Tok i Tru i Stretim Wokabaut Bilong Mi
Klostu olgeta pren bilong mi bilong pastaim ol i dai pinis long sik AIDS. Taim ol i no dai yet, planti taim mi lukim ol i wokabaut long rot. Sapos mi no bin kisim tok i tru, mi tu mi no inap i stap laip long nau. Mi laik stori long dispela.
MAMA i karim mi long Disemba 11, 1954. Mi namba 2 pikinini na laspela pikinini bilong John na Dorothy Horry. Ol i givim nem Dolores long mi, tasol taim mama i karim mi em i kolim mi Dolly, long wanem, em i ting mi luk olsem wanpela liklik doli. Olgeta man i bin kolim mi Dolly, tasol ol i no save bihain bai mi kamap as bilong ol bikpela hevi bilong mama.
Mipela i sindaun long wanpela haus long Siksti-Fes Strit, Nu Yok Siti. Em i no gutpela haus; ol rat tu i stap. Wanpela nait rat i kaikaim mi, olsem na kwiktaim tru mipela i lusim dispela haus.
Long 1957 mipela i go sindaun long hap is bilong Manhaten. Dispela hap i gutpela tru, winim hap mipela i bin sindaun bipo long en. Haus i gat ol gutpela rum slip, na long windo bilong rum bilong mi, mi inap lukim wanpela bikpela pak klostu na wara Is. Mi inap lukim ol bot i trip nabaut long wara na ol pikinini i pilai kikbal na beisbal long pak. Man! I olsem mi stap long wanpela paradais! Tasol bihain, bel isi bilong mi i wok long pinis.
Dring na Ol Drak
Papamama i bin tok kros planti taim. Pastaim mi no save bilong wanem ol i mekim olsem, tasol bihain mi luksave olsem papa i spak olgeta taim. Em i no inap holim wanpela wok mani; mama tasol i wok. Taim ol pren bilong mi i save papa em man bilong dring oltaim, ol i bin tok bilas long mi na dispela samting i mekim na mi bel hevi stret.
Sindaun bilong mipela i wok long go moa nogut. Bihain papa i kamap man bilong kros pait na mama i rausim em long haus. Em nau, mipela i no gat papa—mama tasol. Long dispela taim mi gat 8-pela o 9-pela krismas na dispela samting i bagarapim tru bel bilong mi. Bilong lukautim mipela, mama i bin wok mani olgeta taim, olsem na bihain long skul, mi na susa bilong mi i wetim mama long haus bilong ol man i sindaun klostu.
Taim mi stap long gret 6 mi kamap wanpela bikhetmeri tru. Planti taim mi no save go long skul—mi bin ranawe i go long Tompkins Skwe Pak klostu, na dring bilong traim lusim tingting long ol hevi bilong mi. I no longtaim tumas na mi prenim sampela yangpela ol i gat bikpela krismas, winim mi. Mi gat 11-pela krismas tasol, tasol skin bilong mi i bikpela, na ol man i ting mi gat 16 o 17 krismas. Ol nupela pren bilong mi ol i dring, smok mariwana, kisim drak LSD, na givim sut long ol yet bilong kisim drak heroin. Mi laik ol i mas laikim mi, olsem na mi kirap na kisim ol dispela samting tu. Taim mi gat 14 krismas mi kalabus long ol dispela samting.
Mama i Kisim Save
“Mi karim yu, na bai mi kilim yu.” Em wanpela tok bilong ol mama long hap bilong mipela em pikinini bilong ol i bin mekim sampela samting bilong bagarapim tru bel bilong ol. Mama bilong mi em i meri bilong stap isi na bosim gut skin, tasol taim em i kisim save olsem pikinini bilong em—em pikinini i gat 14 krismas tasol—em i save kisim drak heroin, em i laik kilim mi i dai.
Mi siksti i go long ples waswas na traim long lokim dua. Mi slipim baksait bilong mi long dua na taitim strong lek bilong mi long bikpela dis bilong waswas na bai mama i no inap opim dua, tasol mi no hariap long mekim. Em nau, bikpela hevi i painim mi! Mama i paitim mi nogut tru. Wanpela samting tasol i pasim mama long bagarapim mi, em susa bilong mi na meri i bin kotim mi long mama. Tupela i sut i kam insait long ples waswas na holim mama inap long mi ken ranawe. Inap sampela de mi stap long wanpela hap na bihain mi kam bek long haus. Mi tokim mama mi orait long kisim helpim long daunim dispela pasin bilong mi long kisim drak.
