Mi Gat Strongpela Laik Long Mekim Wok Bilong God

Taim mi gat 5-pela krismas mi nambawan bikhet manki long ples pilai. Mi stap long Skul Pekins, em skul bilong ol aipas.

Nau bai mi stap 13-pela yia long dispela skul long Wotetaun long Masasusets long Amerika. Mi save olgeta narapela pikinini long dispela skul i aipas, tasol mi ting mi inap lukluk. Papamama i mekim wankain pasin long mi olsem ol i save mekim long 5-pela susa bilong mi. Maski ol i mekim wanem samting, mi mekim tu​—ol wok long haus, kain kain pilai, subim wara, go antap long ol diwai. Ol i no mekim pasin long mi olsem mi wanpela aipas, olsem na mi ting mi no aipas.

Mi amamas long stap laip na mi laik painim amamas na mi no pret long wanpela samting. Mi kisim ol narapela pikinini long pilai long siso na long wanpela bot bilong pilai. Mi meknaisim bot strong tru na ol pikinini i pret na singaut, tasol mi singsing strong na singaut na bai ol i ken amamas. Ating dispela samting mi mekim i no gutpela tumas, long wanem belo i krai na tisa i singautim mi na givim stik long mi. Na mi mas sindaun long wanpela sia bilong ol bikhet manki. Em i stap long hap olgeta tisa i save wokabaut long en. Taim ol i lukim mi ol i lap na tok, “Yu stap gen, a?”

Orait pastaim mi laik stori long olsem wanem mi kam long dispela skul bilong ol aipas. Mama i karim mi long 1941, na taim mi gat tupela krismas ol dokta i tokim papamama, mi gat wanpela buk nogut insait long ai bilong mi na ol i mas rausim ai. Taim ol i katim mi ol i luksave olsem buk nogut i go bikpela na kisim narapela ai pinis na nau i laik i go insait long kru. Olsem na ol i mas rausim tupela ai, nogut mi dai. Long dispela taim, em long 1943, ol man i ting bilong i stap aipas em i nogut tru, winim i dai. Wanpela dokta bilong ai i tok: “Sapos em i pikinini bilong mi bai mi larim em i dai.” Narapela dokta i no wanbel na em i tok: “Nogat, larim em i stap laip.” Gutpela tru, papamama i larim mi i stap laip. Tripela yia bihain mi nambawan bikhet manki long ples pilai.

Long skul olgeta pikinini i lain long lotu ol yet i laikim. Mama bilong mi i Katolik, olsem na mi kisim skul long sampela sister Katolik ol i stap long wanpela haus sister klostu. Ol i stori long ol “santu” i bin givim laip bilong ol long God, olsem na taim mi liklik yet mi gat strongpela laik long kamap wankain olsem ol. Mi laik givim laip bilong mi long God, tasol ol sister i tok mi no gat rot long mekim olsem. Ol i tok: “Yu pikinini nogut. God i no laikim yu!” Ol i tok olsem long wanem mi save pilai wantaim ol pikinini Talatala na Juda, tasol ol i bin tokim mipela long pilai wantaim ol Katolik tasol.

Mi askim ol sister long nem bilong Jehova na dispela tu i skrapim bel bilong ol. Long dispela taim mama bilong mi i stadi wantaim ol Witnes Bilong Jehova na taim mi go stap wantaim papamama wanpela taim long olgeta mun, mi harim nem bilong God em Jehova. Taim mi askim ol sister, bilong wanem ol i no skulim mipela long Jehova, ol i kros na mi mas sanap ausait long klasrum. Taim mi liklik, planti taim mi sanap ausait long klasrum o sindaun long sia bilong ol bikhet manki.

Mama bilong mi i wanpela Katolik na olsem wanem em i stadi wantaim ol Witnes Bilong Jehova? Taim ol i katim mi pinis, pris i kam lukim em na tokim em, ating em i bin mekim wanpela pasin nogut tru na God i kros long em na em i mekim mi i kamap aipas. Pris i no strongim em long dispela taim bilong bikpela hevi, nogat. Em i mekim mama i bel hevi moa. Na tu, em i sutim tok long God olsem em i as bilong sik bilong mi. Dispela pasin pris i mekim i opim rot long ol Witnes Bilong Jehova​—i no longtaim na ol i kam.

