Baibel i Save Senisim i Stap Bilong Man

Bilong wanem wanpela man husat i tingim tasol ol motobaik, drak, na spot, em i kirap mekim wok bilong God fultaim? Wanem samting i kirapim wanpela man bilong pilai laki long lusim dispela pasin, na kirap mekim gutpela wok bilong lukautim famili bilong em? Wanpela meri i bin kamap bikpela olsem wanpela Witnes, tasol bihain em i no bin bihainim moa ol lo bilong Baibel. Wanem samting i bin kirapim em long skelim gen laip bilong em? Skelim tok ol i mekim.

DISPELA MAN

NEM: TERRENCE J. O’BRIEN

KRISMAS: 57

KANTRI: AUSTRALIA

BIPO: KISIM OL DRAK NA LAIKIM TUMAS OL MOTOBAIK

LAIP BILONG MI LONG BIPO: Taim mi liklik, mi bin stap long Brisbane, em biktaun bilong Queensland. Famili bilong mi ol i Katolik, tasol taim mi gat 8-pela krismas, mipela i no go moa long lotu na mipela i no save toktok moa long Baibel. Taim mi gat 10-pela krismas, famili bilong mipela i go sindaun long Gold Coast long Australia yet. Mipela i stap klostu long nambis, olsem na taim mi tineja, mi save lusim bikpela taim long swim na sef.

Maski i olsem, taim mi liklik mi no bin stap amamas. Papa i lusim mipela taim mi gat 8-pela krismas. Mama i marit gen, na pasin bilong dring na kros pait i kamap planti taim insait long famili bilong mipela. Wanpela nait, bihain long bikpela kros namel long papa na mama, mi bin sindaun long bet bilong mi na mi promis olsem sapos mi marit, mi no inap tru long kros wantaim meri bilong mi. Maski i gat ol hevi insait long famili, famili bilong mipela​—mipela 6-pela pikinini wantaim mama na waspapa​—i save pas gut wantaim.

Taim mi gat 19 krismas samting, planti wanlain bilong mi ol i save bikhet long ol man i gat wok long bosim ol. Ol i save kisim mariwana, smok tabak, na ol narapela drak na ol i save dring planti alkohol. Mi tu mi insait long dispela kain laip olsem ol wanlain bilong mi. Na tu, mi save amamas long draivim motobaik. Maski mi bin insait long sampela bikpela eksiden, mi laikim yet motobaik na mi tingting long draivim motobaik kirap long wanpela sait bilong Australia na i go kamap long narapela sait bilong en.

Maski mi stap fri, planti taim mi save bel hevi taim mi tingim ol samting i kamap long graun na pasin bilong planti man long i no tingim ol hevi i save painim ol man. Mi gat laik long kisim stretpela save long God, na long lotu, na long as na ol hevi i kamap long graun. Tasol taim mi kamapim askim bilong mi long tupela pris Katolik, mi no amamas long bekim ol i givim. Mi kamapim wankain askim long sampela pasto bilong ol lotu Protestan, tasol mi no amamas long bekim bilong ol tu. Bihain wanpela pren bilong mi i stretim rot long mi ken bungim Eddie, em wanpela Witnes Bilong Jehova. Mi bin toktok wantaim Eddie inap fopela taim, na long olgeta dispela taim em i bin yusim Baibel bilong bekim ol askim bilong mi. Kirap long namba wan taim mipela i bin toktok, mi save mi painim pinis wanpela spesel samting. Tasol long dispela taim, mi no ting olsem mi mas senisim i stap bilong mi.

BAIBEL I SENISIM I STAP BILONG MI: Taim mi draivim motobaik na mekim dispela raun bilong mi long Australia, mi bin toktok wantaim narapela Witnes em mi bin bungim. Tasol taim mi kam bek long Queensland, mi no bin toktok moa wantaim ol Witnes inap 6-pela mun.

Wanpela taim, taim mi pinis wok na i laik go bek long haus, mi lukim tupela man husat i bilas gut ol i karim brifkes na i wokabaut long strit, na mi ting olsem ol i Witnes Bilong Jehova. Mi go bungim ol na mi painimaut olsem ol i Witnes, na mi askim ol long stadi long Baibel wantaim mi. Wantu mi kirap long i go long ol miting bilong ol Witnes na mi go tu long wanpela bikpela kibung i bin kamap long Sydney long 1973. Tasol taim famili bilong mi​​—na moa yet mama​​—i painimaut long samting mi mekim, ol i tingting planti. Dispela na ol narapela samting tu i mekim na mi no bung moa wantaim ol Witnes. Inap wanpela yia, mi mekim samting mi laikim tru​—mi pilai kriket.

