Addie Em i Lapun Tasol Em i No Lapun Tumas Long Kisim Save

Em stori bilong wanpela meri blakskin. Inap 87 yia em i bin wok long helpim ol blakskin long painim gutpela sindaun. Nau em i sindaun long wanpela diwai arere long mangro na wok long kisim pis. Skin bilong em i gutpela, i no slek. Na tingting bilong em i wok gut. Em i no olsem meri nating i no gat nem. Em i strong, na em i gat save pinis. Ai bilong em i lait, na yu ken save em meri bilong lap. Na em i gat gutpela pasin daun. Em i meri bilong stori gut na taim em i stori, yu inap save ol gutpela pasin na tingting bilong Afrika na bilong Saut bilong Amerika, i pulap long bel bilong em. Harim tok bilong em taim em i tingting bek na stori long ol samting i bin painim em.

“MAMA bilong bubu mama bilong mi i bin karim em long wanpela sip bilong ol man bilong wok kalabus. Sip i kirap lusim Afrika na i laik go long Jojia. Pikinini i no gat strongpela skin na ol i ting em bai dai. Olsem na taim ol i baim mama bilong em i go long ol man, ol i larim em i holim pikinini. Ating em yia 1844 samting. Nem bilong pikinini, em Rachel.

“Dewitt Clinton i bin lukautim wanpela plantesen bilong ankol bilong em. Rachel i kisim bel long Dewitt na long Jun 1866, em i karim papa bilong mi, em Isaiah Clinton. Ol i bin givim hap nem long em olsem Aik. Taim em i pikinini, planti taim em i raun wantaim Dewitt long hos bilong em na Dewitt i bin lainim em long olgeta wok bilong plantesen. Sampela yia bihain Dewitt i tokim Aik olsem: ‘Nau em taim bilong painim wok mani bilong yu yet.’ Em i tok pinis, na nau em i rausim paus mani long let bilong em na givim long Aik.

“Bihain Papa bilong mi i bin go na wok long plantesen bilong Mista Skinner, na bihain em i kamap wasman bilong dispela plantesen. Em i bin maritim Ellen Howard, na long Jun 28, 1892, mama i karim mi long Provins Berk, klostu long Weinsboro, long Jojia. Sindaun bilong mi i gutpela tru. Mi no laik stap long haus, mi laik raun ausait na lukim ol samting. Tasol mama bai pasim mi inap long em i pasim gut klos bilong mi. Olgeta de mi harim em i tok: ‘Pasim klos na larim em i go.’ Mi laik stap klostu long papa, olsem na mi save kalap long hap bilong stia taim em i wok long brukim graun.

“Wanpela de long taim bilong san, bikpela ren i kam. Klaut i bruk na kilim i dai Mista Skinner na hos bilong em taim ol i raun long bikpela gaden. Misis Skinner em meri bilong Not na olgeta man bilong Provins Berk i nolaik tru long em, long wanem, Jeneral Sherman [em bilong Not] na ami bilong em i bin kisim taun Atlanta na kukim long paia. Olsem na ol i nolaik tru long Misis Skinner, winim pasin bilong ol long nolaik tru long ol blakskin! Misis Skinner i bekim dispela pasin ol i mekim long em. Bihain long man bilong em i dai, Misis Skinner i baim plantesen i go long papa bilong mi​—wanpela blakskin! Tingim: Paslain long yia 1900, wanpela blakskin i papa bilong wanpela plantesen long Jojia!”

Mista Neely na Stua Bilong Em

“Taim Papa i laikim wanpela samting, em i bin go long Mista Neely, em papa bilong stua. Olgeta samting i stap long dispela stua. Sapos man i sik na em i laik lukim dokta, em i save go long dispela stua. Sapos man i laik baim bokis bilong planim man, em inap kisim long dispela stua. Ol man inap dinau inap long ol gaden koten i redi na ol i kisim mani. Neely i save Papa i gat mani long beng, olsem na em i givim planti samting long mipela​—ol samting mipela i no sot long en​—olsem bokis ais, masin bilong samapim laplap, ol gan, ol wilwil, 2-pela donki. Papa i tok: ‘Mipela i no laik kisim ol dispela samting!’ Neely i tok: ‘Kisim. Bihain yu ken baim.’

