Tripela Aua i Senisim Laip Bilong Mi
MI GAT 10-pela krismas tasol taim mi kisim gan olsem presen bilong Krismas. Mi save sut long ol botol na ol tin, tasol bihain mi amamas long sut i go long ol pisin na snek na long wanem wanem samting i save wokabaut. Taim mi kilim pisin, mi save putim mak long gan. I no longtaim na mi gat 18 mak long gan bilong mi.
Tasol wanpela samting i kamap na mi senisim pasin bilong mi. Wanpela taim mi stap long baksait bilong haus na mi wok long painim sampela pisin bilong kilim ol i dai. Mi lukim wanpela liklik pisin i stap antap long wanpela diwai, olsem na mi makim gut na mi sut i go long en. Mi sutim stret dispela pisin! Em pisin Namba 19 mi bin kilim i dai!
Dispela pisin i pundaun long graun. Mi wokabaut i go long ples pisin i bin pundaun long en, na mi lukluk i go daun long dispela pisin na mi lukim blut long gras bilong en. Pisin hia i meknais liklik na i olsem em i tanim het na lukluk long mi. Taim mi lukim pes bilong en, i olsem em i gat tok long mi, olsem: “Husat i tok na yu bagarapim laip bilong mi?” Taim em i laik i dai, isi isi het bilong en i go daun long graun. Taim mi lukim dispela samting, em i sutim tru bel bilong mi na mi kirap na krai. Mi siksti i go long mama na mi tokim em long ol samting i bin kamap na mi ting dispela pisin i bin mekim tok long mi. Bihain long dispela mi no bin sutim narapela pisin, na tu, mi no bin putim narapela mak long gan bilong mi. Mi tingim yet dispela liklik pisin mi bin kilim i dai na blut i pulap long gras bilong en. Dispela samting i bin kamap taim mi pikinini yet, tasol em i helpim mi long tingim olsem laip i bikpela samting, maski em laip bilong pisin, o laip bilong man.
Taim mi liklik yet papamama i lainim mi long planti gutpela pasin—no ken giaman, mas daun long ol bikpela man, na wanem samting i stret na wanem samting i no stret. Mama i karim mi long ples Memfis long Tenisi, tasol mi go bikpela long liklik ples Robins long biktaun Sikago, long Ilinois. Taim mi liklik mi save go long lotu, tasol ol samting mi lain long en long lotu, mi lusim tingting long en taim mi go bikpela. Mi bin lukim pasin bilong ol man i go long lotu, na pasin bilong ol pris, olsem ol i no bihainim ol stretpela pasin. Na mi lukim ol narapela man tu, ol i no ting ol stretpela pasin i bikpela samting. Tasol samting i bin kamap bipo long dispela liklik pisin mi bin kilim i dai, i lainim mi olsem, laip i bikpela samting; dispela tingting i no bin lusim mi.
Taim mi go long haiskul mi no save go moa long lotu. Papamama bilong mi i bel hevi long dispela. Na bel bilong mi i no gat tok moa. Tasol mi tingim taim mi kirap long tok swea—bel bilong mi i gat tok long dispela. Mi save raun wantaim ol man nogut na dispela i bagarapim pasin bilong mi na isi isi mi kisim ol drak na mekim pasin pamuk. Baibel i tok dispela pasin bai kamap na mi bin truim tok bilong en olsem: “Sapos yumi poroman wantaim ol man nogut, bai ol i bagarapim gutpela pasin bilong yumi.”—1 Korin 15:33.