Bihain mi luksave olsem taim mi stadi wantaim ol Witnes Bilong Jehova, long dispela taim tasol mi bin stap amamas tru. Mi toktok wantaim ol gen na mi kirap long i go long ol miting. Na tu, mi lusim ol pren bilong mi em mipela i save kisim drak wantaim.

Samting i bin kirapim mi long mekim ol dispela senis em ol samting mi lainim long stori bilong Jop long Baibel. Wanpela Witnes husat i gat bikpela krismas na gutpela pasin, nem bilong em Bill, em i save toktok wantaim mi long Baibel. Bihain long mipela i bin stadi long stori bilong Jop, Bill i askim mi olsem: Satan i sutim tok long husat moa na tok olsem ol i givim hap bel tasol long mekim wok bilong God? (Jop 2:​3-5) Mi kolim nem bilong ol man em Baibel i stori long en em mi save long ol, na isi tasol Bill i tok, “Yes, yes, ol tu.” Bihain em i lukluk stret long ai bilong mi na i tok, “Satan i sutim dispela tok long yu tu!” Mi kirap nogut tru. Paslain long dispela stadi, mi save olsem ol bikpela tok bilong Baibel mi wok long lainim ol i tru. Tasol nau mi kliagut long as na mi mas bihainim ol tok mi lainim. Fopela mun bihain, mi kisim baptais na kamap wanpela Witnes Bilong Jehova.

GUTPELA SAMTING I PAINIM MI: Mi no laik tingim laip bilong mi bai olsem wanem long nau sapos mi no bin lain long bihainim ol lo bilong Baibel long i stap bilong mi. Ating bai mi dai pinis. Planti poroman bilong mi long bipo ol i dai pinis, long wanem, ol i bin kisim drak o dring alkohol. Na tu, marit bilong ol i no gat amamas long en. Ating laip bilong mi bai wankain olsem bilong ol.

Nau mi marit, na mi wantaim meri bilong mi, Margaret, i amamas long mekim wok long brens ofis bilong ol Witnes Bilong Jehova long Australia. I no gat wanpela long famili bilong mi i bihainim mi na lotuim Jehova. Tasol insait long ol yia i go pinis, mitupela Margaret i bin amamas long stadi long Baibel wantaim planti singel na ol marit em ol i senisim i stap bilong ol, olsem mi bin mekim. Taim mipela i mekim dispela wok, mipela i bin kisim planti gutpela pren. Na tu, Margaret, em i bin kamap bikpela insait long famili Witnes, na em i helpim mi long holimpas dispela promis mi bin mekim inap 40 yia i go pinis. Winim 25 yia mipela i marit na mipela i stap amamas wantaim. I no olgeta taim mipela i save wanbel long ol samting, tasol i kam inap long nau mipela i no bin tok pait. Mitupela wantaim i pilim olsem Baibel i bin helpim mipela long mekim olsem.

DISPELA MAN

NEM: MASAHIRO OKABAYASHI

KRISMAS: 39

KANTRI: JAPAN

BIPO: MAN BILONG PILAI LAKI

LAIP BILONG MI LONG BIPO: Mi kamap bikpela long Iwakura, em wanpela ples i stap klostu liklik long Nagoya​—bai yu ron inap 30 minit long tren bilong kamap long en. Mi tingim papa na mama bilong mi, tupela i gat gutpela pasin. Tasol bihain, mi kisim save olsem papa bilong mi em wanpela raskolman insait long lain yakuza, na em i save mekim pasin giaman bilong stilim mani bilong lukautim mipela faivpela long famili. Em i save dring planti long olgeta de, na taim mi gat 20 krismas em i kisim sik lewa sirosis na em i dai.

Papa bilong mi em bilong Korea, olsem na ol manmeri long hap mipela i stap long en ol i no laikim mipela. Dispela samting na ol narapela hevi i mekim na taim mi tineja, i stap bilong mi i no gat amamas long en. Mi go long haiskul, tasol mi save go long skul wan wan taim tasol na bihain long wanpela yia mi lusim skul. Mi gat nem nogut long fail bilong polis, na tu, mi hapkas Korea na dispela i mekim na i hatwok long mi kisim wok mani. Bihain, mi kisim wanpela wok, tasol mi kisim bagarap long skru na mi no inap mekim strongpela wok.