Kisim Helpim Long Dokta
Sampela mun bihain mi lukim televisen i stori long wanpela kain klinik bilong helpim ol man i kisim drak. Ol man i laik tru long lusim ol drak, ol inap i go long dispela klinik. Mi stori wantaim mama long samting mi lukim, na em i salim mi i go long wanpela klinik long Nu Yok Siti. Long klinik ol man i sindaun olsem wanpela famili na ol i kisim helpim bilong kirapim ol long senisim pasin bilong ol. Mi bin stap long dispela klinik 2 na hap yia.
Klinik i helpim mi, tasol mi bel hevi stret taim mi kisim save olsem sampela wokman bilong klinik, em ol man mi save laikim na bilip long ol—na mipela i ting ol i bin lusim ol drak—ol i kisim gen ol drak. Mi pilim olsem mi kranki stret na ol i bin giamanim mi. Ol i bin skulim mipela olsem wanpela tok ol man i save mekim, olsem “man bilong kisim drak bai stap man bilong kisim drak oltaim oltaim,” em wanpela tok giaman. Tasol nau mi pilim olsem pasin bilong ol dispela man yet i kamapim klia olsem dispela tok i no wanpela tok giaman—em i wanpela tok tru.
Tasol taim mi kisim 17 krismas mi no kalabus moa long ol drak, na mi go bek long mama. Mi gat strongpela laik long mi bai wok strong long no ken kisim gen drak heroin. Taim mi bin stap long klinik, mama na susa bilong mi ol i bin kirap na stadi long Baibel wantaim ol Witnes Bilong Jehova.
Mi Olsem Wanpela Samting Nogut Yet
Maski mi no kisim moa ol drak, mi olsem wanpela samting nogut yet long ai bilong mama na susa bilong mi. As bilong en i olsem, mi no laik bihainim ol nupela lo mama i putim, olsem no ken smok, na no ken go long ol disko, na sampela samting moa. I no longtaim na mama i rausim mi long haus, long wanem, mi no laik lusim ol pren bilong mi na tingting bilong dispela graun. Mama i mekim olsem na mi nolaik tru long em, tasol gutpela tru em i mekim olsem, long wanem, dispela i bin helpim mi. Mama i strong long bihainim ol stretpela lo.
Olsem na mi lusim haus bilong kisim nupela sindaun. Mi bin go bek long skul bilong lain long wanpela wok, na mani mi kisim long dispela wok i helpim mi long go long koles. Mi wok gut na helpim ol narapela man. Mi kisim gutpela wok mani na flet bilong mi yet. Bihain mi bungim wanpela boipren bilong pastaim. Mitupela pren gen na mipela i gat laik long mekim stret ol samting na marit.
Tasol bihain boipren bilong mi i kisim ol drak na sindaun bilong mitupela i go nogut. Bel bilong mi i bagarap stret na bilong daunim bel hevi bilong mi, mi kirap na mekim wanpela samting mi save em bai daunim bel hevi bilong mi—mi kisim ol drak. Mi kisim koken. Em wanpela drak ol i save kolim drak bilong maniman, long wanem, em i gat bikpela pe. Long dispela taim planti man i kisim koken, long wanem, ol i ting ol i no inap kalabus long en. Tasol long mi, koken i moa nogut, winim heroin.
Inap olsem 3-pela yia namel long 1974 na 1976 samting, mi bin kisim koken. Bihain mi pilim olsem i stap bilong mi i nogut tru, na mi ting: ‘Olsem wanem? Mi bilong i stap olsem tasol?’ Mi ting sapos olsem, mi les pinis long dispela kain i stap bilong mi. Mi go bek long mama na tokim em mi les pinis long wokabaut bilong mi na mi bai go bek long klinik. Mi stap long klinik wanpela yia na hap na bihain mi stap fri gen long ol drak.
