Laip Stori
Skulim Etpela Pikinini Long Jehova, i Gat Hatwok na Amamas
STORI BILONG JOYCELYN VALENTINE
Long 1989 man bilong mi i go wok long narapela kantri. Em i tok promis long salim mani bambai mi ken lukautim 8-pela pikinini bilong mi. Planti wik na mun i lus na mi no harim wanpela tok long em. Mi tokim mi yet, ‘Taim ol samting i kamap gut, em bai kam long ples.’
NOGAT mani bilong lukautim famili na mi tingting planti. Planti nait mi no save slip, na mi save askim mi yet, ‘Olsem wanem em i ken mekim dispela pasin long famili bilong em?’ Isi isi mi save olsem man bilong mi em i lusim tru mipela. Em i bin lusim mipela inap 16 yia i go pinis, inap long nau em i no kam bek yet. Olsem na mi wanpela i mekim bikpela long ol pikinini. Em hatwok tru, tasol taim mi lukim ol pikinini i bihainim tok bilong Jehova mi kisim bikpela amamas. Tasol pastaim long mi stori long olsem wanem mipela famili i karim dispela hevi, mi laik stori long olsem wanem papamama i mekim bikpela long mi.
Mi Wok Long Painim Tok i Tru
Mama i karim mi long 1938, long ailan Jameka long hap bilong Karibian. Maski Papa i no man bilong lotu, em i save tingim em yet olsem em i man bilong daun long God. Long nait planti taim em i save tokim mi long ritim ol tok bilong Buk Song long em. I no longtaim na mi inap kolim planti tok bilong ol song long tingting. Mama em i meri bilong lotu, na sampela taim em i save kisim mi i go long lotu.
Long taim bilong lotu, ol i tokim mipela olsem God i save kisim ol gutpela man i go long heven, na kukim ol man nogut long bikpaia inap oltaim oltaim. Ol i tokim mipela tu olsem Jisas em i God na em i laikim ol pikinini. Tingting bilong mi i paul na mi pret long God. Mi tingting, ‘Olsem wanem God husat i save laikim mipela em inap long givim pen long ol man long paia?’
Taim mi tingim dispela bikpela paia mi save pret nogut tru. I no longtaim na mi mekim wanpela kos bilong Baibel em Misin Sevende i kamapim. Ol i skulim mi olsem ol man nogut i no inap kisim pen oltaim oltaim long bikpaia, tasol paia bai kukim bodi na i kamap sit bilong paia. Mi ting, em nau, dispela tingting em i stret, na mi stat long go long lotu bilong ol. Tasol ol tok bilong ol i paulim mi, na samting mi lainim i no stretim tingting kranki bilong mi long pasin pamuk.
Long dispela taim planti man i save olsem pasin pamuk i gat rong. Tasol mi na planti narapela i ting olsem, man o meri i slip wantaim narapela narapela poroman, ol i mekim pasin pamuk. Tasol man i stap wantaim wanpela meri tasol na tupela i no marit tru na ol i mekim maritpasin, ol i no mekim sin. (1 Korin 6:9, 10; Hibru 13:4) Dispela tingting em i wanpela as na mi kamap mama bilong 6-pela pikinini na mi no marit tru.
Kamap Strong Long Samting Bilong Spirit
Long 1965, Vaslyn Goodison na Ethel Chambers i kam stap long Bath, em ples klostu long mipela. Ol i Witnes Bilong Jehova na ol i mekim wok painia, olsem autim tok bilong God fultaim, na wanpela taim ol i toktok wantaim Papa. Papa i orait long ol i stadi long Baibel wantaim em. Sapos mi stap long haus taim ol i kam, ol i save toktok wantaim mi tu. Maski mi gat tingting kranki long ol Witnes Bilong Jehova, mi stadi long Baibel wantaim ol bambai mi ken painimaut ol popaia bilong ol.
