Mi Tenkyu Long Jehova i Bin Helpim Mi
EM STORI BILONG SHARON GASKINS
PARADAIS long graun! Long tingting mi lukim olsem mi raun long gutpela ples i gat gras na mi raunim ol bataflai, na mi pilai wantaim ol pikinini laion. Man! Em i gutpela samting tru bilong tingim! Tasol mi gat tupela tingting—mi inap bilip tru long en o nogat? Long wanem, planti taim mi bilip na wetim wanpela gutpela samting i kamap, tasol nogat.
Taim mi liklik yet i kam inap nau, mi mas sindaun long wilsia. Taim mama i karim mi, mi gat wanpela kain sik long kru bilong het (cerebral palsy). Ol narapela pikinini i save pilai na raun long wilwil samting, tasol mi nogat. Mama i bin kisim mi i go long ol man i save putim han long man bilong mekim em i kamap orait gen. Mipela i go long planti man olsem, na oltaim mipela ting bai wanpela mirakel i kamap na bai mi orait, tasol taim mi lusim ol mama i mas subim mi yet long wilsia na i go bek long haus; ol i no oraitim mi. Mi bel hevi long dispela, tasol bel hevi bilong mama i moa yet!
Mitupela i laik tru long painim wanpela samting mipela inap bilip tru long en. Olsem na long yia 1964 mama i kirap stadi long Baibel wantaim ol Witnes Bilong Jehova. Long dispela taim mi gat olsem 6-pela krismas.
Mipela amamas tru long kisim save olsem bipo i gat wanpela gutpela ples paradais long graun. Tasol sori tru, namba wan man Adam i bikhet na em i mas lusim paradais. Tasol mi gat laik long pas gut wantaim God olsem Adam i bin mekim pastaim. Mi save tingting: Em gutpela tru sapos mi inap pas gut wantaim Jehova olsem, o sapos mi bin i stap long taim Pikinini bilong em i bin wokabaut long graun. Na mi tingim dispela Paradais bai kamap bihain. Maski mi pikinini yet, mi save mipela i painim pinis tok i tru.
Mama i kirap kisim mipela ol pikinini i go long Haus Kingdom bilong ol Witnes Bilong Jehova. Ol miting bilong ol i narapela kain tru long ol miting mipela i bin lukim long ol narapela lotu! Mi pilim tru gutpela pasin bilong ol manmeri.
Mama i hatwok tru long kisim mipela 4-pela pikinini i go long Haus Kingdom, na no gat ka tu. Sapos mama i gat mani, mipela i save kisim teksi. Wanpela Sande i no gat teksi na mama i hatwok tru. Tasol wantu wanpela trak i kam na draiva i pasim trak na kisim mipela. Tru, mipela i kamap bihaintaim, tasol mipela i kam pinis long miting na mipela i tenkyu tru long Jehova!
I no longtaim na ol gutpela brata sista wanbilip i gat ka ol i kirap kisim mipela i go long miting. Em bikpela pasin sori ol i mekim long mipela. Mama i save tokim mipela, no ken lusim miting, olsem na maski mi yangpela yet, mi save em i bikpela samting long yumi mas “bung wantaim” long miting. (Hibru 10:24, 25) Mama i pilim tru ol tok em i lainim, na em i dediket long Jehova, na long 1965 em i kisim baptais.
Long dispela taim mi bikpela liklik na mi amamas long i go long miting. Long kongrigesen bilong mipela (Cypress Hills) long Bruklin, Nu Yok, i gat ol waitskin na blakskin na hapkas na ol narapela, ol i bung wantaim na lotuim Jehova. Mi ting i stret tru long lain bilong God i stap olsem—olsem ol brata brata tru.—Song 133:1.
Mama i lainim mi long pasin bilong redim ol tok bilong miting. Mi no hatwok long tingim ol tok, tasol sik bilong mi i mekim na mi hatwok tru long katim ol bekim long buk samting. Mi laik wokim stretpela lain, tasol em i krungut nabaut na i bagarapim ol rait bilong buk. Tasol mi mekim mekim na bihain em i kamap gutpela liklik.
