Yosemite Nesenel-Pak i Gat 100 Yia Bilong En

SAPOS yu lusim Merset long hap bilong Kalifonia long Amerika na yu raun long ka i go long hap bilong ol maunten, i gat wanpela rot i go insait long graun. Orait taim yu bihainim dispela rot na yu kam ausait gen, bai yu kirap nogut long gutpela ples tru nau yu lukim. Dispela gutpela hap em wanpela bikpela ples daun ol i kolim Yosemite, na long arere bilong en i gat ol traipela maunten i stap, na sap bilong en i go antap tru. Long han kais yu inap lukim wanpela maunten nem bilong en El Kapitan, em i go antap tru inap 1,100 mita; long han sut i gat wanpela bikpela wara i pundaun, nem bilong en Braidalvel, em i kalap i go daun inap 190 mita; sapos yu lukluk i go longwe long han sut, bai yu lukim wanpela traipela maunten i go antap inap 2,698 mita, na em i samting tru long lukim. Ating taim yu lukim dispela traipela samting, bai yu tingim wanpela tok bilong Baibel i tok, ‘God Jehova em i olsem wanpela bikpela strongpela ston i no save senis. Na wok bilong em i gutpela na stretpela tasol.’​—Lo 32:4.

Kirap long taim ol i bin opim dispela nesenel-pak bilong Yosemite long yia 1890 na i kam inap long nau, planti milion manmeri bilong olgeta hap ol i bin i kam lukim dispela gutpela ples. Bipo, olsem long yia 1864, gavman i bin makim dispela gutpela ples long kamap wanpela nesenel-pak bilong Kalifonia. Long taim bilong ol holide samting, planti manmeri i save kam lukim dispela gutpela nesenel-pak long Yosemite. Tasol sapos yu no laik i stap wantaim planti man na yu gat strongpela bun, orait yu ken i go antap long wanpela bikpela maunten, ol i kolim Siera Antap Tru, na bai yu inap lukim olgeta hap bilong dispela naispela ples daun bilong Yosemite Nesenel-Pak.