Pas Bilong Ol Man

Ol Kibung Intenesenel Mi laik tok tenkyu long yupela long ol stori, “Olsem Wanem Olgeta Lain Inap Stap Wanbel?” (Ogas 8, 1994) Mi amamas tru long kaunim stori long ol kibung intenesenel bilong ol Witnes Bilong Jehova long Isten Yurop. Taim mi kaunim stori olsem sampela Kristen bilong ol kantri i gat pait long en ol i kam long kibung, dispela i strongim tru bel bilong mi.

E. R., long Amerika

Mitupela man bilong mi i save autim tok long olgeta de olsem painia, olsem na mipela i no gat mani bilong go long wanpela kibung intenesenel long narapela kantri. Tasol taim mi kaunim ol stori yupela i bin kamapim long ol dispela kibung, mi pilim olsem mi bin stap long kibung. Na mi inap tingim olsem mi bin givim bel long singsing wantaim ol susa Kristen, em piksa bilong ol long pes 9 i kamapim. Dispela stori i strongim bel bilong mi long stap strong.

I. F., long Frans

Toktok Gut Wantaim Bihain long mi kaunim ol stori “Tupela Marit i Mas Toktok Gut Wantaim,” (Septemba 8, 1994) mi save, insait long 28 yia mi marit, mi no kamapim pasin sori long meri bilong mi em i laik mi kamapim. Taim meri i laik mi mekim sampela samting bilong kamapim sori bilong mi, mi bin sakim em, long wanem, mi ting bel na tingting bilong em i olsem bilong pikinini. Ol stori i bin helpim mi long save olsem God i wokim meri i narapela kain long man. Nau bai mi mekim traim long kamapim sori long meri bilong mi olsem em i laik mi mekim. Tenkyu tru long dispela stretpela save.

Y. K., long Japan

Mi amamas tru long ol dispela stori. Mi kirap nogut tru long stretpela save yupela i bin kamapim long tingting na bel bilong man na meri, olsem ol i narapela narapela kain. Em i helpim mi long skelim mi yet na save gut long tingting bilong mi. Mi no marit, tasol mi save ol dispela stori bai helpim mi long save gut long tingting bilong ol narapela man na meri.

D. R., long Itali

Stretim Ol Hevi Mi salim dispela pas bilong tok tenkyu long yupela long ol gutpela stori i save kamap long “Ol Yangpela i Laik Save . . .” Taim mi kisim nupela Kirap!, em namba wan stori mi save kaunim. Mi amamas tru long stori, “Husat Inap Helpim Mi Long Stretim Ol Hevi Bilong Mi?” (Oktoba 8, 1994) Klostu mi pinis long haiskul na mi hatwok long tingim ol samting bai mi mekim bihain. Olgeta taim mi na papamama i save toktok gut wantaim, tasol sampela taim mi pilim olsem ol i no save gut long tingting bilong mi. Dispela stori i bin helpim mi long save i bikpela samting long kamapim tingting na bel bilong mi long tupela na kisim ol gutpela tok na tingting bilong ol.

H. L., long Amerika

Rit Rait Bihain long mi kaunim wanpela stori long ol Kirap! planti taim mi laik salim pas long yupela na tok tenkyu. Tasol ol stori “Ol i Lain Long Rit Rait” (Novemba 8, 1994), i kirapim mi long mekim olsem. Long wik antap bai mi kirap na stadi Baibel wantaim wanpela meri em i no save rit rait. Bipo mi no save bai mi mekim olsem wanem, tasol nau mi save, long wanem, ol dispela stori i helpim mi. Ol i kamap long taim stret!

M. A. C., long Itali