Sapos Yu Mas Baim Takis, Gutpela Yu Baim

“I GAT tupela samting yumi no inap abrusim​—⁠wanpela em takis na wanpela em indai.” Long yia 1789 wanpela saveman bilong Amerika i gat namba long wok politik, em Benjamin Franklin, i tok olsem. Planti man i save kamapim dispela tok na dispela i kamapim klia, ol man i no inap abrusim takis na ol i no amamas long baim takis. Planti man i ting em i samting nogut olsem indai.

Maski i hatwok long baim takis, ol trupela Kristen i save tingim dispela olsem wanpela bikpela samting. Aposel Pol i tokim kongrigesen Kristen long Rom olsem: “Wanem samting yupela i mas givim long gavman, orait yupela givim long ol. Yupela i mas givim ol kain kain takis . . . Yupela i stap aninit long wanpela man, orait yupela i mas harim tok na soim gutpela pasin long em. Na sapos man i stap bikman, orait yupela i mas givim biknem long em.” (Rom 13:⁠7) Na Krais Jisas i stori long baim takis taim em i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.”​—⁠Mak 12:​14, 17.

Jehova i larim ol gavman i stap, na sapos lo bilong ol i no pait wantaim lo bilong God, em i laik ol wokboi bilong em i daun long ol. Tasol bilong wanem God i tok ol man i lotu long em i mas baim takis? Pol i tokaut long 3-pela as: (1) gavman bai bekim “pe nogut” long ol man i brukim lo; (2) bel bilong Kristen i gat tok sapos em i giaman long takis; (3) i mas i gat mani bilong baim ol dispela “wokman bilong God” long mekim ol wok, na bai ol samting i ken stap gutpela liklik. (Rom 13:​1-7) Planti i no amamas long baim takis. Tasol sapos ol i mas i stap long wanpela kantri i no gat polis o lain paiaman, o ol i no stretim ol rot, na ol i no gat ol skul, na no gat posofis, ating bai ol i les moa. Wanpela man Amerika i gat save long lo, em Oliver Wendell Holmes, i bin tok: ‘Takis em samting yumi mas givim bilong baim gutpela sindaun bilong yumi.’

Pasin bilong baim takis i no nupela samting long ol wokboi bilong God. Ol Israel bilong bipo i givim samting i olsem takis long ol king bilong ol, na sampela king i putim bikpela hevi long ol taim ol i makim bikpela takis. Na tu, ol Juda i bin baim kain kain takis long ol kantri i bin bosim ol, olsem Isip na Persia na Rom. Olsem na ol Kristen i stap long taim bilong Pol i save gut long tok bilong em taim em i stori long pasin bilong baim takis. Ol i save, maski takis i stret long mak o i antap tumas, na gavman i mekim wanem samting long dispela mani, ol i mas baim takis. I wankain long ol Kristen long nau. Tasol wanem sampela lo inap helpim yumi taim yumi baim takis nau long dispela taim i gat planti hevi?

Faipela Lo Bilong Stiaim Yumi

Stretim gut ol samting. Yumi mekim wok bilong Jehova na bihainim pasin bilong em. Em i “save mekim stret olgeta wok bilong en. Em i no save mekim ol samting i paul nabaut.” (1 Korin 14:33; Efesus 5:⁠1) Bilong baim takis yumi mas mekim stret ol samting. Olgeta pepa bilong yu i stap, na yu stretim ol gut, na raitim stret ol tok? Yu no gat wok long tromoi bikpela mani long baim fail bilong ol. Yu ken putim ol narapela narapela pepa long narapela narapela karamap na raitim long karamap wanem samting i stap insait (olsem ol risit bilong ol mani yu tromoi). Na yu ken putim ol karamap bilong wanpela yia insait long wanpela bikpela karamap. Long planti kantri yu mas holim ol dispela pepa inap planti yia, long wanem, gavman inap tok em i laik lukim ol. Olsem na no ken tromoi ol pepa; taim yu save tru yu no gat wok moa long ol, nau yu ken tromoi.

No ken giaman. “Yupela i mas prea long God na askim em long helpim mipela. Mipela i pilim olsem bel bilong mipela i stap stret . . . na mipela i laik wokabaut stret long olgeta taim.” (Hibru 13:18) Yumi mas i gat laik tru long bihainim stretpela pasin taim yumi mas baim takis. Pastaim, skelim takis yu mas baim long ol mani yu bin kisim long wok samting. Long planti kantri yu mas baim takis tu long mani yu kisim olsem presen, o long sampela liklik wok nabaut, o long sampela samting yu bin salim​—⁠sapos dispela mani i winim mak gavman i putim. Kristen i no laik bai bel bilong em i gat tok, olsem na em bai askim gavman olsem em i mas baim takis long wanem samting, na em bai baim dispela takis ol i makim.