Ol i tokim em long gutpela tok bilong Kingdom na God em i man bilong pasin sori, em i no wanpela God bilong givim hevi long ol man. Olsem na mama i kirap stadi wantaim ol Witnes. Tasol planti yia i lus inap long em i dediket bilong mekim laik bilong Jehova. Ol bilip giaman bilong lotu Katolik i stap strong insait long bel bilong em. Tasol ol tok i tru bilong Baibel “i gat strong bilong God, na ol inap brukim ol strongpela banis,” olsem na long 1954, mama i baptais na i kamap wanpela Witnes Bilong Jehova.​—2 Korin 10:4.

Taim mi go i stap wantaim papamama long sampela Sarere Sande, papa i laik bai mipela i go long lotu Baptis, na sampela susa bilong mi i go long lotu Metodis, na mama i kisim mi i go long Haus Kingdom, na long skul ol i skulim mi strong long lotu Katolik. Fopela lotu i wok insait long wanpela famili! Olsem na nau mi paul tru, wanem rot i stret bilong lotu long God.

Taim mi gat 16 krismas dispela strongpela laik long mekim wok bilong God i kamap olsem paia long bel bilong mi, na i strong tru, winim olgeta taim bipo. Mi beten long Jehova, sapos mi maritim wanpela man em i mas insait long lotu i tru, maski em i wanem kain lotu. Orait, bihain wanpela naispela man i laik maritim mi. Em i bilong lotu Katolik na mi ting God i harim beten bilong mi na i salim em i kam. Olsem na mi ting lotu Katolik em i lotu tru. Mi pasim tok long tingting bilong mi, nau bai mi stap olsem wanpela gutpela Katolik na gutpela meri na mama.

Tasol marit bilong mi i no kamap gutpela. Bihain long 10-pela mun mipela kisim wanpela pikinini meri na 22 mun bihain wanpela pikinini man, tasol long dispela taim marit bilong mipela i wok long i go nogut. Mi ting sindaun bilong mi i nogut pinis.

Tasol mi popaia; ol samting i go nogut moa yet. Mipela i save go danis long olgeta Sarere long nait na bihain ol pren i kam long haus bilong mipela bilong dring kopi na kisim sampela liklik kaikai samting. Tasol long wanpela Sarere mipela i go long haus bilong wanpela pren. Taim mipela i stap, mi harim man bilong mi i stretim tok long senisim meri. Wanpela man mi no save long em i tok, em bai kisim husat, na mi harim man bilong mi i tok: “Yu ken kisim meri bilong mi.” Mi pilim nogut tru na mi pret na mi ranawe long dispela haus. Long biknait man bilong mi i kam bek long haus na em i paitim mi nogut tru. Em i tok, ‘Yu semim mi long ai bilong ol man, olsem na mi paitim yu.’

Dispela Sande olgeta mi beten strong long Jehova sapos i gat wanpela lotu i tru olsem wanpela stretpela rot bilong mekim wok bilong em, orait em i mas soim mi. Sapos nogat, mi laik i dai. Mi tingim tupela pikinini bilong mi na dispela tasol i pasim mi na mi no kilim i dai skin bilong mi yet. Husat bai lukautim ol sapos mi dai?

Long narapela moning mi stap ausait na katim gras na mi wokabaut lek nating—dispela i helpim mi long save gras i longpela long wanem hap na mi mas katim. Nau tupela Witnes Bilong Jehova i kam, wanpela man na wanpela meri. Mi no inap lusim tingting long pasin isi na tok isi bilong dispela man. Em i holim wanpela nius long rait bilong ol aipas em Sosaiti Was Taua i bin wokim. Em i givim long mi na i tok, ol i laik kam bek long narapela wik. Mi no laik bai ol i kam bek, tasol tupela i mekim gutpela pasin na mi no inap sakim ol. Taim mi go bek long haus mi tingting: “O God, mi no laik kamap wanpela Witnes Bilong Jehova! Sapos i narapela lotu em i orait!”

Ol i kam bek na long olgeta wik mipela i stadi long Baibel. Bihain, tupela meri em Judi na Peni i save kam. Ol i autim tok long olgeta taim (ol i kolim painia salim) na tupela i olsem wanpela gutpela blesing i kam long Jehova. Judi em i meri bilong toktok, na em i meri bilong stadi, em i save gut long painim ol skripsa. Peni i save stap isi, tasol em i meri bilong stretim mi sampela taim. Tupela i givim laip olgeta bilong ol long mekim wok bilong Jehova, na mi laik kamap wankain olsem tupela na mi no ting moa long kamap olsem ol dispela “santu,” em ol sister i bin stori long ol.

