Mi Winim Mak Mi Putim Taim Mi Gat Sikspela Krismas
EM STORI BILONG SANDRA COWAN
Planti papamama i makim wok ol i laik bai pikinini bilong ol i mekim long bihain—sampela i laik bai pikinini bilong ol i lain long wokim musik o mekim wanpela kain danis, na taim pikinini bilong ol i liklik yet ol i kirap lain long dispela samting. Mama bilong mi tu i bin mekim olsem. Kirap long taim mi gat tupela wik tasol, mama i save kisim mi i go long olgeta miting Kristen na long raun autim tok.
TAIM mi gat 4-pela krismas, mama i pilim olsem mi wanpela inap autim tok. Mi tingim yet namba wan taim mi wanpela tasol mi go autim tok long wanpela haus. Mipela i bin i go long wanpela bikpela haus i stap long wanpela fam, na mama wantaim ol narapela i sindaun long ka na mi wanpela i lusim ka na wokabaut i go long haus. Wanpela naispela meri i harim tok bilong mi, na taim mi tokim em long kisim 10-pela buklet, em i givim wanpela hap sop long mi, olsem pe bilong dispela 10-pela buklet. Dispela hap sop i bikpela na mi mas holim long tupela han. Mi amamas tru!
Long dispela yia tasol, long yia 1943, Skul Gileat i kirap lainim ol painia long mekim wok misineri. Mama i kirapim mi long tingting long mekim wok misineri long bihain. Long dispela taim, Namba 2 Pait i kamap long hap bilong Yurop, na mama i save tokim mi long ol liklik pikinini Witnes long Yurop, em gavman i kisim ol long papamama bilong ol. Mama i laik bai mi kamap strong, na maski wanem traim i painim mi, bai mi stap gut long wok bilong Jehova.
Long 1946, mi kisim baptais long wanpela kibung intenesenel long Klivlan, Ohaio. Mi gat 6-pela krismas tasol, tasol mi tingting strong long truim dediket bilong mi long Jehova. Long dispela yia mi mekim wok painia long namba wan taim. Mi tingim wanpela moningtaim, mi autim tok na mi tilim 40 magasin long ol manmeri i sindaun long wanpela ples bung long San Diego, Kalifonia. Mi liklik, na mi save toktok gut wantaim olgeta man, na ating dispela i mekim na mi tilim planti magasin.
Planti taim mipela i bin autim tok long Bet-Sarim. Long 1942, presiden bilong Sosaiti Was Taua, em Brata Rutherford, em i dai. Tasol taim em i stap laip yet, em i save go long Bet-Sarim long taim bilong kol. Mipela save bung wantaim ol painia long dispela hap na kaikai wantaim ol. Mi amamas long ol dispela bung, na mi tingting olsem mi tu mi laik mekim wankain wok olsem ol dispela painia. Long dispela taim stret mi pasim tok long tingting bilong mi, olsem taim mi bikpela bai mi go long Skul Gileat na mekim wok misineri.
Long yia bihain, papamama i katim marit, tasol dispela samting i no bagarapim mipela long samting bilong spirit. Mama i mekim wok painia, na em i lainim gut mitupela brata bilong mi. Mipela i stap long wanpela liklik haus ka, na planti taim ol brata sista Kristen i save kam lukim mipela. Mama i save kisim mi i go sekanim ol misineri i bin winim Skul Gileat. Tupela misineri olsem, em Lloyd na Melba Barry, taim ol i wet long i go long Japan, ol i mekim wok olsem wasman bilong raun. Ol i toktok wantaim mi na wok long strongim mi, maski mi wanpela liklik pikinini meri tasol i gat laik long mekim wok misineri—mi pilim tru dispela gutpela pasin bilong tupela.
Taim mi gat 10-pela krismas, mama i maritim wanpela gutpela Witnes, em tu i mekim wok painia. Em i raitim pepa bilong gavman na mipela i kamap pikinini bilong em, tasol em i laikim tru mipela olsem mipela i pikinini tru bilong em. Em i laikim tru Jehova na em i givim bel tru long mekim wok bilong em, na dispela i kirapim mi long bihainim pasin bilong em.
