Skul Yumi Kisim Long Jisas

Long God Tru

Yu ting God i gat nem tru bilong em?

Jisas i skulim ol man olsem God i gat nem. Jisas i tok: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi.’ ” (Matyu 6:9) Baibel i tokim yumi olsem nem bilong God em Jehova. (Kisim Bek 3:​15, sta; Song 83:​18, King James Version) Jisas i tok long ol disaipel bilong em na i beten long Papa bilong em olsem: “Mi bin kamapim nem bilong yu long ol.”​​—Jon 17:26.

Jehova em i husat?

Jisas i kolim Jehova olsem “yu wanpela tasol yu God tru,” long wanem, Jehova em Man Bilong Wokim olgeta samting. (Jon 17:3) Jisas i tok: “Ating yupela i no bin ritim tok i stap long buk bilong God? Dispela tok i olsem, ‘Bipo tru taim God i wokim olgeta samting, em i wokim ol manmeri, na em i mekim ol i kamap man na meri.’ ” (Matyu 19:4) Jisas i tok tu olsem: “God em i Spirit.” (Jon 4:24) Olsem na yumi no inap lukim God.​​—Kisim Bek 33:​17-​20.

God i laik yumi mas mekim wanem?

Taim wanpela i askim Jisas long wanem lo i nambawan tru na i winim olgeta narapela lo, Jisas i bekim tok bilong em olsem: “Namba wan lo em i dispela, ‘Yupela Israel, harim gut. Bikpela em wanpela tasol em i God bilong yumi. Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela na long strong bilong yupela.’ Na namba 2 lo em i dispela, ‘Yu mas laikim ol wantok olsem yu laikim yu yet.’ ”​—Mak 12:​28-​31.

Olsem wanem yumi ken soim olsem yumi laikim tru God?

Jisas i tok: “Mi laikim tru Papa.” Olsem wanem em i kamapim klia dispela pasin laikim bilong em? Em i tok: “Mi save mekim olgeta samting Papa i tokim mi long mekim.” (Jon 14:31) Em i tok tu olsem: “Oltaim mi save mekim ol samting em i laikim.” (Jon 8:29) Yumi inap mekim God i amamas long rot bilong kisim save long em. Taim Jisas i beten long God long helpim ol disaipel bilong em, em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru.”​—Jon 17:3; 1 Timoti 2:4.

Olsem wanem yumi ken kisim save long God?

Wanpela rot bilong kisim save long God em long lukim ol samting em i bin wokim. Jisas i tok: “Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol. Ating yupela i no winim tru ol pisin, a?” Jisas i laik bai yumi kisim wanem skul long dispela? Em i laik bai yumi no ken larim pasin bilong wari na tingting planti long ol samting bilong skin yumi mas kisim i pasim yumi long mekim wok bilong God.​​—Matyu 6:​26-​33.

Nambawan gutpela rot bilong kisim save long Jehova em long rot bilong stadi long Baibel. Jisas i kolim Baibel olsem “tok bilong God.” (Luk 8:21) Jisas i tokim God: “Tok bilong yu i tru olgeta.”​—Jon 17:17; 2 Pita 1:​20, 21.

Jisas i helpim ol manmeri long save long tok i tru bilong Jehova. Wanpela disaipel bilong Jisas i tok long Jisas olsem: “Tru tumas, taim mitupela i wokabaut long rot, na em i givim toktok long mitupela, na em i autim as tingting bilong buk bilong God long mitupela, bel bilong mitupela i bin kirap tru.” (Luk 24:32) Bilong kisim save long God, yumi mas i gat pasin daun, na i gat laik long kisim save. Jisas i tok: “Sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven.”​—Matyu 18:3.

Bilong wanem save i kam long God i mekim yumi i stap amamas?

God i inapim laik bilong yumi long kliagut long yumi stap bilong mekim wanem. Jisas i tok: “Ol manmeri i save, ol i stap rabis tru long ol samting bilong God, em ol i ken amamas.” (Matyu 5:3) Jehova i skulim yumi long nambawan gutpela rot bilong bihainim. Jisas i tok: “Ol man i harim tok bilong God na i bihainim, em ol i ken amamas.”​—Luk 11:28; Aisaia 11:9.

Bilong kisim sampela save moa, lukim sapta 1 bilong buk Tru Tru Baibel i Tok Wanem?a

[Futnot]

[Piksa long pes 16]

“Mi bin kamapim nem bilong yu long ol.” ​—Jon 17:26

[Ol Piksa long pes 16, 17]

Yumi inap kisim save long Jehova long rot bilong ol samting em i wokim na long rot bilong Baibel