Baibel i Save Senisim i Stap Bilong Man

OLSEM WANEM wanpela mama wanpis long Rasia husat i save kisim drak em inap lusim dispela pasin na pas gut wantaim ol pikinini bilong em? Olsem wanem wanpela man long Kyoto, Japan, husat i no gat ples slip em inap strongim bel na lusim ol pasin i bin mekim em i kamap rabisman? Wanem samting i bin helpim wanpela kauboi bilong Australia long lusim pasin bilong dring planti? Skelim tok ol i mekim.

“Mi kisim save olsem mi gat wok long lukautim mi yet long sait bilong mani.”​—NELLY BAYMATOVA

KRISMAS: 45

KANTRI: RASIA

BIPO: MERI BILONG KISIM DRAK

LAIP BILONG MI LONG BIPO: Mi kamap bikpela long Vladikavkaz, em biktaun bilong Ripablik Bilong Not Osetia (nau ol i kolim Alania). Famili bilong mi ol i gat planti mani liklik. Tasol maski mipela i gat planti samting bilong skin, mi no stap amamas. Taim mi gat 34 krismas, mi bin marit na divos tupela taim pinis. Mi bin kisim drak inap 10-pela yia na tupela taim mi bin go long wanpela kain haus sik bilong helpim ol man long lusim drak. Mi gat tupela pikinini, tasol long dispela taim mi no pas gut wantaim ol, na mi no pas gut wantaim ol pren na famili bilong mi.

Mama bilong mi i bin kamap wanpela Witnes Bilong Jehova, na planti taim mi harim em i krai na beten long Jehova i ken helpim mi. Mi tingting: ‘Mama i longlong stret! Olsem wanem Jehova inap helpim mi?’ Mi bin traim long lusim drak, tasol mi yet i no gat strong long lusim. Wanpela taim mi lusim drak inap tupela de. Orait mi tingting olsem mi mas lusim haus, na mi go long windo na mi kalap i go daun. Tasol sori tru, mi stap long namba tu plua. Olsem na taim mi kalap i go daun, mi brukim wanpela han na lek bilong mi, na mi kisim bagarap long baksait bilong mi. Winim wanpela mun, mi slip long bet.

Long dispela taim mama i lukautim mi na i no krosim mi. Em i save olsem mi no inap tingting stret na bosim gut bel bilong mi. Tasol em i putim sampela nius Kirap!a klostu long bet bilong mi. Mi ritim olgeta na mi laikim ol tok bilong en. Orait nau mi pasim tok long bel olsem mi bai stadi long Baibel wantaim ol Witnes.

BAIBEL I SENISIM I STAP BILONG MI: Wanpela samting Baibel i skulim mi long en, em mi gat wok mi mas mekim. Mi kisim save olsem, mi no ken ting mama i mas lukautim mi​—em wok bilong mi yet long lukautim mi wantaim ol pikinini bilong mi long sait bilong mani. Inap long planti yia mi bin mekim laik bilong mi yet, olsem na nau i hatwok long lain long mekim wok mani long olgeta de.

Na samting i bin helpim mi gut, em ol tok i stap long Lo 6:​5-7, i tokim ol papamama long skulim ol pikinini bilong ol long God. Mi kisim save olsem God bai skelim pasin bilong mi long mekim bikpela long tupela pikinini bilong mi. Dispela save i kirapim mi long lusim haptaim bilong stap wantaim ol na kisim pasin bilong laikim tru ol.

Long bel, mi tenkyu tru long Jehova i bin larim mi i kisim stretpela save long em. Olsem na mi dediketim laip bilong mi long em na mi kisim baptais na kamap wanpela Witnes Bilong Jehova.

GUTPELA SAMTING I PAINIM MI: Mi lain long bosim belhat bilong mi, na dispela i helpim mi long stap gut wantaim mama bilong mi. Na mi pas gut moa wantaim ol pikinini bilong mi.

Mi kisim pasin bilong nolaik tru long ol samting i no stret long ai bilong God, olsem na planti hevi bipo mi bin kisim ol i pinis. Nau mi kisim bikpela amamas long helpim ol man long kisim stretpela save long gutpela God bilong yumi, Jehova.

