Stadi 7
Kam Klostu Long God Long Rot Bilong Beten
Bilong wanem em i bikpela samting long beten long olgeta taim? (1)
Yumi mas beten long husat, na mekim olsem wanem? (2, 3)
I stret yumi beten long wanem ol samting? (4)
Wanem taim yu mas beten? (5, 6)
Olsem wanem? God i save harim olgeta beten? (7)
1. Beten em i olsem: Man i toktok long God long pasin daun. Yu mas beten long God long olgeta taim. Olsem bai yu ken stap klostu long em olsem wanpela gutpela pren. Jehova em i bikpela Man tru na em i gat bikpela strong, tasol em i save harim beten bilong yumi! Olsem wanem? Yu save beten long God long olgeta taim?—Song 65:2; 1 Tesalonaika 5:17.
2. Beten em hap wok lotu bilong yumi. Olsem na yumi mas beten long God tasol, em Jehova. Taim Jisas i bin stap long graun em i save beten long Papa bilong em—em i no beten long narapela. Nogat tru. Yumi tu i mas mekim olsem. (Matyu 4:10; 6:9) Tasol olgeta beten yumi mekim yumi mas mekim long nem bilong Jisas. Dispela bai kamapim klia olsem yumi rispektim namba Jisas i holim na yumi bilip long ofa bilong em long baim bek yumi.—Jon 14:6; 1 Jon 2:1, 2.
3. Taim yumi prea long God yumi mas kamapim ol tok i stap long bel bilong yumi. Yumi no ken kolim ol prea yumi bin lain long en o ritim long wanpela buk lotu. (Matyu 6:7, 8) Yumi ken beten long olgeta taim, maski yumi stap long wanem ples, na yumi ken sanap, sindaun o brukim skru. God inap harim tu ol beten yumi mekim insait long bel tasol. (1 Samuel 1:12, 13) Gutpela yumi painim ples i no gat pairap o no gat ol man long en bambai yumi ken mekim prea bilong yumi yet.—Mak 1:35.
4. Yu ken beten long wanem ol samting? Yu ken beten long olgeta samting em inap helpim yu o pasim rot bilong yu long stap pren bilong God. (Filipai 4:6, 7) Wanpela beten bilong Jisas i lainim yumi olsem yumi mas tingim nem bilong God na laik bilong em insait long prea bilong yumi. Yumi ken beten askim God long lukautim yumi long ol samting bilong skin, na lusim sin bilong yumi, na helpim yumi long sakim ol traim. (Matyu 6:9-13) Taim yumi beten, yumi no ken tingim yumi yet tasol. Yumi mas beten tasol long ol samting i stret long laik bilong God.—1 Jon 5:14.
5. Yu ken beten taim bel i kirapim yu long tok tenkyu long God o litimapim nem bilong em. (1 Stori 29:10-13) Yu ken beten taim yu gat hevi na taim traim i painim yu. (Song 55:22; 120:1) I stret yu beten paslain long kaikai. (Matyu 14:19) Jehova i laik bai yumi “prea oltaim” long em.—Efesus 6:18.
6. Sapos yumi bin mekim bikpela sin, em bikpela samting long yumi mas beten. Long kain taim olsem yumi mas beten askim Jehova long marimari long yumi na lusim sin bilong yumi. Sapos yumi autim sin bilong yumi long em na yumi wok strong bambai yumi no ken mekim gen, God i redi long “rausim sin” bilong yumi.—Song 86:5; Sindaun 28:13.
7. Jehova i save harim beten bilong ol stretpela man tasol. Bilong God i ken harim beten bilong yu, yu mas wok strong tru long bihainim ol lo bilong em. (Sindaun 15:29; 28:9) Yu mas mekim pasin daun taim yu prea. (Luk 18:9-14) Yu mas mekim wok i stret wantaim beten bilong yu. Long dispela rot yu kamapim klia olsem yu bilip tru na yu tingim tru ol samting yu prea long en. Sapos yu mekim olsem, Jehova bai harim beten bilong yu.—Hibru 11:6.