Maski mi mekim ol dispela samting nogut, sampela taim tingting bilong mi i pilim ol samting i stret na ol samting i no stret, na dispela i save pasim mi long mekim sampela rong. Olsem: Long namba 3 yia bilong mi long haiskul mi gat tupela poroman. Mipela pren gut na raun wantaim, na wanem wanem samting mipela laik mekim, mipela mekim wantaim. Tasol wanpela nait mi no wanbel long wanpela pasin tupela i laik mekim—tupela i laik bagarapim wanpela yangpela meri. Dispela yangpela meri i singaut strong long tupela i no ken mekim dispela pasin nogut long em. Tasol ol i no harim, na taim ol i bagarapim dispela meri, meri i bikmaus tru na krai strong na askim tupela long kilim em i dai na no ken bagarapim em olsem. Tasol maski dispela yangpela meri i wok strong long pasim tupela, tupela i bagarapim em. Bihain tupela i laik bai mi tu mas mekim nogut long dispela meri. Mi no laik tru long mekim, na dispela samting mi bin lukim i bagarapim tru bel bilong mi. Tupela poroman hia i belhat tru long mi na tupela i kolim planti nem nogut long mi. Long dispela nait stret mi lusim tupela na mi no poroman moa wantaim tupela.
Sampela yia bihain mi kisim save olsem dispela samting tupela poroman bilong mi i bin mekim long mi taim mi no laik bihainim pasin nogut bilong tupela, dispela i wankain long tok bilong Baibel, em i tok: “Yupela i no save mekim ol dispela kain pasin nogut wantaim ol haiden. Na ol i save kirap nogut long dispela, na ol i tok nogut long yupela.”—1 Pita 4:4.
Yia 1965, em laspela yia bilong mi long haiskul na long dispela yia pait long Vietnam i go bikpela. Olsem na mi tingim samting bai mi mekim taim mi lusim skul. Mi no laik insait long ami na go long Vietnam na kilim i dai man. Mi tingim yet laip i bikpela samting—maski em laip bilong liklik pisin o laip bilong man. I gat rot bilong mi ken abrusim dispela samting: Mi bin kisim setifiket bilong spot long go pilai basketbal long wanpela yunivesiti. Tasol mi no mekim. Mi go insait long ami bilong pait long balus, tasol mi no gat wok long go long bikbus na kilim i dai man—mi mekim narapela kain wok.
Insait long ami bilong pait long balus mi kamap olsem mekenik bilong balus. Mi mekim dispela wok inap long 4-pela yia. Long Janueri 1968, taim ol i lainim mi pinis long dispela wok, ol i salim mi i go long Taiwan. Klostu olgeta poroman bilong mi insait long ami bilong balus ol i go long kain kain ples bilong pait, olsem Vietnam na Tailan, Japan na Filapin. Wanem wanem samting ol i laikim, ol inap kisim, olsem ol strongpela drak heroin na koken. Taim mi stap long haiskul mi kirap long kisim drak, tasol nau mi wok long baim i go long ol man. Eitpela mun bihain ol i salim mipela olgeta i go long Japan. Long dispela taim Amerika i save bosim. Bisnis bilong mipela long salim ol drak i go bikpela tru.
Kepten bilong mipela i askim mi long go long Vietnam na lukim ol samting i kamap long dispela ples. Mi laik tru long go, long wanem mi tingim mani na amamas. Taim mi kamap long Vietnam mi lukim gutpela ples tru—ol grinpela bus na waitpela nambis. Ol manmeri bilong Vietnam i man bilong pren na man bilong mekim gut long ol man. Sapos yu go paitim dua bilong ol, ol bai kisim yu na givim kaikai long yu na mekim gut long yu. Planti taim mi ting: ‘Bilong wanem dispela pait i kamap? Bilong wanem ol i kilim i dai ol dispela manmeri olsem ol i animal tasol?’ Tasol long taun Saigon mi lukim planti pasin raskol, na planti pasin nogut na bagarapim man. Ol man i tingim laip bilong narapela man i olsem samting nating tasol. Mi tingting planti, olsem ol man i no inap i stap long pasin sekan na sindaun gut wantaim na i stap amamas, na tu, ol i no laik mekim olsem.
Long Julai 1970 mi bin lusim ami bilong pait long balus na mi go bek long as ples bilong mi long taun Robins long Ilinois. Mi kisim wok mani tasol mi no inap sindaun gut long wanem olgeta samting i narapela kain nau. Pasin bilong ol man i senis, na ol ples tu i no olsem bipo. Na pasin bilong mi tu i senis. Mi pilim olsem as ples i no ples tru bilong mi moa. Tingting bilong mi i go bek long hap bilong Is. Mi laik tru long go bek long dispela hap. Eitpela mun bihain long taim mi lusim ami mi kisim balus na mi go long taun Okinawa long Japan, na mi tingting long i stap olgeta long dispela hap.
