Ol Man na Ol Meri—Toktok Bilong Ol i Narapela Narapela Kain?

BIL i bel hevi taim em i wokabaut i go insait long ofis bilong Jeri. Jeri i sori long pren bilong em na wetim tok bilong em. Bil i tok: ‘Mi no save, mi inap mekim dispela wok o nogat. I gat planti hevi na ol bos long nambawan ofis i strong long mi mekim ol samting.’ Jeri i tok: ‘Bilong wanem yu tingting planti Bil? Yu hapman stret bilong mekim dispela wok na ol bos i save long dispela tu. No ken tingting planti. Man! Yu ting yu gat hevi? Long mun i go pinis . . .’ Nau Jeri i kirap na stori long popaia em i bin mekim, olsem na taim Bil i lusim ofis em i wok long lap. Jeri i amamas long em inap helpim pren bilong em.

Long apinun taim Jeri i kamap long haus em i save meri bilong em, Pam, i bel hevi long wanpela samting. Em i tok amamas long meri na wetim em i kamapim hevi bilong em. Tasol pastaim Pam i pasim maus. Bihain Pam i tok kros olsem: ‘Mi no inap karim dispela hevi moa! Nupela bos i man nogut!’ Jeri i sindaun na holim Pam na tok: ‘No ken bel hevi. Em wok mani tasol. Em pasin bilong olgeta bos. Olaman! Nau bos bilong mi tu i kros kros. Sapos yu no inap i stap long dispela wok, orait lusim.’

Nau Pam i krosim Jeri olsem: ‘Yu no sori long mi! Olgeta taim yu no harim tok bilong mi! Mi no ken lusim dispela wok! Pe yu kisim i no inap!’ Nau em i ran i go insait long rum slip bilong em, pasim dua na krai i stap. Jeri i kirap nogut tru na sanap ausait long dua. Em i tingting planti. Bilong wanem pren bilong em long ples wok i amamas long tok bilong em, tasol Pam i no amamas?

Man na Meri i No Inap Toktok Gut Wantaim?

Sampela bai tok, as bilong dispela i olsem: Bil em wanpela man; Pam em wanpela meri. Ol saveman bilong skelim ol tok ples i tok, hevi i kamap insait long marit, long wanem, man na meri i hatwok long toktok gut wantaim. Maski tok ples bilong man na meri i wankain, rot bilong kamapim tok i narapela narapela kain.

Taim Jehova i wokim meri long bun bilong man, em i wokim meri i narapela kain. Jehova i gat save na em i wokim gutpela skin na tingting bilong tupela. Em i laik bai narapela i tingim narapela long ol samting bilong skin, na bel, na tingting, na spirit. Na i no dispela tasol. Olgeta man i no gat wankain sindaun, na ol samting i painim ol i narapela narapela kain, na pasin na tingting bilong lain bilong ol i stiaim ol. Olsem na ol i no gat wankain tingting long pasin bilong man na pasin bilong meri. Olsem na ating yumi ken save, pasin bilong man long toktok i narapela kain long pasin bilong meri long toktok. Tasol ating dispela i kamap ples klia long ol buk bilong ol saveman bilong skelim tingting, na em tasol.

Ol meri i save tingim tru ol narapela manmeri, tasol planti man tu i gat wankain gutpela pasin. Sampela i tok, ol man i save skelim samting long tingting, winim ol meri. Tasol planti meri tu inap skelim gut ol samting long tingting. Olsem na yumi no ken tok, wanpela pasin em pasin tru bilong man tasol, o wanpela pasin em pasin tru bilong meri tasol. Yumi save: Sapos narapela i save gut long tingting bilong narapela, ating tupela i no inap tok pait, tupela bai stap bel isi. Dispela i bikpela samting long ol marit.