Na tu, i gat rot bilong daunim sampela takis. Klostu olgeta gavman i orait long rausim sampela mani long takis ol i mas baim. Long nau ol man i no tingting long bihainim stretpela pasin, olsem na ol i ting i no gat rong long painim kain kain rot bilong daunim takis. Wanpela man long Yunaitet Stets i baim wanpela saket ol i wokim long skin bilong animal bilong givim long meri bilong em. Saket ya i gat bikpela pe. Em i hangamapim saket inap wanpela de long ples wok bilong em bai em i ken tok em i baim bilong “bilasim ples wok,” na rausim pe bilong saket long takis. Narapela man i laik rausim mani em i tromoi long marit bilong pikinini meri bilong em long takis bilong em. Em i tok, em mani em i tromoi long wanpela wok bisnis. Narapela man i kisim meri bilong em i go raun wantaim em inap sampela mun long hap bilong Esia. Tasol meri i no go bilong helpim em long wok, em i painim amamas tasol. Man i laik rausim mani em i tromoi long dispela raun bilong meri long takis bilong em. Kain pasin olsem i kamap planti taim tru. Yumi ken tok klia, sapos yumi askim gavman long rausim mani yumi tromoi long wok bisnis long takis bilong yumi, tasol yumi no tromoi dispela mani long samting bilong wok bisinis, em pasin giaman. Em samting God Jehova i nolaik tru long en.​—⁠Sindaun 6:​16-19.

Tingting gut. Jisas i tokim ol disaipel bilong em ol i “mas bihainim pasin bilong ol snek, na tingim gut pastaim ol samting [ol] i laik mekim.” (Matyu 10:16) Yumi ken bihainim dispela tok long ol samting bilong baim takis. Long ol kantri i gat planti wok bisnis planti man i baim wanpela kampani o wanpela man i gat save long lo bilong takis long redim ol pepa bilong takis. Ol yet i sainim tasol ol pepa na salim mani i go. Tasol gutpela ol i ken bihainim tok i stap long Sindaun 14:​15, em i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”

Planti man i bin kisim hevi long gavman, long wanem, ol i ‘bilipim tok’ bilong man i redim ol pepa bilong takis, tasol ol i no gat gutpela save o ol i laik giamanim gavman. Mobeta yu tingting gut! Was gut na ritim olgeta pepa pastaim na bihain yu ken sainim. Sapos sampela tok, o sampela hap ol i no raitim tok long en, o sampela tok bilong daunim takis i narapela kain, orait askim ol long as bilong dispela samting. Maski ol i mas stori 2-pela o 3-pela taim long dispela samting​—⁠yu mas save dispela samting i stret na i bihainim lo, o nogat. Tru long planti kantri ol lo bilong baim takis i planti tru na i hatwok long save long ol, tasol inap long skel bilong yu, yu mas save long samting yu sainim. Sapos yu mekim olsem yu bihainim gutpela tingting. Sampela taim narapela Kristen i gat gutpela save long ol lo bilong takis inap helpim yu long kisim sampela save. Wanpela elda Kristen i mekim wok loya na em i save helpim ol man i gat hevi long takis, em i tok: ‘Sapos man bilong stretim ol akaun bilong yu i tokim yu long wanpela samting i gutpela tru, ating em i laik kalapim lo!’

Mekim gut wok. Aposel Pol i tok: “Olgeta man wan wan bai i karim hevi bilong pasin ol yet i mekim.” (Galesia 6:⁠5) Long taim bilong baim takis olgeta wan wan Kristen i gat wok long bihainim stretpela pasin na ol lo. Em i no samting ol elda bilong kongrigesen i mas bosim ol brata sista long en. (Skelim wantaim 2 Korin 1:24.) Ol i no insait long ol samting ol narapela i mekim bilong baim takis. Tasol sapos wanpela brata i mekim pasin nogut na olgeta man i save em i giaman long baim takis, nau ol i skelim dispela. Long ol samting bilong takis ol wan wan Kristen i mas skulim bel bilong ol long bihainim tok bilong Baibel. (Hibru 5:14) Taim Kristen i sainim pepa i tokaut long ol mani em i kisim​—⁠maski narapela man i redim pepa o em yet i mekim​—⁠em i mas save dispela pepa i gat strong long ai bilong gavman, olsem na em yet i mas ritim dispela pepa na em i mas save ol tok bilong en i tru.a