Mama na papa i wok wantaim long soim rot long mitupela pikinini taim mipela wok long i go bikpela. Mipela famili i stap gut tru long ol samting bilong spirit, na taim mi tingim i stap bilong mipela long dispela taim bipo, mi save amamas. Mama na papa ol i gat liklik mani tasol, olsem na i hatwok long ol i mekim bikpela long mipela pikinini na mekim tu wok painia—ol i mas lusim sampela samting ol yet i laik mekim. Tasol mama na papa i tingim Jehova pastaim na wetim em i helpim ol, na ol wok bilong Kingdom i stap olsem ol nambawan wok ol i mas mekim.
Mi inap tingim gut kibung intenesenel i bin kamap long Nu Yok long 1950! Papa i kisim dinau long beng, na mipela kisim tripela man moa i go wantaim mipela long ka bilong helpim mipela long baim rot i go long kibung. Taim mipela raun long ka i go long dispela kibung, mama na papa na mi wantaim brata bilong mi i sindaun long nambawan sia bilong ka, na ol narapela i sindaun long namba tu sia bilong ka. Mipela sindaun olsem kirap long San Diego na i go olgeta long Nu Yok. Bos bilong papa i no laik bai papa i kisim malolo inap tupela wik bambai em i ken i go long kibung, olsem na papa i mas lusim dispela wok. Tasol papa i tok, Jehova bai helpim mipela long kisim ol samting em mipela i mas kisim, na Jehova i bin mekim olsem. Taim mipela i kam bek long ples, papa i salim ka bilong bekim dinau long beng, na bihain em i kisim wanpela wok mani i winim tru wok mani bilong pastaim. Taim mi bikpela na mitupela man bilong mi i painim hevi, mi tingim ol samting i bin painim famili bilong mi taim mi liklik yet, na dispela samting i bin helpim mi.
Taim mipela lusim Nu Yok na i laik i go bek long ples, mipela i go lukim Kingdom Fam, na mi lukim Skul Gileat long namba wan taim. Mi tingim wanpela samting mi bin mekim, olsem: Mi sanap long wanpela rum bilong dispela skul, na mi tokim mi yet olsem, ‘Mi no winim yet 11-pela krismas. Ating bai mi no inap i kam long dispela skul. Armagedon bai kamap pastaim.’ Tasol taim mi lukim dispela ples em Skul Gileat i save kamap long en, mi tingting strong moa yet long mi mas i go long dispela skul taim mi kamap bikpela.
Wok Long Inapim Laik Bilong Mi
Taim mi gat malolo long skul, kirap long taim mi stap long gret 1, mi mekim wok painia. Tupela wik bihain long taim mi winim hai-skul long Jun 1957, mi kirap mekim wok painia oltaim.
Taim mi go long kibung distrik long Los Enjeles long 1957, mi go long wanpela miting bilong ol man i laik i go long Skul Gileat, na wanpela gutpela samting i bin painim mi. Taim mi wokabaut i go insait long haus sel em miting bai kamap long en, mi bungim Bill. Em wanpela brata mi bin save long em taim mi gat 6-pela krismas na i kam inap nau. Inap wanpela yia pinis em i bin autim tok long hap bilong Luisiana, long wanpela hap i no gat planti Witnes. Taim mitupela i toktok wantaim, mitupela i kirap nogut, long wanem mitupela wantaim i gat bikpela laik long mekim wok misineri. Inap 6-pela mun bihain, mitupela i pasim tok long marit bambai mitupela inap wok wantaim na mekim wok misineri. Mitupela i raitim pas i go long Sosaiti na askim ol long tokim mipela long wanem hap ol i laik bai mipela i go long en, na wanpela mun paslain long taim mitupela i marit, Sosaiti i makim mipela long i go mekim wok long hap bilong Ramni, long Wes Vijinia.
Long 1958, taim mipela i go long kibung long Nu Yok, mipela i kisim ol samting bilong mipela i go long Ramni. Taim mipela i stap long dispela kibung, mipela i go long miting bilong ol man i laik i go long Skul Gileat. Planti handet ol i bung. Mipela lukim dispela bikpela lain i bung, na mipela pilim olsem Sosaiti i no inap singautim mipela i go long Skul Gileat. Maski mitupela i bin marit inap 11-pela wik tasol, mipela raitim pepa bilong i go long Skul Gileat. Long yia bihain, taim mipela i go long kibung distrik long Filadelfia, mipela raitim narapela pepa gen.
