Bikpela Lain Ami i Wokabaut i Go!

“Mipela i stap long wanpela liklik ples long Belis em ol i wok yet long wokim, em i gat planti bus i raunim. Wanpela moning long 9 klok samting, bikpela lain anis i kam insait long haus bilong mipela. Ol anis i kapsait i kam aninit long dua na long olgeta hap i gat bruk long en, bilong painim kaikai. Mipela i no inap mekim wanpela samting, na mipela i mas lusim haus inap wanpela o tupela aua, taim ol anis i pulap long haus. Taim mipela i kam bek, no gat wanpela liklik binatang i stap, haus i klin olgeta.”

LONG PLANTI MANMERI i stap long ol kantri i gat bikpela san, olsem Belis, dispela samting i save kamap long planti taim na i no olsem em i nogut olgeta, nogat. Em wanpela rot bilong rausim ol samting nogut olsem kokoros na ol narapela binatang. Na ol i no larim wanpela liklik pipia i stap.

Long dispela stori, ol i kolim ol dispela anis olsem bikpela lain ami, long wanem, i stap bilong ol na wok ol i mekim i olsem ol ami.a Ol dispela planti handet tausen anis olsem lain ami ol i tripman, ol i no save wokim ol haus bilong i stap oltaim long en, nogat. Ol i save wokim ol haus bilong stap sotpela taim tasol, ol anis i save bung bung na pasim lek bilong ol wantaim bilong wokim banis i raunim kwin bilong ol na ol nupela liklik pikinini bilong em. Taim ol i stap long dispela haus, ol i salim sampela anis long ol longpela lain bilong go painim kaikai olsem ol binatang na ol liklik palai samting. Ol lain anis i go pas ol bai mekim tu wanpela samting olsem ol bai surik i go i kam long sait sait bilong pulim abus. Dispela samting i kamap taim i no gat smel bilong ol binatang em ol i ken bihainim​—⁠ol anis i go pas bai les long i go moa na ol i stop. Ol anis long baksait bai strong yet long subim ol anis bilong poret, na taim ol i mekim olsem, nau dispela samting i kamap.

Insait long 36 de, dispela lain anis i save inapim raun bilong ol, 16 de ol bai wokabaut raun painim kaikai na long narapela 20 de ol i stap long wanpela hap tasol, na long dispela taim kwin i putim ol kiau. Bihain long dispela, hangre i mekim na nau ol i kirap raun gen. Braitpela bilong lain bilong ol em 10 mita samting, na long arere em ol spaida, skopion, binatang bitel, rokrok, na ol palai, na ol pisin i wok long bihainim ol na kaikai ol dispela binatang samting i laik ranawe, tasol ol i no kaikai ol anis.

Long Sindaun 30:​24, 25, Baibel i tok, ol anis i gat “gutpela tingting tru.” Em nau, ol anis i wanpela bilong ol gutpela samting tru God i bin wokim.

[Futnot]

[Piksa long pes 16]

Bikpela lain anis

[Kredit Lain]

© Frederick D. Atwood

[Piksa long pes 16]

Ol i pasim ol lek bilong ol wantaim na sanap olsem bris

[Kredit Lain]

© Tim Brown/www.infiniteworld.org