Yu Save Long Dispela?

Long taim bilong Jisas, ol man i baim wanem kain ol takis?

INAP planti yia, lain Israel i save givim mani bilong sapotim lotu i tru. Tasol long taim bilong Jisas, ol Juda i mas baim planti takis na dispela i putim bikpela hevi long ol.

Bilong sapotim wok lotu i kamap long haus lotu sel na long tempel, olgeta Juda em ol i bikpela pinis i mas baim takis inap olsem hap sekel (2-pela drakma). Long taim bilong Jisas, ol i yusim dispela takis long baim ol sakrifais na lukautim tempel em Herot i bin wokim. Sampela man Juda i askim Pita olsem Jisas i save baim takis o nogat. Jisas i tok i no gat rong long baim takis. Em i tokim Pita long kisim wanpela koin na baim dispela takis.—Mat. 17:24-27.

Na tu, lain Israel long bipo i mas givim namba 10 hap bilong ol kaikai i kamap long gaden o namba 10 hap bilong mani ol i kisim long wok ol i mekim. (Wkp. 27:30-32; Nam. 18:26-28) Ol lida bilong lotu i strong olsem ol manmeri i mas givim olgeta kaikai i kamap long gaden, dispela i makim tu “mint na dil na kumin.” I no olsem Jisas i tok i no stret long givim namba 10 hap bilong ol samting, nogat. Tok bilong em i soim olsem ol saveman bilong lo na ol Farisi i mekim pasin i no stret long wei ol i yusim lo bilong givim namba 10 hap bilong ol samting.—Mat. 23:23.

Long dispela taim, ol Juda i stap aninit long wok bos bilong Rom na ol i mas baim takis. Eksampel, ol lain i gat graun i mas yusim mani o ol kaikai samting bilong baim takis. Olsem, sapos ol i kisim kaikai long gaden em weit bilong en 100 kilogram, orait ol i mas givim inap 20 or 25 kilogram bilong dispela kaikai long ol Rom. Na tu, olgeta wan wan Juda i mas baim takis olsem Gavman Rom i makim. Ol Farisi i bin askim Jisas sapos i stret long baim dispela takis. Tok bilong Jisas i soim tingting yumi mas i gat long pasin bilong baim takis, em i tok: “Orait ol samting bilong Sisar, givim long Sisar, na ol samting bilong God, givim long God.”—Mat. 22:15-22.

Na tu, ol man i mas baim takis taim ol i bringim ol kago bilong ol i kam insait long wanpela distrik, o taim ol i salim ol kago i go long narapela distrik. Ol i kisim dispela takis long ol haba, ol bris, ol rot, na long ol rot i go insait long ol taun o ol maket.

Ol man i stap aninit long wok bos bilong Gavman Rom i karim bikpela hevi tru long baim takis. Tasitus em wanpela saveman bilong Rom, em i tok long taim Empera Taiberius i mekim wok bos taim Jisas i stap long graun, “Siria na Judia i askim long gavman i ken daunim pe bilong baim takis bikos ol i pilim hatwok tru long baim takis.”

Na tu, ol i karim bikpela hevi moa bikos ol man bilong kisim takis i apim pe bilong takis. Wanpela man inap kamap man bilong kisim takis sapos em i peim bikpela mani moa winim ol narapela long mekim dispela wok. Na bihain em bai makim ol narapela long kisim ol takis, na olgeta bai traim long kisim bikpela profit. Ating Sakius i bin makim ol kain man olsem bilong kisim takis. (Luk 19:1, 2) Ol manmeri i no amamas long dispela samting na ol i heitim ol man bilong kisim takis.