“Wanpela taim Neely i bringim i kam wanpela bikpela blakpela ka. Papa i tok: ‘Mista Neely, mipela i no laik kisim! I no gat wanpela i save draiv o i save long lukautim ka. Olgeta i pret long en!’ Neely i no harim tok. ‘Maski Aik, holim. Bihain yu ken baim. Wanpela wokboi bilong mi bai lainim wanpela wokboi bilong yu long draiv.’ Dispela ka i no helpim mipela liklik. Wanpela taim mi askim askim papa long larim mi i go wantaim wanpela wokboi bilong kisim bensin. Papa i tok: ‘No ken holim stia. Mi save long yu!’ Taim papa i no inap lukim mipela moa, mi tokim draiva: ‘Mi laik traim. Papa i save bai mi mekim.’ Man! Ka i siksti na sut i go insait long bus. Mi tanim stia i go long han kais na han sut bilong abrusim ol liklik na bikpela diwai. Bihain ka i pundaun insait long wanpela liklik wara.

“Mi bin askim Papa bilong wanem em i orait long ol dispela kago Mista Neely i bringim i kam na em i tok: ‘Sapos mi no orait long en, bel bilong em bai bagarap. Na tu, lain KKK (Ku Klux Klan) i no save mekim nogut long ol pren blakskin bilong Mista Neely.’ Olsem na mipela i baim ol samting Mista Neely i bringim i kam, em ol samting mipela i no gat wok long en. Na mi save tingim wanpela tok Papa i save mekim long olgeta taim: ‘No ken baim wanpela samting yu no inap mekim wok long en. Sapos yu mekim olsem, bihain bai yu gat bikpela dinau na samting yu laik mekim wok long en, yu no gat mani bilong baim.’ Mi nolaik tru long Mista Neely!

“Long Janueri 1, 1900, mama i dai taim em i karim namba 4 pikinini. Mi gat 8-pela krismas, tasol long ples matmat mi tokim papa bai mi lukautim em.

“Bubu mama, nem bilong em Mary, i bin helpim papa long lukautim mipela ol pikinini. Em i meri i save givim bel long lotu, na maski em i no inap rit rait, em inap holim planti samting long tingting bilong em. Long haus kuk mi save sutim planti askim long em olsem: ‘Bilong wanem ol waitskin i no save laikim ol blakskin, tasol ol i tok long ai bilong God olgeta man i wankain? Taim yumi go long heven, ol waitskin tu bai stap? Mista Neely tu bai stap long heven?’ Mary i save bekim tok olsem: ‘Mi no save. Yumi olgeta bai amamas.’ Tasol mi gat tupela tingting long dispela bekim bilong em.

“ ‘Bubu, bai yumi mekim wanem long heven?’ Em i tok: ‘Man! Bai yumi wokabaut long ol rot ol i bin wokim long gol! Na bai yumi pasim pul na flai i go long olgeta diwai!’ Mi tokim skin bilong mi yet olsem: ‘Eh, mobeta mi stap long graun na pilai.’ Mi no gat laik long go long heven, tasol mi no laik go long bikpaia tu. Mi tok gen: ‘Bubu, bai yumi kaikai wanem samting long heven?’ Em i tok: ‘Ating bai yumi kaikai susu na hani!’ Mi bin singaut olsem: ‘Tasol mi no save laikim susu na hani! Bubu, bai mi hangre nogut tru! Bai mi dai long hangre long heven!’ ”

Mi Kirap Skul

“Papa i laik bai mi skul. Long 1909 em i salim mi i go long Skul Tuskeji, long Alabama. Wanpela tisa long dispela skul, em Booker T. Washington, i save strongim ol sumatin long planti samting bilong helpim ol long skul gut na bilong strongim bel na tingting bilong ol. Olgeta sumatin i save kolim em Papa. Em i save raun long planti ples bilong kisim mani bilong helpim skul. Bikpela hap bilong dispela mani em i kisim long ol waitskin. Taim em i stap long skul em i save tokim mipela olsem: ‘Skul gut. Painim wanpela wok mani na bungim mani bilong yupela​—no ken tromoi nating. Baim wanpela liklik hap graun. Taim mi kam lukim yupela, nogut yupela i no bin sarepim gras o penim haus o ol windo i bruk, olsem na yupela i pasim kol long ol olpela laplap. Amamas long yupela yet. Helpim lain bilong yupela. Helpim ol long skul na wok strong long helpim sindaun bilong ol yet. Yupela yet inap makim gutpela pasin ol i ken bihainim.’