Klostu Mi Painim Tok i Tru
Mi kisim gen wanpela gutpela wok mani, naispela flet, na boipren. Mitupela i pasim tok pinis long marit. Mama i no lusim tingting long mi, olgeta taim em i telefon o raitim pas samting. Em i save stori long Baibel na salim nius Wastaua na Kirap! long mi, tasol mi no save kaunim. Mi tokim mama mi laik marit na kisim pikinini. Em i salim wanpela buk long mi—em buk Rot Bilong Kamapim Amamas Insait Long Famili. Em nau, dispela buk i senisim tru i stap bilong mi inap oltaim.
Taim mi kaunim dispela buk, mi kisim save long ol samting mi laik kisim tasol mi bin bihainim tingting kranki bilong kisim. Nau mi save, i gat man i save long tingting bilong mi na ol samting i stap insait tru long bel bilong mi. Mi no narapela kain! Planti man i gat wankain tingting. Tasol taim mi soim buk Famili na Baibel long boipren bilong mi, em i lap. Em i no laik senisim pasin bilong em inap long mitupela i ken pas gut wantaim olsem wanpela famili. Olsem na mi save mi mas skelim wanpela bikpela samting tru—mi bai stap wantaim em o lusim em. Mi tingting long lusim em.
Boipren bilong mi i belhat stret. Wanpela taim mi kam bek long haus na olgeta klos bilong mi i bagarap; boipren i bin kisim resa na katkatim. Klostu olgeta samting bilong mi—su, klos, tebol na sia samting, em i bin bagarapim o baim i go long ol man. Klos mi pasim, em tasol mi holim. Mi bel hevi stret—mi laik dai tasol. Taim yumi gat hatwok tru long i stap bilong yumi, sampela taim yumi les, olsem na yumi go bek long ol pasin bipo yumi bin mekim bilong helpim yumi long lusim tingting long ol hevi. Mi ting mi mas mekim olsem o kilim i dai skin bilong mi yet.
Maski mi kisim gen ol drak, mama i no les long mi. Em i save kam lukim mi na bringim nius Wastaua na Kirap! Wanpela apinun mitupela i toktok na mi kamapim tingting bilong mi long mama. Mi tokim em mi les pinis long painim rot bilong kisim gutpela sindaun na mi les tru long ol hevi. Mama i tok: “Yu bin traim planti rot, orait gutpela yu traim rot bilong Jehova.”
Tok i Tru i Helpim Mi
Long 1982, mi orait long mekim wanpela samting em mama i bin wok long kirapim mi long mekim inap planti yia. Mi kirap na stadi long Baibel. I no longtaim na mi amamas long ol samting mi lain long en. Mi kisim save olsem laip bilong mi i bikpela samting long Jehova, na tru tumas, i stap bilong yumi man i gat as bilong en. Tasol mi kisim save olsem, sapos mi laik mekim wok bilong Jehova mi mas mekim planti senis long i stap bilong mi, na wanpela i mas strongim bel bilong mi na helpim mi long ol samting bilong spirit. Olsem na mi askim mama long larim mi i kam bek long haus.
Mama i gat tupela tingting, long wanem, planti taim pasin bilong mi i mekim na em i bel hevi. Em i tokim wanpela elda Kristen olsem mi laik kam bek long haus. Taim elda i save mama i ting dispela taim mi bai senisim pasin bilong mi, em i tok: “Yu ken traim wanpela taim moa long helpim em, a?”
Gutpela tru, dispela taim mi bin mekim ol samting bilong amamasim mama. Mi stadi i go na mi kirap na go oltaim long ol miting Kristen. Jehova i helpim mi, olsem na mi senisim tru wokabaut bilong mi. Gutpela tok bilong Baibel i helpim mi long winim ol hevi. (Jon 17:17) Mi lusim smok. Mi bin kalabus tu long drak heroin na koken, tasol smok i hatwok moa long lusim. Mi lusim ol dispela samting na em namba wan taim mi amamas long i stap laip.