Long olgeta de, taim man i toktok wantaim meri bilong em, hevi inap kamap. Olsem na sapos man na meri i gat gutpela tingting, ol bai was gut taim ol i toktok wantaim poroman marit bilong ol, nogut tok bilong ol i bagarapim bel bilong poroman. Sapos pasin bilong poroman marit i narapela kain liklik, poroman i gat pasin sori i no inap toknogutim em, na em i no ken strong long bihainim pasin bilong em tasol. Em bai sori long poroman na wok long save gut long tingting na bel bilong em.

Olgeta wan wan manmeri i narapela narapela kain. Na olgeta wan wan marit i narapela narapela kain. Yumi ol manmeri i no stretpela olgeta, olsem na ol marit i mas wok strong long pas gut wantaim. Ating yumi inap ting, tingting bilong narapela long ol samting i wankain long tingting bilong yumi, a? Na yumi save mekim wankain pasin long ol olsem yumi laik bai ol i mekim long yumi. Ating yumi laik bihainim tok bilong Jisas, em i tok, ‘Samting yu laik bai ol narapela i mekim long yu, yu mas mekim long ol.’ (Matyu 7:12) Tasol Jisas i no tok, samting yu laikim, em inap long ol narapela, nogat. I olsem yu laik bai ol narapela i givim samting long yu, em yu sot long en o yu laikim, olsem na samting ol i sot long en, i gutpela yu givim long ol. Dispela i bikpela samting long ol marit, long wanem, taim tupela i marit nupela, tupela i tok promis pinis long mekim sampela samting inap long strong na save bilong ol bilong helpim poroman marit.

Pam na Jeri i bin mekim tok promis olsem. Inap tupela yia ol i marit pinis na tupela i stap amamas. Tasol maski narapela i ting em i save gut long narapela, sampela taim sampela samting i kamap na narapela i no inap kamapim tru tingting bilong em long narapela. Baibel i tok: “Man i gat gutpela tingting, em i save tingting gut pastaim na bihain em i mekim gutpela tok.” (Sindaun 16:23) Tru tumas, taim tupela i toktok wantaim, i gutpela sapos narapela i wok long pilim gut toktok bilong narapela. Dispela i bin helpim Jeri na Pam. Olsem:

Tingting Bilong Wanpela Man

Long ples wok bilong Jeri, ol bos na ol man i wok aninit long ol, ol i mekim ol samting i makim wok bilong ol​—em wanpela bos o em man i save wok aninit long bos. Pasin bilong ol long toktok wantaim i kamapim klia husat i bos, na husat i gat save, na husat i gutpela wokman. Jeri i ting pasin bilong bihainim laik na tingting bilong em yet i bikpela samting. Olsem na taim wanpela i strong na i pul tumas long Jeri i mas mekim wanpela samting, maski dispela samting i stret, Jeri i no laik; em i bikhet.

Jeri em i save toktok wantaim sampela bilong lainim ol long sampela samting, o ol i toktok wantaim Jeri bilong lainim em. Jeri i laik stori long ol nupela tingting na save em i bin kisim.

Taim Jeri i harim tok bilong narapela, em i no save katim tok bilong em bambai em inap kisim save. Tasol sapos em i no wanbel wantaim dispela tok, ating wantu em bai tokaut. Taim em i mekim olsem, i olsem em i tingim gut tok bilong narapela man.

Sapos Jeri i gat wanpela hevi, em bai lusim ol narapela na em wanpela i stap bilong tingim rot bilong stretim hevi. O em bai mekim wanpela samting bilong helpim em long lusim tingting long dispela hevi inap liklik taim. Sapos em i laik bai narapela i helpim em, long dispela taim tasol em bai stori long hevi bilong em.

Sapos wanpela man i gat hevi na em i kamapim long Jeri olsem Bil i bin mekim, Jeri i save em wok bilong em bilong helpim dispela man. Na Jeri bai was gut, nogut tok em i mekim bilong helpim pren bilong em bai semim em. Na taim Jeri i givim tok bilong helpim pren bilong em, ating em bai kamapim sampela hevi bilong em yet bilong strongim bel bilong pren.