“Na tru tumas, i mas i gat man bilong helpim ol long mekim olsem. Ol i gutpela man na ol i gat planti gutpela pasin. I gat sampela samting ol waitskin i mas tingim, em ol samting i bin painim ol blakskin bipo. Ol blakskin i no gat rot long kisim save, long wanem, ol i wok kalabus na lo i tok, ol wokboi kalabus i no ken skul. Ol narapela man i amamas long kam long dispela kantri, mipela ol blakskin i no laik. Ol i pasim sen long mipela na bringim mipela i kam. Inap 300 yia mipela ol blakskin i wok nating, mipela no kisim pe. Inap 300 yia mipela kamap wokboi olsem lain kalabus bilong ol waitskin, na kaikai na klos samting ol i givim long mipela, i no inap. Kirap long bikmoning i go inap nait ol i subim mipela long wok. Sapos mipela i mekim liklik popaia tasol, ol i wipim mipela. Na maski ol waitskin i larim mipela i go fri, ol i no larim mipela i skul. Ol i laik mipela i wok long fam bilong ol, na ol pikinini bilong mipela tu i mas wok long fam. Pikinini bilong mipela inap skul 3-pela mun tasol long olgeta wan wan yia.

“Na yu save em i wanem kain skul? Em i wanpela liklik haus lotu​—ol blakskin i no gat wanpela haus skul. No gat sia, olsem na sampela pikinini i mas sindaun long ol pipia bang na sampela i sindaun long plua. I gat bikpela san long mun Jun, Julai, na Ogas, na i no gat waia long windo bilong pasim ol binatang. I gat wanpela tisa tasol bilong skulim 103 pikinini. Insait long 3-pela mun, pikinini i no inap skul long planti samting, a? Wanpela taim long taim bilong malolo long skul Tuskeji, mi yet i skulim 108 sumatin bilong kain kain gret.

“Mi pinisim skul long 1913 na kamap wanpela nes. Long 1914 mi maritim Samuel Montgomery. Bihain em i go pait long Namba Wan Pait, na mi gat bel long dispela wanpela pikinini bilong mi. Liklik taim bihain long Samuel i kam bek long pait, em i dai. Mi kisim liklik pikinini man bilong mi na mitupela i kisim tren na go long Ilinoi bilong lukim brata bilong mi. Mi ting mi inap kisim wok nes long dispela hap. Ol man i bosim tren i tokim mipela ol blakskin long sindaun long haus ka bilong tren baksait long ensin. Man! Em hat nogut tru! Ol windo i op, olsem na blakpela paura na sit bilong paia bilong tren i karamapim mipela. Tupela de mipela sindaun long tren na nau bret bilong mipela i pinis na mi no gat susu bilong givim long bebi. Mi laik go insait long liklik haus kaikai bilong tren, tasol wanpela blakskin i wok long tren i pasim mi. Em i tokim mi: ‘Yu no inap i kam insait long hia.’ Mi askim em: ‘Mi laik baim susu bilong givim long bebi bilong mi.’ Em i tok mi no inap baim. Mista Neely em namba wan man i no bin mekim pasin i stret na bagarapim bel bilong mi na mi kros. Nau dispela wokman i namba tu man bilong mekim olsem.