Planti tok i pulap long tingting bilong mi na mi laik tru long kamapim long maus. Tasol maus i hevi na i no inap kamapim gut ol tok. Mi mas tingting strong long kolim klia olgeta wan wan tok. Mi save bel hevi taim maus bilong mi i paulim ol tok, o sapos ol man i no klia long tok bilong mi. Tasol taim ol brata sista long kongrigesen i save gut long mi, ol inap kisim gut ol tok bilong mi. Long nau tu mi hatwok yet. Sampela taim mi save toktok gut liklik, tasol sampela taim nogat.
Sikspela Mun Bilong Hevi
Taim mi gat 8-pela krismas, wanpela hevi i painim mi inap 6-pela mun. Ol dokta i bin mekim planti samting bilong helpim mi long toktok na mekim wok long han lek, tasol nau ol i salim mi i go long wanpela haus sik long Wes Havestro long Nu Yok. Bel bilong mitupela mama i bagarap stret. Taim mi liklik yet, ol dokta i tokim mama, kru bilong mi i no wok gut, na bai mi olsem longlong. Tasol mama i no laik putim mi long haus sik bilong ol man i gat sik longlong. Olsem na nau mama i bel hevi stret long mi mas i go i stap long haus sik. Tasol em i laik bai mi ken lain gut long lukautim skin bilong mi, nogut oltaim mi mas wetim mama o papa i helpim mi.
Haus sik i gutpela, tasol mi pilim olsem mi stap wanpis. Planti taim mi save krai na dispela i kamapim bel bilong mi, mi nolaik tru long i stap long dispela ples. Papamama i no inap i kam lukim mi planti taim; ol i stap longwe, na bilong i kam long bas, em inap olsem 3-pela aua. Na tu, mama i gat bel gen, em namba 5 pikinini. Taim ol i kam lukim mi na ol i mas i go bek long haus, bel bilong mi i bagarap stret, olsem na dokta i tok, ol i mas i kam wan wan taim tasol long lukim mi. Inap tupela taim tasol ol dokta i larim mi i go lukim papamama long haus.
I stap bilong mi long haus sik i helpim mi. Ol i pasim ain long lek bilong mi na lainim mi long wokabaut wantaim stik i gat hevipela ain long en. Hevi bilong en i helpim mi long sanap gut na mi no ken pundaun. Dispela i bilong lainim mi na bihain bai ol inap rausim ain long lek bilong mi.
Bipo mi save hatwok tru long mekim ol wok long pinga, olsem holim naip na katim kaikai, o pasim baten long klos, o kain wok olsem. Tasol nau mi lain long katim kaikai na putim long maus, na pasim klos. Dispela i helpim mi long lukautim skin bilong mi, na bihain em i helpim mi long mekim wok bilong God.
Mi lain pinis na nau mi lusim haus sik na go bek long haus. Mama i kirapim mi long mekim ol wok mi lain pinis long en. Mi bel hevi, long wanem, mi hatwok tru; mi lusim bikpela taim na mi sotwin stret. Taim mi putim klos bilong i go long miting, mi mas wok inap tupela aua long mekim!
Bihain mipela kisim wanpela haus klostu long Haus Kingdom, long hapsait bilong rot, na mi yet mi wokabaut i go long miting. Dispela em i bikpela samting tru long mi!
Bikpela De Bilong Amamas
Oltaim mama i save stadi wantaim mipela, nogut mipela sot long ol kaikai bilong spirit. Em i laik bai mi mas kaunim olgeta Wastaua na Kirap! Na mi mas stadi na redim olgeta tok bilong miting, na go long ol miting. Tingting na bel bilong mi i kisim gut ol dispela save, tasol mi no tingting strong long dediket long Jehova na kisim baptais. Olsem na mama i helpim mi long stretim tingting bilong mi, olsem maski skin bilong mi i no gutpela, God bai skelim mi long ol samting mi yet mi mekim. Mi no inap hangamap long mama—mi yet mi mas mekim wok na bai mi inap abrusim bagarap na go insait long nupela taim God bai kamapim.
