Pas Bilong Ol Man

Masin Bilong Wetlewa  Mi laik tok tenkyu tru long stori bilong Laurel Nisbet​—“Masin i No Inap Pasim Em Long Autim Tok.” (Novemba 8, 1993) Em i gutpela piksa tru long meri i gat strongpela bel, na bilip, na pasin bilong sanap strong, na givim bel tru long wok bilong Jehova. Mi gat ol sua long skin, tasol taim mi tingim bikpela sik bilong Sista Nisbet na planti yia em i mas karim hevi bilong dispela sik, sik bilong mi i samting nating.

R. L. H., long Amerika

Lek bilong mi i dai olgeta, olsem na mi no inap wokabaut. Mi bin toktok planti, long wanem, mi no inap raun tumas na autim tok. Tasol maski dispela meri i bin slip insait long masin na slip long baksait bilong em inap 37 yia, em i bin autim tok na kamapim ol disaipel. Olsem na mi save, mi mas orait long wok mi inap mekim.

M. L., long Itali

Mipela amamas long harim ol tok olsem. Tru, planti i no gat bikpela sik olsem Sista Nisbet na ating sik bilong ol i no bagarapim ol olsem, tasol ol tu i hatwok na karim bikpela pen na hevi.​—ED.

Ol Meri​—Litimapim Nem Bilong Ol Tenkyu long ol stori “Ol Meri​—I Stret Yumi Litimapim Nem Bilong Ol.” (Epril 8, 1993) Ol i bin helpim mi long save, dispela hevi olsem man i nambawan na meri i nambatu tasol i no stap long wanpela lain man tasol, em i stap long planti lain. Na mi amamas long kaunim tok bilong yupela long sampela rot bilong abrusim pasin bilong bagarapim meri.

S. A., long Naijiria

Mi amamas long ol dispela stori i no haitim tok. Tok yupela i bin kamapim bai helpim planti man na meri long skelim gut tingting bilong ol long dispela samting. Tenkyu tru long kamapim tingting bilong Jehova long ol meri.

J. P. L., long Kanada

Mi save tok bilong yupela long tingting bilong man long meri, i no ken senisim tingting bilong olgeta man long dispela graun, tasol mi amamas long kaunim ol tok tru bilong yupela na tok bilong mekim bel bilong ol meri i stap isi. Na yupela i pilim tru hevi bilong ol meri. Tru tumas, Jehova i save tingim tru mipela ol meri.

H. Q., long Amerika

Ol dispela stori i sutim tru bel bilong mi. I no olsem mi no tingim gut meri bilong mi, tasol ating mi ken mekim sampela samting moa bilong helpim em. Mi save litimapim nem bilong meri bilong mi na mi ting ol dispela stori bai helpim olgeta man Kristen long tingim gut meri bilong ol. Tru tumas, olgeta man marit i mas tingim gut meri bilong ol, na laikim tru ol, na save ol i no olsem samting nating tasol.

S. S., long Brasil

Indai  Ol stori long “Taim Wanpela Bilong Yumi i Dai” i sutim tru bel bilong mi. (Me 8, 1993) Long de stret mipela kisim dispela nius, tambu bilong mi i dai long sik kensa. Em i gat 16 krismas tasol. Mipela i bel hevi stret, tasol ol stori bilong yupela i strongim bel bilong mipela. Ol pren na wanblut i kam helpim mipela​—ol i kisim kaikai i kam, na ol i givim sampela gutpela tok bilong mekim gut bel bilong mipela, na helpim mipela long stretim ol samting bilong planim tambu bilong mi. Tru tumas, long rot bilong kain stori olsem, Jehova i save mekim gut bel bilong man i krai sori.

C. C., long Amerika