Taim mitupela Bill i stap long Ramni, mipela pilim tru olsem mipela i mas wetim Jehova i helpim mipela taim hevi i painim mipela. Inap olsem 2,000 manmeri i save stap long Ramni, na i hatwok long kisim wok mani. Mipela i stap long wanpela liklik haus ka (em i longpela inap 5 mita). Mipela i no gat paip wara, o samting bilong hatim dispela haus, na mipela i no gat bokis ais. Sampela taim em i kol nogut tru insait long dispela haus na wara i tanim i kamap ais, na taim mipela laik kisim wara, pastaim mipela i mas brukim ais i stap long baket. Ol brata i helpim mipela inap long hap skel bilong ol, na taim ol i painim abus long bus, ol i save givim sampela long mipela. Planti taim mipela ting bai mipela i no gat kaikai inap long dispela de, tasol taim mipela autim tok pinis na kam bek long haus, bai mipela lukim sampela apol o sis samting i stap long dua bilong haus.
Inap 9-pela mun mipela i stap olsem, na sampela taim mani bilong mipela i sot olgeta. Bihain mipela tingting long i go i stap long Baltimo, long Merilan, long wanem Bill inap kisim wok long dispela hap. Taim mipela tokim ol brata long dispela samting mipela i laik mekim, ol i krai na mipela tu i krai. Olsem na mipela i tingting long i stap long Ramni inap liklik hap taim moa.
Bihain liklik, wanpela Witnes i mekim wok manesa long wanpela bikpela stua long Westenpot, long Merilan, em olsem 60 kilomita longwe long hap mipela i stap long en, em i givim sampela wok haptaim long Bill. Na long dispela mun stret, wanpela Baibel-stadi bilong mipela i givim wanpela liklik haus long mipela i gat bet na sia samting na wanpela bikpela stov long en. Long dispela taim mi pilim tru tok bilong Malakai 3:10, na dispela tok bilong Baibel i kamapim wanpela tok mi laikim moa yet, winim ol narapela. Jehova i bin givim planti gutpela samting long mipela, winim tru ol samting mipela i bin tingting long kisim.
Mipela i Go Long Skul Gileat!
Long wanpela de long Novemba 1959 mipela kisim pas i singautim mipela i go long Skul Gileat—amamas bilong mipela long dispela taim i winim tru ol narapela amamas mipela i bin kisim. Ol i singautim mipela i go long namba 35 klas, em laspela klas i kamap long Kingdom Fam. Taim mi sanap long dispela rum mi bin sanap long en taim mi liklik yet, bel bilong mi i amamas tru.
Skul Gileat em i ples bilong kisim ol gutpela kaikai bilong spirit. Inap 5-pela mun, i olsem mi stap pinis long nupela pasin. Planti taim yumi save wet long kisim wanpela samting, tasol ol samting mi kisim long Skul Gileat, i winim tru ol samting mi bin tingting long kisim.
Ol i tok long salim mipela i go long India, tasol bihain gavman i tambuim mipela long i go long dispela hap. Mipela wet long Biktaun Nu Yok inap wanpela yia pinis, na nau Sosaiti Was Taua i salim mipela i go long Moroko, long hap bilong Not Afrika.
Mekim Wok Misineri Long Moroko
Mipela stap long Moroko inap 24 yia, na mipela kisim bikpela amamas. Taim mipela kamap long dispela hap na mipela lukim ol manmeri, mipela laikim ol tru. Mipela lainim tok ples Frans na tok ples Spen, olsem na mipela inap autim tok long ol manmeri bilong narapela hap em ol i kam i stap long Moroko, em planti bilong ol i laik kisim save long tok bilong Kingdom.
Wanpela meri mi save stadi wantaim em, em i save wok mani long mekim wanpela kain danis bilong Spen, na em i wok long wanpela ples danis long hap bilong Kasablanka. Taim em i save pinis long lo bilong Baibel, em i lusim dispela man em i bin sindaun wantaim em, em papa bilong dispela haus danis, na em i go bek long Spen. Taim em i kamap long Spen, em i autim tok long olgeta wanblut bilong em, na sampela ol i bilip long dispela tok em i autim long ol. Bihain em i kam bek i stap long Kasablanka, na em i stap gut long wok bilong God i go inap long taim em i dai long 1990.
Taim mipela kam pastaim long Moroko, mipela lukim lain bilong autim tok bilong Kingdom ol i go bikpela. Tasol bihain i hatwok long ol man bilong narapela hap i kisim wok na gavman i no orait long ol i stap long Moroko, olsem na planti Witnes ol i go long Yurop. Sampela man na meri mipela i bin stadi wantaim ol, ol i go i stap long Nu Silan, Kanada, Amerika, Balgeria, Rasia, Frans, na sampela i mekim wok painia.
