Baibel i Tok Wanem?

I Gat Rong Long Man i Maritim Planti Meri?

Planti hevi i kisim Jen taim papa bilong em i painim pinis wok mani long wanpela biktaun.a Papa i stap longwe long ples bilong ol long Afrika, na em i kisim narapela meri. Jen i tok, “Sindaun bilong mipela i no gutpela, long wanem, papa bilong mi i no save lukautim mipela long mani samting; em i lukautim namba 2 meri bilong em wantaim ol pikinini bilong dispela meri. Klostu long taim mi laik lusim skul, planti taim mi no gat kaikai na mi slip nating. Haus bilong mipela i wok long bagarap. Long ol Sarere Sande mi save maket long ol kaikai bilong gaden bilong helpim mama bilong mi, tasol liklik wansiling mi kisim long dispela rot i no inap. Olgeta nait mi save krai.”

STORI bilong Jen i makim olsem, planti taim pasin bilong maritim planti meri i mekim nogut long ol narapela i no gat asua. Long Afrika long hap bilong saut, ol man i save mekim tok ples Venda ol i gat wanpela tok olsem muhadzinga long tok ples bilong ol, em wanpela nem sampela meri marit i save kolim long narapela meri bilong man bilong ol. Insait bilong dispela nem i olsem “kukim long paia,” na ating em i makim stret ol hevi dispela pasin bilong maritim planti meri i save kamapim namel long ol dispela meri.

Orait, ating yu gat askim olsem: ‘I gat rong long man i maritim planti meri? Na sapos olsem, bilong wanem sampela man em Baibel i stori long ol, ol i gat planti meri?’

Maritim Planti Meri​—Baibel i Tok Wanem?

Inap sampela hap taim God i larim man i maritim planti meri, long wanem, dispela em i wanpela rot bilong truim tok promis God i bin mekim long Abraham, olsem: “Bai mi mekim ol lain tumbuna bilong yu i kamap bikpela lain tru.” (Stat 12:2; Kisim Bek 1:7) Long dispela taim meri bilong Abraham, em Sara, i no gat pikinini, olsem na em i krai long Abraham i kisim wokmeri bilong em na slip wantaim em na bai dispela wokmeri, em Hagar, i ken karim wanpela pikinini. Tasol Baibel i tokaut klia long ol hevi dispela pasin i bin kamapim long lain bilong Abraham.​—Stat 16:​5, 6; 21:​8-10.

Jekop, em tumbuna pikinini man bilong Abraham, i gat tingting long maritim wanpela meri tasol, em Resel. (Stat 44:27) Tasol tambu papa bilong Jekop, em Laban, i trikim em long maritim tupela pikinini meri bilong em, em Resel na Lea. (Stat 29:​21-28) Na bihain dispela tupela meri i strong long Jekop i slip wantaim ol wokmeri bilong ol, em Bilha na Silpa, na bai ol i ken karim sampela pikinini. Tasol long dispela taim tu Baibel i tokaut klia long ol hevi em pasin bilong kisim planti meri i bin kamapim insait long bikpela lain bilong Jekop.​—Stat 29:​30, 31; 30:​1-3, 15, 16, 20; 37:​2-4; 44:​20-29.

Baibel i stori tu long Elkana, em papa bilong profet Samuel, na long tupela meri bilong Elkana, em Hana na Penina. Penina i save mekim nogut long Hana, olsem na planti taim em i krai na em i no kaikai. Ating Penina i bel nogut long Hana, long wanem, Elkana i laikim tru Hana.​—1 Samuel 1:​4-7.

Tru tumas, pasin bilong maritim planti meri i bin kamapim bikpela hevi. Tru, bipo God i larim ol lain bilong em i maritim planti meri, tasol olsem wanem long pastaim tru, taim God i wokim namba wan man na meri? Baibel i tok klia long dispela samting.

Lo God i Putim Long Pastaim Tru

Bilong helpim yumi long save long lo bilong God long marit, yumi mas save long lo God i bin putim long marit long pastaim tru. Baibel i stori long God i bin wokim wanpela meri, em Iv, na em i bringim em i go long Adam, na taim Adam i lukim dispela meri em i tok: “ ‘Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi.’ . . . Olsem na dispela pasin i kamap. Man i save lusim papamama na i pas wantaim meri bilong en, na tupela i kamap wanpela bodi tasol.”​—Stat 2:​21-24.

Jisas i stretim bek dispela lo God i bin putim long marit long pastaim tru, em lo ol Kristen i mas bihainim​—man i mas marit long wanpela meri tasol. (Matyu 19:​4, 5) Na tu Jisas i tokim ol man na meri marit nau ol i mas bihainim lo bilong God olsem: “Tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim.” (Matyu 19:6) Olsem na Kristen marit i mas mekim ol samting na bai em wantaim poroman marit bilong em i stap olsem “wanpela bodi.”b Taim man i kisim narapela meri na slip wantaim em tu, man i brukim dispela lo bilong God. Kongrigesen Kristen i tambuim kain pasin olsem.​—1 Korin 5:11; 6:​9, 16, 18; Hibru 13:4.

Olsem na yumi no ken kirap nogut long ol gutpela tok Baibel i mekim long ol Kristen marit i gat wanpela meri tasol. (1 Korin 9:5; 1 Timoti 3:2) Baibel i tok: “Mobeta olgeta man wan wan i gat meri bilong ol yet [i no planti meri], na olgeta meri wan wan i gat man bilong ol yet [em i no man i marit pinis long narapela meri].”​—1 Korin 7:2; Sindaun 5:18.

Taim sampela i kisim save olsem Baibel i tambuim pasin bilong maritim planti meri, ol i mekim sampela samting bilong stretim sindaun bilong ol na bai wokabaut bilong ol i stret wantaim laik bilong God. Tingim Jon: Em i stap long wanpela biktaun long sentral Afrika.c Bipo em i gat 3-pela meri. Orait em i stadi long Baibel wantaim ol Witnes Bilong Jehova na bihain em i tingting pinis long ol samting em i mas mekim. Nau em i kamapim dispela tingting long ol meri bilong em na em i toktok gut wantaim ol. Em i stretim rot bilong lukautim namba 2 na namba 3 meri bilong em wantaim ol pikinini bilong ol long mani na kaikai samting, na bihain ol i go bek long ples bilong ol. Orait, nau rot i op long Jon i mekim wok bilong God long kongrigesen, na em i kisim sampela blesing moa.

Jon i tok, “Olgeta nait, taim mi kam long haus i gat planti hevi i stap. Olsem: Narapela meri i kamapim rong bilong ol pikinini bilong narapela meri, na ol pikinini bilong narapela meri i bel hevi long ol pikinini bilong narapela meri. Olsem na namba wan samting mi save mekim taim mi kamap long haus, em mi mas stretim ol dispela hevi. Nau mi sindaun wantaim wanpela meri tasol, na haus bilong mi i olsem ples bilong malolo na bel isi.”

Tru tumas, bai man i stap bel isi na stap gut long ai bilong God sapos em i wok strong long stretim marit bilong em.​—Rom 12:​1, 2.

[Ol Futnot]

[Rait long pes 23]

‘Taim man i gat planti meri, bai narapela meri i bel nogut long narapela meri em man i slip wantaim em, na kros pait tu i save kamap insait long famili.’—The New Encyclopædia Britannica

[Piksa long pes 22]

Piksa bilong wanpela famili bilong Afrika; man bilong Ibo na ol meri bilong em

[Kredit Lain]

Courtesy of The British Museum