“Jehova, Yu Painim Mi Pinis!”

Stori bilong Nelly Lenz

Mi askim tupela man husat i kam long haus bilong mipela olsem: “Yutupela i Witnes Bilong Jehova?” Ol i bekim olsem, “Yes, mipela ol Witnes Bilong Jehova.” Mi kirap na tok, “Mi tu!” Mi gat 13 krismas tasol na mi no save go long ol miting long Haus Kingdom. Papamama bilong mi i no ol Witnes Bilong Jehova. Olsem na bilong wanem mi bin tok olsem mi wanpela Witnes Bilong Jehova?

SAPOS ol Witnes Bilong Jehova i no bin stap, mi ting mi no inap kamap. Mama i kisim bel long mi taim em i stap long Montreal, Quebec, Kanada. Em i gat 17 krismas tasol. Famili bilong em i strong tru long em i mas rausim bel. Mama i tok orait long mekim olsem.

Mama i askim long kisim wanpela de malolo long wok, bilong em i ken go na rausim bel. Bos bilong em, i wanpela Witnes Bilong Jehova, na i luk olsem em i kisim save long as na mama i laik kisim de malolo. Bos i mekim sotpela tok long Mama long olsem wanem laip i wanpela gutpela samting tru. (Song 139:​13-​16) Taim Mama i wokabaut i go long klinik, em i tingting long tok bos i bin mekim long em. Nau em i pasim tok olsem em i no ken rausim bel. Bihain long mama i karim mi long 1964, em i lusim mi long wanpela haus bilong lukautim ol pikinini i no gat papamama.

Nambawan Taim Mi Harim Tok i Tru Bilong Baibel

Klostu long taim mi gat 2-pela krismas, mama wantaim nupela man bilong em i kisim mi long haus bilong lukautim ol pikinini. Taim mipela i stap long Marguerite-du-Lac-Masson, tupela i kirap stadi long Baibel wantaim ol Witnes Bilong Jehova na go long ol miting bilong kongrigesen. Tasol, i no longtaim mipela i go long Boisbriand, na papamama i no stadi moa.

Sampela yia bihain, tupela i kirap stadi gen. Mi putim yau long harim Baibel i tok wanem long wanpela paradais hia long graun. (Luk 23:43, NW) Mi lain long laikim tru Jehova.

Wanpela de, Mama i tokim mi olsem ol i no stadi moa wantaim ol Witnes na mipela i no ken go moa long Haus Kingdom. Pastaim mi bin amamas. Mi liklik pikinini i gat 8-pela krismas, olsem na sampela taim mi pilim olsem ol miting i longpela tumas. Tasol long apinun mi laik toktok long Jehova long rot bilong beten, na mi tingting planti nogut em i no putim yau long beten bilong mi.

Long Sande bihain, mi lukim ol neiba bilong mipela husat i Witnes Bilong Jehova i go long miting long Haus Kingdom. Mi kirap long krai na mi askim God, “Bilong wanem ol pikinini bilong ol Witnes inap long go long miting na mi nogat?” Tasol maski mi pilim olsem, tok bilong Song 33:18 i kamap tru: “Tasol harim. Bikpela i save was long ol manmeri i stap aninit long em.”

Mi Go Bek Long Haus Kingdom

Bihain long 3-pela wik, mi visitim ol neiba bilong mipela na mi tokim mama bilong haus, Lilianne olsem, mi laik go long ol miting. Lilianne i tok, mi no inap go, long wanem, mama bilong mi i no laik pas wantaim ol Witnes Bilong Jehova. Tasol mi strong yet. Olsem na em i kisim mi i go long haus na em i askim Mama sapos mi inap long i go wantaim ol. Mi kirap nogut tru, Mama i tok orait long en. Mama i tok ol miting bai lainim mi long ol gutpela stiatok. Olsem na long olgeta Sande, mi bin i go long miting.

Inap olsem 3-pela yia, mi inap long i go long ol miting bilong kongrigesen. Tasol taim mi gat 11-pela krismas papamama i katim marit, na mi wantaim mama i mas lusim dispela hap. Na mi no bung moa wantaim ol Witnes Bilong Jehova.