“Long 1925 mi maritim John Few, em wanpela wokman long tren. Em i save stap long Sen Pol, Minesota, olsem na mi bin go sindaun long dispela hap. Nau namba tri samting i kamap na mi kros nogut tru long en, olsem na mi gat strongpela laik long helpim lain bilong mi. Long Sen Pol mi stap long hap bilong Not, tasol pasin bilong ol man long bel nogut long ol blakskin em i moa nogut, winim hap bilong Saut. Mi no inap wok long haus sik. Ol i tok ol i no save long wanpela blakskin em inap mekim wok nes. Long Tuskeji ol i bin skulim gut mipela ol nes. Ol i tok sikman i bikpela samting na mipela mas tingim gut em. Tasol long Sen Pol i no olsem. Ol i tingim skin bilong man​—ol i no laikim blakskin. Mi gat wanpela liklik haus long Weinsboro, olsem na mi baim i go long ol man. Long dispela mani mi baim hap graun i gat wanpela haus long en. Mi kirapim wanpela sevis-tesin olsem wok bisnis bilong mi, na baim 4-pela man bilong mekim wok mekenik. I no longtaim tumas na bisnis i wok gutpela tru.”

Mi Painim Lain NAACP

“Long 1925 samting mi insait long lain NAACP [National Association for the Advancement of Colored People]. Mi givim bel tru long wok bilong dispela lain. Mi tingim tok bilong Booker T. Washington: ‘Helpim lain bilong yupela. Helpim ol long skul na wok strong long helpim sindaun bilong ol yet.’ Namba wan samting mi bin mekim em long go long namba wan gavman bilong provins na givim wanpela lista long em. Long dispela lista i gat nem bilong planti blakskin i save vot na ol i gat haus bilong ol yet na ol i save givim takis long gavman. Em i harim tok bilong mi na em i bin helpim wanpela yangpela nes blakskin long kisim wok long dispela haus sik ol i no laik givim wok long mi. Tasol ol nes waitskin i mekim nogut tru long em, olsem kapsaitim pispis long yunifom bilong em. Olsem na em i lusim dispela haus sik na i go long Kalifonia, na em i kamap wanpela dokta.

“Olsem wanem long sevis-tesin bilong mi? Em i wok gut inap long wanpela de long 1929. Long dispela de stret mi putim K2,000 long beng na wokabaut i go, mi harim ol man i singaut olsem ol beng i bagarap. Man! Mi gat liklik dinau tasol bilong pinisim na bai mi kamap mama tru bilong sevis-tesin. Olgeta samting bilong mi i lus​—mani bilong mi na sevis-tesin. Mi inap kisim bek liklik mani tasol, olsem na mi hapim i go namel long 4-pela mekenik bilong mi.

“Olgeta man i no gat mani. Mi baim namba wan haus bilong mi taim mi kisim K300 long laip-insurens bilong mi. Pe bilong haus em K300. Bilong painim liklik mani, mi wok bisnis long baim i go long ol man, plaua na kakaruk na kiau, na mi larim haus bilong mi i kamap olsem haus pasindia na sampela man inap slip long en. Long liklik mani mi kisim long dispela wok, mi baim sampela liklik hap graun i stap nating. Pe bilong olgeta wan wan hap graun em K10 K10. I no gat wanpela taim mi hangre na i no gat wanpela taim mi mas singaut mani long gavman olsem welfe. Mipela save kaikai kiau na kakaruk, na bilong givim kaikai long ol pik bilong mi, mi bin memeim bun bilong ol kakaruk.

“Bihain mi kamap pren bilong wanpela bikmeri, em Eleanor Roosevelt, na narapela gutpela pren bilong mi, em bikman Hubert Humphrey. Mista Humphrey i bin helpim mi long baim wanpela bikpela haus i gat planti rum long en, long wanpela hap bilong Sen Pol i gat planti waitskin i sindaun long en. Bisnisman i bin baim dispela graun i go long mi em i pret nogut tru, nogut ol man i save em i baim dispela graun i go long wanpela blakskin. Em i askim mi long tok promis olsem, bai mi wet inap 12-pela mun na bihain mi mekim wanpela samting long dispela graun.”