Sampela mun bihain, long Disemba 24, 1983, mi kisim baptais bilong kamapim long ples klia olsem mi dediket pinis long Jehova. Long Epril 1984, mi kirap na mekim wok painia haptaim bilong mekim sampela wok moa long wok autim tok. Taim mi kirap nupela long dispela wok, ol pren bilong mi bilong pastaim ol i lap na tok bilas long mi. I olsem aposel Pita i bin tok: “Nau yupela i no save mekim ol dispela kain pasin nogut wantaim ol. . . . Na ol i save kirap nogut long dispela, na ol i tok nogut long yupela.”—1 Pita 4:4.
Long Septemba 1984, mi kamap wanpela painia oltaim, na i no longtaim tumas na mi lukautim 10-pela Baibel-stadi long olgeta wik. Sampela bilong ol dispela stadi, em ol yangpela i bin lap na tok bilas long mi taim mi kirap nupela long wok autim tok. Long dispela taim mi amamas tru, long wanem, mi inap helpim sampela yangpela long kisim tok i tru. Long olgeta taim mi gat laik long kisim pikinini, olsem na bilong kamap olsem wanpela mama bilong ol pikinini long ol samting bilong spirit, oltaim dispela i givim bikpela amamas tru long mi.—Skelim wantaim 1 Korin 4:15.
Ol yia i kam i go pinis, na mi bin lukim sampela pren bilong mi bilong pastaim, em mipela i bin kisim ol drak wantaim, na ol i wokabaut long ol rot klostu long haus bilong mipela. Ol i gat sik AIDS, long wanem, ol i bin kisim drak long rot bilong nil bilong sut ol man i gat sik AIDS i bin mekim wok long en. Man! Skin bilong ol i bagarap stret! Nau planti bilong ol i dai pinis. Mi save, sapos tok i tru bilong Baibel i no bin helpim mi, mi tu i no inap i stap laip long nau. Yes, tok i tru i bin stretim wokabaut bilong mi, olsem na mi stap laip.
Abrusim Hevi
Planti taim mi ting, gutpela sapos mi bin save long tok i tru taim mi pikinini na mi inap abrusim ol bikpela pen na hevi. Jehova i save helpim mi long karim hevi, em ol hevi mi kisim, long wanem, mi lusim nating taim bilong yangpela bilong mi. Tasol mi mas wetim nupela taim i kamap na sampela bel hevi bilong mi bai pinis olgeta. (KTH 21:3, 4) Long nau mi save wok strong long tokim ol yangpela, ol i kisim gutpela blesing—ol i save long Jehova na ol i kisim helpim long oganaisesen bilong em bambai ol i ken bihainim ol tok em i skulim ol long en.
Long ai i olsem ol bilaspasin bilong dispela graun i samting bilong amamas long en. Na ol lain bilong dispela graun i laik bai yu ting, yu inap kisim kain kain amamas bilong graun na no gat hevi long en, tasol nogat. Ol man bilong dispela graun bai mekim wok long yu na taim wok bilong ol i pinis, ol i no ken laikim yu moa. Baibel i tok stret, Satan em i bos bilong dispela graun—em god bilong en—na yumi no ken laikim dispela graun na ol pasin bilong en. (Jon 12:31; 14:30; 16:11; 2 Korin 4:4; 1 Jon 2:15-17; 5:19) Ol man bilong dispela graun i kalabus long pasin bilong bagarap, olsem na sapos yu poroman wantaim ol, yu no inap painim amamas tru.—2 Pita 2:19.
Mi stori long ol dispela samting i bin painim mi bambai ol narapela i ken save, “laip tru”—em laip oltaim long nupela taim God bai kamapim—em tasol i wanpela gutpela samting yumi olgeta i ken wok strong long kisim. Maski sampela taim hevi i painim yumi taim yumi bihainim tok i tru, nogut yumi mekim olsem wanpela bulmakau i kalabus i stap long wanpela banis na em i lukim gras i gutpela moa i stap long narapela banis na em i laik kisim. Gras o pasin long graun bilong Satan i no gutpela moa, nogat tru. Tasol Satan i save bilasim ol samting bilong pulim yumi na yumi ting olsem. Mi save beten olsem mi wantaim olgeta brata sista Kristen bilong mi, mipela inap lukluk i go long laip tru—em laip oltaim long Paradais long graun. (1 Timoti 6:19)—Em stori bilong Dolly Horry.
[Piksa long pes 15]
Mitupela mama i autim tok long Tompkins Skwe Pak