Sapta 27
Rot Bilong Beten Bambai God i Ken Helpim Yu
1. God i mas givim wanem samting long yumi bilong helpim yumi? Yumi mas mekim wanem na bai yumi inap kisim dispela samting?
OL KRISTEN i mas beten askim God long helpim ol bambai ol inap sakim pasin nogut bilong dispela graun. Jisas i tok: “[God] bai i givim Holi Spirit long ol man i beten long em.” (Luk 11:13) Yumi mas lainim tok bilong Baibel, na bung wantaim lain bilong God, na yumi mas kisim spirit holi tu bilong helpim yumi. Tasol sapos yumi laik kisim spirit holi, yumi mas beten askim God long givim long yumi.
2. (a) Beten i olsem yumi mekim wanem? (b) I gat wanem ol kain beten? (c) Bilong wanem beten em i bikpela samting?
2 Beten em i olsem yumi toktok gut wantaim God. Sampela taim yumi beten long God bilong kisim sampela samting. Tasol yumi ken beten bilong tenkyu long God tu o bilong litimapim nem bilong em. (1 Kronikel 29:10-13) Sapos yumi laik pas gut wantaim God, oltaim yumi mas beten. (Rom 12:12; Efesas 6:18) Spirit holi bilong God, em yumi kisim taim yumi beten askim God long en, em inap helpim yumi long sanap strong na sakim olgeta hevi na traim Seten wantaim lain bilong em long graun i putim long yumi.—1 Korin 10:13; Efesas 3:20.
3. (a) Yumi inap kisim wanem strong long God? (b) I gat wanem rot tasol bilong pas gut wantaim God?
3 Ating yu hatwok long lusim wanpela pasin God i no save laikim. Orait, yu mas beten askim Jehova long helpim yu. Pol i mekim olsem, na em i tok: “Long strong bilong em mi inap mekim olgeta samting.” (Filipai 4:13; Sam 55:22; 121:1, 2) Wanpela meri em i lusim pinis pasin pamuk, em i tok: “God tasol i gat strong inap long helpim yu long lusim kain pasin olsem. Yu mas pas gut wantaim Jehova, na i gat wanpela rot tasol bilong helpim yu long pas gut wantaim em, em olsem: Yu mas beten.”
4. Wanpela man i kisim strong olsem wanem na em inap lusim smok?
4 Tasol ating bai yu tok: ‘Planti taim mi beten askim God long helpim mi long wokabaut stret, tasol mi mekim yet pasin i no stret.’ Sampela manmeri i save smok ol i tok olsem. Wanpela poroman bilong kain man olsem i tokim em: “Yu save beten long wanem taim?” Man i tok: “Taim mi laik slip, na taim mi kirap. Na taim mi pundaun na mi smok gen mi save beten na tok sori long Jehova.” Poroman i tokim em: “Gutpela taim bilong beten askim Jehova long helpim na strongim yu em taim yu laik kisim wanpela smok, a?” Dispela man i kirap mekim olsem na God i harim beten bilong em na helpim em. Em i lusim pasin bilong smok.
5. (a) Sapos yumi laik mekim stret wok bilong God, yumi mas mekim wanem? (b) I gat wanem samting na yumi ken save, man i laik lusim pasin i no stret em i mas karim pen na hevi?
5 Tasol sapos yu beten na yu stadi long Baibel na yu bung wantaim lain bilong God, yu no ken ting bai yu no hatwok long bihainim pasin i stret. Nogat. Bai yu gat hatwok, na ating bai yu karim bikpela pen na hevi. (1 Korin 9:27) Ol pasin nogut inap kalabusim yu na bai skin bilong yu i laik tumas long mekim, olsem yu sotwin tru na i dai long mekim. Olsem na hevi i save painim man i laik lusim wanpela pasin i no stret. Yu redi long karim pen na hevi bambai yu inap mekim pasin i stret?—1 Pita 2:20, 21.
OL BETEN GOD I SAVE HARIM
6. (a) Bilong wanem planti manmeri i hatwok long beten? (b) Yumi mas i gat wanem samting bambai God i harim beten bilong yumi?
6 Planti man i hatwok long beten. Wanpela yangpela meri i tok: “Mi hatwok long beten long wanpela Man mi no inap lukim.” No gat wanpela man i bin lukim God, olsem na yumi mas i gat bilip na taim yumi beten long God bai God i harim. Yumi mas bilip olsem Jehova em i stap tru na em inap helpim yumi. (Hibru 11:6) Sapos yumi gat dispela kain bilip na yumi givim bel tru na yumi beten, yumi ken save tru, bai God i harim beten bilong yumi. (Mak 9:23) Olsem na taim Konilias i no insait yet long lain bilong God, tasol em i beten askim God long soim rot long em, God i harim, long wanem Konilias i bilip tru na em i beten.—Aposel 10:30-33.