Senis i Kamap

“Long 1958 wanpela samting i kamap na mi no inap lusim tingting long en. Tupela waitskin na wanpela blakskin i kam painim ples slip inap wanpela nait. Mi ting ol i kam bilong trikim mi na kotim mi long polis, olsem na inap sampela aua mi givim ol askim long ol. Tripela i tokim mi, ol i Witnes Bilong Jehova na ol i laik i go long Nu Yok long wanpela kibung. Ol i kamautim Baibel na soim mi ol samting God i laik mekim long kamapim Paradais long dispela graun, na long dispela taim pasin bilong bel nogut long ol man bilong ol narapela lain na skin bai pinis. Olgeta man bai stap brata brata. Mi tokim skin bilong mi yet olsem: ‘Samting mi bin wok long painim inap planti yia nau, em dispela samting tripela man ya i stori long en?’ Ol samting ol i mekim i makim olsem ol i stap brata brata. Tripela i laik stap wantaim long wanpela haus pasindia inap wanpela nait.

“Sampela yia bihain mi go lukim wanpela meri i save baim long wik wanpela rum long mi na mi save klostu em bai dai. Nem bilong em Minnie. Taim mi askim em i gat wanpela samting mi ken mekim bilong helpim em, em i tok: ‘Plis, kisim liklik blupela buk long hap na kaunim sampela tok bilong en. Mi laik harim.’ Em buk Tok i Tru i Bringim Man Long Laip Oltaim ol Witnes Bilong Jehova i save tilim long ol man. Olsem na olgeta taim mi save go lukim Minnie, mi save kaunim sampela tok moa bilong dispela liklik blupela buk. Wanpela taim mi go lukim Minnie, tasol em i dai pinis. Long rum slip bilong Minnie mi bungim wanpela meri waitskin, nem bilong em, Daisy Gerken. Klostu Daisy i aipas. Em i tokim mi em i bin stadi wantaim Minnie long dispela liklik blupela buk. Daisy i askim mi i gat wanpela samting bilong Minnie mi laik kisim. Mi tok: ‘Mi laik kisim Baibel bilong em wantaim liklik blupela buk.’

“Mi save sapos mi bihainim ol samting dispela blupela buk i stori long en, mi mas lusim olgeta wok mi save mekim bilong helpim lain bilong mi. Mi no inap kamapim olgeta samting mi bin mekim na mi ting i gutpela wok​—wok i gat as bilong en. Mi yet i kamapim wanpela yunion bilong helpim ol man i wok long tren. Long rot bilong kot mi bin winim pait bilong kirapim gavman long helpim sampela blakskin. Mi yet i stretim rot bilong sampela mats na ol man i mats long sampela hap bilong taun long wankain taim. Mi bin was gut long ol blakskin, nogut ol i brukim lo, na taim ol i mekim na kalabus, mi save go na baim kot. Mi insait long 10-pela klap i save mekim wok bilong helpim ol man.

“Olsem na mi ting mi no gat taim bilong tingting long ol samting bai painim mi bihain long mi dai. Lain bilong mi i save karim hevi long nau! Mi gat bikpela lain wokman long lain NAACP, na kuskus bilong mi em wanpela waitskin. Kirap long 1937 i go inap 1959 mi bin stap olsem nambatu presiden bilong dispela lain NAACP long Sen Pol na kirap long 1959 i go inap 1962 mi bin stap olsem presiden. Mi bin stretim rot bilong lain NAACP long 4-pela provins i ken kibung na long dispela kibung mi yet i stretim rot na lain NAACP i orait long holim nesenel kibung bilong ol long Sen Pol. Yes, i gat planti samting mi bin hatwok long mekim bilong helpim ol blakskin, na mi ken stori longpela taim long wan wan. Taim mi gat 70 krismas long 1962 mi laik pinis long wok, tasol paslain long mi mekim olsem, mi go lukim Presiden John F. Kennedy. Sori tru, long dispela taim mi no tingim God na ol samting em bai mekim bilong stretim hevi bilong ol man, nogat; mi tingim ol samting mi yet i ken mekim bilong stretim.”