Taim ol i tokim mi long autim tok long haus bilong ol man olsem ol i save mekim, mi ting: ‘Ol i no ken ting mi bai mekim dispela wok! Mi aipas ya!’ Inap long nau mi no bin abrusim wanpela wok long wanem mi aipas, tasol long dispela taim mi ting, ‘Nogat. Mi no ken i go autim tok long ol haus.’ Olsem na mi tok: “Olsem wanem mi inap kaunim Baibel long ol man?” Peni i tok: “Yu inap long tingim na kolim ol skripsa, a?” Em i save mi inap mekim, long wanem, long olgeta wik ol i skulim mi long tupela skripsa na mi mas kolim. Mi no inap giamanim tupela!

Mi bin stadi inap tupela yia, na mi tingting strong long go long Memorial long 1968 bilong tingim dai bilong Krais. Taim mi laik tokim man bilong mi, mi beten. Mi save pinis em bai belhat, na i tru, em i bikmaus olsem: “Mobeta yu dai, nogut yu kamap wanpela Witnes Bilong Jehova.” Em i kisim naip na putim long nek bilong mi. “Tokim mi yu no ken i go, na bai mi no ken kilim yu i dai!” Long tingting mi beten long Jehova: ‘Maski mi mas i dai, helpim mi long stap strong.’ Mi kirap nogut, bel bilong mi i stap isi na mi tingting, ‘Sapos mi no inap mekim wok bilong Jehova laip bilong mi i samting nating.’ Mi pilim olsem longpela taim em i holim naip long nek bilong mi na bihain em i tromoi naip long plua na em i singaut: “Mi no inap kilim yu. Mi laik mekim, tasol mi no save bilong wanem mi no inap.”

Taim mi harim tok bilong Memorial mi pilim olsem mi stap klostu long Jehova na bel bilong mi i stap isi tru. Taim mi go bek long haus man bilong mi i bin lokim dua na ol samting bilong mi i stap ausait. Mi go slip wantaim papamama bilong mi. Bihain long dispela, planti taim em i save paitim mi na holim naip long nek bilong mi. Planti taim em i lokim dua na mi stap ausait taim mi kam bek long miting. Em i tok: “Sapos yu laik mekim wok bilong Jehova, em i ken lukautim yu.” Em i no baim moa ol samting bilong mipela. Mipela i no gat kaikai na ol i katim paua na ges na ol i rausim mipela long haus. Tasol Jehova i sambai long mi na ol pikinini.

Long Julai 1969 wanpela bikpela kibung bilong ol Witnes Bilong Jehova i bin kamap long Nu Yok. Wanpela aua paslain long mi mas i go long tren, man bilong mi i pasim rot bilong mi na mekim olsem em i bin mekim planti taim pinis, em i putim naip long nek bilong mi. Tasol mi save pinis long pasin bilong em na mi no surik liklik. Long dispela kibung long Julai 11, 1969, mi kamapim dediket bilong mi long Jehova. Mi wantaim 3,000 ol narapela i kisim baptais.

Tupela taim long yia, mi autim tok inap 75 aua, maski man bilong mi i tambuim mi long mekim dispela wok. Mi save, Krais Jisas i givim dispela wok long yumi na mi mas mekim. (Matyu 24:14; 28:​19, 20) Mi save mekim bikpela wok long haus. Mi save klinim haus na kukim kaikai bilong man bilong mi long taim stret. Long ol de i gat miting mi save wokim kaikai em i laikim tru. Taim mi kam bek long haus mi wokim liklik kaikai i swit long em. Maski em i pes drai, em i no inap bikmaus tumas long mi taim mi givim em ol kaikai em i laikim tru.

Long 1975 man bilong mi i kisim mipela i go sindaun long Kalifonia. Mi bin marit inap 17 yia, tasol long Novemba 1976 marit bilong mipela i pinis. Mi no laik katim marit. Mi no ting i gutpela samting. Long Malakai 2:​16, Jehova i tok, ‘mi no laikim tru pasin bilong katim marit.’ Em i taim bilong bikpela hevi. Na mi bel hevi moa long wanem, ol pikinini i stap wantaim papa bilong ol long Kalifonia. Mi bin i go bek long hap bilong Is, em hap mi bin stap pastaim long en.