Wantu, long Epril 1973, gavman i tambuim wok autim tok long Moroko. Mipela bel hevi stret! Long Fonde long nait mipela i bin amamas long bung long Haus Kingdom, na mipela toktok i go i go inap long brata i pasim lait. Long dispela taim mipela i no save bai mipela i no inap bung gen olsem. Taim gavman i putim tambu long wok bilong mipela, mipela ol liklik lain i save bung na mekim ol miting na kibung long ol haus. Long taim bilong kibung distrik, mipela ol Witnes i save go long Frans o Spen.
Lain bilong mipela i wok long i go liklik, na wan wan Witnes i stap yet long Moroko ol i kamap gutpela pren tru. Olsem na taim Sosaiti Was Taua i tok long pasim brens-ofis long Moroko na salim mipela i go long narapela hap, mipela olgeta i krai.
Mipela i Go Long Sentral Afrika
Sosaiti i salim mipela i go long Ripablik bilong Sentral Afrika. Em i narapela kain tru long Not Afrika! Moroko em i kain olsem hap bilong saut bilong Kalifonia, tasol nau mipela i stap long ples hat!
I gat ol nupela hevi mipela i mas winim. Olsem: Nau mi mas bosim pret bilong mi, em mi save pret long ol rat na snek na kain samting olsem. Tripela taim wanpela palai i bin pundaun antap long het bilong mi taim mi go insait long dua. Sampela taim mi mekim Baibel-stadi na wanpela rat i save kam sindaun wantaim mipela! Mi laik ranawe i go, tasol mi lain long bosim pret bilong mi, tasol mi save lukluk long rat na mi save putim lek antap na holim paus bilong mi inap long taim rat i go. Mi kisim save olsem, sapos yu strong, yu inap daunim olgeta kain pret.
Mipela i stap long dispela hap inap 6-pela mun, na nau mipela harim toksave long redio olsem gavman i tambuim wok bilong mipela. Ol i pasim ol Haus Kingdom bilong mipela, na ol i tokim ol misineri long lusim dispela hap. Mitupela wantaim narapela tupela marit tasol inap i stap, na mipela i stap long brens-ofis inap 3-pela yia moa. Bihain, long wanpela Sande long moningtaim, taim mipela mekim Stadi Wastaua, ol polis i holim gan ol i kam na kisim mipela i go long namba wan ofis bilong ol. Ol i larim ol meri pikinini i go, tasol ol i pasim 23 brata i stap, na ol i pasim tu man bilong mi, Bill. Em i stap inap 6-pela de pinis na ol i lusim em; ol i tok em i mas i go bek long haus na bungim ol kago bilong em. Tripela de bihain, long Me 1989, mipela i mas lusim dispela kantri. Planti brata bilong mipela i kam bilong tok gutbai long mipela long ples balus, na mipela olgeta i krai.
Bihain Mipela i Go Long Siera Leon
Nau mitupela Bill i stap long Siera Leon, long hap bilong Wes Afrika. Em wanpela gutpela kantri i gat ol naispela wesan. Ol manmeri bilong dispela hap ol i man bilong amamas, na i no hatwok long autim tok long ol. Taim mipela i go long haus bilong ol, ol i singautim mipela long sindaun long ples kol aninit long diwai mango o kokonas. Ol i save amamas long toktok long God, na ol i save kisim Baibel bilong ol yet na lukim ol tok mipela kolim.
Mitupela Bill i wok long Haus Betel long Fritaun. Mi mekim wok seketeri na mi lukautim ol sabskripsen na akaun bilong ol kongrigesen. Inap 16 yia mipela i bin autim tok long ol kantri em gavman i bin tambuim wok bilong mipela, olsem na mipela i amamas long mekim wok long wanpela kantri i no gat tambu long en, na wok i kamap gutpela.
Long Jun 1991, mi bin mekim wok misineri inap 30 yia pinis. Mama i bin makim wanpela gutpela wok bilong mi mekim! Sapos em i stap laip yet, bai mi tokim em olsem: “Tenkyu!” Tasol mi inap tok tenkyu yet long papa bilong mi!
[Piksa bilong Sandra Cowan long pes 26]
[Piksa bilong Sandra Cowan taim em i stap pikinini long pes 27]
[Piksa long pes 28]
Kibung long Nu Yok long 1958
[Piksa long pes 29]
35th class—July, 1960
[Piksa long pes 30]
Bill na Sandra Cowan, 1991