Wokim Ol Haus Bilong Litimapim Nem Bilong Jehova
“Mi kirap nogut tru. Mi ting mipela i no inap tru long kisim wanpela naispela Haus Kingdom olsem dispela bilong bung long en na litimapim nem bilong Jehova. Mani i no inap baim dispela bikpela amamas mi kisim!” —MARIA, MEKSIKO.
OL WITNES BILONG JEHOVA i save laik tru long bung wantaim bilong kisim save long Tok Bilong God, em Baibel. (Song 27:4; Hibru 10:23-25) Na ol i amamas moa yet taim ol inap bung wantaim long ol naispela haus bilong lotuim God long en. Insait long sampela yia i go pinis, ol i bin wokim planti tausen nupela haus lotu—ol i kolim Haus Kingdom—long planti kantri long olgeta hap long graun.
Wanem samting i mekim na ol i wok long sanapim planti Haus Kingdom olsem? Husat ol i save mekim ol dispela wok? Na dispela wok bilong sanapim ol Haus Kingdom i mekim wanem long ol lain i insait long dispela wok? Bilong painim bekim bilong ol dispela askim, yumi ken tingim ol samting i kamap long Meksiko na Belis.
I Mas i Gat Planti Tausen Haus Kingdom Moa!
Bipo ol Witnes Bilong Jehova long Meksiko ol i bin bung long wanem wanem ples ol inap painim—long hap baksait long haus, haus bilong ol Witnes, bakstua, haus ka, o ol haus bung ol i save rentim. Planti taim ol dispela Witnes i bin ting, em bai i gutpela tru sapos ol inap wokim ol Haus Kingdom bilong ol yet.
Long 1994 i gat 388,000 Witnes long Meksiko. Long dispela yia ol i bin skelim olsem: Bilong olgeta i ken bung long ol haus lotu bilong ol yet, ol i mas sanapim 3,300 nupela Haus Kingdom. Man! Em wanpela traipela wok stret!
Long dispela taim sampela kongrigesen long Meksiko ol i kirap pinis long sanapim Haus Kingdom bilong ol yet taim ol i gat rot long mekim. Tasol insait long 5-pela yia bihain em i klia tru olsem mipela i mas wokim planti Haus Kingdom moa—na wokim hariap moa—long wanem, lain bilong ol i wok long go bikpela na ol i sot long ol haus bilong bung long en. Orait ol i mekim wanem bilong stretim dispela samting?
Ol Lain Volantia i Raun Mekim Wok
Long 1999 ol i kirapim wanpela nupela program bilong sanapim ol Haus Kingdom. Ol i kamapim ol Grup Bilong Sanapim Ol Haus Kingdom long olgeta hap bilong Meksiko. Ol Witnes Bilong Jehova long olgeta hap bilong Meksiko—em planti ol i gat save long wokim ol haus samting—ol i volantia long insait long dispela program. Long nau, Meksiko i gat 35 grup olsem, na ol i kamapim wanpela grup long Belis.
Inap olsem 8-pela volantia, ol man na meri wantaim, ol i insait long wan wan Grup Bilong Sanapim Ol Haus Kingdom em ol i save wok fultaim na ol i no kisim pe. Ol dispela lain bilong amamas ol i save go long ol narapela narapela hap insait long kantri bilong lukautim wok bilong sanapim ol dispela haus. Olgeta wan wan volantia i save wok 8-pela aua long olgeta de, kirap long Mande i go inap Fraide, na long sampela Sarere tu. Long 7 klok moningtaim ol i save bung na stori long wanpela ves bilong Baibel na bihain long en ol i kisim kaikai. Olgeta i amamas long mekim wanem wanem wok ol wasman bilong grup i askim ol long mekim. Ol meri i save wok wantaim ol man long mekim ol kain kain wok olsem peintim wanpela kain simen long siling na wal insait, na putim ol tail, na peintim ol samting.
Kongrigesen long hap ol i wokim Haus Kingdom ol i save lukautim ol volantia i raun bilong mekim dispela wok, olsem ol i givim rum slip long ol, na wasim klos, na kukim kaikai bilong ol. Ol volantia na ol Witnes bilong dispela hap ol i wok wantaim long sanapim haus na ol i amamas long bung wantaim long ol miting Kristen na long go long ol haus na autim tok.
Gutpela Samting Bilong Wok Volantia
Ol dispela volantia i ting olsem wanem long wok bilong ol? Daniel, em i bin wok volantia inap 3-pela yia pinis, em i tok: “Tru, mipela save wok strong long bikpela san na long taim bilong kol, na kaikai ol samting mipela i no bin lain long kaikai, na go long ol narapela narapela hap, na stap longwe long famili, na planti taim i no gat ol samting bilong helpim sindaun bilong mipela, tasol dispela em i samting nating taim mipela i tingim ol blesing mipela i save kisim.”