Mi Painim Dispela Wanpela Rot Tasol Bilong Helpim Lain Bilong Mi

“Olgeta taim mitupela Daisy Gerken i save toktok long telefon, na long olgeta yia Daisy i save kam lukim mi. Liklik taim bihain long mi go long Tukson, long Arisona, sabskripsen bilong Wastaua, em wanpela i bin givim long mi olsem presen, em i pinis. Skru bilong lek i bagarap na mi no inap wokabaut, olsem na taim Adele Semonian, wanpela Witnes Bilong Jehova, i kam long haus bilong mi, mi stap. Mitupela i kirap na stadi long Baibel. Bihain, tok i tru bilong Baibel i sutim tru bel bilong mi. Nau mi save mi no inap stretim olgeta hevi bilong lain bilong mi na helpim olgeta long ‘skul na wok strong long helpim sindaun bilong ol yet.’ Dispela hevi i bikpela tru​—i no Mista Neely tasol, o ol hevi bilong hap bilong Saut, o ol hevi i stap long Yunaitet Stets; na dispela hevi i no bilong graun tasol, nogat.

“Long dispela graun yet wanpela bikpela askim i bin kamap olsem: Husat i mas bosim ol man? I stret ol man yet i bosim wokabaut bilong ol? O i stret birua bilong God, Satan, i bosim ol man? O i stret Man bilong wokim olgeta samting i mas bosim ol man? Yumi save, Man bilong wokim olgeta samting, em tasol i mas bosim yumi, a? Taim God i stretim dispela bikpela tok, orait, ol hevi mi bin hatwok long pinisim inap planti yia, God bai pinisim. Na maski mi bin mekim wanem bilong helpim blakskin o waitskin, yumi olgeta i save go lapun na dai. God bai kamapim Paradais long dispela graun na olgeta lain bai stap wanbel na kisim wankain sindaun. Man! Mi amamas tru long save mi inap kisim laip oltaim oltaim, na mekim wok bilong lukautim ol diwai gras na animal samting, na laikim ol man olsem mi laikim mi yet​—em laik bilong God long pastaim tru taim em i wokim namba wan man na meri. (Song 37:​9-11, 29; Aisaia 45:18) Na mi amamas tru long save mi no ken go long heven na kisim susu na hani o dai long hangre!

“Tasol i gat sampela samting mi bel hevi long en, long wanem, inap planti planti yia mi bin wok long painim rot bilong helpim sindaun bilong ol man, tasol mi no gat stretpela tingting long as tru bilong kamapim kain sindaun olsem. Sapos mi bin save long God taim mi yangpela, bai mi amamas tru long givim strong bilong mi long em long dispela taim. Na mi ting mi bin mekim olsem taim mi helpim ol man. Tasol nau mi wok long helpim ol man long wetim Kingdom bilong God long han bilong Krais Jisas, em man God i makim bilong helpim yumi long kisim laip oltaim. (Matyu 12:21; 24:14; KTH 21:​3-5) Papa bilong mi i bin tok, ‘Sapos yu no helpim wanpela man, orait, em i no ken helpim yu.’ Mi gat bikpela laik long helpim ol narapela man.

“Taim mi gat 87 krismas mi kisim baptais olsem wanpela Witnes Bilong Jehova. Mi save mi no ken stap longpela taim moa, tasol mi laik mekim yet planti samting. Mi wok yet, tasol mi no gat strong olsem bipo. Insait long tupela yia mi bin lusim tupela miting tasol. Mi laik lain long planti samting bambai mi inap skulim famili bilong mi taim ol i kirap bek. Adele i save helpim mi long autim tok, olsem na long olgeta mun mi inap autim tok 20 i go inap 30 aua samting.

“Ol dispela samting mi stori pinis long en, em ol bikpela samting mi bin mekim long i stap bilong mi. Tasol mi no inap stori long olgeta samting​—sapos mi mekim olsem, bai yumi sindaun hia long dispela diwai na stori i go i go inap sampela wik.”

Nau wanpela bikpela snek bilong wara i wokabaut i kam long diwai. Addie i singaut: “Olaman! Dispela snek i kam we?” Wantu em i rausim long wara stik bilong hukim pis na em i kisim ol pis em i hukim pinis na siksti i go. Em nau, toktok bilong mipela i pinis.​—Addie Clinton Few i bin kamapim dispela stori long wanpela niusman bilong “Kirap!” Liklik taim bihain Addie i dai taim em i gat 97 krismas.