“Mi pilim olsem God i bin helpim mi long abrusim bagarap.”​—MINORU TAKEDA

KRISMAS: 54

KANTRI: JAPAN

BIPO: EM I BIN SLIP NABAUT LONG STRIT

LAIP BILONG MI LONG BIPO: Mi kamap bikpela long biktaun Yamaguchi wantaim papa na bubu meri bilong mi. Mi no bin save long mama bilong mi. Taim mi gat 19 krismas, bubu meri i dai, na mi sindaun yet wantaim papa. Mi mekim wok olsem man bilong kuk, na papa tu i mekim kain wok olsem. Ol aua bilong wok bilong mitupela i no wankain, olsem na mi no lukim em planti taim. Mi kisim pasin bilong wok planti aua long olgeta de na dring wantaim ol poroman bilong mi.

Bihain, mi les long wok bilong mi. Mi save tok pait wantaim bos bilong mi na mi kirap dring planti moa yet. Orait taim mi gat 28 krismas samting, mi lusim papa na mi go raun long ol narapela hap. Taim mani bilong mi i pinis, mi kisim wok long wanpela haus laki. Mi bungim wanpela yangpela meri na mitupela i marit. Tasol insait long tupela yia na hap, marit bilong mipela i bruk.

Mi bel hevi na mi no inap bosim strong laik bilong mi, olsem na bihain mi gat bikpela dinau tru long ol man i gat bisnis long givim dinau long ol man. Mi ranawe long ol lain bilong kisim bek dinau na inap liklik haptaim mi go sindaun long ples bilong mi wantaim papa, tasol mi tok giaman long em na mitupela i no pren gut moa. Mi kisim mani long haus bilong em, na inap liklik taim mi kisim mani long rot bilong pilai laki. Tasol mi kamap rabis tru, na inap sampela haptaim mi slip long wanpela tren stesin. Mi go i stap long Hakata, na bihain long en mi go long Himeji, na bihain mi go long biktaun Kyoto. Inap sampela yia mi slip nabaut long strit.

BAIBEL I SENISIM I STAP BILONG MI: Long 1999, mi stap long wanpela pak klostu long wara Kamogawa long Kyoto na tupela meri i kam long mi. Wanpela i askim mi, “Yu laik stadi long Baibel?” Mi tok mi laik mekim olsem. Sampela strongpela Kristen long kongrigesen bilong ol Witnes Bilong Jehova i stadi wantaim mi long Baibel na ol i helpim mi long save olsem em i bikpela samting long mi mas bihainim ol stiatok bilong en. Ol i tok i gutpela sapos mi traim painim wok mani na ples slip. Bilong amamasim ol mi raun painim wok, tasol mi no wok strong tumas long painim. Tasol bihain, mi kirap beten askim God long helpim mi, na mi wok strong long painim wok, na bihain mi kisim wanpela wok.

Beten i helpim mi tu long winim wanpela bikpela traim. Ol lain bilong givim dinau em mi bin ranawe long ol, ol i painim mi na tokim mi long mi mas bekim dinau. Bikpela presa i kisim mi. Long Baibel ritim bilong mi, mi lukim tok bilong Aisaia 41:10. Long dispela ves, God i tok promis long ol gutpela wokman bilong em: “Bai mi helpim yupela.” Dispela tok promis i strongim bel bilong mi. Mi wok strong long bihainim ol tok bilong Baibel na bihain mi stretim olgeta dinau bilong mi. Long 2000, mi winim mak bilong kisim baptais na kamap wanpela Witnes Bilong Jehova.

GUTPELA SAMTING I PAINIM MI: Ol tok mi lainim long Baibel i kirapim mi long stretim hevi i stap namel long mi na papa, na em i lusim ol rong mi bin mekim bipo. Em i amamas tru long mi bin lain long bihainim ol lo bilong Baibel long i stap bilong mi. Mi pilim olsem God i bin helpim mi long abrusim bagarap, long wanem, mi bin kirap bihainim ol stiatok bilong Baibel.

Na tu, mi inap mekim wok mani bilong lukautim mi yet long ol samting bilong skin. (Efesus 4:28; 2 Tesalonaika 3:12) Na mi painim ol pren tru insait long kongrigesen Kristen. (Mak 10:​29, 30) Mi tenkyu tru long ol samting Jehova i bin skulim mi long en.

“Mi hatwok long senisim pasin bilong mi.”​—DAVID HUDSON

KRISMAS: 72

KANTRI: AUSTRALIA

BIPO: MAN BILONG DRING PLANTI

LAIP BILONG MI LONG BIPO: Mi namba 11 pikinini bilong papamama bilong mi, em Willie na Lucy. Famili bilong mi ol i bin sindaun long wanpela komiuniti bilong ol Aborijini, ol i kolim Aurukun, i stap long hap not tru long Queensland. Aurukun i stap long arere bilong naispela wara Archer na klostu long solwara. Papamama i lainim mipela ol pikinini long painim abus na kisim pis na bai mipela i gat kaikai. Long dispela taim bipo, mipela ol Aborijini i stap aninit long wanpela lo bilong gavman i tambuim mipela long holim mani, na mipela i mas sindaun tasol long hap gavman i makim bilong mipela.