Mi kirap insait long wanpela kain pilai laki em ol i kolim pasinko, bilong lukautim mi yet long mani samting. Long dispela taim, mi stap wantaim wanpela meri na em i laik mi mas kisim wok mani na maritim em. Tasol mi save kisim planti winmani long pilai laki, olsem na mi no laik senisim i stap bilong mi.

BAIBEL I SENISIM I STAP BILONG MI: Wanpela taim, wanpela Witnes Bilong Jehova i kam long haus bilong mipela na mi kisim buk Life​​—How Did It Get Here? By Evolution or by Creation? Bipo mi no bin tingim dispela askim. Tasol taim mi ritim buk pinis, mi orait long kisim sampela save moa long Baibel. Planti taim mi bin tingting long wanem samting i painim man taim em i dai. Ol gutpela bekim mi kisim long Baibel long dispela askim na long ol narapela tok, dispela i kliaim tru tingting bilong mi.

Mi luksave olsem mi mas bihainim ol tok bilong Baibel mi wok long lainim. Olsem na mi stretim marit bilong mi, lusim smok, katim longpela gras bilong mi em mi bin kalarim i go yelopela, na mi mekim gut skin. Na mi lusim tu pasin bilong pilai laki.

Olgeta dispela senis i no isi long mekim. Olsem: Long strong bilong mi yet mi no inap long lusim pasin bilong smok. Tasol mi beten oltaim na mi bilip tru long God Jehova, na mi bin lusim dispela pasin. Na tu, bihain long mi lusim pilai pasinko, i hatwok tru long mekim namba wan wok mi bin kisim. Mani mi kisim long dispela wok em hap tasol bilong mani mi save kisim long pilai laki, na tu, wok i hatwok na i pinisim tru strong bilong mi. Wanpela ves bilong Baibel i bin helpim mi long dispela taim i gat hatwok tru long en, em Filipai 4:​6, 7. Em i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” Long planti taim, dispela promis i stret tru long mi.

GUTPELA SAMTING I PAINIM MI: Taim mi kirap stadi long Baibel wantaim ol Witnes Bilong Jehova, meri bilong mi i no amamas. Tasol taim em i lukim ol bikpela senis mi mekim long pasin bilong mi, em i sindaun wantaim mi long stadi bilong mi na em i kirap long i go long ol miting bilong ol Witnes Bilong Jehova. Nau mitupela wantaim i Witnes Bilong Jehova. Em i gutpela samting tru long mitupela wantaim i mekim wok bilong God!

Paslain long mi stadi long Baibel, mi ting mi bin stap amamas. Nau mi save long amamas tru em i wanem samting. Em i no isi long bihainim ol lo bilong Baibel, tasol mi save tru olsem dispela em i nambawan gutpela rot bilong bihainim.

DISPELA MERI

NEM: ELIZABETH JANE SCHOFIELD

KRISMAS: 35

KANTRI: YUNAITET KINGDOM

BIPO: TINGTING OLTAIM LONG KISIM AMAMAS LONG WIKEN

LAIP BILONG MI LONG BIPO: Mi kamap bikpela long Hardgate, wanpela liklik taun ausait long Glasgow, Skotlan. Taim mi gat 7-pela krismas, mama bilong mi husat i bin kamap wanpela Witnes Bilong Jehova, em i kirap skulim mi long Baibel. Tasol taim mi gat 17 krismas, mi laikim pasin bilong bung wantaim ol pren bilong mi long skul na i go long ol nait-klab, harim ol hevi metal musik, na dring alkohol. Na mi no tingting liklik long God o Baibel. Mi tingting oltaim long kisim amamas long wiken. Tasol olgeta dispela samting i senis taim mi gat 21 krismas.

Mi go visitim sampela wanblut bilong mi long Noten Aialan. Taim mi stap long hap, mi lukim wanpela mats (Orange Walk) bilong lotu Protestan. Mi kirap nogut tru long lukim pasin birua i stap namel long ol Protestan na ol Katolik. Dispela i helpim mi long tingim ol tok bilong Baibel em Mama i bin skulim mi long en, na mi save olsem God i no inap orait long ol man i sakim ol gutpela na stretpela lo bilong em. Na mi luksave olsem mi bin wok strong long mekim ol samting bilong inapim laik bilong mi yet tasol, na mi no tingim ol samting God i laik mi mas mekim. Mi wokim disisen olsem taim mi go bek long Skotlan, mi bai wok strong long skelim ol tok em Baibel i skulim man long en.