Mi givim bel long God, tasol sik bilong mi i mekim na mi no stap gutpela—mi stap olsem narapela kain long ol narapela yangpela. Mi hatwok long karim dispela hevi. Sampela taim mi tingim dispela na bel bilong mi i hat. Mi save, mi mas bosim skin na daunim dispela belhat pastaim na bai mi ken kisim baptais. (Galesia 5:19, 20) Na olsem wanem sapos mi dediket long Jehova na mi no inap truim dispela tok promis?
Mama i tokim wanpela elda bilong kongrigesen long toktok wantaim mi. Em i kamapim wanpela askim em profet Elaija i givim long ol Israel: “Yupela manmeri bilong tupela tingting, wanem taim bai yupela i gat wanpela tingting tasol?” (1 King 18:21) Nau mi save, Jehova i no amamas long tupela tingting bilong mi.
Nau tingting bilong mi i kirap na mi beten strong long Jehova i mas helpim mi na bai mi strong na givim skin bilong mi long em olsem dediket long em. Wanpela sista i stadi wantaim mi. Em i yangpela long mi na taim em i liklik yet mama bilong em i dai. Tasol taim em i yangpela yet em i dediket long God.
Orait, taim mi gat 17 krismas mi tingting pinis long mi laik mekim wok bilong Jehova long strong bilong mi olgeta. Olsem na long Ogas 9, 1974 mi kisim baptais. Man! Em i de bilong amamas tru, winim olgeta narapela de bilong mi!
Amamas Long Autim Tok
Bikpela hatwok bilong mi, em bilong autim tok, long wanem, maus bilong mi i hevi na ol man i no inap kisim gut tok bilong mi. Taim mi autim tok long ol man, mi wok strong long kolim klia ol tok, na sapos mi no inap, orait poroman bilong mi bai kolim gen. Sampela man i no amamas long dispela—ol i ting ol Witnes i subim mi long mekim wok bilong ol. Tasol em i samting bilong mi yet na mi gat bikpela laik tru long mekim dispela wok bilong autim tok.
Taim mi wokabaut i go long ol haus na autim tok, strong bilong mi i save pinis hariap. Na planti haus ol i gat lata, na mi no inap i go antap. Na long taim bilong kol, ais i karamapim rot na rot i wel na mi no inap wokabaut long en na autim tok. (Aposel 20:20) Tasol ol brata wanbilip i bin helpim mi moa yet, na nau Jehova i mekim gut long mi na mi gat wanpela wilsia i gat ensin long en, na mi no hatwok tumas long raun na autim tok.
Bilong helpim mi long autim tok, mi kirap raitim pas long ol man. Tasol ol bai hatwok tru long kaunim rait bilong mi, olsem na mi kisim wanpela taipraita i wok long paua. Tasol han bilong mi i hevi na i no wok gut; mi laik paitim wanpela leta, tasol pinga i popaia na paitim narapela, olsem na mi isi tru long raitim pas. Bilong raitim wanpela pes olgeta, mi mas wok inap wanpela aua samting.
Maski skin bilong mi i no gat strong, sampela taim mi save mekim wok painia haptaim, na mi autim tok inap 60 aua long mun. Olsem na mi mas makim gut taim bilong mekim ol samting, na mi mas wok strong, na ol wanbilip i mas helpim mi. Ol i givim bel long wok painia, na dispela i strongim bel bilong mi. Pasin bilong mama tu i strongim mi—em i gat sik na skin i no strong, na em i gat 7-pela pikinini, na papa i bilong narapela lotu, tasol mama i bin wok olsem painia oltaim na sampela taim em i mekim wok painia haptaim.
Mi Stap Wanpis
Taim mi gat 24 krismas, mi tingting long lusim papamama na lukautim mi yet. Papamama i bin lainim mi long mekim olsem, nogut bihain ol i dai na i no gat man bilong lukautim mi. Mi go sindaun long wanpela hap bilong Bruklin, em Bensonhes. Kongrigesen Malboro i olsem wanpela famili i pas gut wantaim. Mi stap wantaim ol na dispela i strongim tru bilip bilong mi. I gat tupela o 3-pela ka tasol long kongrigesen, tasol oltaim ol i kisim mi i go long ol miting. Tasol mi no stap longtaim long dispela hap.