No gat rong. Bilong holim wok bilong ol, ol wasman Kristen i mas ‘bihainim stretpela pasin tasol, bai ol man i no inap lukim wanpela rong long ol.’ Olsem tasol olgeta brata sista long kongrigesen i mas bihainim stretpela pasin tasol. (1 Timoti 3:2; skelim wantaim Efesus 5:27.) Ol i mas i gat gutpela nem long ai bilong ol man​—⁠long samting bilong baim takis tu. Krais Jisas yet i stap olsem gutpela piksa long dispela samting. Ol man i askim Pita olsem: “Tisa bilong yupela i save givim takis bilong tempel?” Em liklik takis tasol. Jisas i no gat wok long baim dispela takis, long wanem, tempel em haus bilong Papa bilong em, na ol king i no save kisim takis long pikinini man bilong ol. Jisas i tok olsem; tasol em i baim dispela takis. Em i wokim mirakel bilong painim dispela mani. Bilong wanem em i baim takis em i no gat wok long baim? Jisas yet i tok: “Nogut yumi mekim ol i kros long yumi.”​—⁠Matyu 17:​24-27.b

Stretpela Pasin i Litimapim Nem Bilong God

Olsem tasol ol Witnes Bilong Jehova long nau i no laik pundaunim ol narapela. Olsem na yumi no kirap nogut long save ol i gat gutpela nem long olgeta hap bilong graun, olsem ol i man bilong baim stret takis na bihainim stretpela pasin. Olsem: Niuspepa El Diario Vasco bilong Spen i stori long planti man long Spen i no laik baim takis, tasol nius i tok: “Ol Witnes Bilong Jehova tasol i narapela kain. Taim ol i baim samting o salim samting na ol i mas tokaut long hamas mani ol i mas baim takis long en, ol i tok tru tasol.” Na sampela yia i go pinis niuspepa San Francisco Examiner long Amerika i bin tok: “Ol [Witnes Bilong Jehova] i save bihainim ol lo bilong kantri. Ol i save tromoi takis, na lukautim ol sikman, na skulim ol man i no save rit rait.”

Ol trupela Kristen i no laik mekim wanpela samting i bagarapim gutpela nem ol i bin hatwok long kisim. Olsem wanem? Bilong holimpas yet sampela mani bilong yu, yu laik kisim nem olsem man i giaman long takis? Nogat, a? Tru tumas, mobeta yu redi long tromoi sampela mani na yu no ken bagarapim gutpela nem bilong yu, na lusim ol gutpela lo, na ol man i toknogutim lotu bilong yu.

Tru tumas, sapos yu laik holim gutpela nem olsem man i gat stretpela pasin, sampela taim yu mas tromoi mani. Inap 2,400 yia i go pinis saveman Pleto bilong Grik i bin tok: “Sapos tupela man i kisim wankain pe na ol i mas tromoi takis, stretpela man bai tromoi bikpela takis, na man nogut bai tromoi liklik.” Na em i ken skruim tok olsem, stretpela man i no save sori long lusim sampela mani bilong bihainim stretpela pasin. Dispela mani i no lus nating sapos yumi inap holim gutpela nem. Ol Kristen i gat dispela kain tingting. Em i bikpela samting long ol long holimpas gutpela nem, long wanem, dispela i litimapim nem bilong Papa bilong ol long heven na em inap helpim ol narapela long bihainim pasin bilong ol, na kam klostu long God Jehova.​—⁠Sindaun 11:​30; 1 Pita 3:⁠1.

Tasol bikpela samting tru i olsem: Ol trupela Kristen i laik i stap pren bilong Jehova. God i lukim olgeta samting ol i mekim, na ol i laik mekim ol samting em i ken amamas long en. (Hibru 4:13) Olsem na ol i sakim olgeta traim long giamanim ol gavman. Ol i save God i laikim ol man i wokabaut stret. (Song 15:​1-3) Na ol i laik bai Jehova i ken belgut long ol, olsem na takis ol i mas givim long gavman, ol i givim.​—⁠Sindaun 27:11; Rom 13:⁠7.

[Ol Futnot]