Pas Bilong Ol Man

Tok i Bagarapim Bel Ol stori “Tok i Bagarapim Bel i Kamap Tok i Mekim Gut Bel” (Novemba 8, 1996), ol i sampela bilong planti stori i soim yumi olsem Jehova i save tingim tru yumi. Ol stori long “Samting Bilong Helpim Man Bilong Dring na Famili” (Mas 8, 1993), “Ol Meri​—⁠i Stret Yumi Litimapim Nem Bilong Ol” (Epril 8, 1993), “Kros Pait Bilong Famili Bai Pinis o Olsem Wanem?” (Oktoba 8, 1993), “Help for Children of Divorce” (Epril 22, 1991)​—⁠olgeta i bin strongim mi inap planti yia taim man bilong mi em i dring oltaim na mekim ol samting bilong bagarapim bel bilong mi. Mi kaunim ol dispela stori na aiwara bilong amamas na aiwara bilong bel hevi i bin kamap. Mi save amamas tru long wanpela God em i save long ol pret, pen, na hevi i stap long bel bilong yumi.

J. C., long Kanada

Mi pilim tru ol dispela stori. Ol i stori long wankain hevi mi bin kisim long man bilong mi. Mi wanbel long olgeta tok bilong ol dispela stori. Yupela save mekim gut tru long ol meri, na dispela i kamapim klia long mi olsem Jehova i save mekim wok long dispela oganaisesen.

P. S., long Jemani

Ol stori i strongim mi long wok yet long daunim wanpela pasin bilong mi i no stret​—⁠mi mas wok long bosim maus bilong mi. Nau mi save mi mas mekim wanem kain pasin long man bilong mi. Aiwara i pulap taim mi kaunim ol dispela stori.

G. I., long Ostria

Inap planti yia man bilong mi i bin toknogutim mi. Tasol bel bilong mi i no bagarap olgeta, long wanem, mi wok long kamapim ol pasin spirit holi bilong God i as bilong en, na mi wok strong long mekim wok autim tok long olgeta de. Ol stori bilong yupela i helpim mi na mi pilim olsem mi no stap wanpis​—⁠yupela i save long dispela hevi.

M. N., long Itali

Mi bin kaunim planti stori bilong yupela long bipo, tasol ol dispela stori mi pilim tru long bel. Taim mi lukim piksa long pes 9 i olsem mi lukim piksa bilong mama o susa bilong mi. Inap planti yia ol i bin kisim hevi long man bilong ol. Mi bin wokim kopi bilong ol dispela stori na salim i go long ol narapela mi save ol i karim wankain hevi. Mipela i amamas long wetim nupela taim God bai kamapim na ol kain kain tok nogut bilong bagarapim bel bai pinis olgeta.

B. P., long Kenya

Bipo Em i Kalabus Long Ol Samting  Mi amamas tru long stori “Tok i Tru i Stretim Wokabaut Bilong mi.” (Novemba 8, 1996) Mi gat 19 krismas, na maski mi wanpela painia oltaim, olsem meri bilong autim tok long olgeta de, sampela taim mi bin pilim olsem mi lus long sampela samting. Stori bilong Dolly Horry i bin helpim mi long save olsem, ol bilaspasin bilong dispela graun i olsem ol samting bilong amamas long en na no gat hevi long en, tasol nogat.

R. M. A., long Bolivia

Mi laik tokim yupela olsem mi pilim tru dispela stori. Taim mi bin kaunim stori bilong Dolly Horry, aiwara i kapsait i go daun long pes bilong mi. Mi laik bai dispela stori i ken helpim ol narapela i save mekim ol samting Dolly i bin mekim bipo na bai i stap bilong ol i kamap gutpela na i gat as bilong en.

O. S. O., long Naijiria

Mi wanpela Witnes Bilong Jehova, olsem na mi amamas tru long Dolly Horry em wanpela sista Kristen bilong mi. Taim mi gat 13 i go inap 19 krismas samting, Jehova i bin stap olsem namba 2 long laip bilong mi. Tasol mama i no les long helpim mi, na taim mi kisim baptais long yia i go pinis, amamas bilong em i bikpela tru.

B. B., long Ostrelia