Long namba wan nait long dispela taun Okinawa mi go long wanpela klap. Mi kirap nogut tru long lukim wanpela olpela pren bilong mi, bipo mitupela i bin wok wantaim long bisnis bilong drak. Mitupela i amamas tru long bung gen, na kwiktaim mipela tingim wanpela rot bilong kisim hait ol drak long Tailan na karim i go long ol narapela ples. Bilong i go long Tailan mipela i mekim sampela pasin giaman na ol man i ting mipela man tru bilong ami. Olsem na mipela wokim giaman ID kat (em kat bilong toksave yu husat tru). Na mipela wokim ol narapela pepa giaman na mipela giaman na putim unifom bilong ami. Mipela mekim planti pasin giaman olsem. Olsem na mipela lusim Japan na go long Bangkok.
Taim mipela kamap long Bangkok wanpela man i wetim mipela. Em i kisim mipela long kanu na mipela go long ol liklik wara insait long bus na mipela i kamap long wanpela ailan. No gat narapela ailan klostu. Wanpela bos bilong ol man i salim drak long Tailan i bungim mipela. Em i lukautim gut mipela na mipela i no ting dispela man bai tokaut long polis long wok mipela laik mekim. Tasol em i mekim olsem bambai ol polis i no ken kotim em.
Taim mitupela i kamap long ples bilong kisim bas long Bangkok polis i wetim mipela. Mi karim wanpela suitkes na insait long en i gat ol drak, hevi bilong en i olsem 29 kilo! Taim mi go insait long dua bilong dispela ples bilong kisim bas mi pilim wanpela hap ain i kol tru long nek bilong mi. Wanpela kepten bilong polis bilong Tailan i holim gan long het bilong mi na em i tok isi, olsem: “Plis, no ken ranawe.” Ol i holim mitupela na kisim mipela i go long hetkota bilong polis.
Mipela bin ting long bungim wanpela wanwok long Okinawa. Dispela man bai holim 3-pela bokis bilong su, tasol insait i no gat su—i gat drak heroin. Mipela i ting long bungim ol drak bilong mipela na bai mipela yet i ken bosim mak bilong salim ol drak long Okinawa. Dispela man i karim ol bokis su i gat drak heroin insait long en, em i kamap long ples balus long Okinawa, tasol taim ol dispela bokis i kamap long ples bilong kisim ol suitkes samting, polis i wet wantaim dok bilong ol, na dispela dok i harim smel bilong dispela drak heroin. Em nau, polis i kisim drak heroin bilong em na ol i kisim suitkes bilong mi em ol drak maruana na drak spid i pulap long en. Olsem na dispela bisnis mipela laik kirapim i bagarap. Ol i pasim mipela long haus kalabus Klong Prem. Mipela sot long planti samting long dispela haus kalabus. No gat planti kaikai. Tupela taim long olgeta wan wan de mipela kaikai sampela liklik pis i gat sol wantaim rais. Mi stap tupela mun long dispela haus kalabus na skin bilong mi i go slek; mi lusim 45 kilo.
Taim mipela stap long dispela haus kalabus wanpela man bilong gavman bilong Amerika i kam bilong lukim mipela. Em i tok em i laik helpim mipela, tasol em i mas kisim sampela save moa pastaim. Tasol mipela i ting em i giaman. Em i go i kam planti taim na bihain em i tokaut long mipela olsem em i bikman bilong painimaut ol samting bilong ol drak long Sautis Esia. Na em i laik save tru, mipela mekim hait dispela pasin bilong kisim ol drak na karim i go long ol narapela ples o nogat. Bihain em i kam bek long haus kalabus na toktok wantaim mi yet.
Em i tok: “Yu mas tok tru long mi. Sapos nogat, bai yu stap long dispela haus kalabus inap long taim yu dai.” Olsem na mi tok tru long em. Nau em i askim mi: “Olsem wanem? Yu laik wok wantaim mi na helpim mi long painim ol man i salim ol drak?” Mi kirap nogut tru long tok bilong em, tasol bihain mi tok bai mi mekim.