Long taim bilong stadi mi save givim planti askim long ol Witnes, na ol i bekim long rot bilong Baibel. Ol i soim mi long Baibel olsem ol daiman i no gat save na tingting na ol i no kisim pen long bikpaia. (Saveman 9:5, 10) Mi kisim save tu olsem i gat laip oltaim long Paradais long graun em yumi inap wetim i kamap. (Song 37:11, 29; KTH 21:3, 4) Maski Papa i no stadi moa long Baibel, mi kirap long go long ol miting bilong ol Witnes Bilong Jehova. Ol i mekim ol miting long pasin isi na ol samting i wok stret wantaim, olsem na mi inap kisim sampela save moa long Jehova. Mi go tu long ol kibung sekit na kibung distrik, em ol bikpela kibung ol Witnes i mekim. Mi wok long kisim save long Baibel na dispela i strongim laik bilong mi long lotuim Jehova long pasin em i laikim. Tasol mi gat wanpela hevi.
Long dispela taim mi sindaun nating wantaim papa bilong 3-pela bilong 6-pela pikinini bilong mi. Mi kisim save long Baibel olsem, God i tambuim maritpasin em man na meri i sindaun nating wantaim na mekim, na bel bilong mi i kirap long kotim mi. (Sindaun 5:15-20; Galesia 5:19) Mi laikim tru tok i tru, na mi laik stretim ol samting long laip bilong mi na bai i stret long lo bilong God. Bihain mi pasim tok long samting mi laik mekim. Mi tokim man mi sindaun nating wantaim olsem, mitupela i mas stretim marit bilong mipela na marit tru, sapos nogat orait mipela i no ken stap wantaim. Maski poroman bilong mi no wanbel long ol bilip bilong mi, mitupela i marit long lo bilong gavman long Ogas 15, 1970, em faipela yia bihain long ol Witnes i bin toktok wantaim mi long namba wan taim. Long Disemba 1970, mi kisim baptais long wara bilong makim olsem mi dediket long Jehova.
Bai mi no inap lusim tingting long dispela de em mi bin kirap autim tok long namba wan taim. Mi pret na mi no save olsem wanem bai mi kirapim tok bilong Baibel long man. Tasol bel bilong mi i stap isi taim man bilong namba wan haus i katim tok bilong mi wantu na mi no stori moa. Tasol i no longtaim na mi no save pret moa. Taim mi pinis long autim tok long apinun, mi save amamas, long wanem, mi inap stori wantaim sampela man long tok bilong Baibel na tilim sampela nius bilong Baibel long ol.
Strongim Famili Long Ol Samting Bilong Spirit
Long 1977 mipela i gat 8-pela pikinini. Mi strong long helpim famili bilong mi long lotuim Jehova. (Josua 24:15) Olsem na mi strong long stadi wantaim famili long Baibel long olgeta taim. Sampela taim skin i les na mi pasim ai na slip taim wanpela pikinini i ritim paragraf, na ol pikinini i mas kirapim mi. Tasol pasin bilong skin i les i no pasim mipela long stadi long Baibel wantaim olsem famili.
Na tu, mi save beten planti taim wantaim ol pikinini bilong mi. Taim ol i kamap bikpela, mi skulim ol long ol yet i ken beten long Jehova. Mi mekim ol samting bambai wan wan pikinini i mekim beten bilong em yet taim em i laik slip. Na mi save beten wantaim wan wan pikinini em ol i liklik na ol i no inap mekim beten bilong ol yet.
Pastaim man bilong mi i no laik bai mi kisim ol pikinini i go long ol miting bilong kongrigesen. Tasol taim em save em i mas lukautim ol pikinini taim mi stap long miting, dispela i mekim na em i no strong moa long pasim ol. Long nait, em i save laik raun na lukim ol poroman bilong em, tasol taim em i tingim olsem em i mas kisim 8-pela pikinini wantaim em, em i no laikim dispela! Bihain, em kirap helpim mi long redim ol pikinini bilong i go long Haus Kingdom.
I no longtaim na ol pikinini i lain long go long olgeta miting bilong kongrigesen na insait long wok autim tok. Taim ol i malolo long skul, planti taim ol i save autim tok wantaim ol painia, olsem ol lain bilong kongrigesen i save autim tok bilong God fultaim. Dispela i helpim ol pikinini long kisim pasin bilong laikim ol bratasista na wok autim tok.—Matyu 24:14.
