Rot Bilong Famili i Ken Stap Amamas

Pasin Bilong Stretim Kros

Man i tok: “Taim mitupela Saraha i marit pinis, mipela i stap wantaim famili bilong mi long haus bilong papamama. Wanpela taim, gelpren bilong brata bilong mi i askim mi long draivim em i go bek long haus. Mi orait long dispela na kisim liklik pikinini man bilong mi i go wantaim. Tasol taim mi kam bek long haus, Sarah i kros nogut tru. Tok pait i kamap, na long ai bilong famili bilong mi, Sarah i kolim mi pes meri. Mi belhat nogut tru na mekim sampela tok i kirapim em long kros moa yet.”

Meri i tok: “Pikinini man bilong mipela i gat wanpela bikpela sik, na long dispela taim kros i kamap, mipela i gat hevi long mani. Olsem na taim Fernando i kalap long ka wantaim gelpren bilong brata bilong em na pikinini man bilong mipela, mi bel hevi tru. Taim em i kam bek long haus, mi tokim em long tingting bilong mi. Bikpela tok pait i kamap na mipela i kolim kain kain nem long narapela. Bihain, mi pilim nogut tru.”

SAPOS tupela marit i tok pait, yu ting dispela i makim olsem narapela i no laikim moa narapela? Nogat! Fernando na Sarah, em yumi stori long tupela antap, narapela i laikim tru narapela. Long olgeta marit, maski marit i stap gut tru, sampela taim bai i gat kros i kamap.

Bilong wanem ol kros i save kamap? Yumi ken mekim wanem na bai ol kros i no ken bagarapim marit bilong yumi? Marit em samting God i bin kamapim, olsem na i stret yumi skelim ol tok em Baibel i mekim long marit.​​—Stat 2:​21, 22; 2 Timoti 3:​16, 17.

Save Gut Long Ol Hevi

Man na meri marit i laik mekim gutpela pasin tasol long poroman. Tasol Baibel i tok “yumi olgeta man yumi bin mekim sin.” (Rom 3:​23) Olsem na taim tupela marit i no wanbel long sampela samting, ating i hatwok long pasim kros. Na sapos tok pait i kamap, ating sampela i hatwok tru long sakim pasin bilong bikmaus na tok bilas. (Rom 7:​21; Efesus 4:​31) Wanem sampela samting moa inap kamapim kros?

Man na meri marit i gat narapela narapela pasin bilong toktok wantaim. Michiko i tok: “Taim mipela i marit nupela, mi luksave olsem pasin bilong mipela long toktok wantaim i narapela narapela. Mi laik toktok long samting i bin kamap, na bilong wanem na olsem wanem dispela samting i bin kamap. Man bilong mi i laik toktok tasol long samting i bin kamap long dispela.”

Hevi bilong Michiko i no narapela kain, nogat. Long planti marit, wanpela i laik toktok longpela taim wantaim poroman long samting ol i no wanbel long en, tasol poroman i no laik mekim olsem, em i laik abrusim tok pait. Sampela taim, sapos wanpela i strong tumas long toktok long wanpela samting, orait nau narapela bai strong long pasim maus. Olsem wanem? Kain pasin olsem i wok long kamap insait long marit bilong yu? Oltaim wanpela i redi long toktok na narapela i no laik toktok?

Narapela samting bilong tingim i olsem: Famili em man o meri i bin kamap bikpela insait long en, dispela inap stiaim tingting bilong em long pasin ol marit i mas bihainim long toktok. Justin, em i marit pinis inap 5-pela yia, em i tok: “Mi bin kamap bikpela insait long wanpela famili i no save toktok tumas, olsem na mi hatwok long kamapim ol tingting bilong bel bilong mi. Meri bilong mi i bel hevi long dispela. Famili bilong em ol i lain bilong toktok, na em i no hatwok long tokim mi long ol samting i stap long bel bilong em.”

Wok Wantaim Long Stretim Hevi

Ol saveman i bin kisim save olsem nambawan samting i makim olsem marit bai stap amamas o nogat, i no hamas taim narapela i tok em i laikim narapela, nogat. Planti mani na pasin bilong man long laikim meri na meri i laikim man, dispela tu i no nambawan samting. Nambawan bikpela samting em pasin man na meri i mekim bilong stretim ol hevi i kamap.