Jeri i save amamas long mekim sampela samting wantaim ol pren bilong em. Em i ting dispela i rot bilong pren gut wantaim.

Taim Jeri i stap wantaim famili i olsem em i kisim malolo​—em i no tingim moa hevi na hatwok long ples wok. Em i save meri bilong em i orait long em, na bilip long em, na sori long em, na meri i pilim tru ol gutpela pasin bilong em. Tasol maski i olsem, wan wan taim Jeri i laik i stap wanpis. I no olsem Pam i bin mekim wanpela samting na Jeri i laik i stap wanpis, nogat; Jeri i laikim liklik hap taim bilong i stap olsem. Jeri i hatwok long kamapim ol hevi na pret bilong em long Pam. Em i no laik bai Pam i tingting planti. Em i save wok bilong em i bilong lukautim Pam na em i laik bai Pam i bilip olsem em inap mekim dispela wok. Jeri i laik bai Pam i helpim em, tasol em i no laik bai Pam i sori sori long em, long wanem, dispela bai daunim Jeri na em i no inap mekim gut wok bilong em.

Tingting Bilong Wanpela Meri

Pam i ting i bikpela samting bilong prenim ol narapela. Pam i ting long rot bilong toktok wantaim narapela, em na ol narapela inap pren gut na dispela pasin pren inap i go bikpela.

Pam i amamas long stap aninit long Jeri, tasol taim Jeri i tingting long pasim tok long wanpela samting na em i kisim tingting bilong Pam, nau Pam i save Jeri i laikim tru em. Na maski Jeri i kisim tingting bilong Pam, Pam i laik bai Jeri i go pas long mekim ol samting. Taim Pam i laik pasim tok long bel long mekim wanpela samting, em i amamas long askim Jeri pastaim. Em i no mekim olsem na bai Jeri i ken tokim em long olsem wanem em i mas mekim dispela samting, nogat; samting em i mekim i soim olsem em i pas gut wantaim Jeri.

Sapos Pam i sot long wanpela samting, em i sem long askim Jeri. Em i no laik toktok planti na askim askim na Jeri i ting em i no amamas. Em i wet tasol na Jeri i ken luksave long samting Pam i laikim, o Pam bai mekim ol tok bokis bambai Jeri i ken save long samting em i laikim.

Taim Pam i toktok wantaim narapela, em i givim planti askim, long wanem, em i save tingim gut ol manmeri na em i laik prenim ol.

Taim Pam i harim tok bilong narapela em i save katim tok liklik o em i meknaisim het bilong em bilong truim tok o em i givim sampela askim. Dispela i makim olsem Pam i harim na tingim gut tok bilong narapela.

Em i save wok strong long painim rot bilong save ol man i sot long wanem wanem ol samting. Olsem na taim ol man i no askim yet, Pam i kirap na helpim ol. Long dispela rot em i kamapim pasin sori bilong em. Na em i laik tru long helpim man bilong em.

Taim Pam i gat hevi, bel bilong em i bagarap stret. Em i mas kamapim bel bilong em long wanpela i save gut long em na em i ken sori long em. Taim Pam i tingting planti olsem, ating ol tok kranki i kamap olsem: ‘Olgeta taim yu no harim tok bilong mi!’

Taim Pam i pikinini, gutpela pren bilong em i no wanpela pikinini em i save pilai wantaim em, nogat; em i wanpela pren Pam inap kamapim olgeta tok long em. Olsem na bikpela samting long marit bilong Pam i olsem em i mas i gat rot bilong kamapim olgeta tingting bilong em long poroman marit na poroman i mas putim gut yau long tok bilong em.

Pam i save famili i gutpela ples bilong toktok. Em i ken kamapim ol pret na hevi bilong em na Jeri i no ken kotim em. Na sapos em i laik bai Jeri i helpim em, em i no sem long askim em. Em i save Jeri i tingim gut em na em bai harim gut tok bilong em.