Ol i kisim wanem ol blesing? Planti volantia ol i save lain long mekim ol nupela wok. Tasol wanpela volantia i save lukautim wanpela bikpela grup, nem bilong em Carlos, em i stori long gutpela samting ol i kisim na i bikpela samting moa, em i tok: “Mipela i kamap olsem wanpela famili i gat 20 insait long en. Mipela i save kaikai wantaim, wok wantaim, stadi wantaim, beten wantaim. Mipela i kamap gutpela pren tru i save pas gut wantaim.”
Na ol dispela volantia i save kamap gutpela pren bilong ol kongrigesen ol i wok long helpim ol. José, em i bin mekim wok long 100 Haus Kingdom, em i tok: “Taim kongrigesen i lukim nupela Haus Kingdom bilong ol i kamap, aiwara na amamas bilong ol i mekim na bel bilong mipela i gutpela tru.” Na em i tok moa: “Mipela i amamas long save, liklik hap wok mipela i mekim long sanapim narapela haus bilong mekim lotu i tru, dispela i save strongim bilip bilong kongrigesen.”
Ol i Mekim Bikpela Wok Tru
Ol dispela haus bilong mekim lotu long en ol i no gat planti bilas na ol kain kain stail bilong pulim ai bilong ol man, nogat. Olsem na ol inap sanapim kwik ol dispela Haus Kingdom na i no gat bikpela pe bilong wokim. Sapos inap, ol i save kisim ol samting bilong dispela ples yet na bihainim pasin bilong ples long wokim ol dispela haus. Olsem na ol inap wokim nupela haus insait long 6-pela wik tasol.
Long yia 2007, olgeta kongrigesen long Belis ol i gat nupela Haus Kingdom bilong ol yet—inap olsem 17. Long Meksiko, kirap long 1999 na i kam inap nau ol i bin sanapim planti Haus Kingdom, winim 1,400!
Tru, ol volantia i bin mekim planti gutpela wok tru, tasol i gat planti wok moa bilong mekim. (Matyu 9:37) Long nau lain Witnes long Meksiko i go bikpela inap 600,000 samting, na olgeta i save bung 3-pela taim long olgeta wik bilong kisim save long Baibel. Olsem na ol i mas i gat 2,000 nupela Haus Kingdom moa. Sapos long strong bilong ol man yet ol volantia i mas mekim dispela bikpela wok bilong sanapim planti Haus Kingdom olsem, bai ol i no inap tru long winim dispela wok. Tasol ol wok ol i mekim pinis i kamapim klia olsem, taim God Jehova yet i helpim dispela wok, ol “inap long mekim olgeta samting.”—Matyu 19:26.
[Blok/Piksa long pes 22]
“Samting Ol i Tok Long Mekim, Ol i Save Mekim”
Wok bilong sanapim ol Haus Kingdom i no save mekim sampela samting long lain bilong kongrigesen bilong ol Witnes Bilong Jehova tasol. Taim ol i wokim wanpela Haus Kingdom long Belis, wanpela man em meri bilong en i bilong lotu Pentikostal, em i tokim meri olsem, taim ol Witnes Bilong Jehova i wokim pinis “haus lotu” bilong ol em i laik i go long ol miting bilong ol. Wanem samting i kirapim dispela laik bilong em? Em i tok: “Mi lukim olsem God i stap wantaim ol. Taim ol i wok wantaim, ol i no save pait. Na samting ol i tok long mekim, ol i save mekim.”
[Piksa]
Haus Kingdom long Orange Walk, Belis
[Blok/Piksa long pes 23]
Wanpela Wok i Kamap Long Olgeta Hap
Ol Grup Bilong Sanapim Ol Haus Kingdom ol i stap long 120 kantri. Daunbilo i gat lista bilong sampela kantri em ol volantia i amamas na wok strong long mekim dispela wok:
Angola, Bolivia, Fiji, Gana, Hong Kong, India, Itiopia, Jameka, Kasakstan, Kroesia, Laibiria, Moldova, Naijiria, Papua Niugini, Ripablik Dominika, Ruanda, Sambia, Tuvalu, Yukren, Veneswela.
[Ol Piksa]
Haus Kingdom long Acapulco, Meksiko
Lain bilong wanpela Grup Bilong Sanapim Ol Haus Kingdom long Meksiko
[Piksa long pes 23]
Haus Kingdom long Tlaxcala, Meksiko