Samting Mi No Ting Bai Kamap

Wanpela de mi sindaun long lata bilong haus bilong mipela taim tupela Witnes​—Eddie Besson na Don Fisher⁠—i kam na askim papamama i stap o nogat. Taim mi tok ol i no stap, tupela i tanim na wokabaut. Tasol mi ron bihain long ol, na mipela i mekim dispela toktok mi bin stori long en long kirap bilong dispela stori.

Tupela i kirap nogut long harim mi tok olsem mi wanpela Witnes Bilong Jehova. Mi tokim ol long mi stap olsem wanem na mi strong long ol i mas kam bek long apinun. Taim mi tokim Mama olsem ol Witnes bai kam long apinun, em i kros na tok em i no inap larim ol i kam insait long haus bilong mipela. Tasol tru tru, em i tingting long lusim haus paslain long tupela i kam kamap. Mi krai na strong long Mama i mas stap. Klostu long em i redi long lusim haus, belo long dua i ring, na em Eddie Besson. Man! Tingim amamas bilong mi taim Mama i orait long stadi gen!

Em nau, mi inap long go long ol miting gen! Tasol klostu wanpela yia bihain, mama i lusim stadi gen. Dispela taim em i tambuim mi long pas wantaim ol Witnes na em i tromoi olgeta buk samting bilong ol Witnes Bilong Jehova em inap long painim. Tasol mi bin haitim wanpela Baibel, wanpela buk singsing, 2-pela volium bilong Wastaua, 2-pela Yearbook of Jehovah’s Witnessess, na wanpela buk, nem bilong en, Tok i Tru i Bringim Man Long Laip Oltaim.a Long laspela stadi bilong mi, mi bin askim Eddie Besson wanem samting mi inap long mekim, long wanem, mi laikim tru Jehova. Em i strongim mi long mekim stadi bilong mi yet na beten olgeta taim. Em i tokim mi olsem Jehova bai lukautim mi. Mi gat olsem 14 krismas tasol.

Mekim “Ol Miting” Bilong Mi Yet

Kirap long dispela taim, long olgeta Sande mi save go long rum bilong mi na mekim olsem mi stap long miting. Mi mekim singsing “Lukluk Long Prais!” long kirap na long pinis, long wanem, em dispela singsing tasol mi inap tingim. I kam inap long nau mi save krai taim mi mekim dispela singsing. Mi save stadi tu long wanpela stadi bilong Wastaua long ol volium mi gat. Mi pinisim “miting” bilong mi wantaim beten. Olsem na maski mi no bung wantaim ol Witnes, mi pilim olsem Jehova i stap klostu long mi.

Taim mi gat 17 krismas, mi na Mama i go sindaun long Montreal. Insait long ol dispela yia em i hatwok, long wanem, haus i olsem wanpela ples nating tasol na i no gat pasin laikim i stap.

Jehova i Painim Mi Pinis!

Wanpela de Mama i kisim buk Yu Inap i Stap Oltaim Long Paradais Long Graun long ol Witnes Bilong Jehova. Taim mi kam bek long haus, mi lukim em i stap long tebol na mi kirap ritim. Taim mi lukim olsem em i yusim nem bilong God, em Jehova, mi kirap long krai na long tingting mi beten olsem, “Jehova, yu painim mi pinis!”

Mi mas painim ol brata na sista Kristen bilong mi. Tasol bai mi painim ol olsem wanem? Mama i tokim mi olsem ating neiba bilong mipela i wanpela Witnes Bilong Jehova. Olsem na taim mi laik go long wok, mi wokabaut i go long haus bilong neiba bilong mipela na ringim belo long dua. Wanpela man—i hap slip yet i kam na opim dua. Man! Em i kirap nogut tru taim mi tok mi wanpela Witnes Bilong Jehova na mi laik kisim baptais! Em i stretim rot long wanpela sista Kristen, nem bilong em Josée Miron, long stadi wantaim mi long Baibel. Tasol Mama i kirap gen long mekim pasin birua long mi taim mi kirap stadi. Em i tokim mi olsem mi mas wet inap mi gat 18 krismas pastaim na mi ken kamap wanpela Witnes.

