Ol Man i Askim . . .
Yu Ting Olgeta Man i Gat Rot Long Kisim Save Long God?
▪ Taim wanpela saveman bilong lo i askim Jisas long wanem lo i nambawan tru, Jisas i tok: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:37) Tasol paslain long ol man i ken laikim tru God, ol i mas kisim stretpela save long em. (Jon 17:3) Yu ting olgeta man i gat rot bilong kisim dispela save?
Nambawan rot bilong kisim save long God em long rot bilong Baibel. (2 Timoti 3:16) Planti manmeri i stap long ol hap we i isi long kisim Baibel. Na ating dispela ol manmeri i bin kisim singaut planti taim liklik long kisim stretpela save long God long rot bilong stadi long Baibel. (Matyu 28:19) Sampela em ol papamama Kristen i mekim bikpela long ol, na long olgeta de papamama i givim rot long ol long kisim save long God.—Lo 6:6, 7; Efesus 6:4.
Tasol sampela em sindaun bilong ol i mekim na i hatwok long ol i kisim save long ol tok bilong Baibel. Na sampela i kam long ol famili we ol i mekim nogut long ol na papamama i no tingim na laikim ol pikinini. (2 Timoti 3:1-5) Ol lain husat i kamap bikpela insait long ol kain famili olsem inap pilim olsem i hatwok long tingim God olsem wanpela gutpela Papa. Planti i no gat rot bilong kisim gutpela skul. Dispela i mekim na i hatwok long ol long ritim Baibel. Sampela narapela em ol bilip giaman bilong ol lotu i pasim tingting bilong ol, o ol i kam long ol famili, ol komiuniti, o ol kantri we ol i no orait long skulim ol man long tok i tru bilong Baibel. (2 Korin 4:4) Olsem wanem? Yu ting ol dispela samting i mekim na ol kain man olsem i no gat rot bilong kisim save long God na laikim em?
Jisas i tokaut klia olsem ol hevi na traim sampela man i karim bai mekim na i hatwok long ol long laikim God na bihainim tok bilong em. (Matyu 19:23, 24) Tasol maski i olsem, Jisas i tokim ol disaipel bilong em, “God em inap long mekim olgeta samting,” maski long ai bilong ol man i luk olsem i hatwok.—Matyu 19:25, 26.
Tingim ol dispela samting: God Jehova i mekim na Tok bilong em, em Baibel, i go long olgeta hap. Baibel i tok profet olsem long “olgeta hap bilong graun” ol bai autim gutnius bilong God na long ol samting em i tingting pinis long mekim. (Matyu 24:14) Long nau, ol Witnes Bilong Jehova i autim dispela gutnius long winim 230 kantri na ol i prinim ol buk na nius bilong Baibel long 500 tokples samting. Ol man husat i no gat rot long ritim Baibel, ol tu inap kisim planti save long trupela God long rot bilong lukim ol samting em i bin wokim.—Rom 1:20.
Na tu, Baibel i tok: “Bikpela i save long olgeta tingting na laik bilong yumi. Sapos yu wok strong long kisim save long laik bilong em, orait bai em i larim yu i save gut long em.” (1 Stori 28:9) Tru, Jehova i no tok promis olsem olgeta wan wan bai i gat wankain rot stret long kisim save long em, tasol em i givim rot long olgeta man i gat gutpela bel long mekim olsem. Ol man i no bin i gat rot liklik long kisim save long em, em bai kirapim bek ol long nupela taim we stretpela pasin tasol i stap long en, na bai ol i gat rot long kisim save long em.—Aposel 24:15.