Taim Bilong Traim
Bilong helpim sindaun bilong famili long mani, man bilong mi i go wok long narapela kantri. Em i lusim famili inap sampela taim, tasol em i save kam bek taim em i kisim malolo. Tasol long 1989, em i go olgeta na em i no kam bek. Olsem mi bin stori pinis, taim em i lusim mipela bel bilong mi i bagarap tru. Inap planti nait mi save krai na beten planti taim long Jehova i ken mekim gut bel bilong mi na strongim mi long karim hevi, na mi pilim olsem em i harim beten bilong mi. Ol skripsa olsem Aisaia 54:4 na 1 Korin 7:15, i mekim tingting bilong mi i stap isi na i strongim mi long mekim wok bilong mi. Na tu, ol wanblut na pren long kongrigesen i strongim bel bilong mi na helpim mi long ol samting bilong skin. Mi tenkyu long Jehova na long lain bilong em long ol i helpim mipela.
Mipela i gat ol narapela hevi tu. Wanpela taim wanpela pikinini meri bilong mi i sakim lo bilong Baibel na kongrigesen i bin rausim em. Mi laikim tru olgeta pikinini bilong mi, tasol pasin bilong mi long stap gut long Jehova i mas i stap namba wan. Olsem na long dispela taim, mi na ol narapela pikinini i mas strong long bihainim lo bilong Baibel long pasin mipela i mas mekim long man em kongrigesen i rausim em. (1 Korin 5:11, 13) Ol man husat i no kliagut long pasin mipela i mekim ol i sutim tok long mipela. Tasol taim kongrigesen i kisim bek pinis pikinini meri, man bilong em i tokim mi olsem pasin bilong mipela long strong long bihainim ol stiatok bilong Baibel i kirapim tru em. Nau em i lotuim Jehova wantaim famili bilong em.
Karim Hevi Bilong Mani
Taim man bilong mi i lusim mipela mi no gat wok, na mipela i no kisim moa mani long em bilong helpim mipela. Dispela i skulim mipela long amamas long samting mipela i gat pinis, na tingim ol samting bilong spirit i bikpela samting winim ol samting bilong skin. Ol pikinini i lain long laikim na helpim narapela narapela na ol i pas gut wantaim. Taim ol bikpela pikinini i kirap mekim wok mani, ol i amamas long helpim ol liklik bratasusa bilong ol. Bikpela pikinini meri, Marseree, i helpim liklik susa Nicole, long pinisim haiskul bilong em. Na tu, mi lukautim wanpela liklik stua bilong salim kaikai. Mani mi kisim em inap long lukautim mipela long ol samting em mipela i mas kisim.
Jehova i no bin lusim mipela. Wanpela taim mi tokim wanpela sista Kristen olsem mipela i sot long mani olsem na mipela i no inap go long kibung distrik. Em i tok: “Sista Val, taim yu harim olsem bai i gat kibung, kirap redim ol samting! Jehova bai lukautim yu.” Mi bin bihainim tok bilong em. Jehova i bin lukautim mipela, na em i mekim yet olsem. Famili bilong mipela i no bin lusim wanpela kibung, long wanem, mipela i sot long mani, nogat tru.
Long 1988, bikpela win na ren ol i kolim Gilbert, i bagarapim tru Jameka, na mipela i lusim haus bilong mipela na go stap long haus sel long hap i no kisim bagarap. Win i dai liklik na mi na pikinini man i lusim kem na go sekim haus bilong mipela i bin bagarap. Taim mipela i wok long lukluk aninit long ol pipia samting, mi lukim samting em mi laik tru long lukautim. Wantu bikpela pairap bilong strongpela win i kamap gen, tasol mi holim strong yet dispela samting em mi laik lukautim. “Mama, putim dispela televisen i go daun. Yu meri bilong Lot, a?” (Luk 17:31, 32) Dispela tok pikinini man i mekim i givim stretpela tingting long mi. Mi tromoi dispela televisen i go daun, na mitupela i ranawe bilong abrusim bagarap.
Mi pret taim mi tingim olsem klostu mi bin lusim laip bilong mi bilong lukautim televisen. Tasol taim mi tingim tok bilong pikinini man long dispela taim, long was i stap long ol samting bilong spirit, bel bilong mi i gutpela tru. Ol skul bilong Baibel em i bin kisim long kongrigesen Kristen i as na em inap helpim mi long abrusim bikpela bagarap bilong skin na ating bilong spirit tu.
