Yu Save Long Dispela?
Wanem sais bilong bikpela tang wara i stap long tempel bilong Solomon?
Stori bilong dispela i stap long 1 King 7:26 i tok, dispela tang i gat “40,000 lita wara” em ol pris i save mekim wok long en, tasol 2 Stori 4:5 i tok dispela tang i gat “60,000 lita wara.” Dispela i mekim na sampela man i tok, man husat i bin raitim tok bilong Buk Stori em i popaia long raitim dispela hap, olsem na tupela namba hia i no wankain.
Tasol Baibel New World Translation i helpim yumi long save olsem wanem tok bilong dispela tupela ves i stret wantaim. Namba 1 King 7:26 i tok: “Em i save holim 40,000 lita wara.” Tasol 2 Stori 4:5 i tok: “Long dispela tang ol inap long pulimapim 60,000 lita wara.” Olsem na 2 Stori 4:5 i toktok long hamas lita wara dispela tang long tempel em inap long holim, tasol 1 King 7:26 i stori long hamas lita wara ol i save pulimapim long tang bilong tempel. Yumi ken tok, ol i no save pulimapim wara i kam inap tru long mak bilong maus bilong tang. I luk olsem ol i save putim wara inap long 40,000 lita tasol na ol i no save pulimapim olgeta.
Bilong wanem Jisas na Pita i tromoi wanpela mani tasol bilong baim takis bilong tempel?
Long taim bilong Jisas, long olgeta yia olgeta wan wan man Juda i winim pinis 20 krismas, ol i mas tromoi tupela mani ol i kolim drachma o wanpela mani ol i kolim didrachma bilong baim takis bilong tempel. Dispela mani em inap olsem pe ol wokman i save kisim long tupela de. Taim ol man i kamapim askim long pasin bilong givim dispela takis, Jisas i tokim Pita: “Yu go long raunwara na tromoi huk. Na namba wan pis yu pulim, em yu kisim na opim maus bilong en, na bai yu lukim wanpela mani i stap insait. Yu kisim dispela mani na givim long ol, bilong inapim takis bilong mitupela wantaim.”—Matyu 17:24-27.
Planti saveman i ting dispela mani hia em mani ol i kolim tetradrachma. Strong bilong dispela mani i olsem bilong 4-pela mani drachma, olsem takis bilong tupela man wantaim. Planti man ol i save holim dispela mani tetradrachma, winim mani didrachma. Olsem na wanpela buk (The New Bible Dictionary) i tok: “I luk olsem planti taim ol Juda i save bung tupela tupela na tromoi takis bilong Tempel bilong inapim tupela man.”
Na tu, sapos man i laik baim takis bilong wanpela man tasol, em i mas tromoi hap mani antap long dispela bilong baim ol man bilong senisim mani. Sampela taim pe bilong senisim mani em i bikpela, inap 8 pesen. Tasol ol man i baim takis bilong tupela man wantaim ol i no gat wok long mekim olsem. Olsem na long dispela liklik samting tu, dispela stori em Matyu i bin raitim long Baibel i stret wantaim pasin ol man i bin mekim long taim bilong Jisas na ol lain long nau i save long en.
[Piksa long pes 15]
Bikpela piksa long tetradrachma