Long piksa wanpela meri anis i olsem kwin bilong ol blakpela anis, em i raun painim wanpela diwai bateria. Em i save ol han bilong diwai bateria i gutpela tru bilong wokim haus bilong en. Em i wokim hul long wanpela han bilong diwai na putim ol kiau bilong en i go insait. Na wanpela kain liklik binatang i save kaikai blut bilong diwai bateria ol i stap insait long ol han bilong diwai. Ol anis i save lukautim ol dispela liklik binatang olsem samting bilong ol yet, na ol i save kisim susu long ol bilong dring.
Taim ol anis i kamap planti, ol i kirap na rausim ol kain kain binatang samting i stap long diwai, i olsem ol i klinim diwai. Man! Em i gutpela tru long lukim wok bilong ol anis long lukautim na klinim diwai bateria olsem haus bilong ol! Sampela anis i go long as bilong diwai na kaikaim ol rop i wok long go antap na bagarapim diwai, olsem na ol rop i dai. Na sampela anis i wok long rausim ol pipia lip na mosong. Ol i painim wanpela katapila i hait i stap aninit long wanpela lip—ol i rausim em tu.
Stori bilong televisen i tok: ‘Ol anis i no lusim wanpela liklik hap pipia, ol i klinim gut olgeta samting. Nau diwai bateria i no gat wanpela samting i pasim em long resis wantaim ol narapela diwai long go bikpela. Tasol ol anis i kisim wanem gutpela samting long hatwok bilong ol? Ol inap stap insait long ol han bilong diwai na lukautim gut ol liklik binatang ol i kisim susu long en—em kaikai bilong ol—na mekim bikpela long pikinini bilong ol.’
Ol anis i no save les! Wanpela savetok bilong Baibel i tok: “Yupela ol lesman, . . . go lukim gut pasin bilong ol anis na bai yupela i kamap saveman.”—Sindaun 6:6.