Bilong Wanem Yumi Mas Beten Long Nem Bilong Jisas?

PLANTI taim Jisas i bin skulim ol man long beten. Long taim bilong em, ol bikman bilong lotu Juda ol i save mekim beten “long ol kona bilong bikrot.” Bilong wanem ol i bin mekim olsem? “Bai ol man i ken lukim ol.” Ol i laik bai ol man i litimapim nem bilong ol olsem ol i man bilong givim bel long lotu. Planti i mekim ol longpela beten na kolim kolim wankain samting inap planti taim, i olsem ol i ting ol i mas “mekim planti toktok” na bai God i ken harim beten bilong ol. (Matyu 6:​5-8) Jisas i kamapim klia olsem ol kain beten olsem i lus nating tasol, na long dispela rot em i helpim ol man i gat gutpela bel long save long ol pasin ol i mas abrusim taim ol i beten. Tasol em i no skulim ol tasol long ol pasin ol i no ken mekim taim ol i beten.

Jisas i skulim yumi olsem ol beten bilong yumi i mas kamapim laik bilong yumi, olsem yumi laik bai nem bilong God i mas i stap holi, na Kingdom bilong Em i mas i kam, na laik bilong Em i mas kamap. Na Jisas i skulim yumi olsem i stret long askim God long helpim yumi long ol samting bilong yumi yet. (Matyu 6:​9-​13; Luk 11:​2-4) Jisas i mekim ol tok piksa bilong soim olsem yumi mas strong long beten, na bilip, na mekim pasin daun bambai God i ken harim beten bilong yumi. (Luk 11:​5-​13; 18:​1-​14) Na ol pasin Jisas yet i mekim i strongim dispela tok em i bin skulim ol man long en.​—Matyu 14:23; Mak 1:35.

Yumi ken save, dispela skul Jisas i bin givim long ol disaipel bilong em i helpim ol long mekim ol gutpela beten. Tasol Jisas i wetim laspela nait bilong em long graun bilong skulim ol long wanpela bikpela samting tru bilong beten.

“Wanpela Bikpela Senis Long Pasin Bilong Beten”

Long laspela nait bilong em, Jisas i lusim planti aua long strongim bel bilong ol gutpela aposel bilong em. Em i taim stret bilong kamapim wanpela nupela samting long ol. Jisas i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” Na bihain em i givim gutpela tok long ol bilong strongim ol, olsem: “Olgeta samting yupela i askim long nem bilong mi, em bai mi mekim. Olsem na Papa bai i kisim biknem long Pikinini bilong en. Olgeta samting yupela i askim long nem bilong mi, em bai mi mekim.” Klostu long pinis bilong tok bilong em, em i tok: “Bipo yupela i no askim long kisim wanpela samting long nem bilong mi. Yupela i mas askim, na bai yupela i kisim, na bai amamas i ken pulap tru long bel bilong yupela.”​—Jon 14:​6, 13, 14; 16:24.

Dispela tok em i bikpela samting tru. Wanpela buk i stori long dispela tok bilong Jisas olsem “wanpela bikpela senis long pasin bilong beten.” Jisas i no laik bai ol man i mas beten long em na ol i no ken beten moa long God, nogat. Em i kamapim wanpela nupela rot bilong beten long God Jehova.

Tru, long olgeta taim God i bin harim beten bilong ol gutpela wokman bilong em. (1 Samuel 1:​9-​19; Song 65:2) Tasol kirap long taim God i bin wokim kontrak bilong Lo wantaim ol Israel, sapos ol narapela lain i laik bai God i harim beten bilong ol, ol i mas save God i bin makim ol Israel olsem lain bilong em stret. Na bihain, kirap long taim bilong Solomon, ol man i mas save olsem tempel em i ples God i bin makim bilong givim ol ofa long em. (Lo 9:29; 2 Stori 6:​32, 33) Tasol dispela pasin bilong mekim lotu i no bilong i stap oltaim. Olsem aposel Pol i tok, dispela Lo God i bin givim long ol Israel na ol ofa ol i bin mekim long tempel, ol i olsem “piksa o tewel tasol bilong ol gutpela samting i laik kamap bihain.” (Hibru 10:​1, 2) Dispela piksa i mas pinis na samting tru tru i mas kamap. (Kolosi 2:17) Kirap long yia 33 C.E., man i no gat wok moa long bihainim Lo Bilong Moses bambai em i ken pas gut wantaim Jehova. Em i mas bihainim tok bilong dispela man em Lo i bin makim​—em Krais Jisas.​—Jon 15:​14-​16; Galesia 3:​24, 25.

Nem “i Winim Olgeta Arapela Nem”

Jisas i kamapim wanpela rot i gutpela moa bilong go klostu long Jehova. Em i soim olsem em i wanpela pren i gat bikpela strong, na em i man bilong opim rot bambai God i ken harim beten bilong yumi. Wanem samting i mekim na Jisas inap mekim dispela pasin bilong helpim yumi?

Taim mama i karim yumi, yumi olgeta i gat sin, olsem na i no gat wanpela wok o ofa yumi mekim em inap tekewe mak nogut bilong dispela sin o inapim yumi long pas gut wantaim God holi bilong yumi, Jehova. (Rom 3:​20, 24; Hibru 1:​3, 4) Tasol Jisas i bin givim nambawan gutpela laip bilong em olsem ofa na em i baim sin bilong olgeta manmeri em ofa bilong em inap baim bek ol. (Rom 5:​12, 18, 19) Olgeta manmeri i laik bai sin bilong ol i tekewe, ol i gat rot long kamap klin long ai bilong Jehova na ‘ol i no pret’​—tasol ol i mas bilip long ofa bilong Jisas na beten long nem bilong em.​—Efesus 3:​11, 12.

