Askim

Jehova i larim ol wokboi bilong em long bipo, em ol Israel, long maritim planti meri, tasol em i no larim dispela pasin long nau. Olsem wanem? Lo bilong em inap senis?

Jehova i no bin senisim tingting bilong em long pasin bilong maritim planti meri. (Song 19:7; Malakai 3:⁠6) Em i no wanpela pasin em i bin kamapim long ol manmeri long bipo tru, na em i no wanpela pasin em i kamapim long nau. Taim em i wokim Iv olsem meri bilong Adam, Jehova i kamapim lo olsem, i mas i gat wanpela meri bilong wanpela man. “Olsem na dispela pasin i kamap. Man i save lusim papamama na i pas wantaim meri bilong en, na tupela i kamap wanpela bodi tasol.”​​—⁠Stat 2:​24.

Taim Jisas Krais i stap long graun, em i kolim gen dispela lo taim em i bekim tok bilong ol man i bin askim em long pasin bilong katim marit na marit gen. Em i tok: “Ating yupela i no bin ritim tok i stap long buk bilong God? Dispela tok i tok olsem, ‘Bipo tru taim God i wokim olgeta samting, em i wokim ol manmeri, na em i mekim ol i kamap man na meri. Na God i tok, “Olsem na man i save lusim papamama na i pas wantaim meri bilong en, na tupela i kamap wanpela bodi tasol.” ’ ” Na Jisas i tok moa: “Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.” (Matyu 19:​4-6, 9) Long dispela stori, em i klia olsem, pasin bilong maritim tupela o planti meri, dispela em i pasin pamuk.

Sapos olsem, orait i gat wanem as na bipo God i larim pasin bilong maritim planti meri? Yumi mas save olsem Jehova i no as bilong dispela pasin. Namba wan man i gat tupela meri em Baibel i stori long en, em Lamek, wanpela tumbuna pikinini man bilong Kein. (Stat 4:​19-​24) Taim Jehova i kamapim Tait Wara long taim bilong Noa, Noa na ol tripela pikinini man bilong em, olgeta wan wan i gat wanpela meri tasol. Olgeta man i gat planti meri, ol i bagarap long Tait Wara.

Planti handet yia bihain, Jehova i makim ol Israel olsem lain manmeri bilong em, tasol long dispela taim, pasin bilong maritim planti meri i stap pinis namel long ol, maski planti man i gat wanpela meri tasol. Long ol famili we man i maritim planti meri, God i no laik bai ol dispela famili i bruk. Olsem na em i putim strongpela lo i bosim dispela pasin.​​—⁠Kisim Bek 21:​10, 11; Lo 21:​15-​17.

Jehova i no bin larim dispela pasin i stap oltaim. Yumi ken save long dispela long tok Jisas i mekim long lo bilong Jehova long marit long bipo tru, na tu, long tok holi spirit i bin kirapim aposel Pol long raitim. Em i tok: “Mobeta olgeta man wan wan i gat meri bilong ol yet, na olgeta meri wan wan i gat man bilong ol yet.” (1 Korin 7:⁠2) Na tu, holi spirit i bin kirapim Pol long raitim tok olsem man i kamap wasman o wokman insait long kongrigesen Kristen, em i mas i stap “man bilong wanpela meri tasol.”​​—⁠1 Timoti 3:​2, 12; Taitus 1:⁠6.

Olsem na taim kongrigesen Kristen i kamap inap 2,000 yia i go pinis, Jehova i no moa larim dispela pasin bilong maritim planti meri. Long dispela taim, lo bilong marit i kamap gen wankain olsem i bin stap long taim God i wokim namba wan man na meri: olsem olgeta wan wan man i mas i gat wanpela meri tasol. Long nau, em i wanpela lo ol manmeri bilong God long olgeta hap bilong graun i mas bihainim.​​—⁠Mak 10:​11, 12; 1 Korin 6:​9, 10.