Pas i Go Long Papa na Mama

Yu ting gutpela papamama i bikpela samting? Pikinini man i bikpela pinis i raitim dispela pas hia i go long papamama:

“Gude Mama na Papa:

“Mi bin lusim yupela inap 16-pela yia pinis, olsem na ating nau yupela bai kirap nogut long kisim dispela kain pas long mi. Tasol mi bin tingim gut dispela samting na mi ting i gutpela sapos mi raitim dispela pas. Taim mi lusim haus bilong yupela planti yia i go pinis, mi no bin kisim tok orait long yupela na mi kisim sampela samting i go. Ating yupela i no save mi kisim ol dispela samting. Pastaim mi tu mi no bin save. Em ol samting olsem:

“Laikim stretpela pasin: Olaman, dispela samting i bin lukautim mi tru!

“Laikim ol man: Longpela o sotpela, patpela o nogat, na wanem kala skin, em liklik samting. Wanem samting i stap insait long bel bilong ol em bikpela samting.

“Stretpela pasin: Samting bilong mi em bilong mi, na mi inap givim long ol narapela tu. Samting bilong narapela em bilong em.

“Strong long winim ol hevi: Long taim bilong hevi, dispela samting i helpim mi long winim hevi.

“Pasin bilong no les kwik: Yupela i laikim mi na mekim gut long mi. Yupela i no les kwik long mi.

“Stretim ol rong: Yupela i no mekim hatpela pasin tumas o les. Tasol long dispela taim mi no bin save. Inap yupela i lusim tingting long samting mi bin mekim?

“Stap fri: Mi bin stap fri long ol hevi em planti pikinini i wok long kisim long han bilong ol papamama nogut. Yupela i mekim ol samting bilong helpim mi, na yupela i lukautim mi na bai mi inap abrusim ol samting em inap bagarapim mi. Mi no inap lusim tingting long dispela samting.

“Laikim ol gutpela samting: Ol maunten, ol wara, blupela skai. Ol dispela samting i save amamasim mi tru. Yupela i mekim bikpela wok long skulim mi, tasol yupela i no kros taim yupela i mekim olsem.

“Was gut: No ken bilipim olgeta tok yu harim. Tasol sapos yu bilipim, bihainim, maski wanem samting i kamap.

“Tok i tru bilong Baibel: Em bikpela samting tru. Em nambawan presen yupela i givim long mi. Mani o bot o haus o ol narapela samting i no inap winim tok i tru. Em bai givim nambawan bikpela samting long mi​—laip oltaim.

“Mani i no inap baim ol dispela samting. Mi mekim wok long ol dispela gutpela pasin planti taim. Na mi laik mekim wok yet long ol dispela samting. Mi bai givim ol dispela samting long ol pikinini bilong mi. Mi save ol dispela samting bai helpim gut ol. Na bai mi tokim ol, mi kisim ol dispela samting long Bubu papa na Bubu mama.

“Pikinini man bilong yutupela,”

(Em i no laik bai mipela i raitim nem bilong em.)