Bai Mi Lusim Jehova Bilong Mi Ken i Gat Famili?

Bos bilong mi i luksave olsem laip bilong mi long haus em i wok long i go nogut moa. Em i save singautim mi sampela wiken long raun wantaim em na meri bilong em. Mi save laik long raun long ol hos olsem na planti taim mipela i save raun wantaim long ol hos. Mi bin pilim ol i olsem papamama bilong mi.

Wanpela de bos bilong mi i tokim mi olsem em wantaim meri bilong em i laikim mi tru na ol i laik mi go stap wantaim ol. Em i tok long givim mi samting mi gat laik tru long en​—wanpela gutpela famili. Tasol i gat wanpela samting mi mas mekim pastaim—mi mas lusim pasin bilong bung wantaim ol Witnes bilong Jehova. Ol i givim mi wanpela wik long tingting long en, tasol mi no gat wok long tingting long dispela samting inap wanpela wik, nogat. Wantu mi tokim ol long tingting bilong mi. Jehova i no bin lusim mi na mi no inap lusim em.

Mi Mekim Wok Bilong God

Ol hevi mi save karim taim mi stap wantaim mama i mekim na mi go stap wantaim waspapa bilong mi. Em i strongim mi long mekim yet stadi bilong mi, na long Disemba 17, 1983, taim mi gat 19 krismas, mi kisim baptais. Mi bin amamas tru long lukim Eddie Besson long de mi kisim baptais. Nau em i save mi wanpela Witnes Bilong Jehova!

Tasol, pasin bilong waspapa bilong mi i senis olgeta bihain long mi kisim baptais. Taim em i lukim mi i beten, em i save bikmaus na sampela taim tromoi ol samting long mi! Em i strong long mi mas kisim sampela skul moa na dispela bai pasim mi long winim mak mi bin putim bilong kamap wanpela painia, em wanpela wok bilong autim tok fultaim. Bihain em i askim mi long lusim haus. Em i givim mi wanpela sek inap olsem K300 samting na em i tokim mi olsem, taim mi go long beng bilong senisim sek bilong kisim mani bai mi save olsem Jehova i no lukautim mi.

Mi kamap wanpela painia long Septemba 1, 1986, na mi holim yet dispela sek na mi no rausim yet mani long beng i kam inap nau! Mi no gat ka na sampela taim i hatwok long mekim wok painia long ol liklik ples bilong bus. Tasol ol bratasista long kongrigesen bilong dispela ples i bin sapotim na helpim mi tru long mekim wok painia.

Bihain, mi bungim wanpela gutpela man Kristen, nem bilong em, Ruben Lenz. Long 1989 mitupela i marit. Long nau Ruben i mekim wok elda long Milton, Ontario, Kanada, we mipela i bin i stap long en kirap long 2002 na i kam. Marit bilong mitupela em i wanpela gutpela blesing tru Jehova i givim long mi. Mi bin mekim wok painia i go inap mitupela i gat namba wan pikinini, em Erika, long 1993. Insait long 3-pela yia bihain, mitupela i kamapim wanpela pikinini man, nem bilong em Mika. Bihain long planti yia mi bin stap wanpis, God Jehova i blesim tru mi na em i givim mi wanpela famili i laikim em tru olsem mi yet mi save laikim em.

Maski planti taim mi bin stap longwe long ol manmeri bilong Jehova taim mi wok long i go bikpela, mi no bin lusim laik bilong mi long God na mi holimpas tingting bilong i stap oltaim long Paradais. (Jon 3:​36) Mi amamas tru olsem Jehova i “painim” mi pinis!

[Futnot]

[Piksa long pes 31]

Raun long hos bilong bos bilong mi

[Piksa long pes 31]

Nelly Lenz wantaim man bilong em, Ruben, na ol pikinini, Erika na Mika