7. (a) God i save laikim wanem kain beten? (b) God i no save harim wanem kain beten?
7 Sampela taim maus bilong yumi i hevi taim yumi laik beten. Tasol nogut yumi larim dispela samting i pasim yumi long beten. Nogat. Bai God i harim, long wanem em i save pinis long ol samting yumi sot long en. (Matyu 6:8) Yu tingting: Sapos wanpela pikinini i kam tok tenkyu long yu, bai yu laikim tru ol liklik tok bel bilong em yet i kirapim em long mekim, o ol bikpela bikpela tok narapela man i tokim em long mekim? Na olsem tasol Papa long heven em i save laikim tru ol liklik tok bel bilong yumi yet i kirapim yumi long mekim. (Jems 4:6; Luk 18:9-14) Yumi no ken kolim ol narapela kain tok o sampela tok bilong lotu samting. Nogat. God i no save harim beten bilong man i mekim narapela kain pasin bilong toktok bambai ol man i ken litimapim nem bilong em o em i kolim wanpela beten planti taim.—Matyu 6:5, 7.
8. (a) Olsem wanem yumi save God inap harim beten man i mekim long bel tasol? (b) Baibel i tok yumi mas mekim wanpela pasin, olsem sanap o brukim skru, na yumi beten?
8 Na sapos yu no kolim long maus, yu beten long bel tasol, maski, God inap harim. Niemaia i beten olsem na God i harim beten bilong em, na Hana tu i beten olsem. (Niemaia 2:4-8; 1 Samyuel 1:11-13, 19, 20) Na yumi no ken ting yumi mas mekim wanpela pasin, olsem brukim skru samting. Maski yu sanap o yu stap we o long wanem taim, yu ken beten. Tasol Baibel i makim pasin bilong daunim het o brukim skru em i gutpela pasin, long wanem dispela i makim man i mekim pasin daun long God. (1 King 8:54; Niemaia 8:6; Danyel 6:10; Mak 11:25; Jon 11:41) Na olsem Jisas i tok, taim yu yet yu laik beten, gutpela sapos yu wanpela tasol yu stap na ol narapela man i no ken lukim yu.—Matyu 6:6.
9. (a) Yumi mas beten long husat tasol? Bilong wanem yumi mas beten long em tasol? (b) Yumi mas beten long nem bilong husat na bai God i harim beten bilong yumi?
9 Beten em i hap wok lotu bilong yumi. Olsem na yumi mas beten long Man bilong wokim yumi tasol, em God Jehova. Yumi no ken beten long narapela man. (Matyu 4:10) Na Baibel i tok, ol Kristen i mas beten long God long rot bilong Jisas, long wanem Jisas i dai bilong tekewe rong bilong ol. Olsem na yumi mas beten long nem bilong Jisas.—Jon 14:6, 14; 16:23; Efesas 5:20; 1 Jon 2:1, 2.
10. (a) God i no laikim beten bilong husat? (b) I gat wanem bikpela samting yumi mas mekim na bai God i harim beten bilong yumi?
10 Tasol olsem wanem? Jehova i save laikim olgeta beten? Baibel i tok: “Sapos man i givim baksait long lo, orait bai God i no harim beten bilong en. Bai God i lukim dispela beten i olsem stingpela samting tasol.” (Provep 28:9; 15:29; Aisaia 1:15) Olsem na sapos yumi laik bai God i harim beten bilong yumi, orait yumi mas bihainim ol lo bilong em. Sapos nogat, orait God i no laik harim beten bilong yumi, olsem stretpela man i no laik harim tok bilong redio em i ting i no stret wantaim lo bilong God. Baibel i tok: “Na sapos yumi beten long wanpela samting, orait em i save givim long yumi. Long wanem yumi save bihainim lo bilong em, na yumi save mekim pasin em i laikim.”—1 Jon 3:22.
11. Olsem wanem yumi ken mekim wok i stret wantaim beten bilong yumi?
11 Olsem na yumi mas mekim wok i stret wantaim beten. Olsem: I no stret sapos wanpela man i beten askim God long helpim em long lusim smok o buai samting, na bihain gen em i go baim dispela samting. Na sapos em i beten askim God long helpim em long klia long pasin pamuk, tasol em i save lukim ol piksa wokabaut o kaunim ol buk i kamapim dispela samting, em i no stret. O sapos wanpela man i hatwok long lusim pasin bilong pilai laki na em i beten askim God long helpim em, tasol em i go long hosres samting, orait em i no stret. Sapos yumi laik bai God i harim beten bilong yumi, orait, yumi mas mekim ol samting i stret wantaim dispela beten, na bai God i ken save, yumi no giaman.
12. (a) Wanem sampela samting yumi ken beten toktok wantaim God long en? (b) Yumi mas kisim save long wanem samting na bai God i harim beten bilong yumi?