Bihain mi lusim haus kalabus na mi go bek long Okinawa bilong kirap mekim dispela nupela wok bilong pasim ol drak. Wok bilong mi i olsem mi mas bungim ol man i save baim ol drak i go long narapela man na long dispela rot polis inap holim ol. Mi mekim dispela wok inap wanpela yia na hap na bihain mi lusim dispela wok.
Bihain mi wok long skelim ol lotu bilong Is. I no longtaim na mi save planti samting bilong ol dispela lotu i no klia, olsem dispela tok bilong ol misin ol i kolim Kristendom, em tok bilong God Triwan. Tok bilong ol tu i olsem i no gat as bilong en.
Wanpela taim mi wanpela tasol i stap long haus na wanpela lapun meri Japan i paitim dua. Em i sanap na em i lap liklik. Ai bilong em i lait tru. Taim mi lukim ai bilong em mi ting dispela meri em i gutpela stretpela meri na em i no kam bilong giamanim mi o pulim mani bilong mi. Mi pilim olsem mi mas harim tok bilong em. Olsem na mi tokim em long kam insait long haus na mi ken harim tok bilong em.
Taim mipela sindaun insait long haus kuk, mi harim gut tok bilong em. Taim mi yangpela mi bin i go planti taim long haus lotu, tasol taim dispela meri i toktok long mi em namba wan taim mi bin harim tok i kam stret bilong Baibel. Em i helpim mi long save, bilong wanem i gat planti pasin nogut i stap, na Satan em i god bilong dispela graun, na ol dispela samting nogut i kamap ol i olsem mak—yumi stap long lasde. Em i tok, klostu nau God bai kirap na pinisim ol dispela pasin nogut na kamapim gutpela taim long graun, i gat stretpela pasin tasol long en. Planti taim mi bin tingting, bilong wanem yumi stap hia long graun na wanem as bilong i stap bilong yumi, na bilong wanem God i bin wokim dispela graun. Bekim bilong ol dispela askim i stap long Baibel.—Buk Song 92:7; Saveman 1:4; Aisaia 45:18; Daniel 2:44; 2 Korin 4:4; 2 Timoti 3:1-5, 13; 2 Pita 3:13.
Taim dispela lapun meri i toktok, nau tingting bilong mi i klia—i olsem ol liklik pikinini kaikai i slip long graun planti yia na bihain ol i kru taim ol i kisim wara—tingting bilong mi i wankain. Ol samting bilong God i bin slip i stap long tingting bilong mi, tasol nau taim mi harim ol tok i tru bilong Baibel, i olsem tingting bilong mi i kirap.—Efesus 5:26; Kamapim Tok Hait 7:17.
Nau mi kisim save olsem yumi inap i stap laip oltaim long graun, na i no olsem yumi bai stap laip oltaim long heven, nogat. Graun bai kamap olsem gaden paradais bilong Eden. Planti milion man bai kirap bek na ol tu inap kisim laip oltaim long Paradais long graun. Pen, krai, bel hevi, pasin nogut, sik na indai bai pinis olgeta—planti tok bilong Baibel i stori long ol dispela gutpela blesing bai kamap aninit long Kingdom bilong Jehova long han bilong Krais. Tingting bilong mi i kirap tru na mi tingim ol gutpela samting Jehova bai givim long ol man i bihainim tok bilong em.—Song 37:10, 11, 29; Sindaun 2:21, 22; Jon 5:28, 29; 17:3; Kamapim Tok Hait 21:1, 4, 5.
Dispela ol samting i gutpela tru, tasol em i no stori nating. Dispela lapun meri i kisim olgeta tok bilong em long Baibel. Taim em i toktok, em namba wan taim mi lukim gut tok bilong Baibel na mi pilim olsem tok bilong Baibel i gat laip. Nau mi kisim save long tupela samting: Namba wan samting i olsem: dispela em tok tru i kam long Baibel na i no gat wanpela tok giaman bilong ol misin i stap long en; na namba tu samting, i olsem: mi mas senisim sampela pasin bilong mi na bai i stap bilong mi i stret long ol lo bilong God.—Buk Song 119:105; Rom 12:1, 2; 1 Korin 6:9-11; Kolosi 3:9, 10.
