Mi Lusim Pasin Bilong—Bagarapim Man

MITUPELA pren bilong mi i siksti i go, na taim mipela kamap long wara klostu long as ples bilong mi, mipela kalap i go daun long wara. Mipela kam antap na nau mipela subim strong wara long kamap hariap long narapela hapsait.

Olsem wanem? Dispela em wanpela pilai bilong ol yangpela man? Nogat! Mipela mekim olsem, long wanem, mipela i no laik kisim bagarap. Taim mi bin lukluk i go bek, mi lukim ol plisman i holim gan stret long mipela. Taim ol i sut long gan, em nau, mi kalap i go daun long wara na mi subim wara i go kamap long narapela hapsait, nogut ol katres i kilim mi. Taim mi stap insait long wara mi inap harim ol gan i pairap.

Taim mipela kamap long narapela hapsait, mipela save, taim mipela i ranawe long kalabus, nau mipela win tru. Mipela bin i stap kalabus, long wanem, mipela bin stilim ol ka na brukim stua samting.

Planti taim ol polis i bin raun painim mi, long wanem, mi bin mekim pasin raskol. Mi gat 17 krismas tasol, tasol planti taim polis i holimpas mi. Orait, bihain ol polis i holim mipela na nau mitupela pren bilong mi i kalabus gen na mi mas kalabus tupela na hap yia.

Long haus kalabus mi no stap isi​—mi man bilong kros pait. Ol woda i givim wanpela waitpela klos long mi olsem yunifom, long wanem, planti taim mi pait wantaim ol narapela kalabusman. Taim mi na sampela ol narapela i putim waitpela klos, ol woda inap luksave long mipela na was gut long mipela.

Mi Lusim Kalabus, Tasol Mi Mekim Moa Yet Pasin Nogut

Mi lusim kalabus, tasol pasin bilong mi i no senis​—nau mi nogut moa. Kwiktaim mi kamap bos bilong ol raskol i save bosim sampela rot. Sapos wanpela i laik daunim mi, kwiktaim mi pait long em.

Wanpela taim sampela yangpela man i skrapim bel bilong mi. Maski mi bin brukim han sut bilong mi sampela wik i go pinis long narapela pait, mi pait wantaim ol, na sampela i bin kisim bagarap pinis taim ol polis i kam bilong pasim dispela pait.

Narapela taim mi wantaim tupela pren bilong mi i subim sampela man i stap long narapela taun long pait wantaim mipela. Gopas bilong ol i sanap holim stik ain na em i laik pait wantaim mi. Mi pait na rausim dispela stik ain na em i ranawe. Bilong pait yet wantaim em, mi save mi mas bekim dispela stik ain long em. Mi mekim olsem. Em i laik mekim gen, na mi rausim gen dispela stik ain i stap long han bilong em, tasol mi no larim em i ranawe gen inap long mi paitim em gut.

Wanpela nait mi laik painim “amamas,” olsem na mi bin sanap long kona bilong wanpela rot long taun Halem long biktaun Nu Yok, na mi singaut long husat husat i laik pait wantaim mi. Kain kain man i pait wantaim mi. Mi mekim kain pasin olsem, na mi kisim nem olsem man nogut tru na man bilong kros pait. Long ol dispela kain kain pait mi bin kisim bagarap taim man i paitim mi long botol, o long ol tul bilong taia, na stik, na naip, na ol narapela samting. Tasol maski ol dispela hevi na bagarap i painim mi, mi no lusim pasin nogut bilong mi.

Pasin Nogut Bilong Mi i Go Bikpela Moa

Bihain liklik mi kisim save olsem man inap kisim planti mani long rot bilong baim ol drak i go long ol man. Mi man bilong kisim drak, olsem na mi save long ol man i insait long pasin bilong baim drak i go long ol man na bilong kisim drak. I no longtaim na mi wok bisnis long ol drak na sampela manmeri i wok olsem boi bilong mi long baim ol drak bilong mi yet i go long narapela man. Nau mi kamap man nogut tru.

Wanpela taim mipela brukim haus bilong wanpela man i wok bisnis long ol drak. Mipela laik stilim ol drak bilong em. Mipela holim wanpela gan na wanpela naip na hansapim 3-pela man na wanpela meri taim mipela painim painim ol drak long dispela haus.

Narapela taim mi wantaim pren bilong mi i pasim laplap long pes na bai ol man i no ken save long mipela, na mipela holim ol gan na go long haus bilong wanpela maniman. Mipela ting long stilim mani bilong baim ol drak. Mipela wet wet, tasol em i no kam, olsem na mipela lusim dispela haus. Sapos em i bin kam, mipela bai mekim tru dispela samting mipela laik mekim.

Olsem na taim mi gat 20 krismas, mi insait tru long pasin bilong kros na pait, na kisim ol drak na mekim pasin raskol. Mi save bihain bai mi kisim bikpela kalabus tru inap long olgeta yia mi stap laip, na mi no amamas liklik.

Planti taim mi tingting: Wok bilong husat long makim wanem samting i stret na wanem samting i no stret. Mi ting, man i gat strong namel long olgeta manmeri, em dispela man i mas tok, wanem samting i stret na wanem samting i no stret. Mi ting, ol manmeri bilong graun, ol yet tasol i tok wanem samting i stret na wanem samting i no stret, na mi no daun long wanpela man. Olsem na mi ting i orait long mi yet mi ken tingim samting i stret o i no stret. Tasol klostu nau na bai mi painim gutpela tingting.