BAIBEL I SENISIM I STAP BILONG MI: Namba wan taim mi go bek long wanpela miting bilong ol Witnes Bilong Jehova long taun mi kamap bikpela long en, mi sem na pret. Tasol olgeta i amamas long mi kam. Taim mi wok long bihainim ol tok bilong Baibel mi lainim, wanpela gutpela sista long kongrigesen i tingim mi tru. Em i helpim mi long pilim olsem mi hap bilong kongrigesen gen. Ol pren bilong mi long bipo i wok yet long singautim mi long i go long ol nait-klab, tasol mi tokim ol olsem mi tingting strong long bihainim ol lo bilong Baibel. Bihain, ol i no kam lukim mi moa.

Bipo mi save tingim Baibel olsem wanpela buk i gat ol lo tasol long en. Tasol nau tingting bilong mi i senis. Mi kirap luksave olsem ol man em Baibel i stori long ol, em ol man i bin stap tru na ol i gat ol pasin kranki na ol i pilim ol samting long bel, wankain olsem mi. Ol tu i bin mekim ol popaia, tasol God Jehova i lusim rong bilong ol taim ol i sori tru long rong ol i bin mekim. Maski mi bin givim baksait long God taim mi yangpela, mi bilip olsem em inap lusim rong bilong mi na lusim tingting long ol popaia bilong mi sapos mi wok strong long amamasim em.

Na tu, mi amamas tru long pasin bilong mama bilong mi. Maski mi bin lusim God, Mama i no bin mekim olsem. Pasin bilong em long stap gut yet long Jehova, dispela i mekim na mi luksave olsem wok bilong Jehova em i gutpela samting bilong mekim. Taim mi liklik na mi save go autim tok long ol haus wantaim mama bilong mi, mi no save amamas long mekim na mi ting mi bai no inap autim tok long ol man inap planti aua. Tasol nau mi laik lukim olsem tok bilong Jisas long Matyu 6:​31-​33 em i tru o nogat. Em i tok: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. . . . Papa bilong yupela i stap long heven em i save pinis, yupela i mas kisim dispela olgeta kain samting. Tasol namba wan samting yupela i mas mekim i olsem. Yupela i mas larim God i stap king bilong yupela [“painim kingdom pastaim,” NW], na kisim stretpela pasin bilong em, na bai em i givim dispela olgeta arapela samting tu long yupela.” Bihain liklik long mi kisim baptais olsem wanpela Witnes Bilong Jehova, mi lusim wok mani bilong mi na kisim wanpela haptaim wok na mi autim tok fultaim.

GUTPELA SAMTING I PAINIM MI: Taim mi yangpela na mi tingting long painim amamas tasol long ol wiken, mi no bin stap amamas tru, na i stap bilong mi i no gat as bilong en. Nau taim mi insait tru long mekim wok bilong Jehova, na mi stap belgut tru. I stap bilong mi i gat as tru bilong en. Nau mi marit, na mi wantaim man bilong mi, mipela i save visitim narapela narapela kongrigesen bilong ol Witnes Bilong Jehova long olgeta wan wan wik na strongim ol. Mi tingim dispela wok olsem nambawan gutpela wok long laip bilong mi. Mi tenkyu tru long Jehova long em i bin givim rot gen long mi long lotuim em!

[Rait long pes 27]

“Kirap long namba wan taim mipela i bin toktok, mi save mi painim pinis wanpela spesel samting. Tasol long dispela taim, mi no ting olsem mi mas senisim i stap bilong mi”

[Rait long pes 29]

“Long strong bilong mi yet mi no inap long lusim pasin bilong smok. Tasol mi beten oltaim na mi bilip tru long God Jehova, na mi bin lusim dispela pasin”

[Rait long pes 30]

“Bipo mi save tingim Baibel olsem wanpela buk i gat ol lo tasol long en. Tasol nau tingting bilong mi i senis. Mi kirap luksave olsem ol man em Baibel i stori long ol, em ol man i bin stap tru na ol i gat ol pasin kranki na ol i pilim ol samting long bel, wankain olsem mi”