Skul Yumi Kisim Long Jisas

Long Ol Beten Em God i Save Harim

Planti taim Jisas i save painim wanpela hap we i no gat man na bai em i ken beten, na em i tokim ol disaipel bilong em long mekim olsem tu. Baibel i tok: “Jisas i beten i stap long wanpela hap. Em i beten pinis, orait wanpela disaipel i tokim em olsem, ‘Bikpela, yu skulim mipela long mekim prea’ . . . Na Jisas i tokim ol olsem, ‘Taim yupela i beten, yupela i ken tok olsem, “Papa, nem bilong yu i mas i stap holi.” ’ ” (Luk 5:​16; 11:​1, 2) Olsem na Jisas i soim olsem beten bilong yumi i mas i go stret long Papa bilong em, em Jehova. Em tasol em i Man Bilong Wokim yumi na Man bilong “harim beten” bilong yumi.​​—Song 65:2.

Yu ting God i orait long olgeta beten?

God i no save orait long beten em man i save kolim kolim wankain tok long olgeta taim. Jisas i tok: “Taim yupela i mekim prea, maski long mekim planti toktok nating,” olsem kolim wankain tok planti taim. (Matyu 6:7) Taim yumi toktok wantaim Papa bilong yumi long heven, yumi mas kamapim ol tok i stap long bel bilong yumi. Long wanpela taim, Jisas i mekim tok piksa na kamapim klia long ol disaipel olsem God i harim beten bilong man nogut husat i laik tanim bel tru, tasol em i no harim beten bilong man i gat pasin antap na i save bihainim ol pasin bilong lotu. (Luk 18:​10-​14) Olsem na yumi mas i gat pasin daun na bihainim olgeta tok bilong God bambai em i harim ol beten bilong yumi. Jisas i tok: “Mi save autim olgeta tok olsem Papa i bin soim mi. . . . Oltaim mi save mekim ol samting em i laikim.” (Jon 8:​28, 29) Jisas i beten na i tok: “Yu no ken bihainim laik bilong mi. Nogat. Yu mas bihainim laik bilong yu tasol.”​​—Luk 22:42.

Yumi mas beten long wanem samting?

Ol man i bin bagarapim nem bilong God, olsem na Jisas i tok: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’ ” (Matyu 6:​9, 10) Yumi mas beten long Kingdom Bilong God i mas i kam, long wanem, em dispela gavman tasol God bai mekim wok long en long kamapim laik bilong em long heven na long graun. Jisas i tok yumi ken beten long God i ken givim yumi “kaikai inap bilong dispela de.” Yumi ken beten na askim Jehova long helpim yumi long kisim wok, haus, klos, na ol samting bilong helt, na ol narapela samting tu. Na tu, Jisas i tok olsem yumi mas beten long God i ken lusim sin bilong yumi.​​—Luk 11:​3, 4.

Yu ting yumi mas beten bilong helpim ol narapela?

Jisas i beten bilong helpim ol narapela. Baibel i tok: “Ol manmeri i bringim ol liklik pikinini i kam long Jisas. Ol i laik bai em i putim han antap long ol na mekim prea.” (Matyu 19:13) Jisas i tokim aposel Pita olsem: “Mi beten pinis bilong helpim yu, bai bilip bilong yu i no ken pundaun.” (Luk 22:32) Jisas i kirapim ol disaipel bilong em long beten bilong helpim ol narapela, na tu, long ol man i birua long ol na toknogutim ol.​​—Matyu 5:​44; Luk 6:​28.

Bilong wanem yumi mas beten long olgeta taim?

Jisas i makim taim bilong beten na em i kirapim ol disaipel bilong em tu long “ol i mas beten long olgeta taim, na ol i no ken les.” (Luk 18:1) Jehova i laik bai yumi kamapim tingting bilong yumi long em long olgeta taim yumi beten long em. Jisas i tok: “Yupela i mas prea na askim God long givim ol samting long yupela, na em bai i givim long yupela.” Dispela tok i no makim olsem Jehova i save les long harim beten bilong ol man husat i laikim na rispektim em olsem wanpela Papa. Nogat. Jisas i tok: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.”​—Luk 11:​5-13.

Bilong kisim sampela save moa, lukim sapta 17 bilong buk Tru Tru Baibel i Tok Wanem?a

[Futnot]