Klostu olgeta taim Pam i save Jeri i laikim tru em, olsem na em i stap belgut na bel isi. Tasol wan wan taim i no gat as na em i kisim tingting kranki olsem Jeri i no laikim tru em na bel bilong em i no stap isi. Em i laik bai Jeri i poromanim em na kamapim sori bilong em.

Tru tumas, Jeri i narapela kain na Pam i narapela kain. Tupela i gat ol gutpela laik na narapela i laik helpim narapela, tasol narapela i no inap save gut long tingting bilong narapela. Orait, sapos yumi inap kisim tingting bilong narapela narapela long dispela hevi, tupela bai tok wanem?

Samting Tupela Yet i Tingim

Jeri bai tok: ‘Taim mi wokabaut i kam insait long haus, kwiktaim mi save Pam i gat hevi. Mi ting taim em i redi em bai kamapim bel bilong em long mi. Mi ting hevi bilong em i no bikpela. Mi ting sapos mi helpim em long tingim rot bilong pinisim dispela hevi kwiktaim, bel bilong em bai stap isi. Bel bilong mi i bagarap stret taim mi harim tok bilong em​—“Olgeta taim yu no save harim tok bilong mi!” Mi pilim olsem em i ting hevi bilong em i asua bilong mi!’

Pam bai tok: ‘Dispela de olgeta i nogut tru. Mi save em i no asua bilong Jeri na mi gat hevi. Tasol taim em i kam long haus na em i amamas, mi ting em i no tingim hevi bilong mi. Bilong wanem em i no askim mi long hevi bilong mi? Na taim mi kamapim hevi, em i mekim ol tok olsem hevi bilong mi i no bikpela. Em i ting mi gat tingting kranki. Mi no laik bai em i kamapim rot bilong stretim dispela hevi; mi laik bai em i sori long mi!’

Inap liklik taim Jeri na Pam i no wanbel long dispela samting, tasol narapela i laikim tru narapela. Olsem na wanem tok bai helpim tupela long kamapim long ples klia pasin sori bilong tupela?

Tingim Tingting Bilong Poroman

Jeri i ting i no stret sapos em i askim Pam long hevi bilong em, long wanem, taim Jeri i gat hevi, em i no laik bai narapela i askim em. Olsem na em i wetim Pam i kamapim hevi bilong em. Tasol Pam i no ting Jeri i tingim em na wet i stap, nogat. Em i ting Jeri i no sori long em. Taim Pam i toktok, Jeri i harim tok tasol, em i no katim, olsem na Pam i ting Jeri i no save gut long hevi bilong em. Na Jeri i no mekim sampela tok sori​—em i kamapim rot bilong stretim hevi, em tasol. Olsem na Pam i pilim olsem Jeri i ting hevi bilong em i no gat as, em samting nating.

Tasol sapos Jeri i bin pilim tingting bilong Pam na Pam i bin pilim tingting bilong Jeri, ating tupela bai toktok long narapela narapela rot, olsem:

Taim Jeri i kam long haus em i lukim Pam na save em i bel hevi. Olsem na long pasin isi em i tok: ‘Olsem wanem, lewa bilong mi?’ Nau Pam i krai na kamapim hevi bilong em. Pam i no tok: ‘Em asua bilong yu!’ Na em i no tok Jeri i no helpim em. Jeri i holimpas Pam na em i no les long harim tok bilong em. Taim Pam i pinisim tok bilong em, Jeri i tok: ‘Sori tru. Mi save long as na yu bel hevi.’ Pam i kirap na tok: ‘Tenkyu tru long harim hevi bilong mi. Nau bel bilong mi i stap isi, long wanem, mi save yu pilim hevi bilong mi.’

Tarangu, planti marit i no painim rot bilong stretim hevi, na ol i katim marit. As bilong dispela​—ol i no toktok gut wantaim. Tok pait i bagarapim tru planti marit. Stori i kamap bihain long dispela bai stori long olsem wanem dispela hevi i kamap na rot bilong stretim.