Mi pilim olsem mi pundaun tru long wok bilong lukautim mi yet. Mi go bek long papamama na bikpela bel hevi i kisim mi na mi stap olsem inap 3-pela yia. Planti taim mi save kros na belhat. Mi tingting long bagarapim skin bilong mi, na sampela taim mi mekim traim. Oltaim mi tingting long dai bai painim mi na mi pret. Tasol bihain mi putim hevi bilong mi long God na mi tok promis long lukautim dispela laip em i bin givim long mi olsem presen. Ol elda i givim gutpela tok long mi bilong strongim bel bilong mi, na mi beten, na stadi, na famili bilong mi i isi na i no les long mi, na ol dokta i helpim mi, na dispela i stretim tingting bilong mi.
Long rot bilong Wastaua Jehova i givim gutpela tingting long mi long pasin bilong daunim bikpela bel hevi. Tru tumas, em i save tingim lain bilong em na em i save long bel bilong yumi. (1 Pita 5:6, 7) Bihain bel hevi bilong mi i wok long pinis. Nau em tenpela yia bihain, na Jehova i wok yet long helpim mi long daunim bel hevi. Sampela taim mi ting mi nogut tasol na mi no inap mekim wanpela gutpela wok, na bel bilong mi i save bagarap stret. Tasol mi wok long beten na stadi long Baibel na mi gat gutpela famili bilong spirit, na ol dispela samting i strongim mi.
Mi wok long painim narapela haus, tasol mi no inap. Mi ting mi mas sindaun oltaim wantaim famili bilong mi. Tasol Jehova i harim beten bilong mi. Mi kisim haus long narapela hap bilong Bruklin. Long 1984 mi go sindaun long dispela haus, na mi stap yet long en.
Ol brata sista long Kongrigesen Lafayet i mekim pasin sori na kisim mi i go long ol miting. Mi tingim yet namba wan Buk-stadi mi bin i go long en long dispela kongrigesen. Em i kamap long namba 4 flua bilong wanpela haus, na i no gat eleveta bilong bringim mi i go antap. Tasol Jehova i helpim mi na mi inap i go antap long lata na kam daun gen. Bihain ol i painim narapela hap bilong mekim Buk-stadi na bai mi no ken hatwok. Na Jehova i mekim gut long mi na nau i gat Buk-stadi long haus bilong mi.
Ol brata sista long kongrigesen i strong tru long mekim wok painia. Taim mi kam nupela, i gat olsem 30 painia, na sampela ol i helpim na lukautim mi gut taim mi autim tok. Ol i givim bel tru long mekim wok painia, na dispela i kirapim mi long mekim wok painia haptaim planti taim.
Long Epril 1990, Kongrigesen Lafayet na Prat i wokim nupela Haus Kingdom long rot em haus bilong mi i stap long en. Em gutpela tru, long wanem, skin bilong mi i go nogut, na mi hatwok long wokabaut. Tasol mi gat wanpela samting olsem liklik motabaik, na ol brata sista bilong spirit i save helpim mi, olsem na mi save kisim amamas long i go i kam wantaim ol long ol miting. Mi pilim tru pasin sori ol brata sista i save mekim bilong helpim mi.
Mi Tenkyu Long God i Bin Helpim Mi
Lek bilong mi i guria, tasol bel bilong mi i stap strong. Mi bin skul gut, na dispela i bin helpim mi liklik. Tasol oltaim God i bin lukautim mi na strongim mi. Sampela taim mi sot olgeta na mi no save bai mi kisim we kaikai, tasol oltaim Jehova i save helpim mi na painim kaikai bilong mi. Mi save tingim tru tok bilong Devit, em i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai.”—Song 37:23-25.
Oltaim Jehova i save helpim na strongim mi. Taim dokta i katim mi, Jehova i strongim mi taim mi mas bihainim tok bilong Baibel na sakim blut. (Aposel 15:28, 29) Nau tasol papa bilong mi i dai. Mi bel hevi tru long dispela samting. Tasol Jehova i strongim mi na long strong bilong em mi winim dispela hevi na sampela hevi moa.
Sik bilong mi i wok long i go bikpela, tasol mi bilip strong long God na mi pas gut wantaim em, na dispela i save strongim bel bilong mi. Mi amamas tru long i stap namel long lain bilong Jehova na em i helpim na lukautim mi oltaim!