Papamama i bin wok strong long lainim mi long kisim ol gutpela pasin, na ol i skulim olgeta pikinini bilong ol long rispek long ol lapun long komiuniti na serim ol liklik samting bilong mipela wantaim ol narapela. Olsem na mipela i tingim olgeta lapun long komiuniti i olsem ol mama na papa na anti na ankol bilong mipela.

Taim mi gat 7-pela krismas papa bilong mi i dai, na mipela i lusim dispela ples na i go sindaun long wanpela misin stesin bilong ol Aborijini long Mapoon, em i stap long hap not bilong Aurukun inap olsem 150 kilomita. Taim mi gat 12-pela krismas, mi kirap lain long stiaim ol hos na bulmakau, na inap long taim mi gat 48 krismas samting, mi wok olsem wanpela kauboi long planti fam bilong lukautim ol bulmakau samting. I stap bilong mipela i gat hatwok long en. Planti taim mi save dring planti tumas. Dispela i givim mi planti het pen na ol hatwok.

Wanpela taim mi dring planti tru na mi lusim hotel na wokabaut i go stret long fran bilong wanpela ka i spit i kam, na ka i bamim mi. Inap tupela yia mi kisim helpim long haus sik bilong kamap orait, na mi no inap mekim wok moa olsem kauboi.

BAIBEL I SENISIM I STAP BILONG MI: Taim mi stap long haus sik, wanpela pren meri bilong mi i givim mi sampela nius Wastaua na Kirap! bilong ritim. Tasol mi no bin kisim gutpela skul, olsem na mi no inap rit gut. Orait wanpela taim wanpela lapun man i gat 83 krismas em i kam lukim mi long wanpela de i hat nogut tru. Mi singautim em i kam insait na mi givim kolwara long em. Em i givim mi sampela buk na nius bilong Baibel na i tok em i laik i kam bek na kamapim klia ol tok bilong en. Bihain, mitupela i kirap stadi long Baibel long olgeta wik. Mi lukim olsem mi mas senisim sampela pasin na wokabaut bilong mi sapos mi laik bai God i orait long mi.

Em i no isi long mi senisim ol dispela pasin bilong mi. Tasol skul mama i bin givim long mi i mekim na mi rispek tru long dispela lapun i stadi wantaim mi long Baibel na ol gutpela save bilong Baibel em i givim long mi. Tasol mi surik long dediketim laip bilong mi long God. Mi ting mi mas save long olgeta tok bilong Baibel pastaim.

Tasol wanpela wanwok bilong mi i helpim mi long stretim tingting bilong mi long dispela samting. Em i wanpela Witnes Bilong Jehova, na em i soim mi gutpela tok i stap long Kolosi 1:​9, 10. Dispela ol ves i tok long yumi mas wok yet long kisim “save long God, na oltaim dispela save bai i kamap bikpela moa.” Wanwok i helpim mi long save olsem long olgeta taim bai mi lain na kisim save long ol nupela samting, olsem na i no gat as na mi larim liklik save tasol bilong mi i pasim mi long dediket long God.

Taim mi kirap bung wantaim ol Witnes Bilong Jehova, mi kirap nogut long pasin bilong ol. Mi lukim ol manmeri bilong olgeta kain sindaun i stap wanbel long lotuim God. Dispela pasin wanbel i mekim na mi bilip tru olsem mi painim pinis lotu i tru, olsem na long 1985 mi kisim baptais na kamap wanpela Witnes Bilong Jehova.

GUTPELA SAMTING I PAINIM MI: Mi kisim save long rit gut, na nau mi save lusim planti aua long olgeta wik long helpim ol narapela man long lain long rit na stadi long Baibel. Na tu, dispela pren meri i bin givim mi Wastaua na Kirap! bilong ritim, em tu i stadi wantaim ol Witnes na kisim baptais, na nau em i stap gutpela meri bilong mi. Mitupela wantaim i kisim bikpela amamas long helpim ol narapela long komiuniti bilong ol Aborijini long kisim save long God Jehova.

[Futnot]

[Rait long pes 21]

Mi wantaim meri bilong mi i kisim bikpela amamas long helpim ol narapela long komiuniti bilong ol Aborijini long kisim save long God