Papamama bilong mi em ol i bin mekim gut long mi taim mi pikinini yet, ol i stap long dispela hap. (Nau papa i dai pinis, tasol mama i stap laip yet, em i winim 80 krismas na inap 40 yia em i wanpela strongpela Witnes.) Tasol mi wanpela i stap, na Jehova i helpim mi long planti samting olsem: haus, kaikai, klos, mani, wok, na planti gutpela pren ol i bin helpim mi na ol i wok yet long mekim olsem. Wanpela pren, em Judi Kol, maski nau em i stap longwe, em i ringim mi planti taim na em i kaunim sampela tok bilong Wastaua long mi na strongim mi. Em i gutpela pren tru bilong mi. Tasol nambawan gutpela pren tru bilong mi i winim olgeta narapela pren, em Jehova.

Long Oktoba 1, 1986 long 11 klok nait pikinini meri bilong mi Linda i ringim mi long San Diego, Kalifonia. Em i toksave, Stiven i stap long haus sik na ol i ting em bai dai. Stiven em i pikinini man bilong mi, em i gat 23 krismas. Em i ran long motabaik long wanpela rot i gat planti baut na em i bamim wanpela diwai na pundaun long wanpela maunten inap 46 mita. Wanpela haus tasol i stap klostu. Em 2 klok long nait, tasol man bilong dispela haus i no slip​—em i stadi i stap. Em i harim pairap na i kam ausait na em i lukim ol samting i bin kamap na wantu em i kisim ol dokta i kam.

Stiven i hap dai na tupela lek bilong em i bruk na skru bilong em i bruk olgeta na kru bilong het i wok long solap. Taim mi kamap, ol dokta i tokim mi, ol i ting em bai i no inap i stap laip. Em i hap dai inap wanpela wik. Taim em i opim ai mi stap. Em i tok: “Hai Mama.” Dispela tok i mekim mi amamas tru! Em inap stap laip! Wanpela yia bihain, long Julai 1988 mi kisim bikpela amamas moa taim Stiven i kisim baptais olsem wanpela Witnes Bilong Jehova.

Narapela samting i mekim mi amamas tru: Nau Sosaiti Was Taua i wokim planti buk long rait bilong ol aipas! Dispela em i wanpela gutpela presen. Taim mi kisim tok i tru, klostu i no gat wanpela buk samting long dispela rait. Tasol nau mipela i gat buk Bikpela Tisa, buk Baibel Stori, na buk Askim Bilong Ol Yangpela, na buk Nambawan Man Tru.

Bilong pinisim stori bilong mi, mi laik tok olsem ol traim i painim mi i bin helpim mi long pas gut wantaim Jehova. Ol dispela samting i bin strongim bilip bilong mi. Mi no ting mi sot long wanpela samting, maski mi no inap lukluk. Em samting mi no bin save long en. Tru mi inap lukluk taim mi gat tupela krismas tasol mi no inap long tingim dispela taim. Wanpela tok bilong Baibel mi laikim tru em Song 145:​16, em i tok: “Em [Jehova] i save givim kaikai samting long olgeta inap long ol i stap gut!” Ol samting God i no givim nau bai em i givim long Paradais. Long dispela ples em bai mekim olgeta samting i kamap nupela. (KTH 21:​3-5) Na bai mi inap lukluk gen.

Nau amamas i pulap long bel bilong mi, long wanem mi gat rot long inapim strongpela laik bilong mi long mekim wok bilong Jehova long olgeta taim bihain!​—Collette Nunes i kamapim dispela stori.

[Rait long pes 19]

“Sapos em i pikinini bilong mi, bai mi larim em i dai”

[Rait long pes 19]

“Yu pikinini nogut, God i no laikim yu!”

[Rait long pes 20]

Pris i sutim tok olsem God i as bilong sik bilong mi

[Rait long pes 20]

Mi harim man bilong mi i stretim tok long senisim meri

[Rait long pes 21]

Em i kisim naip na putim long nek bilong mi. “Tokim mi yu no ken go, na bai mi no ken kilim yu i dai!”

[Piksa long pes 17]

Kolet na was dok bilong em

[Ol Piksa long pes 18]

Em Kolet taim em i gat 17 krismas na taim em i gat 2-pela krismas (long dispela taim em inap lukluk yet)