Dispela bikpela win na ren i bagarapim haus na ol samting bilong mipela, na i bagarapim tu bel bilong mipela. I no longtaim ol brata Kristen bilong mipela i kamap. Ol i strongim mipela long karim hevi na bilip long Jehova na wok yet long autim tok, na ol i helpim mipela long wokim gen haus bilong mipela. Mipela i pilim tru pasin laikim na pasin bilong daunim laik bilong ol yet em ol Witnes long Jameka na ol narapela kantri i bin mekim.
Putim Jehova i Stap Namba Wan
Taim nambatu pikinini meri, Melaine, i pinisim skul bilong em, em i mekim wok painia. Bihain em i orait long go wok painia long narapela kongrigesen, olsem na em i mas lusim wok mani bilong em. Maski dispela wok em i rot bilong em i helpim famili long mani samting, mipela i bilip olsem Jehova bai lukautim mipela sapos wan wan i putim ol samting bilong Kingdom i stap namba wan. (Matyu 6:33) Bihain, pikinini man, Ewan, em tu i kisim pas i singautim em long mekim wok painia. Em i save wok mani bilong helpim famili, tasol mipela i strongim em long mekim wok painia na mipela i laik bai Jehova i mekim gut long em. No gat wanpela taim mi pasim ol pikinini long mekim bikpela wok moa bilong Kingdom, na mipela ol lain i stap yet long haus mipela i no sot long wanpela samting. Tasol amamas bilong mipela i go bikpela moa, na sampela taim mipela inap long helpim ol man i sot.
Long nau, bel bilong mi i amamas tru long lukim ol pikinini bilong mi “i bihainim tok tru.” (3 Jon 4) Wanpela pikinini meri, Melaine, nau em i save bihainim man bilong em taim man i raun lukim ol kongrigesen, olsem wasman sekit. Narapela pikinini meri Andrea na man bilong em i mekim wok painia salim, na em i save raun wantaim man bilong em sampela taim, taim man i mekim wok olsem helpim bilong wasman sekit. Pikinini man Ewan, na meri bilong em i mekim wok painia salim na em i wanpela elda bilong kongrigesen. Narapela pikinini meri, Ava-Gay, em i wok wantaim man bilong em long brens ofis bilong ol Witnes Bilong Jehova long Jameka. Jennifer, Genieve, na Nicole i mekim wok bilong Jehova wantaim ol man bilong ol long ol kongrigesen bilong ol. Marseree i stap wantaim mi, na mipela i save go long Kongrigesen Port Morant. Jehova i mekim gut tru long mi, long wanem, 8-pela pikinini bilong mi olgeta i mekim yet wok bilong em.
Mi wok long kamap lapun na mi kisim sik. Nau mi karim hevi bilong sik atraitis, tasol mi amamas yet long mekim wok painia. Sampela taim i go pinis, mi hatwok long wokabaut i go antap long ol liklik maunten klostu long hap mi stap long en. Mi hatwok long autim tok long olgeta taim. Mi traim long ronim baiskol na mi pilim em isi moa. Olsem na mi baim wanpela baiskol long sekenhen na mi kirap mekim wok long en. Pastaim bel bilong ol pikinini i no stap isi taim ol i lukim mama bilong ol i gat sik i ronim baiskol. Tasol ol i amamas long lukim mi autim tok yet, long wanem, mi laik mekim.
Mi save amamas tru long lukim ol man mi bin stadi wantaim ol i kisim tok i tru bilong Baibel. Oltaim mi save beten long Jehova bai em i helpim famili bilong mi long stap gut yet long em long dispela taim bilong pinis, na i go inap oltaim oltaim. Mi litimapim nem bilong Jehova na tenkyu long em, em Bikpela Man bilong “harim beten,” long wanem, em i bin helpim mi na mi inap mekim bikpela long 8-pela pikinini bilong mi long rot em i makim.—Song 65:2.
[Piksa long pes 10]
Mi wantaim ol pikinini, ol poroman marit bilong ol na ol tumbuna pikinini bilong mi
[Piksa long pes 12]
Long nau mi yusim baiskol long autim tok