Mitupela i toktok inap 3-pela aua—dispela 3-pela aua i bin senisim laip bilong mi. Nem bilong dispela lapun meri em Haruko Isegawa, na taim em i laik lusim mi em i toksave long ples ol Witnes Bilong Jehova i save bung long en. Na em i kam lukim mi long olgeta wik bilong helpim mi long kisim save long Baibel. Wik bihain long taim dispela meri i toktok wantaim mi, mi go long wanpela miting bilong ol Witnes Bilong Jehova. Ol samting mi lain long en i senisim tru tingting na pasin bilong mi. Wantu mi senisim pasin bilong mi. Planti wantok bilong mi i no amamas long dispela, na ol i lusim mi, tasol mi painim planti nupela poroman olsem Jisas i bin tok promis long en. (Matyu 19:29) Long Ogas 30, 1974, 10-pela mun bihain long taim Sista Isegawa i bin toktok wantaim mi long tok bilong Baibel, mi kisim baptais na kamap wanpela Witnes Bilong Jehova.
Wanpela mun bihain long baptais mi bin go bek long Amerika na mi bung wantaim Kongrigesen Robins long as ples bilong mi. Long yia bihain mi go lukim nambawan ofis bilong ol Witnes Bilong Jehova long Bruklin, Nu Yok, ol i kolim Betel. Insait bilong dispela nem Betel i olsem “Haus bilong God.” Long nau i gat 3 tausen i wok volantia long dispela haus Betel na narapela wan tausen i wok long Wastaua-Fam long hap bilong not long Nu Yok. Long dispela ples ol i prinim ol buk bilong Baibel bilong tilim long olgeta hap graun. Taim mi go lukim dispela ples mi laik tru long wok long dispela hap, na Jehova i opim rot bilong mi long mekim olsem, kirap long Septemba, 1979.
Sampela mun bihain, wanpela brata i kam na em i wok wantaim mi. Taim mi lukim em mi ting mi save long dispela brata. Bihain mitupela i pren gut, na nau mitupela i save, bipo mipela i bin stap wantaim long Okinawa. Mitupela i bin stap long wanpela haus tasol na mipela bin mekim wankain wok olsem baim ol drak i go long ol man. Nau mitupela i amamas tru long bung gen. Long nau em na meri bilong em, tupela i mekim wok misineri long ailan Maikronesia.
Long 1981 mi maritim wanpela gutpela meri, nem bilong em Boni, na mitupela i kisim planti gutpela blesing taim mitupela mekim wok long haus Betel. Bel bilong mi i gutpela tru, olsem Devit, em i bin tok long Buk Song sapta 23, ves 6: “Bikpela, bai yu lukautim mi gut, na olgeta de mi stap laip bai yu marimari long mi. Na bai mi stap oltaim oltaim long haus bilong yu.”
Wanpela taim mi kaunim Matyu 10:29, 31 long Baibel. Taim mi kaunim, mi tingting bek long taim mi manki. Dispela hap bilong Baibel i tok: “Yupela i save, ol man i save baim tupela liklik pisin long wan toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun.” Mi tingting: Jehova i save mi bin kilim i dai dispela liklik pisin? Mi amamas taim mi kaunim i go: “Yupela i no ken pret. Yupela i winim planti lain liklik pisin.”—Em stori bilong James Dyson.
[Rait long pes 20]
‘Bilong wanem ol i kilim i dai ol dispela manmeri olsem ol i animal tasol?’
[Rait long pes 21]
Mi pilim wanpela gan long nek bilong mi
[Rait long pes 22]
Ol polis i wet wantaim dok bilong ol, na dok i harim smel bilong dispela drak
[Rait long pes 23]
Mi pilim olsem mi mas harim tok bilong em
[Piksa long pes 25]
Em mi wantaim meri bilong mi, Boni