Na Jisas i tok, taim tupela i marit, dispela i no samting man i pasim, nogat; em samting God yet i pasim. (Matyu 19:​4-6) Olsem na taim marit i stap gut, dispela i save givim biknem long God. Tasol sapos man i no tingim meri bilong em na soim pasin laikim, dispela inap mekim na nau God Jehova i no harim ol beten bilong em. (1 Pita 3:7) Na sapos meri i no gat rispek long man bilong em, dispela i olsem em i no gat rispek long Jehova em i bin putim man i stap het bilong famili.​​—1 Korin 11:3.

Rot Bilong Stap Amamas​​—Abrusim Ol Tok i Bagarapim Bel Bilong Poroman

Maski yu gat wanem kain pasin bilong toktok o yu bin kamap bikpela insait long wanem kain famili, sapos yu laik bihainim ol stiatok bilong Baibel na stretim gut ol hevi, i gat sampela pasin bilong toktok yu mas abrusim. Givim ol dispela askim long yu yet:

▪ ‘Mi save sakim pasin bilong bekim tok nogut?’ “Sapos yu paitim nus bilong wanpela man, bai blut i kamap. Olsem tasol, sapos yu mekim ol man i kros, bai pait i kamap.” (Sindaun 30:33) Wanem mining bilong dispela savetok? Tingim dispela eksampel: Ating pastaim tupela i gat narapela narapela tingting long pasin bilong basetim mani bilong famili (“yumi mas was gut long hamas yumi baim long dinau”), tasol sapos tupela i no was gut, kwiktaim dispela inap kamap olsem wanpela tok pait we narapela i sutim tok long pasin bilong narapela (“yu westim mani”). Tru, sapos poroman i “paitim nus” bilong yu, olsem sutim tok long pasin bilong yu, ating bai yu gat laik long bekim. Tasol pasin bilong bekim i save kamapim belhat na i save mekim hevi i go bikpela tasol.

Jems, wanpela man bilong raitim Baibel, em i tok: “Yumi save, liklik paia tasol em inap kirapim bikpela paia moa long bus na kukim olgeta diwai. Na maus em i olsem paia.” (Jems 3:​5, 6) Taim tupela marit i no bosim gut maus, kwiktaim liklik kros inap kamap olsem bikpela kros. Na long ol marit we i gat planti kros, pasin laikim i no inap kamap strong.

Yu no ken bekim tok nogut. Em i gutpela sapos yu bihainim pasin bilong Jisas, em taim ol i tok nogut long em, “em i no bekim tok nogut bilong ol.” (1 Pita 2:​23) Nambawan gutpela rot bilong daunim kwik kros taim tok pait i kamap, em yu mas pilim tingting bilong poroman na tok sori long samting yu yet i bin mekim na dispela tok pait i bin kamap.

TRAIM MEKIM OLSEM: Narapela taim tok pait i kamap, askim yu yet: ‘Sapos mi putim yau long ol wari bilong poroman bilong mi, dispela bai givim hatwok long mi? Mi yet i bin mekim wanem na dispela tok pait i kamap? Wanem samting i pasim mi long tok sori long ol pasin kranki mi bin mekim?’

▪ ‘Mi save rabisim o daunim tingting bilong poroman bilong mi?’ Baibel i tok: “Yupela olgeta i mas i stap wanbel na sori long olgeta man.” (1 Pita 3:8) I gat tupela samting inap mekim na yu no bihainim dispela tok. Wanpela, ating yu no kliagut long tingting bilong poroman. Olsem: Sapos poroman i wari long wanpela samting, tasol yu no wari long dispela, ating bai yu tok, “Yu wari tumas.” Ating yu laik helpim poroman long skelim gut dispela hevi. Tasol kain tok olsem i no inap mekim gut bel bilong em. Man marit na meri marit i laik save olsem poroman bilong ol i save pilim tru tingting bilong ol.