12 Orait, yumi ken beten toktok wantaim God long wanem ol samting bilong yumi yet? Yumi ken beten toktok wantaim Jehova long olgeta samting i laik pulim yumi na bai yumi no pas wantaim em. I stret yumi ken beten askim em long helpim yumi long lukautim skin bilong yumi, na helpim yumi long mekim bikpela long ol pikinini. (2 King 20:1-3; Hetman 13:8) Aposel Jon i tok: “Sapos yumi bihainim laik bilong God yet na yumi beten long wanpela samting, orait bai em i harim beten bilong yumi.” (1 Jon 5:14) Olsem na pastaim yumi mas save long laik bilong God. (Provep 3:5, 6) Na taim yumi beten, sapos yumi tingim laik bilong God na yumi no tingim tasol laik bilong yumi yet, bai God i harim ol beten bilong yumi. I stret yumi mas tenkyu long Jehova long olgeta de long ol gutpela samting em i save givim long yumi.—Jon 6:11, 23; Aposel 14:16, 17.
13. (a) Olsem wanem Jisas i makim ol nambawan bikpela samting yumi mas kamapim taim yumi beten? (b) Wanem ol samting i olsem namba tu samting yumi mas kamapim long beten?
13 Jisas i lainim ol disaipel long wanpela beten bambai ol i ken save wanem kain beten God i save harim. (Matyu 6:9-13) Dispela beten i makim nem bilong God na kingdom bilong em na bihainim laik bilong em, em ol nambawan bikpela samting. Na ol namba tu samting em ol samting bilong helpim yumi yet, olsem yumi ken beten askim God long givim kaikai long yumi, na lusim ol rong bilong yumi, na tekewe yumi long traim na long dispela man nogut Seten.
BETEN BILONG HELPIM NARAPELA MAN
14. Baibel i tok wanem na yumi save, em bikpela samting yumi mas beten askim God long helpim ol narapela man?
14 Jisas i save beten askim God long helpim narapela man, olsem na yumi save, dispela em i bikpela samting. (Luk 22:32; 23:34; Jon 17:20) Pol i save, kain beten olsem inap helpim man, na planti taim em i tokim ol brata long beten askim God long helpim em. (1 Tesalonaika 5:25; 2 Tesalonaika 3:1; Rom 15:30) Taim em i stap kalabus em i rait pas na i tok: “Mi bilip bai God i harim prea bilong yupela, na bai em i givim bek mi long yupela.” (Failimon 22; Efesas 6:18-20) Liklik taim bihain Pol i lusim kalabus, olsem na yumi save beten bilong ol brata i bin helpim em.
15. Ol narapela man yumi laikim tumas ol, yumi ken beten askim God long helpim ol olsem wanem?
15 Pol yet i mekim beten bilong helpim ol narapela man. Em i tok: “Olgeta taim mipela i prea long God bilong yumi bai em i helpim yupela. . . . mipela i beten long em i ken mekim yupela inap tru long pasin em i singautim yupela long mekim.” (2 Tesalonaika 1:11) Na em i tokim narapela kongrigesen: “Mipela i save prea long God, bai em i helpim yupela, na yupela i no mekim wanpela pasin nogut. . . . bai yupela i mekim stretpela pasin.” (2 Korin 13:7) Gutpela sapos yumi tu yumi mekim kain beten olsem bilong helpim ol manmeri yumi laikim tumas ol. Tru tumas, “Prea bilong stretpela man em i gat strong, na em inap tru long helpim man.”—Jems 5:13-16.
16. (a) Sapos yumi laik bai God i helpim yumi, yumi mas beten wan wan taim tasol o olsem wanem? (b) Bilong wanem beten em i gutpela samting tru?
16 Olsem wanem? Yu save beten wanpela taim tasol long wik, olsem long taim bilong stadi bilong yu, o yu save beten long ol narapela taim tu? Sapos yumi laik bai God i helpim yumi, planti taim yumi mas beten long em. (1 Tesalonaika 5:17; Luk 18:1-8) Yu mas lain long toktok wantaim God long pasin daun, olsem yu save toktok wantaim wanpela gutpela poroman bilong yu. Em i gutpela samting tru yu inap beten na toktok wantaim Nambawan Bikpela King bilong heven na graun na yu ken save em i harim beten bilong yu!—Sam 65:2.
[Piksa long pes 227]
Taim samting i laik pulim yu long smok—gutpela sapos yu smok o yu beten askim God long helpim yu long sakim?
[Piksa long pes 229]
Yu save beten askim God long helpim yu na bihain gen yu mekim sampela samting em inap pulim yu long mekim pasin nogut?
[Piksa long pes 230]
Yu yet yu save beten o taim yu stap wantaim ol narapela man tasol?