Rot i Winim Ol Narapela Rot

Susa bilong mi i bin maritim wanpela pren kalabus bilong mi, na susa i kirap stadi wantaim ol Witnes Bilong Jehova. Wanem samting em i lain long en, em i save tokim ol narapela long famili bilong mipela​—mi tasol, nogat. Famili bilong mi i tok, mi no ken bung wantaim susa bilong mi. Bilong wanem? Ol i tok, long wanem, em i save toktok tasol long dispela “longlong lotu.”

Nau mi tingting. Mi laik save, bilong wanem ol i ting dispela lotu i longlong. Wanem samting susa bilong mi inap toktok long en na dispela toktok i skrapim bel bilong ol narapela? Mi laik save, tasol susa bilong mi i no laik toktok wantaim mi. Bilong wanem? Em i ting mi man nogut tru na mi no inap tru long harim wanpela tok bilong Baibel.

Tasol wanpela apinun mi go kaikai long haus bilong susa bilong mi. Mi sindaun na kaikai wantaim em na man bilong em. Nau mi tok: “Tokim mi long dispela nupela lotu.” Tupela i mekim olsem​—ol i mekim mekim i go i go inap 6-pela aua! Mi pilim tru dispela tok, olsem na long narapela apinun mi go bek gen long haus bilong tupela long harim sampela tok moa.

Bihain long namba 2 taim mi save, nau i gat wanpela samting mi ken givim bel long en na bai i stap bilong mi i gat as bilong en​—mi no ken mekim nating tasol. Kwiktaim mi go long Haus Kingdom bilong ol Witnes Bilong Jehova. Na tu, mi toktok wantaim ol pren bilong mi long ol samting bilong Baibel mi lain long en.

Mi no senisim wantu pasin bilong mi. Liklik taim moa mi mekim yet pasin nogut. Tasol mi stadi i go na lain long ol samting Jehova i laik bai mi mekim. Na mi no lusim wanpela miting long Haus Kingdom. Long dispela rot mi kisim strong long Baibel bilong senisim wokabaut bilong mi. Isi isi mi lusim pasin nogut bilong mi.

Pastaim mi lusim pasin bilong wok bisnis long ol drak. Dispela i mekim na sampela olpela pren i kros tru. Tasol mi holim yet pasin bilong kros, olsem na dispela lain i no biruaim mi. Bihain mi lusim pasin bilong kisim drak na pasin pamuk. Laspela samting mi lusim em pasin bilong smok. Etpela mun tasol na mi inap kisim baptais. Mi baptais long yia 1970.

Nau mi save tru husat inap tok long wanem samting i stret na wanem samting i no stret. Em Jehova, God bilong givim laip long yumi olgeta; em tasol inap tok, na em tasol inap tokim ol man long bihainim tok bilong em long laip bilong ol.

Planti taim mi tingim tok bilong Aisaia 65:​25, na mi pilim em i makim pasin bilong mi. Dispela tok profet em i stori long bihain, taim pasin nogut bilong laion bai senis na em bai stap isi na kaikai gras olsem bulmakau. Mi tingim mi yet, bipo mi man nogut olsem laion, tasol nau mi stap isi.

Tasol bipo mi gat nem nogut na mi mas wok strong long kisim gutpela nem. Olsem: Planti taim mi bin go long haus bilong ol man bilong toktok wantaim ol long Baibel. Long wanpela haus wanpela yangpela man i kam na em i pret taim em i lukim mi. Em i ting mi kam bilong birua long em. Kwiktaim mi stori long mi bin kam bilong toktok long Baibel. Em i kirap nogut tru na em i amamas long mi no kam bilong birua long em.

Liklik taim bihain long mi baptais, mi bin maritim wanpela Witnes Bilong Jehova. Tasol sori tru, long yia 1974 meri bilong mi i no laik mekim moa laik bilong God. Em i tok: mi mas lusim lotu o em bai lusim mi na kisim 2-pela liklik pikinini bilong mipela. Dispela i bikpela hevi tru, winim ol narapela hevi i bin painim mi. Tasol mi no inap tru lusim lotu bilong mi, na mi wok yet long mekim laik bilong God.

Nupela Rot Long Laip Bilong Mi

Jehova i mekim gut long mi long wanem, mi no lusim em. Long yia 1977 mi bungim wanpela gutpela meri Witnes, na mitupela i marit. Em i gat wanpela pikinini man i gat 5-pela krismas. I no longtaim na mitupela meri bilong mi i kirap mekim wok painia, olsem autim tok bilong Baibel long olgeta de na lainim ol man long God na long laik bilong em. Taim pikinini man bilong mitupela i kamap bikpela, em tu i insait long dispela wok. Nau em i mekim sampela wok insait long kongrigesen.

Sampela taim mitupela meri bilong mi i bin go long sampela ol narapela kantri bilong helpim wok bilong wokim nupela haus brens samting. Ol dispela haus olsem brens-ofis i save lukautim wok bilong ol Witnes Bilong Jehova long skulim ol man long tok bilong Baibel.

Taim mipela i stap long as ples, mipela i wok strong long helpim ol narapela man long lain long tok bilong Baibel. Na tu, mipela i helpim wok bilong sanapim nupela Haus Kingdom. Man bilong susa bilong mi, bipo mitupela i stap kalabus, em wantaim mi i stap olsem wasman long wanpela kongrigesen bilong ol Witnes Bilong Jehova.

Mi amamas tru long Jehova i helpim mi long bosim gut i stap bilong mi na helpim mi long kirap wokabaut long gutpela nupela rot. Mi larim em i soim mi long wanem samting i stret na wanem samting i no stret. Olsem na i stap bilong mi i wok long kamap gutpela moa.​—Wanpela man i salim dispela stori i kam.