Pasin antap, dispela tu inap kirapim man o meri long rabisim tingting bilong poroman. Man o meri i gat pasin antap em i laik litimapim em yet, olsem na olgeta taim em i wok long daunim ol narapela. Ating em i mekim olsem long rot bilong sutim tok bilas long narapela o skelim pasin bilong em wantaim pasin bilong ol narapela. Tingim pasin bilong ol Farisi na ol saveman bilong lo long taim bilong Jisas. Taim wanpela man​​—maski em tu i wanpela Farisi​​—i kamapim wanpela tingting i narapela kain long tingting bilong ol dispela man i gat pasin antap, ol i kirap na sutim tok bilas long em na mekim ol tok i daunim em. (Jon 7:​45-​52) Jisas i narapela kain. Em i pilim tru tingting bilong ol man taim ol i kamapim tingting bilong ol long em.​​—Matyu 20:​29-​34; Mak 5:​25-​34.

Tingim samting yu mekim taim poroman i kamapim tingting bilong em. Olsem wanem? Ol tok yu mekim, pes, na krai bilong nek, i kamapim olsem yu pilim tru tingting bilong em? O yu kirap kwik na mekim sampela tok na pasin i makim olsem tingting bilong poroman i samting nating tasol?

TRAIM MEKIM OLSEM: Insait long ol wik bihain, tingim pasin bilong yu long toktok wantaim poroman. Sapos tok yu mekim i daunim em o i makim olsem tingting bilong em i samting nating, wantu tok sori.

▪ ‘Planti taim mi kisim tingting kranki olsem poroman i tingim em yet tasol?’ “Yu ting bai Jop i aninit long yu sapos em i no kisim wanpela samting long han bilong yu, a? Mi ting nogat. Long wanem, oltaim yu save lukaut gut long em na long famili bilong en na long olgeta samting bilong en.” (Jop 1:​9, 10) Long dispela tok, Satan i sutim tok long samting i kirapim gutpela man Jop long lotuim God.

Sapos ol marit i no was gut, ol tu inap kirap na bihainim wankain pasin. Olsem: Sapos poroman i mekim wanpela gutpela samting long yu, yu ting olsem em i laik kisim wanpela samting o haitim wanpela samting long yu? Sapos poroman i mekim wanpela pasin kranki, yu ting dispela i makim olsem em i save tingim em yet tasol na i no save tingim narapela? Kwiktaim yu tingim bek ol pasin kranki bipo em i mekim na yu tingting strong olsem yu no ken lusim tingting long dispela pasin kranki em nau tasol em i mekim?

TRAIM MEKIM OLSEM: Wokim wanpela lista bilong ol gutpela samting em poroman i bin mekim bilong helpim yu na ol gutpela samting yu ting i bin kirapim em long mekim olsem.

Aposel Pol i tok: “Man i save givim bel bilong en long ol arapela, . . . em i no save tingim rong ol i mekim long em.” (1 Korin 13:​4, 5) Man i gat pasin laikim tru, em i save pinis olsem yumi olgeta i sinman na i save mekim pasin kranki. Tasol em i save tu olsem em i no ken wok long tingim tingim ol rong em narapela i mekim long em. Pol i tok tu olsem, man i gat pasin laikim em i save “bilip” long narapela. (1 Korin 13:7) Tru, em i no bilipim nating olgeta tok narapela i mekim long em. Tasol em i no laik tingting nogut long em. Pasin laikim em Baibel i strongim yumi long kisim, dispela i kirapim yumi long fogivim narapela, na ting olsem gutpela tingting tasol i bin kirapim em long helpim yumi. (Song 86:5; Efesus 4:​32) Taim ol marit i kamapim dispela kain pasin laikim, ol bai amamas insait long marit bilong ol.

ASKIM YU YET . . .

▪ Tupela marit em tok bilong ol i stap long kirap bilong dispela stori, ol i mekim wanem ol pasin kranki?

▪ Mi ken mekim wanem na bai mi no mekim wankain pasin kranki insait long marit bilong mi?

▪ Wanem ol samting long dispela stori mi mas wok strong long bihainim?

[Futnot]