Taim yumi beten long nem bilong Jisas, yumi kamapim olsem yumi bilip long 3-pela samting em i mekim bambai ol samting God i tingting pinis long mekim i ken kamap tru: (1) Em i “Pikinini Sipsip Bilong God,” na ofa bilong em i as na God i ken lusim sin bilong ol man. (2) Jehova i bin kirapim em bek long matmat na nau em i stap “hetpris” na i mekim wok long dispela ofa bilong em bilong baim bek ol man bilong helpim ol. (3) Em wanpela tasol i “rot” bilong beten long Jehova.​—Jon 1:29; 14:6; Hibru 4:​14, 15.

Taim yumi beten long nem bilong Jisas, dispela i givim biknem long em. Na i stret em i kisim biknem, long wanem, Jehova i laik bai “olgeta ensel na olgeta man . . . ol i ken brukim skru long ai bilong Jisas na . . . tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.” (Filipai 2:​10, 11) Tasol bikpela samting moa, em taim yumi beten long nem bilong Jisas, dispela i save givim biknem long Jehova, em i bin givim Pikinini bilong em bilong helpim yumi.​—Jon 3:16.

Bilong yumi ken kliagut long bikpela namba Jisas i holim, Baibel i kolim sampela biknem bilong makim ol pasin na wok bilong em. Ol dispela nem i helpim yumi long save long ol gutpela helpim yumi kisim long rot bilong ol samting Jisas i bin mekim long bipo, na em i wok long mekim long nau, na em bai mekim long bihain. (Lukim blok “Bikpela Wok Jisas i Holim,” long pes 14.) Tru tumas, Jisas i bin kisim “nem i gutpela tru na i winim olgeta arapela nem.”a God i bin givim em bikpela namba na strong bilong bosim olgeta samting long heven na long graun.​—Filipai 2:9; Matyu 28:18.

I No Bilong Mekim Nating Tasol

Tru tumas, yumi mas beten long nem bilong Jisas sapos yumi laik bai Jehova i harim. (Jon 14:​13, 14) Tasol yumi no ken kolim nating dispela hap tok, “long nem bilong Jisas.” Bilong wanem yumi no ken mekim olsem?

Yumi ken tingim wanpela tok piksa. Taim yu kisim pas bilong wanpela bisnisman, ating em i save pinisim pas long dispela tok, “sincerely yours” o “tenkyu tru.” Tasol yu ting dispela i kamapim tingting tru bilong bisnisman? O yu ting em i bihainim gutpela pasin bilong raitim pas na em tasol? Tasol taim yumi beten na kolim nem bilong Jisas, yumi mas pilim tru long bel na no ken kolim nating tasol olsem dispela tok ol i mekim bilong pinisim pas. Tru, yumi “mas beten oltaim,” tasol yumi mas givim bel tru long mekim, na yumi no ken mekim nating tasol.​—1 Tesalonaika 5:17; Song 119:145.

Olsem wanem yu ken abrusim pasin bilong kolim nating dispela tok “long nem bilong Jisas”? Yu ken tingim gut long bel ol gutpela gutpela pasin bilong Jisas. Tingting long ol samting em i mekim pinis na em i laik mekim bilong helpim yu. Taim yu beten, yu ken tenkyu long Jehova na litimapim nem bilong em long gutpela wok tru em i bin mekim long rot bilong Pikinini bilong em. Taim yu mekim olsem, bai yu bilip moa yet long tok promis bilong Jisas, olsem: “Sapos yupela i askim Papa long wanpela samting long nem bilong mi, orait em bai i givim long yupela.”​—Jon 16:23.

[Futnot]

[Rait long pes 13]

Yumi mas givim bel tru long beten, na no ken mekim nating tasol

[Blok/​Piksa long pes 14]

BIKPELA WOK JISAS I HOLIM

Bilong kliagut long bikpela wok Jisas i holim, tingim sampela biknem em i holim, ol nem i kamapim pasin bilong em, na ol nem i makim em yet.

Adam i kamap bihain tru.​​—1 Korin 15:45.

Aposel.​​—Hibru 3:1.

Bikpela.​​—Jon 13:13.

Emanuel.​—​Matyu 1:23.

God i gat bikpela strong.​​—Aisaia 9:6.

Gutpela wasman.​​—Jon 10:11.

Het bilong sios.​​—Efesus 5:23.

Hetman.​​—Matyu 23:10.

Hetpris.​​—Hibru 4:​14, 15.

I tru.​​—2 Korin 1:​19, 20; KTH 3:14.

King bilong kamapim gutpela sindaun na bel isi.​​—Aisaia 9:6.

King.​​—KTH 11:15.

Krais/Mesaia.​​—Matyu 1:16; Jon 1:41.

Man bilong autim stret olgeta tok bilong God.​​—KTH 1:5.

Man bilong givim gutpela tingting tru.​​—Aisaia 9:6.

Man bilong harim kot.​​—Aposel 10:42.

Man bilong kisim bek ol manmeri.​​—Luk 2:11.

Namba wan ensel Maikel.​​—1 Tesalonaika 4:16; Jut 9.

Namba wan man bilong bringim yumi long rot bilong laip.​​—Aposel 3:15.

Namelman.​​—1 Timoti 2:5.

Papa bilong i stap oltaim oltaim.​​—Aisaia 9:6.

Pikinini Bilong God.​​—Jon 1:34.

Pikinini Bilong Man.​​—Matyu 8:20.

Pikinini Sipsip Bilong God.​​—Jon 1:29.

Tisa.​​—Jon 13:13.

Tok.​​—Jon 1:1.