Pas Bilong Ol Man
Toktok Gut Wantaim Nau mi kisim Kirap! bilong Septemba 8, 1994, na i gat sampela stori long “Tupela Marit i Mas Toktok Gut Wantaim.” Ating ol dispela stori i winim tru ol narapela stori mi bin kaunim. Mi marit pinis inap wanpela yia na hap. Mi wantaim man bilong mi i pas gut na i stap amamas wantaim, tasol sampela taim mipela i tok pait. Kirap! i stori gut long i gat wanem as na tok pait i save kamap. Nau mi kirap kaunim gen ol stori long namba 3 taim, na mi laik tok tenkyu long Jehova na long yupela long dispela tok i givim gutpela save long mipela.
C. M., long Amerika
Man bilong mi i mekim gutpela wok, em i wanpela elda Kristen na painia. Tasol kirap long taim mipela i marit nupela, mipela i no inap toktok gut wantaim na sampela taim hevi i kamap. Ol dispela stori i kamapim klia as bilong hevi. Mipela i save ol dispela tok bai helpim mitupela long pas gut wantaim.
C. A., long Japan
Mi kaunim stori long tingting bilong “Pam” na i wankain olsem bilong mi. Na tingting bilong man bilong mi i wankain olsem bilong “Jeri.” Dispela stori i no kamapim tasol ol hevi; em i kamapim as bilong hevi. Mi laikim tru gutpela pasin bilong raitim ol dispela stori long dispela bikpela samting.
E. F., long Itali
Nau mi gat 17 krismas tasol na mi no tingting yet long marit, tasol mi pilim tru ol dispela tok i kamapim klia tingting bilong man na meri i as bilong ol samting ol i mekim. Mi laik holim i stap ol dispela stori na kaunim gen sampela taim. Na taim mi redi pinis long marit bai ol dispela tok inap helpim mi!
N. B., long Amerika
Papa bilong mi i kain olsem “Jeri.” Tasol nau mi save, sapos em i no laik toktok wantaim mi, i stret em i ken mekim olsem. Stori hia i givim gutpela save long mi, tasol mi tingting planti, nogut papa i mekim wok long en bilong helpim pasin em i mekim.
A. B., long Amerika
Ol dispela stori i bilong helpim ol man i kaunim long save bilong wanem tingting na pasin bilong ol man na meri i narapela narapela. Tasol mipela i no laik tok, i stret ol i ken pasim maus o mekim pasin i no stret. Baibel i tok, ol papa ‘i no ken mekim ol pikinini i kros.’ (Kolosi 3:21) Olsem na i no stret sapos papa i pasim maus longtaim na ol pikinini i laik bai em i helpim ol na em i mas helpim ol.—ED.
Mi save yupela i kisim planti pas i tok ol dispela stori i gutpela. Mi tu mi laik tok olsem. Long stori bilong “Jeri” na “Pam” yupela inap raitim nem bilong mitupela meri bilong mi. Sapos mi bin pilim gut tingting bilong meri bilong mi, em gutpela! Mi olsem “Jeri”—mi mekim pasin long em, em mi laik bai ol narapela i mekim long mi. Mitupela i marit inap 20 yia, tasol nau meri i katim marit. Ating em bai pilim ol tok bilong ol dispela stori, na bai mipela i ken wok long stretim bek marit bilong mipela.
J. K., long Amerika